31/1/26

 31/1/26     SAT     COOL

今日係有啲無所事事, 朝早老公揍咗仲爺去練跑, 我就繼續瞓, 但之後都有預備早餐架, 食完就去咗costco買嘢, 都算目標為本了, 同埋真係多咗好多亞洲嘢買, 連冬菇都有仲有都平喎, 不膪佢係花菇係冬菇啫, 但比起中超都算係靚仔! 因為要去Jenet屋企攞嘢, 所以順手幫佢買埋嘢攞比佢! 跟住就返屋啦, 先摺咗啲衫, 跟住老公整咗新買嗰個刀削麵, 真係好好食喎! 之後就係咁睇電視同等開飯, 咁又一日啦! 

30/1/26

 30/1/26     FRI     COLD

終於又捱到星期五啦, 今日可以返番去課室, 仲要三隻小天使得番兩隻, 輕鬆好多, hea吓上堂咁都冇咩, 夠鐘就放飯休息吓, 準時收工走人, 真係冇咩特別! 返到嚟有嘢食啦, 今次叫咗酸菜魚, 好好食喎, 加上我喺學校攞咗免費沙律同wap返嚟, 今晚又洗煮啦! 攤咗喺梳化休息又冇摺衫啦, 因為仲爺又話要一齊打機, 所以連電視都比人搶埋! 不過有嘢食之都搶番個電視, 睇到9點幾幾先沖涼休息, 攰!

29/1/26

 29/1/26     THU     COLD

今日都係幾凍吓, 但都冇咩衫可以加, 出門口發現仲爺同conor折返, 原來佢話見到琴日個學生喺路口, 怕所以唔敢行, 咁我唯有陪佢地行到出路口先出車囉! by the way, 最後得知嗰條友仔係比人收咗監架啦, 不過應該唔會好多日囉! 跟住就係如常返工, 以為係跟嗰個又轉咗, 咁又被困大房一日, 有時都唔知好定好, 因為都叫做可以做吓自己嘢, 但又好似好多嘢做咁, 所以都係會好攰, 另外都係要跟個學生架嘛, 雖然只係三堂但都已經夠! 最好就係可以自己準時收工, 但返到去已經攰到咩都唔想做, 攤咗喺梳化, 連嘢食都冇煮, 夠鐘就同仲爺去球場, 因為巴士改道, 所以都唔洗特別追一架巴士, 去到邊架就邊架! 返到嚟又要摺衫又要煮飯, 同埋要仲爺再溫書囉, 因為今日print咗好多嘢比佢臨尾再衝刺, 去到球場未開始之前已經溫過吓, 好過冇啦!

28/1/26

 28/1/26      WED     COLD

原來今日都幾凍吓, 好在都頂得住! 返到去知道今日跟邊個, 因為佢基本上係行得, 所以除咗佢把口都係控制唔到住, 起碼佢唔會周圍走先, 同埋佢只係返3堂, 好事! 不過有另一個顛妹喺到, 某程度上佢地又喺到發顛, 搞到我要出去call人嚟救, 因為已經開始失控! 真係好麻煩! 另外又要替飯更又要run lunch club, 所以都好忙, 但就完全冇去過課室, 因為全日都喺大房運作, 然後就準時收工! 返到去本來諗住同仲爺溫書, 點知又出事, 其實可以係好小事, 但我覺得點都要report, 因為我返到嚟見到有兩個仲爺學校學生喺到同佢地吹水, 同埋neighbour, 本身佢地喺屋入面都可以, 吹水都可以, 但原來嗰個學生係naughty嗰類, 走去knock neighbout門, 人地阿婆返到嚟比人趕先走! 本身都算架啦, 點知4點幾佢地返轉頭, 仲要拖馬帶多咗兩條女, 話叫仲爺出嚟, 我勁同佢地講話唔得先肯收聲, 咁我就覺得咁做令我覺得唔安全啦, 所以我又要叫AI幫我寫email比學校囉, 正所謂報咗案先有著數, 但就搞著我完全冇時間再幫仲爺溫書, 星期五science test都唔知點算啦! 唯有明天再諗吓撘車時同佢溫! 

