31/12/20

 31/12/20     THU.    VERY COLD

今日係2020年的最後一日，都係要晨早流流返工，仲要好凍嗰隻，返去食咗個早餐就做嘢啦，話哂放咗兩日，又要清吓嘢！個心就已經飛咗去放工，冇嗟心機咁有嘢就做，午飯食咗個杯麵咋，出咗德福買嘢，返去後本來諗住hea住過，但都係冇得hea，不過反正都係做唔哂，急咩鬼，準時收工等老公嚟接我，先去長沙灣再買啲嘢，返去接埋啲細，送埋嫲嫲返去，就入Giv仔到，吹咗一晚水，講移民講是非，同場仲有Ben同休佢地，都吹得好開心！見到人地啲仔女仲咁細，我都甩咗不手身煮幾輕鬆，玩到1點先回家，車埋休佢地返青衣先，返去沖得涼都3點囉，好耐未試過咁夜！

2020年過去啦，所有唔好事都一齊過去，2021係順順利利的一年！

30/12/20

 30/12/20     WED.   COLD

今日又係WFH，瞓到8點幾就醒咗！hea吓9點幾起身，煮早餐食完就做家務啦，要換床單，做好嘢先睇劇，追到中間開始悶啲，2點幾煮午餐食，等老公回來接埋我出去買定明天入givens到打邊爐啲肉，買埋今晚啲餸，又食一品窩！返到去繼續睇劇，老公同子元落去跑步，晚餐後就睇電視囉！

29/12/20

 29/12/20     TUE     WARM

今日又係WFH的日子, 所以瞓到10點幾先起身呢! 整得早餐比佢地食, 又要洗碗清潔等等, 做好佢今晚唔洗做! 跟住就開始hea啦, 同埋都幫仲爺睇一睇功課, 做埋啲網上功課, 檢查哂做齊啦就收工, 都冇咩方向要溫咩書, 算啦! 冇咩嘢搞就不如睇吓劇, 諗起DO姐之前講過套韓劇叫甜蜜家園, 係恐怖片嚟, 果然都真係好唔錯! 老公放工回來, 接我地出去食嘢, 食埋麥記隻新ice-cream就回來, 各有各做自己嘢, 老公瞓咗覺, 我就繼續睇劇, 子元做咗啲功課又睇機, 仲爺當然都係睇機啦! 到8點左右唔可以再睇啦, 我唯有停手煮晚飯, 由於都唔餓, 就食埋琴晚食淨的豬手, 煮個麵烚啲菜就得啦! 然後都係睇電視同做運動休息!

28/12/20

 28/12/20     MON     WARM

今日又要返工啦, 返到去食早餐, 都係蒸吓燒賣食好! 跟住咪做吓嘢囉, 淨係要做報更都夠煩啦, 咁鬼多日, 不過其實都冇咩嘢趕啦, 所以都係做吓自己嘢好, 唔好咁浪費時間打機, 試吓search吓英國南的地方仲有邊啲可以做backup嘛, 做番個excel, mark番啲資料落google map都好! 午飯後上咗德福行囉, 買咗麵包呀裝衫袋呀等等! 下午都係做自己嘢啦, 擺到明架啦, 好過無所事事啦! 放工回家後續做, 反正有嫲嫲喺到煮飯等等, 我咩都唔洗做, 咁都幾好! 晚上做埋運動追埋劇就沖涼休息, 明後兩天又休息了!

27/12/20

 27/12/20     SUN.    WARM*

放埋今日假又要返工啦，不過今個星期都係返兩日啫，正式嚟講應該係返日半，其實都唔錯！講番今日先，瞓到10點幾先起身，嫲嫲叫我地去佢嗰邊食嘢，咁食完我哋就出咗尖沙咀行，難得泊到車位，仲爺去咗Tom Lee睇樂器，佢真係鍾意睇樂器多過睇玩具，不過真係冇錢又冇位，所以都係諗吓算！睇完就去咗donki 行，又洗錢啦，不過百幾蚊買吓食物咁都ok嘅！回程返去，老公同子元去跑步，仲爺就做埋啲功課，我唯有做書童，做好就可以出去，去嫲嫲到食晚飯，佢包咗雲吞呢，又食到好飽啦，明天仲可以帶飯添！

