31/10/23

 31/10/23      TUE     COLD

今日帶埋啲糖返去派吓等佢地開心吓，再搵機會同大姐講明天要視像上堂，佢話會安排，咁就最好啦！然後就開工啦，今日又要跟顛妹，不過捉到條路有時覺得時間仲易過，只係放break時又比飯筒捉咗佢去講嗨我又要陪坐，差啲連食嘢都冇機會！準時午飯，仲搵到機會比埋啲糖Letty佢哋！今日準時收工，返到屋企好忙，天黑前要倒垃圾，又要煮定晚飯，因為仲仲又要萬聖節出去攞糖，然後老公揍佢哋去練波，我去聽sixth form evening，但聽完先知冇咩用，都唔係等最後GCSE個成績收生，完全唔明點囉，神校果然麻煩！返嚟快手煮飯食！

30/10/23

 30/10/23     MON      COLD

終於要開學返工，真係好唔捨得個假期呀! 不過為兩餐都要郁架啦, 朝早又係好辛苦咁叫仲爺起身返學囉, 條友又唔記得札辮, 今日要游水嘛, 搞到我要借我嗰條比佢, 好在返到去可以問到letty借嚟用住先啫! 返到學校個更表又冇我個名, 同事叫我問阿姐咁我咪問囉, 好在都係個唔太難搞, 起碼唔會要一日到黑叫住佢個名, 只係佢啲堂真係好悶同埋我都幫唔到佢啲咩! 12點多可以放飯比我預期中早但我得個烏冬真係唔夠飽囉! 最後一堂ART好玩呀, 我都有得一齊整先好! 最後準時收工揍仔, 仲爺又要補番個見家長嘛, 幾忙先得架! 揍咗佢返嚟我又要趕出去買餸, 然後哥哥就揍佢去球場, 我買完餸返嚟真係好餓, 喺咁煮嘢食等等, 食完好攰, 瞓到6點幾真係要煮飯啦, 食完飯hea吓咁都冇咩理仲爺, 佢幾時先的起個心睇吓英文書! 

29/10/23

 29/10/23     SUN     RAIN*

今朝又因為今日行程安排同老公嘈吓咁，真係好委屈囉， 最終我唔跟佢地去踢波，因為又未打掃又未摺衫，本來想買埋餸但落住雨咁都唔想出車，結果等到老公返嚟就要去接子元放補習，然後去咗買日本嘢食，車咗哥哥去球場順手食埋嘢先再過stella屋企，去到就開始幫手整吓BBQ嘢食，老公要等子元踢完波先過嚟，幾經辛苦佢哋透到爐，但燒咗一陣又落雨都要收入室內搞，細路打機大人吹吓水咁10點多要走啦！明天又要開工返學！

28/10/23

 28/10/23     SAT     RAIN

今朝醒咗都hea到咁上吓先起身食早餐，然後就準備出發去MK，又係探朋友活動，不過先買咖啡叉個電先，MK都係一個鐘車啫，去到啲細路打機，我地出去食啲嘢行吓湖邊景點就返去，都係吹吓水等食晚飯，今日有酸菜魚食！食完啲細路開枱，竟然可以打哂四圈先走，都係11點走，不過回程好大雨，順利1個鐘都返到算係咁！

27/10/23

 27/10/23     FRI      COOL

今日子元又出去玩，所以又係唔洗理佢，整咗早餐同仲仲食，跟住就摺吓衫休息吓，老公放工返嚟話去榮業食午餐再去買啲嘢就返屋企，預備吓晚餐先，5點幾又要出門口，仲爺要練波，但子元又要去老遠比賽，好在臨走比我撘到隊 順風車，咁就唔洗等巴士，返嚟煮飯食先，老公佢地10點幾先回程，有冇咁襟踢！

26/10/23

 26/10/23     THU     COOL

今日冇出過街, 子元自己出門口去咗holly屋企玩, 但條友上完Lidi買嘢又唔識撘巴士要打嚟問, 懞懞地! hea到9點幾10點先起身, 整早餐之餘仲整埋午餐, 都係煲粥咋! 今日重點任務係要仲爺做咗功課, 其實都係嗰篇500字英文作文難搞啲, 真係搞咗一個下午, 本來想guide佢自己做, 但佢真係乾海綿, 點都渣唔出水, 佢都叫做寫到啲架啦, 到後來我都冇力再guide佢, 佢真係唔知寫咩出嚟咁, 加上要打出嚟, 我都係寫埋個尾算, 因為老公已經返咗又要煮飯咁, 食完飯我都好攰啦, 明明冇體力勞動, 但都好攰!