27/1/26

 27/1/26     TUE     COLD

今日返到去hea咗一堂就要開工啦, 因為第一堂個學生唔見佢返, 就喺大房等住先啦, 但都唔可以係咁等, 唯有去另一個學生到, 不過佢都係唔係好洗理, 所以只好搵個位坐埋一邊做吓自己嘢, 但又唔係堂堂都可以, 所以都係幾無所事事! 都有自己搵嘢做吓, 可以慢慢放吓break同lunch等, 放學準時返到嚟, 又要倒垃圾又要揍仲爺出去踢波, 點知架巴士去到southall station就話唔去到我地要落車嗰個站, 咁唯有行過去啦, 因為等車同行都係一樣, 不過行對我隻腳踭嚟講都好辛苦, 愈來愈痛唔多掂, 可惡! 終於返到屋企, 先要休息吓先再整嘢煮飯, 咁又一日啦!

26/1/26

 26/1/26     MON     COLD

又到好悶的week A, 不過悶都好, 即係冇咩做啦, 好事! 原來今朝都有啲凍, 唔係好著得夠衫咁, 好在今日主要都室內! 悶悶地所以我幫個學生做好咗嘢之後就搵啲嘢自己做吓, 睇吓慶餘年小說, 因為暫時諗唔到有咩可以做! 咁就捱到放飯啦, 都有啲餓架, 食完仲要上第五堂, 本身都係諗住去坐吓, 上到去先發現係代課, 重點係好煩嗰個代課, 淨係識得叫啲學生唔好講嘢, 我最終頂唔住3點就走人, 慢慢行去攞車閃人! 返到去就第一時間著火, 因為仲爺啲衫褲鞋襪一屋都係, 然後佢仲淨係掛住整嘢食, 又要整到個廚房好亂, 我換好衫開埋機洗衫佢都好似未掂咁, 阻住我今日個plan整蘿蔔糕, 不過我最終都照開始整, 連埋煮飯時間, 又喺個廚房企咗4個鐘, 好攰! 

25/1/26

 25/1/26     SUN     COLD

今日都要出去買嘢, 所以都好忙! 子元朝早要帶波, 所以車完佢去咗球場先再去broadway, 先去食咗早餐先, 係有啲貴但一年都食唔到兩次就算啦, 因為都搵唔到有啲咩好食! 等啲鋪頭開門就去買要買的, 因為之後仲要去中超同costco, 一日行幾個場真係唔掂, 好攰! 中超要買料準備整蘿蔔糕, costco又有好多嘢好吸引, 已經好忍手去買架啦, 嚟緊過年都要入吓貨! 等埋costco熱狗等就回程, 返得去都3點多, 仲要分裝先再食嘢, 咁老公之後要睇波我又唔係好想睇, 所以就搬埋啲衫去樓上自己睇youtube摺! 晚飯都幾豐富, 食飽飽洗埋碗就沖涼休息, 明天繼續努力, 仲有三星期又term break架啦!

24/1/26

 24/1/26     SAT     COOL

今日瞓醒都9點, 起身叫老公煮早餐, 我就要仲爺溫咗書先, 唔可以又話等食完先做嘢, 咁都叫做溫咗啲啦, 等我地出咗去買餸時就叫佢做數囉, 都算係咁架啦! 買完餸返嚟, 老公就揍佢出去比賽, 我就開始做清潔, 始終都係冇人喺屋企時做比較方便啲, 做完都差不多4點啦, 整咗麵自己食就算啦, 佢地踢完波返嚟肯定都會買嘢食, 但唔知幾點嘛! 子元出咗去溫書, 返得嚟食埋一份, 所以晚飯都係簡單烚啲錢呀肉片就算! 再捉仲爺再溫多陣書, 而家有網上材料同佢溫書好好多!

23/1/26

 23/1/26     FRI     COLD

 今日好攰呀, 都唔明點解咁攰, 可能今個星期都瞓得唔係好好咁! 照常返到去都係睇吓跟邊個啦, 點知話IK有可能返, 心諗唔好啦我唔想呀, 好在最尾佢都冇返, 咁我就炒吓散, 替吓飯更係可以的, 仲可以準時收工好重要, 去攞埋藥行下路返去先發現啲行人路都封咗好多, 搞到我好辛苦先返到嚟咁, 中途仲要收到GP電話, 明明book 咗 4點幾, 但佢4點未夠就打嚟囉! 搞到我勁狼狽佢又串喎, 火都嚟埋! 返到去老公又係買咗炸雞, 但我唔鍾意食囉! 好在佢晚餐叫咗意粉, 仲要係好好食嗰間, 正! 因為我追緊DO姐介紹的新劇, 超正, 得6集一口氣追哂, 堅好睇!