26/12/20

 26/12/20.    SAT.    WARM

咩都唔使做嘅星期六，瞓到10點幾起身叫埋老公出去食早餐，食完搵地方去吓啦，因為又要約咗人夜晚出去食飯，今晚我地又要食自己！近近地去咗荃灣行商場，去咗一田買嘢，行哂啲商場就返去，但都唔係好提得起勁做嘢，只係捉咗仲爺做咗一份功課！6點幾要去煮飯啦，今晚食意粉咋，有佢地鍾意嘅三文魚就夠啦！快手做好嘢沖埋涼就睇全民做星，結果都算可以接受啦，始終冇現場觀眾着啲氣氛！

25/12/20

 25/12/20     FRI.    COOL

今日係聖誕節，不過都冇咩特別節目，老公放工返嚟都係瞓覺先，我都去到10點先起身，整左啲先會俾佢兩個食，摺埋啲衫清潔下間屋先叫老公起身出去食嘢，都諗唔到去邊，請食嘢時間老公諗到去元朗Yoho mall影小丸子，呢個場真係好少嚟，完全唔識行，仲要認住佢唔好唔識行返去停車場，最終仲爺都影咗好多小丸子，五點幾我哋都回程放棄，初頭諗住買外賣，但係又諗唔到食咩，咁就不如去長沙灣買材料打邊爐算啦簡簡單單。返去先做運動，佢哋落咗去跑完步先上嚟我都整好嘢可以食得，食到九點幾老公又要返工啦咁我自己食牆角然後沖涼休息！

24/12/20

 24/12/20     THU.    COOL

今日感覺就好似返半日工咁，因為有得放早，仲要我返八點即係放三點，咁我食晏係1:30至2:30 ，真係返去洗個手就差不多收工啦！朝早都係如常咁返去食完早餐就開工，你有啲嘢做吓嘅，做唔到，又係時候食晏啦，邊食邊睇電視劇，食完梗係出去行吓啦，去咗德福行過圈又返返去，收工前竟然都有電郵要覆，搞到我蝕咗幾分鐘添！老公過嚟接我然之後一齊去咗MegaBox行，行完IKEA買埋晚餐的材料，總之就係過MegaBox行咗個圈都冇咩好睇啦咁就返屋企，等老公整平安夜大餐，因為樣樣野都要焗所以都用咗好長時間，先食晒個晚餐， 10點多佢就返工啦，我就同劇集的廣告時間先至慢慢洗碗，所以都10點幾先去沖涼休息真係好攰！

23/12/20

 23/12/20     WED     COOL

今日要開工啦, 反正都要做, 點都要開工架啦, 快啲做好佢! 返到去快食早餐就開工啦, 邊聽住電台邊做嘢其實都算幾開心, 最好其他人咩聲都聽唔到仲好, 唔想煩! 做到食完午飯就出去行街, 買埋明天早餐的麵包, 仲買埋子元佢地最需要的奶, 飲到好似飲水咁快囉! 下午都係忙忙咁做嘢, 比我預期中算快架啦! 放工老公過來接我, 因為佢地又出咗去買嘢呢! 接咗我就去長沙灣買晚餐, 簡單買4餸就算啦, 返去快手食, 因為已經好餓啦, 所以好早食完有好多時間慢慢做想做的事, 又唔洗睇功課溫書的日子原來係咁, 我覺得咁樣其實都幾好, 點解香港啲家長好似要讀多好多次書咁! 有時間我可以睇番套劇, 等今晚做嗰時可以同步追番!

