7/6/26

 7/6/26     SUN     COOL

今日其實只係手術後第二日, 我都算準備出門出好幾個鐘, 都算係大膽! 朝早6點幾醒咗去完廁所10點幾先再醒, 不過瞓到條腰都痛, 起身等老公煮早餐食, 我就洗衫摺埋啲衫先, 因為老公今日去踢波嗰到隔離正正有個香港人端午市集, 咁有緣都可以去八吓, 仲有半個鐘車程咋嘛, 車上車落我又可以坐, 問題不大的! 去到都係行吓企吓坐吓買嘢食咁, 其實嘢食一般啦, 有音樂表演但仲爺想玩又勁驚咁, 係唱得唔好架啦, 但要學習面對群眾唱歌係難, 慢慢嚟啦! 夠鐘就要過球場啦, 我喺門口坐咗陣吹咗陣風, 但都係想喺車等, 太大風啦! 等到7點到先踢完, 就跟大隊去食間香港人茶餐廳, 不過真係唔太好食囉, 食完返屋企都9點幾啦, 快啲沖涼休息!

6/6/26

 6/6/26     SAT     RAIN

今朝6點幾就醒咗, 然後瞓唔番, 但個人其實又攰架喎, 好矛盾! 8點幾老公帶咗仲爺去練波, 我就繼續hea到咁上吓先起身煮早餐, 明明叫子元幫我煮但條友又借啲二又唔煮, 咁我唯有靠自己, 但食完梗係叫佢洗啦, 然後繼續休息吓先! 到點幾覺得自己應該可以支撐到去買餸, 咁就換衫出去, 慢慢行又有手推車其實都可以, 但原來都真係幾攰, 行咗半個鐘咋喎都已經冇咩力, 所以都係繼續返屋企攤吓算, 繼續等食! 可能朝早起得早, 所以都真係攰尤其黃昏時間! 終於洗埋碗, 差不多10點要沖涼休息啦!

5/6/26

 5/5/26     FRI     WARM

今日係大日子, 人生第一次全身麻醉做手術! 跟住仲要朝早就收到ILR successful個email, 咁真係樣樣都大單嘢! 襯個腦仲運作到記錄吓! 禁食禁水, 淨係朝早今飲咗水食藥, 7點半未夠去到醫院, 真係要7點半先叫名入去, 先係要除哂衫藥手術袍, 但我都要求咗底褲著, 太性感搞唔掂! 然後就開始咗漫長的等待, 基本嘢驗血驗尿量血壓, 跟住係咁問嘢, 又要簽consent, 到10點幾開始就係等, 都幾慢長吓, 因為又餓又渴, 仲要第一個去做手術隔離床11點幾已經返咗嚟, 佢就真係好好彩可以排第一, 原來我係排第五, 結果, 我等到1點半先起行, 完全唔記得send message比老公, 不過佢都明的! 去到麻醉室, 我處於勁緊張的狀態! 我知自己震緊, 不過啲醫護人員勁專業, 除咗第一針種豆痛一痛啦, 跟住聞住氧氣落咗藥, 同佢講咗幾句嘢, 最後聽住佢講咗句叫我諗吓啲開心嘢, 我就冇咗知覺! 醒番時已經3點幾, 暈住喺recovery房, 都係等到適合先可以返病房, 期間對面床個男人, 應該同我差不多時間, 但佢好搞笑, 令我輕輕鬆鬆咁過渡咗呢個時間, 因為佢斷哂片咁成日要走落床, 一係叫極都唔醒, 一醒又要走落床, 笑死大家! 返到病房搵老公, 等佢預番時間嚟接我, 咁我就快啲飲水食嘢盡快去到廁所落到床, 疴到尿之後已經冇咁痛, 但手都痛呀, 右手又比人種多咗兩針, 除針時又流哂血, 搞完一大輪, 預到老公咩時間到就同護士夾番出院信, 咁啱醫生嚟手術後詢問, 睇吓我咩情況, 原來佢除咗割出面個肌瘤, 連入面大嗰個都割埋, 得番好細嗰粒因為是沒有突出來的所以不用割, 靠IUS減弱佢就得! 6點老公嚟接咗我返屋企就靠子元照顧我先, 佢又要返球場接仲, 我就食咗個薯蓉就飲吓水食咗止痛藥睇電視休息, 等到老公佢地買咗麥記返嚟食, 今日食咗全日都西餐呀! 明天要食粉麵先得! 10點幾返房沖涼, 真係要休息!