25/10/23

 25/10/23     WED     WARM

今朝真係唔願起身，因為琴晚真係好夜瞓！但佢兩個9點又要集合有比賽，局住要8點多起身，去踢到12點幾先完哂，本來諗住買nature nature，但老公話不如食拉麵，最終都食咗，難得閒日可以食！返屋企等佢兩個沖一沖涼，再出broadway，佢兩個要驗眼，大致都冇咩問題，驗完眼子元剪髮後先返屋企，我地都要休息吓！

24/10/23

 24/10/23     TUE     RAIN

今日一早就出發上曼城，差不多4小時車程，去到曼城樓食午餐，食完就下一站曼城主場，今日朝本來都大雨，好在車程同路上都唔算大雨，都可以影吓相，仲爺就係咁拍片，今日擺明係慢遊，參觀完曼城仲有大把時間，就去附近行大大間ASDA，然後先過曼聯，泊好車都係5點，行咗一圈精品店冇買嘢，就去食街頭小食，真正夜繽紛，7點多終於入場，要分散坐唔係咁好囉，仲爺又唔開心，下半場好啲，終於現場睇到麥麥送入波，勁！最後早幾分鐘走人，因為6萬幾人一齊散好得人驚！最後順利2點返到屋企！

23/10/23

 23/10/23     MON     COOL

今日8點局住起一起身捉仲爺預備出門口，佢要去比賽嘛，等佢出咗去我就返房hea，10點幾先起身煮早餐，然後摺衫，老公1點幾先返，等佢食啲嘢又出去買餸同買咖啡，返得屋企都4點，又要整吓後園條樓梯，執拾埋個樓梯口，乾淨哂，老公沖完涼就煮晚餐，食完沖涼休息！

22/10/23

 22/10/23      SUN     COOL

今日只係球場同球場，唔知點解都覺得好攰，朝早先揍咗子元去補習再揍仲仲去球場， 因為未夠鐘喺停車場等時打埋比阿媽傾咗陣，不過睇咗一陣我就已經返上車等，仲爺踢完又黑面出嚟，都係比人鬧完啦，去接埋子元趕去比賽，最終係輸但對家都好少家，爛仔咁！喺附近搵咗間餐廳食，有啲貴但幾好食，返嚟摺埋衫就做蟲蟲到8點左右叫老公起身煮晚餐！

21/10/23

 21/10/23     SAT     RAIN*

今朝6點比仲爺隻狗嘈醒，搞到要時間再瞓番，就11點幾先再醒，起身直接去茶餐廳食午餐，車番佢兩個返屋企再去westway買嘢，我要買返工褲，著到爛啦！再買埋Halloween 嘢呀咖啡等等就返去，老公同子元去做gym，我就做清潔，等老公返嚟煮飯食，睇波咁啦！

20/10/23

 20/10/23     FRI     WARM

終於最後一日啦，今個學期真係好難捱，今日都係跟個顛，佢都係煩但我已經冇力，半放棄呆應！總之夠鐘就放飯，夠鐘就放學，我跟唔到佢出門口，咁大個人自己嚟！我返咗屋企先，跟住齊人就去Broadway 食嘢再買吓嘢就回程，老公話要染髮就幫佢染，然後煮飯囉！

19/10/23

 19/10/23     THU     WARM

今日又係返到去先知跟咩人， 其實都幾困擾，每日都亂哂龍咁！結果今日原來要跟anjilinla，都知好攰架啦，重點係時間，佢實唔會準時走，就搵咗個同事幫手，最尾同佢對調，佢好好人肯幫手呢，解決咗我個問題！咪繼續捱吓囉，條女都係好難搞，用捱嚟形容冇錯！放學接咗仲爺又要見家長，直接見SENCO，人地啲就專業啦，總之都會有support，希望對仲爺有幫助！返到屋企可以做蟲蟲，子元要踢波，咁預時間煮飯就得！