22/12/20

 22/12/20     TUE.    COOL**

今朝瞓到9點幾先起身，收到陰性報告馬上send比阿姐交差，然後就出去食早餐！今日老公放假，食完早餐就出去諗住買聖誕禮物，點知兩個都選唔到，行完黃埔行埋海運都冇，咁就返美孚先，子元要補英文呢！我地去食個tea，老公車我返屋企，佢帶仲爺去再買過，我返去執吓屋洗吓衫，等佢地返來，就捉仲爺使功課，又做咗個幾鐘啦！6點幾出去買晚餐，簡單食KFC算！明天要返工了，大把嘢做，又做死我啦！

21/12/20

 21/12/20.    MON.    COOL

今日WFH啦，還要去檢測，真係好怕！瞓到8點幾先起身，要留意住仲爺有冇好好上堂，還要整吓早餐食，都係簡單食麥片烚蛋咋！摺埋啲衫打吓機咁就，11點幾過去檢啦，白白比人挖咗兩次，因為佢地誤會咗3日先攞嗰隻，結果又要再撩過！總之明天攞好報告比阿姐交差後日如常返工唔洗返到佢就得！回家前去咗百佳入貨，返到來馬上煮飯，仲爺又叫餓！食完要做功課啦，啲時間即刻過得好快，老公放工回來就瞓，到6點多叫醒佢出門口，去阿媽到做節，還要去接阿嫲呢！食完飯要去攞埋口罩等等，回家後做埋運動睇電視休息！

20/12/20

 20/12/20.    SUN.    COLD

今日冇出過門口呢，只係好hea咁過咋！瞓到十點幾先起身，又要煮早餐比佢地食，叫子元幫吓手咁煮都快啲食得！實在係冇mood同佢地溫書，反正上埋明天一日就放假，到時再溫啦！休息咗一陣就捉仲爺做work out，再叫子元一齊摺埋啲衫，摺住嚟睇電視，咁啱做緊電影，邊睇摺更慢，3點幾先煮午餐佢地食呢！4點幾老公接埋嫲嫲大包佢地過來，今晚喺到做冬打邊爐呢，本來都冇咩，點知老公話我地大廈有人確診，咁就煩啦局我要去比人插鼻，真係好唔想呀但又冇得選擇！出更表前通知埋阿姐明天去測囉！晚餐都係打邊爐咁啦，食得好飽呢！

19/12/20

 19/12/20     SAT.    COLD

今朝6點幾醒完又瞓過，到10點多先起身，煮得早餐少爺們食又做我最想睇嘅空間改造王，所以睇完都唔係好趕得切教功課，做得幾多得幾多，1點要出門口去學音樂，本來諗住預早啲，等佢過去食咗麥當勞先開始學喎，我之仲爺又話唔肚餓，咁咪等佢學完先食囉。學完返到去美孚先買，返屋企坐低慢慢食好啲，食完做埋功課，等子元同老公跑完步回來就去街街，去咗尖沙咀睇燈飾，但今年真係冇咩金色好睇，所以喺T1T2影咗一輪相就走啦，返咗深水埗買晚餐返去食。

18/12/20

 18/12/20     FRI.    COLD

終於到星期五，返埋今日又放假啦，不過今日都唔易過！朝早返去食個早餐吹吓水咁，其實我都係冇停手架，不過最難頂係要捱過個aprisal 囉，要忍要好假咁入去對住兩個憎嘅人，我覺得自己其實都好假呢！所以放飯得我一條友都要出去食佃孤獨飯，去買埋張yoga墊就回去，都算係有責任啦！下午冇咩講，因為只做一件事，就係分哂2000本inSino 囉，真係腰都赤埋，算係放工前做切，老公過來接我，佢去market place買咗食物先，接埋我再返南昌攞蛋糕，今日老公生日嘛！所以晚餐食壽司，送埋嫲嫲返屋企先回來切蛋糕呢！

17/12/20

 17/12/20     THU.    COLD

今日瞓到8點幾先起身，都要捉仲爺上堂，條友又係到打機唔開cam！可惡！跟住我就煮早餐食完再要摺衫等等，期間都要成日入房睇吓佢囉！上完堂我又要準備煮午餐，食完就捉佢做功課，因為我要去覆診，2點幾出門口，去到都係巡例咁睇完就攞藥，老公夾到時間來接我，再去接埋兩隻豬，出去食完嘢買埋晚餐就回家，等仲爺做埋功課就齊齊自由！8點幾叫老公起身煮晚餐，只係簡單食粉啫！清潔完咪睇電視囉，晚上的最豐富節目啦！

