14/8/24

 14/8/24     WED     HOT

今日節目豐富！起身先同婆婆去飲茶，然後買埋飯團就出發入迪士尼，實行又嚟窮遊！約咗煊1點入場，今日冇太陽其實已經冇咁熱，但人多都係熱！入去先行禮品店涼吓睇埋巡遊就去玩蟻俠同Ironman，本來諗住玩Frozen ，但又壞要等，唯有食嘢先，玩吓其他嘢，主要係公主區！最終都係玩唔到Frozen同睇音樂劇，反而去玩轉迷離莊園同船仔就走，因為約咗康傑老師們喺荃灣晚飯，傾到9點幾先走，仲仲冧到老師們好開心，同蔣老師們一齊撘巴士返嚟，沖涼休息！

13/8/24

 13/8/24     TUE     HOT

今日要去攞番身份證，瞓醒出去都11點，食串燒賣算，原來繁忙時間真係好多人，攞完就撘巴士去奧海城，邊架巴士啱就上，太熱！去到先買飛睇戲，今次有現金就用現金先，再去food court，仲仲要食三餸飯，咁就一齊食，然後去咗行商場，飲番杯咖啡先，玩咗$20Namco掟彩虹，再喺無印買咗件背心，明天去迪士尼著！夠鐘買埋popcorn去睇戲，細佬要睇壞蛋掌門人，睇完差不多5點，都係時候返屋企， 又可以執吓嘢，將啲濕碎嘢塞埋入箱，食完飯沖埋涼休息！

12/8/24

 12/8/24     MON     RAIN HOT

今朝瞓醒去荃灣搵嫲嫲食午餐，我想食燒味飯就去聯發食，然後去荃灣廣場行，再去愉景新城，又去Namco 燒錢，食吓嘢再去咗sixty-eight 買咗幾百啦！跟住返嫲嫲屋企hea到7點幾就落樓下食嘢，但食咗間唔好食嘅日本便當，可惜！最後撘地鐵返去沖涼休息！

11/8/24

 11/8/24     SUN    VERY HOT

今日休息一天，琴晚又睇奧運到好夜，陪唔切阿媽出去買雞，咁就出去食個早餐，今日想食粥，食完返去休息，下午煮咗午餐一齊食，然後hea到黃昏，去阿嫲屋企，約咗阿妹一齊同我食生日飯，食埋蛋糕就走啦，我仲帶仲仲去松記食埋糖水先返去！

10/8/24

 10/8/24     SAT     VERY HOT

祝我牛一快樂！今日主要活動就係海洋公園之旅，10點幾出去食早餐，梗係食茶記！撘地鐵去到海洋公園站，先買飯團做午餐，再換好飛就入得場，先去冷氣地方抖抖，咁就買咗個斜揹袋，好懷舊架！跟住行海洋館，仲仲係咁影相，都睇得好高興，因為天氣太熱，可以留戶外時間唔多，睇埋亞洲動物天地就去埋兒童王國但轉哂樣，唯有玩轉木馬就走，食咗飯團填吓肚，就撘海洋列車上上面，都係去有冷氣的地方，睇企鵝睇海豹影吓相，去玩咗一次攤位遊戲，仲仲中咗隻LuLu豬，開心死佢！然後玩咗急流涼爽吓，都差不多啦，撘番覧車回程，換埋衫撘車走，夠皮了！返元州食咗便當，阿媽未餓，咁我地食完買外賣比佢，返嚟沖完涼舒服番啲，真係好攰啦今日！

9/8/24

 9/8/24    FRI     VERY HOT

今日約咗嫲嫲出去飲茶，同埋老板啦，飲完茶我最終去書局買咗幾本書，仲有8折平咗百幾！天氣太熱，去咗嫲嫲屋企避吓暑先，到兩點幾我想去按腳，仲爺又要跟我去，咁就按咗個幾鐘，兩個要5百幾蚊，跟住去咗熊貓酒店行，佢兩個細終於買到想要的模型，我又喺Aeon買到嘢，幾好！最後食埋泰國嘢，上嫲嫲到攞埋海味就撘的士返去，仲要執埋行李先沖涼，太多嘢一定要pack 咗先知仲淨幾多位！

8/8/24

 8/8/24     THU    VERY HOT

今日中午約咗嫲嫲飲茶，我地想去Donki，所以就去荃灣西，飲完茶就行donki勁買零食，我都覺得太過份！因為太多嘢一定要返屋先，行到返去都濕哂，沖個涼休息吓先，今晚約咗煊上佢屋企食飯，等到日落西山先出門口，約咗喺地鐵站等一齊行上去，返到去都食嘢先肚餓啦，邊食邊睇電視，傾吓偈咁都好輕鬆！到咁上吓煊煊竟然攞個蛋糕出嚟慶祝我生日，超級驚喜，我真係完全冇諗過有生日蛋糕，真係好有愛！10點幾點都要走啦，唔好阻人太晏！返去沖涼同老公傾吓電話，講吓仲仲的戰利品，喺煊到攞咗隻公仔走！