22/1/26

 22/1/26     THU     RAIN

今日都係有落雨咁啦, 好在返工唔算大雨, 還好! 全算好正常, 唔太忙又唔太閒, 準時收到工, 返到去食埋嘢就揍細路去踢波, 追得切巴士所以好準時就到咗, 返到嚟又要摺衫煮飯, 好在今晚老公煮簡單飯, 所以我淨係煮埋個例湯就得! 食埋飯洗埋碗都9點幾, 仲爺又話有功課未做, 佢真係要留意吓自己究竟每日有冇功課唔係要我問囉!

21/1/26

 21/1/26     WED     RAIN

今日啲雨又追住我嚟落, 我真係連底褲都衫哂, 單車同scotter真係唔同, 坐喺到咩水都吸哂, 搞唔掂! 加上又有啲暈又有啲想嘔, 好在今日三隻小天使返得一隻, 仲要係相對地易搞嗰隻, 已經好好! 第一堂PE我只係坐喺到, 真係冇咩可以做, 同埋我都要休息吓! 之後都係照上堂啦, 相對地今日已經算易過, 只係因為我今日身子弱, 所以都係有啲辛苦, 加上個人實在太濕, 心情都唔好! 放學返到嚟又要快手換衫抺一抺乾自己就要揍仲爺去睇牙醫, 又要行又要撘巴士, 回程又要等, 返得嚟已經6點幾, 我真係好攰呀, 但都要做埋啲嘢先, 買咗嘢又要擺, 最後煮咗啲嘢食但又唔係太想食, 可能因為一返到嚟太餓食咗啲即食嘢先跟住就飽咗啦! 最後攤咗喺梳化個幾鐘叫做回番少少血, 等老公煮晚飯就可以食得, 洗埋碗就沖涼啦, 今晚都係早啲休息啦!

20/1/26

 20/1/26     TUE     COLD+

今朝叫做唔洗咁趕, 因為朝早請咗假去GP做檢查, 可以睇吓電視摺埋衫, 12點返到去發現我連跟開嗰個都唔洗跟, 可以炒散, 跟吓半盲, 又睇吓lunch club咁, 最尾嗰堂都係執吓大房, 夠鐘就走人, 正! 今朝倒咗垃圾, 所以返到嚟可以食埋嘢揍仲仲去踢波, 不過又等唔到車又迫咁, 都遲咗少少先到, 返到嚟hea咗陣又要煮飯, 都好攰呀! 食完飯都早啲休息啦!

19/1/26

 19/1/26     MON     COLD

今日以為係閒更, 點知返到去先發現又改咗, 可惡! 不過都係咁做架啦, 輕鬆面對! 只係放飯時間有啲緊張, 所以食得比較趕, 放工正常啦, 都係咁慢慢先行到出去, 返到去好肚餓, 快啲食咗啲嘢先, 然後都係要做家務啦, 又要洗衫又要摺衫, 仲要趕仲爺去做數, 等佢地去咗踢波就煮飯啦, 好忙好忙咁呀! 食完飯食埋雪糕就沖涼休息啦!

18/1/26

 18/1/26     SUN     COLD

今日主力都係出去買餸啦, 起身早餐蒸燒賣叉燒包, 食完就出去買餸, 仲爺又要件毛毛皮, 去B&M買完順手去接埋仲爺先返去, 研究咗個乾衣機, 清咗啲塵都係唔得, 熱風個風扇壞咗, 應該都要買過個架啦, 分期啦! 之後煮咗啲嘢食, 就同仲爺溫書, 今日只係溫到數, science唯有下星期六日先溫埋! 最後仲要摺埋呢兩日啲衫, 預備晚飯料等老公煮, 食完飯睇吓電視9點幾先沖涼休息! 