16/12/20

 16/12/20.    WED.    COLD

今日又要返工啦，甚實真係好唔想返工，唔係唔想做嘢，而係唔想受阿姐嘅壓力，佢真係好討厭！我諗買兇排行榜，佢都係頭位嗰批！朝早返到去冇人時食住早餐咁，其實係幾舒服的時間！跟住做嘢啦，都做咗一個上午冇停手，食完飯咪出去行吓街囉，老公話佢買餸，咁我放心去睇吓衫啦！下午返去又要做啲本來唔係我要做嘅嘢囉，有時真係唔明，我同Ivy啲嘢就一定係我地兩個做，佢地啲嘢就要我地幫手，最終講到Ivy要打電話回來吹番轉嗰條友啲仆街嘢囉！又擺我上枱咁啦，算，嬲侷我都嫌死我細包，放工返去好好陪仔好過！

15/12/20

 15/12/20     TUE     COLD

今日好凍但我都冇出過門口, WFH嘛, 咁梗係冇咩都唔出去啦, 反老公返早, 我就8點幾都要起身啦, 因為仲爺上堂真係令人好唔放心, 果然真係成日夠鐘又唔入去, 比佢激死, 跟住都要捉住佢上堂先得, 搞到我摺衫都摺咗好耐! 之後教佢做數教到都唔知時間, 真係好恐怖! 又要快手煮午餐比佢地食, 子元再去補習, 我又開始hea啦, 老公放工回來就去瞓, 我繼續打機, 6點幾先去煮晚餐, 跟住都係咁洗碗清潔沖涼睇電視啦, 明天又要返工啦, 今個星期要返2日呢!

14/12/20

 14/12/20     MON.    COLD+

今日要返工，又要晨早起身，返到去整吓早餐咁，食完又要開工，其實返工你話呢到令人好唔開心又唔係，但啲上層總覺得自己可以壓住你嘅感覺唔好囉，雖則我好化架啦，但都會唔鍾意囉！午飯後去咗德福行吓，都係買吓麵包，買定明晚啲餸咁啦！下午返去都有嘢做但已經冇嘢趕，話咁快又夠鐘放工，快啲返去啦凍咗好多！今晚食西餐呢，等食時趕埋仲爺做好啲功課，咁飯後又可以休息！

12/12/20

 12/12/20.    SAT.    COOL

老公今朝冇咁準時返，所以叫咗子元自己去補習，我地之後再去接佢！因為老公食埋早餐先返，所以得我同仲爺食早餐咋！接埋子元回家後，我就吽咗一個下午，子元有澤書有打機，老公就揍仲爺去學音樂！黃昏回來後陪佢地落街郁吓，子元要跑步交貨比剛sir呢！送番佢兩個上樓，等老公沖埋個涼就去買$20餸做晚餐！飯後都係睇電視啦，咁又一日！

11/12/20

 11/12/20.    FRI.    WARM

返咗兩日工，又可以放假啦！一早起身返工，返去食埋早餐就開工啦，真係好忙好忙，基本上都冇停過手喺個位做嘢，食飯時終於有機會睇返男排女將嗰日未睇嗰part，跟住上咗德福買生日禮物俾老公，為安全起見琴日問咗佢想要咩款銀包，今日就可以即刻去買，佢要兩個高達款，同一個男裝款都會係咁上下價錢，咁佢鍾意就得啦！下午返去更加係冇停手咁做，成日都一個人睇晒個部門咁，真係好攰！五點放工老公來接我，因為佢個灣仔入境處攞埋子元本身嘅Passport，真係好彩一早去申請咗先，唔係而家公務員WFH真係咩都唔洗申請！返到去我負責搞掂埋仲仲啲功課，老公就處理佢個羊腩煲，嫲嫲都過咗嚟一齊食！第一次整羊腩煲都算OK啦，下次可以買啲真正羊腩部份切細啲就去整。今晚老公加班要返夜，所以佢送完嫲嫲返屋企就直接返工，我同仲爺梗係睇電視啦，我都有做運動㗎 ！

10/12/20

 10/12/20.    TUE.    WARM

今日終於要返工啦，出得嚟行遇咗要還，真係做到冇停手！返去食咗早餐先，食飽先有力開工，時間過行好快，淨係清email都清咗兩個鐘，食飯時比芳芳姐捉住咗喺到吹水，食完可以閃，上德福睇銀包，諗住買比老公做生日禮物，但都係未睇得啱！下午返去已經開turbo，但都係做唔哂！明天繼續，準時收工，返去都係要教仲仲做功課，跟住等老公同子元跑完步回來食晚飯，飯後仲爺又話要踩單車，又要睇電視，夠哂忙！