18/10/23

 18/10/23     WED      RAIN

今日係返半日架嘛，都email咗件飯筒，佢可以咩都做唔到，冇安排囉，問親佢又話上緊堂唔答，咁多人死唔見佢死，又爭住做嘢但其實又冇做，仆街！不過半日我已經好攰，仲要頂多兩日呀！返屋企前買埋餸先，返去食埋午餐去接仲，早放嘛，返到嚟都係hea，追吓劇咁，係咁閂hehe劇睇！

17/10/23

 17/10/23     TUE     COOL

今日諗住返去比大姐簽假紙，點知佢今日全日唔喺到，咁我搵邊個簽呀，好在個同事話可以搵miss Johnson 簽，簽完再email大姐，我講就講哂，睇吓佢明天會唔會又玩嘢！今日照樣跟顛妹，都係好攰啦，佢真係好嘈！淨係比老師要求離開課室都兩次，好在今日唔太太凍！終於放學返去揍仲，返屋企後要倒垃圾，搞完一大輪先可以休息食嘢，老公返嚟揍佢哋去踢波，我就預備晚餐！

16/10/23

 16/10/23     MON     COLD

今日好凍，朝早得嗰3度，好在都有裝備！返到去以為跟layla，點知又轉咗，又跟顛妹真係好攰！最慘佢地分咗英文去低b班，重點係飯筒教，以後有排捱！上其他堂都捱架啦，頂硬上囉，食完飯又快手開工，好在我預備好放工閃人，條顛妹又唔肯走麻鬼煩！所以我都遲走，不過可以問到仲爺學校校長關於請假問題，最終係冇問題架佢照唔批你照放得架啦，咩concept！返屋企食啲嘢就行，又要去踢波，可能因為今日太凍，架車唔夠電，叫老公接手，一唔載仲爺就有番，不過嚟緊都只可以撘巴士，太早天黑！買好餸返嚟快手煮飯！

15/10/23

 15/10/23     SUN     COLD

今日冇咩寫啦，因為我只係出去快買咗個餸，都冇出過街，朝早一起身就換床單，佢地出哂去我先食早餐，然後休息吓再做清潔，仲要洗車，佢哋踢完波補完習返嚟都冇諗到食咩，求奇煮吓咋，之後仲要摺衫，督埋仲爺做功課，又要準備晚飯，開咗套戲睇好好笑！差不多10點先沖涼休息！

14/10/23

 14/10/23     SAT     COOL

今日雖然係結婚週年，但都係出去食餐晚飯咋，因為今日好忙，起身食完早餐出去買咖啡，然後去哈囉嗰邊參觀six form開放日，原來好多人睇，間學校都好大，因為子元同letty講咗嚟呢到，事頭又跟埋嚟，一齊睇吓咁，最難得有香港學生導航，講得清楚明白好多，可惜PE係新開未有資料！睇到點幾要走，去costco入貨，子元去做gym，我喺屋企摺衫分貨！等佢地返嚟就出門口去打邊爐，過whitecity嗰間食，好滿足！

13/10/23

 13/10/23     FRI     RAIN

happy friday應該要過得開開心心架嘛，但大姐又搞到大家亂哂龍，時間表又錯，做做吓又轉人，又多agency，到我跟緊個好合作嘅學生時，佢又話我好坐後面，大佬人地好好上緊堂，你睇得嗰一 陣又知我冇做嘢，收皮啦，最仆街我請假佢唔批，要我請半日，又唔簽，我唔開心咗好耐，加上今朝落雨，我返工時濕哂，個人好攰！終於捱到放學，唔急走因老公揍仲，但返去收到信仲仲學校話唔批佢假期，睇嚟星期一放學又要再去處理一次！終於可以休息吓！

12/10/23

 12/10/23     THU     RAIN

今日以為輕輕鬆鬆, 點知返到去大姐話改咗跟我未跟過的另一個year 7 煩妹, 好在頭兩堂喺去咗電腦房做test, 我都可以輕鬆吓先, 小息又係去圖書館, letty佢地又識得跟上嚟搵我吹吓水, 之後音樂堂都有啲煩架啦, 但因為班房得佢一個顛, 冇亙動真係好好多! 更表冇show幾時放飯, 我都唔理架啦, 反正食咗少少嘢先, 到時再算, 點知12點幾有得食都好, 食完飯再開工, 條友開始麻煩啦, 數學堂還好, 老師控制到, 英文堂我知係邊個老師後, 都知唔會有太大問題, 最慘係會遲放囉, 好在我叫咗老公接仲仲, 佢琴日打完流感針, 過度反應又攰又頭痛手又痛返唔到工! 放工返到嚟快手食嘢就出門口, 因為要去Drayton Manner sixth form開放日, 又係悶悶咁sell囉, 都係網上睇到的! 回來煮飯食先沖涼, 子元踢完波返嚟自己食自己洗, 我收工了! 

