7/10/24

 7/10/24     MON     COOL

今日本來好地地, 工作都唔太難, 但第一堂要跟遊蕩生周圍行唔易, 又唔可以比佢發現係你跟佢, 又要知道佢喺邊, 不過我係enjoy呢個遊戲, 好過唔知去邊坐喺個課室吽, 咁我個學生10點返, 我還咗玩到9:55就算, 一路都好順利直到臨尾, 見到飯筒應該捉咗佢個同伴, 佢就開始發現我, 咁我見時間都差不多, 確認咗佢大概喺邊就算, 去接我個學生, 點知行番去日本花園時, 飯筒捉住我又喺到擺款, 叫我要跟貼佢呀同佢講嘢呀等等, 又話最尾10分鐘唔見咗你, 我都駁駁地嘴架啦, 但都係盡量答佢OK就算, 不過心底都係火, 心諗你而家唔係我老細呀, 關你叉事咩小你! 跟住今日都係如常開工同埋悶啦, 準時放工接仲仲, 我仲早過佢去到教堂呢! 條友掛住吹水咁慢! 返去食完嘢就揍佢去球場, 返嚟又要準備晚飯嘢, 又要摺衫等等! 老公回來煮埋個雞煲就食飯, 之後hea吓睇埋電視沖涼休息!

6/10/24

 6/10/24     SUN     WARM

今日都冇咩嘢好寫, 主要係因為冇咩做過咩, 朝早起身食完早餐, 要出去幫barry佢地買埋清潔用品放埋過去就返屋企, 然後都冇做咩, 睇吓波煮吓午餐咁, 老公又約咗人傾電話, 我反而唔記得打比阿媽, 但時間已晏就唔打啦, 之後細佬話佢有啲唔舒服, 最終食咗幾款藥, 因為又有啲燒, 好在有退燒藥, 食咗又好啲! 因為太晏食午餐, 所以8點先煮晚餐, 食得嚟洗埋碗都九點幾, 明天又要開工!

5/10/24

 5/10/24     SAT     SUNNY

今日瞓到自然醒, 老公揍子元去比賽, 我就喺屋企同仲仲做功課仲有做清潔, 時間掌握得好好, 佢地踢完波返嚟已做好哂, 叫埋外賣食完就出去買餸, 仲要攞埋嘢去Barry屋企, 等佢地嚟到有啲嘢用, 返屋企又可以hea啦, 做好哂嘢啦嘛, 開咗套新劇因為do姐介紹架嘛, 真係好好睇, 不過未完唔好睇咁快唔係又要等, 晚飯食薯仔雞翼咋, 因為下午食得晏都仲未餓! 食完再無聊多陣就沖涼休息!

4/10/24

 4/10/24     FRI     COOL

返埋今日又放假啦, 今日都算過得舒服啦, 只係個學生仲係有啲傷風咁, 我都盡量保持距離, 放飯時仲食咗包中藥打個底先! 上堂繼續做好嘢, 不過Business堂啲學生真係好煩, 本身已經係咁蝦個老師, 我都照忍, 但佢開始嘈到我都頂唔住要出聲, 然後就喺到大笑, 我都知佢地唔怕老師但真係令我嬲嬲地! 不過都放學啦, 夠鐘走人我好忙呀! 先要去Broadway攞仲仲的隱形眼鏡, 我順手去攞埋藥, 返到去食嘢休息摺衫再食嘢, 好似隻豬咁! 仲仲去咗練波!

3/10/24

 3/10/24     THU     COLD

今日出咗門口先覺得凍, 明天都係著多啲衫穩陣! 返到去照樣開工啦, 今日都算還可以啦, 都係咁多嘢上, 不過都有時間睇吓書都係好事, 都遲咗放飯架啦, 不過有得食都好好架啦! 放學亦都準時, 去到接仲爺發現唔見佢喺教堂門口等, 以為佢跑步比賽完仲未返, 入咗學校搵佢又唔見, 佢班主任就同我去reception打電話比Lucas媽媽, 因為我話佢會一齊等, 就喺佢打到比佢時, 我就見佢地三個行緊返嚟, 應該係仲爺聽到我話今日會去超市買餸, 佢就一齊行咗去嗰頭等, 真係比佢激死! 最緊要冇事! 去買完餸就返去啦, 簡單預今晚煮粟米肉粒, 老公揍仲爺去踢完波返嚟煮! 

2/10/24

 2/10/24     WED     COOL

今日天氣還好啦, 順利返工返學啦, 都係照樣咁開工, 都要好好上堂, 等到夠鐘有得開飯, 最難搞係臨放學個學生又話要做埋題數, 終於行得佢又話要去廁所, 但已經3:12啦, 得番3分鐘, 老實我真係覺得佢要學吓time management, 我都真係理唔到咁多, 啲學生都出哂嚟, 好在見到佢家姐嚟到, 交咗比佢就算我要去接仔! 返到去都係休息吓咁啦, 又要叫仲仲去做數, 佢好乖咁做咗就可以同同學打機! 摺好衫休息, 老公返嚟就煮飯, 佢唔洗揍仔踢波就佢負責煮! 

1/10/24

 1/10/24     TUE    RAIN

明明今朝睇話冇雨, 點知係返學嗰一陣冇啫, 之後差不多落足全日! 返到去收到新order, 除咗跟自己跟開嗰個學生, 仲要每日頂一堂跟住個淨係喺學校得個行字的學生, 其實我都冇咩, 只係佢成行又落雨喎, 好在我有防水褸, 原來都幾頂得, 跟住都係咁照常開工食飯冇咩特別, 放工走人, 快啲去接我隻小仲仲, 返到去仲要倒垃圾, 因為我太濕關係, 叫佢兩個好好地幫手攞啲垃圾落嚟, 咁我就唔洗濕淋淋咁行上嚟! 今晚仲仲要練波, 咁我準備咗晚飯料就得, 老公返嚟先整雞煲, 仲可以煮菜, 照正!