17/1/26

 17/1/26     SAT     COOL

難得今日都唔算太凍, 仲有太陽, 不過主力都係出去買嘢啫, 今日只係去咗中超同IKEA, 仲爺一聽到IKEA梗係跟埋嚟啦,  咁就先去中超買完嘢先, 尾聲時喺凍櫃嗰到發現有人跌咗現金, 都40鎊架, 咁梗係要路不拾遺啦, 所以叫仲爺攞去交比收銀嗰邊, 買完就去行IKEA, 主要係買衫架同床單, 都目標達成, 喺IKEA食埋午餐先返去, 塞得車嚟都3點幾, 快啲開始做清潔, 仲要換埋床單, 7點幾就食得晚餐, 今晚有一品窩食, 新買的鴛鴦煲就係攞嚟整新食品毛血旺, 真係好好食, 今次試咗, 下次配埋薯粉食仲正! 最後睇埋模範的士, 原來已經大結局啦, 可惜又冇得追啦!

16/1/26

 16/6/26     FRI     COLD

今日終於冇落雨, 不過都係小心啲好! 返到去以為要跟3隻小天使, 點知又轉咗喎, 我今日第一次全日跟Maki呢, 都有少少新挑戰架, 不過老實係有啲攰, 因為不停要寫呀講呀咁, 係冇得hea! 不過充實得嚟又學到嘢咁囉, 大佬你要幫個盲人上art上數學其實都唔知應該用咩字眼等等, 不過每堂都唔算太難過, 忙呀嘛, 而且會遲到早走, 所以每堂都淨唔到幾多時間, 放學時間同佢阿媽講咗幾句咁啦, 準時我都走啦, 返到都係食吓嘢先跟住休息吓, 食完飯諗起仲爺都係完全冇做過溫習啲嘢, 但叫佢郁時佢又話自己要拍片呀等等, 又激到我走咗落樓, 落去吹吓風都好, 我真係堅燥! 又同佢訓話咗一餐, 希望佢合作啦!

15/1/26

 15/1/26     THU     RAIN

今日又係落足一日雨, 真係令人好煩悶, 又周圍都又淨又浸, 勁難返工囉, 要好小心! 返到去又轉咗跟咩人, 然後嗰條友又可能會遲啲返, 完全掌握唔到, 所以都係幫吓手做吓啲大房事務, 最鍾意係咁! 不過之後都要去上堂, 然後放飯後條友又返咗嚟, 但佢都係keep住反叛中, 搞完一輪留咗喺大房, 我就成機做埋B1 Test張紙仔! 夠鐘就放學啦, 又要冒雨返嚟, 濕到呢, 然後快手食啲嘢又要出門口揍仲爺去踢波, 又要去子元家長日, 但老實講都唔係要同家講嘢咩, 可能係怕學生唔會同父母講佢地讀成點, 要我地去坐吓聽吓掛, 有啲無聊! 又要自己撘番車返去, 不過係唔洗煮晚飯囉, 因為一來冇嘢煮, 二來我地返到嚟都咁上吓時間, 咁就不如叫外賣算! 食完沖涼休息!

14/1/26

 14/1/26      WED     COLD

今日原來都幾凍, 地下又濕, 好在都唔算太滑! 返到去先知今日Y11 mock派成績, 咁其他級就第二堂先返, 所以本身今日都輕鬆, 起碼上少一堂, 跟住好好彩咁今日本身嗰個學生係仲未再返學, 所以基本上跟佢的日子都係可以hea! 大房in charge個同事今日就同大姐安排我喺大房幫手, 再cover吓飯更咁, OK啦! 午飯時仲有得加餸, 因為招呼完客啲食物有淨, 咁又益我地啦, 我直情攞多份返去比啲仔食! 最尾嗰堂都係喺大房, 幫手做吓啲文件嘢, 雖然有啲攰但都開心過跟住啲學生hea, 原來我都係鍾意做文職嘢! 放工返到去都好忙, 又要掉垃圾又要處理其他嘢, 5點幾先有時間食嘢, 所以基本上係冇咩休息時間, 跟住又要準備煮飯摺埋啲衫等等, 今日真係攰!