11/10/23

 11/10/23     WED     COOL

一句講哂今日好攰，跟顛妹三日真係極限，佢今個星期日日都好high，堂堂都大叫又失控咁想點！搞到老公師基本上係教唔到書，我都比佢煩到好攰，因為佢不停搞到其他學生投訴，但同我投訴冇用囉！到英文堂，分咗set，佢搞到老師點做都係街市咁，寫張紙send佢去gns都唔比，因為冇call SLT，gns唔收，大姐更加啦，佢最叻叫人離開，好似今朝一返到去有白車，原來Faria暈咗，但我一入去佢淨係叫我離開，大佬我連file都冇攞，好在我知個學生喺邊啫，只係冇時間表，唯冇問番學生囉，真係勁無奈，佢真係仆街中的仆街！放學接仲爺時老師話下星期家長日唔係佢見，因比Sen dep見！咁要再約！返屋企後都係休息食嘢摺衫煮飯，老公好早就瞓！

10/10/23

 10/10/23     TUE     WARM

今日繼續辛苦地開工，因為條顛妹今日都好顛，小息時我忍唔住email咗二姐，唔理啱唔啱有冇需要啦，我覺得要講，又大叫又唔聽指令等等啦，老師基本係上唔到堂！放完飯返去開工，佢哋飯後竟然係去做電腦test，吽咗兩堂又要督住佢地做，都好攰，不過可以準時放學就算！返到屋企係咁食嘢，子元補完課返到嚟先發現漏咗PE衫喺更衣室，時間關係我又要飛車去幫佢囉。到佢哋去哂練波我就睇電視同摺衫！

9/10/23

 9/10/23     MON     WARM*

又要開工啦! 今朝子元返學校打羽毛球, 所以唔洗理佢早餐, 搞掂仲爺就出門口, 返到學校先睇更表, 又要跟顛妹, 加上佢今日好hipper, 所以我都好攰! 基本上我勸到就勸啦, 因為真係有心無力呀! 不過可以準時食到飯吹到陣水都好過冇架啦! 最尾嗰堂早幾分鐘走, 我醒目架啦食飯時渣定架車出門口附近, 走得即閃! 接仲爺放學時, 同neighbor講埋可唔可以下星期家長日時揍埋仲爺走, 咁我唔洗專登請假! 睇吓得唔得啦! 返到屋企快手食嘢休息, 然後又要揍仲爺去踢波, 可以打吓機, 返嚟就食飯飯, 有鴨腿湯飯, 好好味! 跟住都係睇陣電視沖涼休息! 

8/10/23

 8/10/23     SUN     WARM

今日都係做蟲蟲，除咗買餸出咗去都冇咩郁過！今日買餸快刀斬亂麻，唔喺超市遊蕩，加快進程又可以慳啲錢，最後去nature nature買埋午餐就閃，返去食完嘢就要做吓嘢，都係摺埋啲衫，係咁打機同睇波子打機直播，到老公佢哋返嚟就煮飯食睇電視沖涼瞓覺！

7/10/23

 7/10/23     SAT     WARM

今日都係瞓到自然醒啦, 食埋早餐, 準備埋功課叫仲爺做先得, 但佢啲態度又係令人火滾! 終於出得門口, 只係去咗買咖啡同B&M先, 跟住返去接佢地, 子元話要買返學裇衫, 結果喺broadway食埋買埋嘢又洗好多錢咁! 返屋企之後我就做清潔, 老公同子元去做gym, 清潔完都好攰啦, 老公返嚟就整晚餐, 食完睇電視等沖涼啦, 到臨瞓前仲爺又係講極唔聽, 瞓覺前準備又係冇做好, 然後講故事時, 我一路講佢又話聽唔明, 叫佢睇又睇唔明, 我就火起, 但重點係陸生話我攞個仔發脾氣, 其實佢都冇參與過佢照顧日常生活細節, 佢憑咩咁講, 連子元都明我講咩, 因為佢都有參與幫手教仲爺的過程, 仲話叫我唔好理仲爺咪得, 佢唔起身咪由得佢喺屋企唔好返學, 呢啲係咩講法, 根本係唔合理, 仲爺見到我地嘈喺到流馬尿, 佢呢個始作俑者唔該快啲醒覺!