4/6/26

 4/6/26     THU     WARM

今日都係在家休息啦, 不過今朝等佢地出哂門口, 到咁上吓我就做埋清潔先, 因為明天一早就要去醫院啦冇時間做, 咁不如今日有氣有力做咗先, 跟住摺埋衫先, 然後有啲餓就煮咗個麵食, 老公今日請咗半日假, 因為我下午要去park royal嗰邊肝科第一次睇, 嗰個位又真係比較吊腳, 咁老公放工時叫咗外賣先, 返到嚟就有得食, 食完就可以出去! 去到都係睇咗十幾分鐘, 醫生只係睇咗我啲報告, 但又冇照過啲咩, 都冇咩可以做, 所以先去驗血, 6星期後照肝, 再book咗兩個月後再睇, 咁到時再睇吓點! 返到屋企繼續hea, 因為抽完血隻手都痛, 老公揍完仲爺去跑步就返嚟煮飯, 食完9點幾就沖涼休息!

3/6/26

 3/6/26     WED     WARM

今日繼續在家休息, 都係趕咗仲爺起身返學啦, 子元就自己一早返咗學校溫書, 下午先考試! 所以食完早餐我都係hea吓先, 聽住radio打吓機再上房開電腦, 因為收到ILR第三個email, 即係話差不多會出埋successful嗰架, 但都爬吓文睇清楚情況, 跟住又收到醫院consent form, 又要叫AI睇一次, 到咁上吓肚餓要煮嘢食啦, 然後都係睇電視, 佢地返嚟就洗埋衫晾衫等等, 今晚老公可以煮飯, 咁我可以休息一天! 食完睇電視到9點幾就沖涼休息啦!

2/6/26

 2/6/26     TUE     RAIN THUNDER

今日天氣真係好得人驚, 落大雨又天晴又再落, 都幾嚇人架! 不過我都喺屋企, 影響不大, 若果今日真係要返工, 可能我真係會撘巴士! 趕咗仲爺出門口, 子元話佢返學校溫書, 咁佢食完早餐先出去, 條友睇定天氣先, 落大雨前就返咗嚟! 我本來以為要收醫生電話先可以出醫生紙, 但原來係1點前會send嚟, 咁收到我又send埋比學校咁! 點幾食午餐, 食完都要準備睇court大結局, 真係好正! 之後都係催吓仲爺郁啦, 條友總係有十萬個借口, 等我好番我就唔會再對佢放軟手腳! 老公返嚟食埋嘢就帶佢去練波, 咁我又要煮飯, 然後都係睇電視沖涼休息!

1/6/26

 1/6/26     MON     WARM

今日繼續在家休息, 喺屋企活動係夠力的, 又要等醫院護士打嚟做手術前查問, 所以朝早都係有啲緊張, 心跳都加速埋, 我到3點多先叫做好啲, 之前真係一路都勁快, 點都慢唔到, 真係搞掂哂啲電話先叫做正常番! 因為12點幾食嘢, 所以老公返嚟時我都餓, 所以都煮咗丁麵食! 佢同仲爺去咗踢波, 我就要煮飯囉! 又睇哂4集成何體統, 又要等先有得再睇! 9點幾就返上去沖涼啦, 仲要量埋血壓呢, 好多嘢要prepare定星期五手術嘢!