28/2/19

28/2/19.    THU.    COOL

今日如常咁返工返學啦，蒸咗包返去食，加埋冇味脆片同齋啡，叫做盡吓力咁啦！上午都係冇咩做，襯阿姐出咗去就係咁放縱上網，又睇淘寶等等，午飯後都係打吓機啦，下午除咗打機點都搵啲嘢做，所以時間都過得好快，放工返到美孚食香港地咋，嫲嫲唔煮嘛，食完返去沖完涼就hea，睇完晧钄先同兩個睇功課溫書！

27/2/19

27/2/19.   WED.    COLD

今日仲爺學校活動，9：30先集合，所以可以揍我返工，一齊去工商食埋早餐先，我就返工啦，今日都係冇咩做，我地呢啲有分旺唔旺季嘛，呢幾日係淡季呢，所以都係打機吹水等等，午飯後睇吓電視啦，琴晚嗰集如懿都未睇哂！下午時間都係過得好慢，打咗好耐機又update埋個更表，終於等到放工，返到去有飯食，但飯後又係要我鬧，要我勞氣！飯後都係要收拾玩具架啦，最後沖好涼睇埋佢地功課溫習等等，我都攰到10點幾已經喺梳化瞓咗！

26/2/19

26/2/19.    TUE.    COLD

今朝捉佢地起身真係好難，所以子元出得門口都好遲，好在返學冇遲到啫！今日返到公司都冇咩做，所以都係行行企企食飯幾味咁，又幫同事整吓親子勞作咁啦，整朝其實都好似冇做啲咩咁，下午要出去training，所以食完飯就出發，同Tim及紳士一齊撘巴士過T1上英文堂，要上4個鐘其實真係幾攰吓，不過學啲嘢都係子元剛學完嗰啲，但原來我都係唔多識架！6點放學就返企，喺惠康又買咗一堆嘢，都係糧食啦，返上樓準備食飯，之後都係清潔沖涼等等啦，仲爺明天唔洗交功課住，但嫲嫲都叫佢做哂架啦，所以等我沖完涼就k.o.佢，再到子元的功課，還有看他的溫習冊，迫到佢用這方法溫書非常好！

25/2/19

25/2/19     MON.    COLD

今日都去如常返工返學啦，我買早餐返公司食，跟住都係要做嘢。11點無端端俾人捉咗入去開會，焗住都要出席架啦，仲要同我講開完會先話要會議紀錄，好在我到drop得齊！！你咩姐如果唔係點㗎喎。終於到食晏，食完都係打我機啦，我又要做嘢啦！我都係做下野吹下水咁啦終於捱到收工，搭地鐵返去，又係閙仔鬧餐飽，食完飯都去洗碗抹地啦，點知入到我間房，發現張床亂七八糟，地氈就飛咗上天，激到我訓話左一大餐。

24/2/19

24/2/19.   SUN.    COLD

今日都算出咗一日街，本來朝早子元要踢波，但因為落雨取消，所以可以繼續瞓，9點多起身煮早餐，佢地已經玩到一屋都係玩具！食完早餐執埋嘢，落到樓走咗去睇捉野豬，真係有隻野豬走咗嚟屋企樓下，兩個衰仔睇到唔肯走，比佢激死！然後去咗新蒲崗，因為2點要去玩木箱鼓，好在我最終都找到個地址咋，TVB嗰邊真係冇send email比我囉，同埋估唔到真係有人嚟拍，仲應該會放在think big天地播囉，不過玩足個幾兩個鐘，子元就頂得住， 仲爺尾段開始扭計呢！差不多4點多先走，去咗附近食嘢，然後直接入屯門，老公今晚踢波，就入去先玩吓屯門公園個遊樂場，人多就不在話下，仲有啲好串嘅家長，特別的滑梯個個都想玩耐啲，但你玩足個幾兩個字，都唔諗吓排的人要排幾耐，我攞明串佢架啦，最憎呢啲人完全冇公德心！去到球場陪佢地玩咗陣先，開波後我就睇劇啦，睇到散場就去食埋晚餐，返到屋企已經11點幾，明天又要返工返學啦！

23/2/19

23/2/19.   SAT.    COLD

今朝子元要補英文，捉佢起身之餘仲要做埋啲英文呀，成日都係咁！等接佢去埋下一場畫班才去食早餐， 然後返去捉仲爺做功課，條友今日唔想做，所以進度好慢，搞到要老公車去地鐵之餘仲要好趕呢！佢去上音樂時我就食午飯睇劇，夠鐘去接仲爺再去麥記食嘢，Joyce好心地攞把遮嚟，等我陣間去球場唔怕落雨！點知去到金鐘時先收到話取消，仲爺即時好失落，好在有相有真相， 濕到咁點踢啫！咁返屋企咪睇電視囉，子元就去游水！我就睇住時間煮晚餐，最好都係食粉啦，簡單方便！之後睇埋笑笑小電影就唔該沖涼做功課，打暈埋仲仲，終於可以休息吓啦！

22/2/19

22/2/19.    FRI.    COOL

終於捱到星期五啦，今朝都係老公揍仔返學，我就可以好早返到去食埋早餐先返公司，雖然好趕但以我光速都食得切，返到去咪做吓公事再打吓機囉，時間都過得快，食完飯打吓機咁啦，下午真係悶到一個點，幾想搵水吹，終於等到放工，慢慢行過去球場，仲買到個我需要的碗可以滾麵，去球場等到8點幾子元才閃得，快手返美孚接仲仲，同程家食埋晚飯才回家，兩個都攰到顛，沖完涼喺梳化著好衫就瞓咗，唔怪得我沖完出嚟時咁靜！叫醒佢地入房瞓，我就可以自由時間了！