9/12/20

 9/12/20     WED.    COOL

今日WFH埋就要返工啦，瞓到10點多起身自己煮早飯食，兩位少爺上堂老公就瞓覺，咁我又開始無無聊，等到子元都落堂就出去食午飯再買餸，要買夠幾日餸呢！返到屋企又要開始教功課，仲要打埋去入境處等佢地轉埋子元個passport去灣仔，老公星期五去攞！教仲爺最痛苦就係教數，條友真係冇邏輯可言！終於做好還要煮飯做家務，明天終於要返工啦！

8/12/20

 8/12/20     TUE     WARM

今日嘛, 都係朝早起身做伴讀書童咁啦, 老公放工買咗早餐返嚟就出去剪頭髮, 仲仲上堂例牌發夢, 幫得佢幾多得幾多啦! 上完堂快啲捉佢做埋功課, 因為下午約咗JOE佢地去行城門水塘, 所以迫仲爺快啲做哂功課就可以好好出去! 先去君日食咗午飯, 跟住就車子元去補英文, 然後就直接去城門水塘, 老公渣到架車好入好入先泊, 因為原來都好多人嚟! 喺附近行住咁等Joe佢地嚟, 決定好行邊條路線就可以郁身啦! 向上行都真係要啲力氣, 不過就睇到靚景又幾唔錯! 不過要管住佢兩個行山邊, 真係好驚, 因為佢地可以掛住望景可以望唔到路, 要成日提住佢地! 到咁上吓就要調頭, 落番去水塘嗰邊行去水覇, 影吓相咁五點幾都要回程, 去接埋子元就去悅來食晚飯, 仲爺一痴埋梓行到就好嘈, 其實真係唔係咁好! 回家後做運動沖涼休息, 老公就9點幾要出門口返工啦!

7/12/20

 7/12/20.    MON.    WARM

今個星期有三日WFH，仲要係連續三日，真係令人覺得有啲興奮，不過出得嚟行預咗要還啦星期四返去肯定早餐死。唔理咁多啦好好享受下先啦，今朝叫我等佢哋上完上網貨先至出去，不過我同老公都靜靜雞出去食咗個早餐先，返嚟老公再補眠我就摺衫做吓家務咁，只緣一點先上完堂佢就馬上出去，因為佢要去睇鬼滅之刃個pop up Store，不過係要先去攞籌，好在只係個幾鐘就可以入去，咁就喺附近食咗午餐先，再去K11行一陣就落返去排隊，主力係梓子元興奮啫，我都有幫做嘢影吓相，投入吓！剪完最終買咗件T恤，其實我知佢仲有好多嘢想買，但係真係唔可以咁放肆囉。所以都管制着佢唔可以呢樣又買果樣又買。只係可以睇半個鐘就要走咁俾埋錢差不多時間去攞車就入沙田要買燈膽行咗陣IKEA。晚餐唔想煮喇去咗深水埗買食物，大家各自想食咩就買咩都幾方便。返到去就食晚餐老公今晚返夜，所以九點幾佢都要出門口啦！

6/12/20

 6/12/20     SUN.    COOL*

今日雖然有限時限刻起身，但都唔係瞓得咁好，所以十點幾十一點先起身，梳洗出去食早午餐，雞後就去咗新世紀，子元要買波鞋，又唔啱！佢對腳已經41碼，好得人驚！買完上埋一田行，買咗一箱牛骨麵呢，另外買埋今晚晚餐啲嘢就回去，老公今晚返中連夜，好在好早出咗今個星期更表，因為IVY星期四五要去驗身，所以我放哂星期一至三呢！下午係同仲爺溫咗陣書，又要爆佢先肯，好可惡！試吓用上次淨番的酥皮整嘢食吓，算係成功但唔夠材料所以好一般！晚飯就食三文魚意粉，好正呢！