13/1/26

 13/1/26     TUE     COLD RAIN

今日繼續都係正常咁返工, 繼續努力同架車合作, 係要慢慢適應! 返到去除咗英文堂冇電腦用, 其他時間都係可以上網, 所以唔好浪費時間, 做吓啲有益自己的事, search吓ILR啲嘢, 好在而家真係有AI, 雖然冈時佢都可能會錯, 但search多幾次再confirm吓, 又了解多啲! 準時放到飯, 咁飯後返大房睇吓有咩要幫手, 最終可以喺大房hea到放學, 繼續搵我要找的資料咁! 放工返到去仲又搵唔到佢件保暖衣, 又搞咗一排仲要煮埋嘢食先出到門口去球場, 繼續落住雨咁, 巴士又人多喎! 去完球場等老公嚟接我, 返到屋企咪做家務囉, 又要摺衫又要煮飯咁, 好在我套劇集睇得番, 咁正常開飯啦, 食到尾疑似唔知魚柳入面係咪有骨, 搞到我嘔番一半嘢出嚟都好似仲有嘢喺喉嚨咁, 最終食咗雪糕之好似好番, 真係嚇死我!

12/1/26

 12/1/26     MON     RAIN

今日出師不利, 舊雲追住我嚟落雨, 可惡! 我又完全冇預計過會有大雨, 結果濕到透哂, 到第三堂先叫做乾得哂, 要用個人體溫去烘乾佢! Week A的星期一都係一個悶字, 不過只可以話悶好過忙, 但學生家長遲咗差不多半個鐘先到, 我真係等到餓鬼死, 不過有樣好就係勁唔想上最尾嗰堂都叫做冇上到, 因為個學生去咗大房, 咁我行完上去咪又行番去咁, 加上食飯慢慢食已經遲咗3個字, 最終hea多半個鐘就收工啦! 返到去處理吓自己先, 然後仲爺話整tea我食, 係碎蛋沙律包, 都算係佢第一樣要開爐整比我的食物, 點都要post吓嘛! 老公返嚟揍佢去踢波, 我就要摺埋啲衫同埋煮飯啦, 可惜今日個電視收得唔好, 我都冇得睇我想睇的電視, 唯有開youtube就算!

11/1/26

 11/1/26     SUN     COLD*

今日冇出過門口, 瞓醒食完早餐都咁上吓時間, 子元要出去帶波, 老公要車佢去, 我就喺屋企, 先打比阿媽啦, 再同仲爺溫書, 同佢溫書真係勁辛苦, 態度又衰, 明明係唔識咪再記囉, 我又冇話要你一定要馬上識哂, 反正仲有時間, 但佢就係多多事實, 唔識扮識, 最終溫到三點幾收手, 因為佢一副攰樣你都知溫落去都冇意思! 食完嘢我就開始hea同打機啦, 因為電視被播緊波, 咁我就冇得睇劇, 要等到播完哂先有呢! 老公煮晚餐, 簡單食雞腿, 咁又過完個weekend 啦! 

10/1/26

 10/1/26     SAT     COLD

今朝子元就出咗去溫書, 咁我地起身就食完早餐再出去買咖啡買餸, 買完返嚟老公佢地都要出門口去踢波啦, 咁收拾好啲嘢就做清潔, 開住波子嚟做家務啦, 點知做到尾聲時突然冇哂聲, 原來停電呀, 頂...check咗應該唔關我地事, 咁應該係條街全部停電, 唯有等啦, 好在都唔係好耐就有番電, 咁我就可以整嘢食同睇電視, 過咗一個悠閒的黃昏! 食埋晚餐就沖涼, 然後繼續再睇電視, 佢地都差不多9點先返到嚟!

9/1/26

 9/1/26     FRI     COLD

今日撘巴士返工, 但每次撘完都會想自己踩番車, 因為真係會令你遲到, 同埋真係要等好耐, 今日又大風喎, 幾辛苦先返到工, 仲要遲到咗10分鐘, 不過都唔係成日遲, 都冇咩問題! 加上今日我知道係閒更, 都冇咩所謂! 不過今日真係閒到有啲無所事事, 所以都冇咩好寫, 總之就準時放工, 老公嚟接咗我就返屋企食嘢休息, 晚餐食意粉, 我仲係周身唔自在咁, 始終呢到痛嗰到痛都唔知點咁, 繼續係咁睇電視, 真係好浪費時間, 但又真係咩都唔想郁喎!