6/10/23

 6/10/23     FRI     COOL

終於星期五啦，本來以為今日都係跟低B妹，點知轉我炒散，係幾開心，但有時都唔知入唔入課室，都無所事事，唯一係喺數學堂幫到吓手，另外本身要頂2個飯更，最終只要一個，我自己一早食咗先，搞到之後都要搵嘢做，問咗個同事話可以跟Jazzy，但跟佢都幾攰，最尾一堂仲要test，又要我跟真係好攰！放學去埋超市先返去，睇吓我個大笨元，12點多學校打嚟話佢好肚痛要返屋企，最終食咗藥應該好啲，睇埋財閥家的小兒子，老公要揍仲去踢波，我繼續做蟲蟲睇電視，食飯時睇埋大結局，正！

5/10/23

 5/10/23     THU     COOL

今日跟低B妹，YEAR 8嗰個，都係好簡單，只係有兩堂要test，等於我幫佢做，又要寫比佢抄都幾攰！不過可以準時食飯放工又冇人嘈，就已經好好！放學到我去見家長，交我編千字文比佢，再講吓係咩狀況，話埋比佢知仲爺有SEN傾向，估唔到呢間佢地有配套，話會同SEN Dept聯絡，希望真係幫到佢！返屋企可以hea啦，做番條蟲蟲煲電視！

4/10/23

 4/10/23     WED     COOL

今日算係輕鬆地開工，冇咩忙冇被留難，可以吹水，仲為明天仲爺要見家長寫咗千字文，我都係一時詩興大發，寫吓寫吓就寫咗兩頁紙，我都覺得自己勁，應該可以嚇到老師唔見我！小息時見到letty佢地講開仲爺單嘢，佢都信仲仲唔係專登，係真意外，因為上次喺佢屋企玻璃房，佢可以撞咗落玻璃門4次，佢真係好唔小心！準時放工返揍仲，可以休息吓，子元又唔洗練波，老公慢慢煮！

3/10/23

3/10/23     TUE     COOL

今朝返工都有啲趕，周圍都塞！返到就即刻開工，大致今日都冇咩，唔算太難搞，只係好悶啫，去到最尾嗰堂竟然係飯筒負責的option support，想做自己嘢都唔得之餘仲要管住條妹做自己嘢，好煩！搞到我忍唔住寫紙仔同個香港人學生講飯筒壞話！放學接仲爺時班主任話要約見家長，都係累積地喺學校衰得多，成日有籍口咁囉！返到屋企忙左忙右，仲仲踢波老公揍，我就摺衫煮飯等等！老公因為係咁流鼻水，最終驗咗真係好中covid囉，都冇咩可以做！

2/10/23

 2/10/23     MON     WARM

今日又係咩都未知就返工, 返到去都未有機會睇跟邊個, 都係要跟低B妹, 不過係year 11嗰個, 佢都有啲煩, 但相對地係易搞架啦! 照樣開工囉, 又把握機會打吓機咁, 反正都冇嘢好做, 準時食飯準時收工, 係冇得同letty佢地吹水囉, 個學生話唔想我同啲講中文的人傾偈, 我心諗關你咩事, 同佢講嘢又講唔到, 6個鐘唔講嘢堅係悶囉! 終於捱到放學了, 夠鐘就走啦, 接埋仲爺返屋企, 又要準備細佬出去踢波, 點知渣咗一半都未有, 突然好大雨, 我見老公可以渣到嚟接我地, 就走去巴士站等, 等緊時啲雨時大時細, 仲要行埋雷, 所以都取消埋, 直接可以返屋企! 老公煮好味晚餐, 食完睇電視沖涼休息!

1/10/23

 1/10/23     SUN     WARM

今朝都係8點左右就醒，但因為老公揍仲去踢波，所以我可以繼續hea，食緊早餐老公已經返，可以一齊車阿哥去補習，然後去買咖啡買午餐先返屋企，休息吓就要包餃子今晚食，然後可以煲吓劇，終於開套新BL劇，然後都係食飯睇電視咁啦！