5/12/20

 5/12/20     SAT.    COLD

今朝瞓到八點幾開始醒，因為今日唔使打返所以唔使一早起身，老公話要過去嫲嫲度幫佢鑽牆，子元話要去睇鬼滅之刃個賣嘢地方，所以九點幾出門口去嫲嫲度，整好埲牆就去食早餐。食完早餐我哋就出發，點知去到K11 ，竟然冇晒籌，因為九點就開始派，所以唯有放棄，諗住去海運睇吓買唔買到波鞋比子元，最終都係冇反而仲爺係咁影相，佢影得幾開心，不過張張都要戴住口罩真係夠晒特色。返屋企之前我去買餸，老公度湊細佬去學音樂，買完餸返去都係唔做家務，一路睇電視一路摺衫，跟住煲咗啲湯自己飲然後再整埋蘿蔔牛腩做晚餐，老公約咗人食晚飯，咁我就喺屋企睇住佢哋，晚上睇電視咁！

4/12/20

 4/12/20     FRI.    COLD

返埋今日又放假，真係好！加上今日阿姐請咗假，但我都好掛住做嘢嘅，邊有咁多自己野嘅。有啲趕咁出門口，好在仲有4分鐘先夠鐘，返到去淨係燒賣牛肉做早餐，食飽飽仲要開工啊，時間都算過得快！午飯同咗芳芳姐出去德福食上海麵，都真係幾辣！買埋雞蛋就返去公司啦，下午做咗一陣野，雖然未做晒，但都係傾吓先冇理由浪費咗啲自由時間！五點準時收工返去湊仔，因為老公返咗工，下午都係子元揍住仲爺就算啦！不過返到去都係要我鬧，因為又整到間屋亂晒籠，鬧完咪執好晒囉，咁我就可以好好去煮嘢，食完晚飯做埋運動沖埋涼都未夠9:30喎，真係太好啦！大家可以各自做自己嘢，10點幾開始講趕仲爺瞓覺啦，小笨梗係掛住打機啦！

3/12/20

 3/12/20      THU.    COLD

今日又可以WFH，8:15醒咗見仲爺瞓緊就知醒，即刻叫佢起身上堂啦，第一堂班主任堂可上可唔上啦！咁我瞓多陣都起身煮早餐，咁啱giv仔約聖誕活動，又再講開英國啲嘢，所以食完早餐就同佢吹咗成個鐘電話！上完堂就出去午飯，好在冇買餸，因為老公睇錯咗更表，原來今日放假，所以佢去做埋運動就返，我就捉佢地做好功課可以出街！只係去咗OC倉飯行陣就返屋企，還要做運先可以沖涼休息！

2/12/20

 2/12/20     WED.    COOL

今日係仲爺正日生日，真係比佢講中唔洗返學，Daddy請咗假，不過我就要返工，咁等我放工先去慶祝啦。朝早返到，食麵包同埋蛋白，因為上午好忙所以都唔覺得肚餓，好快又食午飯啦！食完野想去德福，本來諗住行吓圖書，點知行咗去UNIQLO，見到特價做到聽日，就買咗件羽絨，同埋返工褲！下午都係做嘢啦，兩日啲嘢一日做晒真係好忙。五點放工就樣樣好，晚餐都可以食早場，去咗是我哋本來諗住今個星期五去試嗰間烚吓烚吓，原來係台灣嘢，所以啲食物同湯底都幾特別！食完才7點，返屋企仲有好多時間，咁仲爺做埋功課沖埋涼先至切蛋糕！

1/12/20

 1/12/20     TUE.    COOL

今日WFH，其實咪同放假冇咩分別，不過又擔心梓妤唔知醒，所以都係7點3起一起身，知佢出咗門口返學先得，8點4又到仲仲網課，所以都係唔好得罪瞓覺啦，趁佢胸膛時整早餐俾佢食，然後就邊睇劇邊摺衫，睇咗套屍殺半島，第一集好好睇，下午睇埋第二集就好唔掂！老公瞓到子元放學返嚟先起身，跟住去咗君日食午飯，買埋啲餸就返屋企。各有各做嘢，我仲煮咗個花膠煲雞，同仲爺自私食！晚飯整咗焗薯配煙肉洋蔥，都算幾好水準。之後咩都唔想做，今日好想懶洋洋咁過！