8/1/26

 8/1/26     THU     RAIN

今日請咗病假, 基本上都係喺屋企, 朝早打咗返學校請假, 但冇得再瞓番, 工有得請假, 阿媽呢份工係冇假放, 照樣要起身整早餐叫隻豬起身, 送佢出門口返學, 跟住就只係睇電視打機休息的一日, 因為真係冇咩可以做, 肚餓就食嘢, 到仲爺返嚟就要準備出去踢波, 係有雨但唔算太大, 但累積下同落車時, 路面都變哂河! 晚飯等老公返煮A餐粟米肉粒飯, 食完沖涼啦! 之後子元收到消息, 佢第一志願收咗佢啦, 咁只要佢考好settlement 埋就掂, 咁就好啦!

7/1/26

 7/1/26     WED     ICE!

仆街, 我今日真係仆咗街, 估唔到我幾小心都係成為咗冰地的其中一個跌到的人! 我已經知道今日地下好滑, 亦已經好小心, 奈何上斜嗰到小車行, 又見到有人過馬路, 我就收油啦, 點知架車一滑就向後反, 我就向後跌, 手踭落地又係右手, 單車壓住我, 路人過嚟扶我都差啲跌, 不幸中之大幸後面架車仲好遠, 咁我仲可以慢慢運車同人去路邊先, 路人確保咗我冇大礙佢先走, 我仲回緊魂, 其實我都唔知自己停咗幾耐, check緊自己手踭郁唔郁到先, 再檢查吓架車, 跟住對面馬路有個女人過嚟, 原來佢喺對面屋, 見到我跌到後過嚟, 好心到問我洗唔洗去佢屋企休息吓先, 但我呢啲社畜只係知道要返工, 都冇接受佢好意, 慢慢再上路, 之後個同事話我做咩唔請假, 嗰吓我真係冇諗到, 咁都出咗門口行咗一半, 其實都好唔抵! 所以返到去同阿姐講咗, 佢地都係叫我去搵first aid睇吓先, 亦都係敷冰先, 都冇咩可以做, 咁今日我就基本上全日都喺大房, 扮吓工咁啦, 放工時其實都好驚架, 但都冇辦法一定要靠自己, 點知已經好艱辛的路上仲要收到仲爺電話原來冇帶key, 但我真係救佢唔到, 最終叫佢自己撘巴士返嚟, 阿哥咪喺屋企囉! 返到嚟settle咗自己食咗嘢, 除咗坐冇咩可以做, 就係慢慢放鬆咗個人之後, 身體其他部位的痛開始浮現, 睇嚟我明日都係請日假穩陣啲! 又要寫email...唉! 今晚完全唔洗煮飯同洗碗, 原來係幾好Feel! 慢慢沖埋涼就休息啦!

6/1/26

 6/1/26     TUE     VERY COLD SNOW

今日終於係要開工啦, 真正有學生的開工, 都係如常啦, 冇事發生就已經係好事! 可能今日有雪落所以心情好好, 始終難得落一次雪嘛! 可惜係最大雪時喺課室冇機會出去玩, 不過放飯時都影到少少雪地可以出吓post! 點知去到staff room冇電喎, 用唔到微波爐, 醒起sixth form building都有就攞去加熱, 費事又攞返去staff room食, 就去大房食就算, 然後又要開工囉, 因為係大姐嗰堂, 交差咁都要努力! 原來學校局部停電, 飯堂用唔到電腦, 變番哂人手寫名, 好痴線! 第五堂好似回復到正常, 不過我就坐咗成堂, 因為學生自己喺電腦做嘢, 好在我個位可以收好部手機打啫! 放學小心地踩車返去, 好怕black ice! 因為太凍仲爺冇波踢, 所以又可以hea喺屋企啦, 仲爺玩咗好耐lego, 估佢唔到! 所以都係hea完就煮飯, 睇到個新菜色一窩雞脾, 又真係幾好喎, 夠哂方便! 食完洗埋碗睇陣電視就沖涼啦, 不過hea到咁上吓又差不多12點!

5/1/26

 5/1/26     MON     VERY COLD

今日又要開工啦, 放完個長假, 又零下溫度, 又用新車, 真係好多變數咁, 所以好早我就出門口, 以防萬一慢慢行, 差不多半個鐘先返到去, 今日飯前基本上係全training, 第一轉都可以, 因為坐最後, 但小休後要被分配坐邊, 都唔知為咩, 其實諗番係幾唔專重, 我知佢都係想大家唔同friend 坐留心聽又討論吓, 但大家都知為train 而train架啦, 邊係真心想聽, 仲要差不多兩個幾鐘, 攰死人, 因為我坐最前枱呢! 終於捱到放飯啦, 今日飯堂有飯, 不過只係焗薯, 一杯仔湯同麵包, 查實都幾唔開胃, 但餓到咁上吓係唔會理有咩食架啦! 下午叫做department開一轉會就自由時間, 本來都冇咩, 點知有個同事拆聖誕掛飾時跌到落地撞到個頭, 應該都冇咩的, 但都幾嚇人! 準時收工, 明天先再對住班生番! 返到去先食嘢, 餓! 我又冇同仲爺溫書, 真係試一次唔理佢睇吓會點, y7啫仲有時間! 夠鐘佢就去踢波, 我就要摺衫同煮飯, 今晚應該都會早眼瞓架啦! 

4/1/26

 4/1/26     SUN     VERY COLD*

最後一日假期啦, 都係hea住過, 又冇出過門口啦, 實在太凍真係唔會想出街! 瞓到自然醒起身食早餐, 等老公煮早餐時盡快做咗清潔先, 因為11點半又有節目要睇, 要去睇造星呢, 主力都係想睇某幾個, 但最估唔到大熱嗰個只得第二, 不過整體嚟講都好睇! 睇完又有啲失落啦, 冇咩好做等食, 老公炸咗雞脾, 食嘢睇波咁, 完全係hea! 細佬悶到攞新嗰盒大富翁出嚟玩, 都有啲難玩, 不過邊玩邊睇說明都OK, 7點幾就食飯啦, 食完仲要睇埋模範的士呢, 睇完都9點幾先沖涼休息!

3/1/26

 3/1/26     SAT     VERY COLD

今朝瞓到10點起身諗住都趕得切giv仔嚟到, 點知佢手車真係好快, 未夠10點半已經到, 快手換好衫招呼人, 買咗飛去睇戲, 食埋嘢都要預備出門口, 佢地話食炸雞脾, 咁就整好比佢地食, 我地都食埋早餐先, 都係簡單食丁麵, 然後就渣車出去商場, 期間佢就講番佢同sun仔件事, 係有啲可惜但人的緣份冇就係冇! 去到商場真係只係直接去戲院, 坐到差不多夠鐘就入場, 仲要完全冇人睇飛, 真係懷疑有冇入錯, 不過見到全部都係香港人就知冇錯, 等咗差不多25分鐘廣告, 終於開場, 咁都真係好好睇, 只係室內愈坐愈熱, 空氣冇咁流通差啲! 可惜係睇完都係搵唔到poster影相, 唯有喺戲院門口影就算, 返到去因為大家都冇食lunch, 就早啲食邊爐, 反正都係煮起比啲細路食, 佢地又唔可以太夜走, 玩到7點都要走, 咁我地又hea吓沖涼休息!

2/1/26

 2/1/26     FRI     VERY COLD ICE

今日自然醒瞓到11點幾12點, 真係好誇張, 星期一要返工啦, 都要早番啲瞓先得! 起身食嗰個都唔知應該係早餐定午餐, 食完嘢就要出去買嘢, 先去broadway睇吓有冇打邊爐個爐賣, 但都係冇, 咁就買完餸再去B&M睇, 所以走幾個場都4點幾先返到屋企, 仲要時間染埋頭髮, 又要煮晚飯, 老公整咖哩雞翼做晚餐, 又係睇電視同hea, 係幾冇意義! 咁又過完個假期咁滯, 好在嚟緊都係6個星期又放term break!

1/1/26

 1/1/26     THU     VERY COLD

今日香港人會做的其中一件事就係睇叱吒, 我地今日都遲咗起身, 梳洗完快手衝落樓開電視, 因為11點半就開始, 真係一個好重要的節目, 基本上一睇就睇足4個鐘架啦, 冇mirror的叱咜, 十大真係一首都冇, 但去到最受歡迎組合, 男歌手同歌曲, 依然係mirror同姜, 姜直情係高票勝出, 咁又過咗大半日, 係時候預備晚餐個鴨湯打邊爐, 點知打打吓發現個爐唔滾, 應該係死咗啦, 唯有再買過個啦, 個爐已經服務咗我地20年, 放過佢啦! 咁冇得打邊爐唯有老公入廚房一品窩, 洗完碗係時候睇番模範的士, 但今次兩集完唔到!