30/11/21

 30/11/21     TUE     COLD

今朝老公要我去埋炮哥嗰邊幫手, 結果搞到我有啲感親, 佢屋企實在太凍, 仲要室外幫手, 真係唔掂! 11點幾叫老公車我返去, 買少少餸就行返屋企, 邊睇電視邊做好多嘢, 又摺衫又整午餐, 又要問埋明天啲shipment幾時到, 仲要答覆埋個香港人幫佢揍仔啲嘢, 賺番少少幫補吓都好! 夠鐘就去接仲仲, 返到嚟又要趕仲爺快啲收拾好, 炮哥夠鐘就嚟接仲爺去打波, 我就煮晚餐, 老公今日又吹親, 係咁話頭痛, 回來咩都冇做, 沖咗個涼就等食等瞓! 唔通我就唔攰唔痛咩, 我都凍親背脊痛啦, 咪又係要做哂全部嘢, 有時真係幾火! 

29/11/21

 29/11/21     MON     VERY COLD -2度

今朝真係凍呀, 我都開咗件雪褸出嚟著啦, 買咗梗係著盡佢! 掛住幫架車溶冰, 子元唔記得咗帶飯, 搞到我揍完仲仲又要返去幫佢入錢等佢買飯, 然後老公logon去銀行又入唔到, 原來係因為嗰次佢過錢比我, 個額太大佢怕佢比人呃, 就唔比佢logon, 最終打電話去set番哂開通番個戶口都搞到10點幾呢! 佢就去炮哥到整嘢, 我就上網搵吓工, 食完午飯就摺埋啲衫睇電視, 夠鐘就去接仲仲, 返到嚟就預備吓晚飯啲嘢等老公回來煮! 食埋飯食埋碗就去上堂, 返嚟食個麵做宵夜, 幾充實!

28/11/21

 28/11/21.    SUN.    VERY COLD

今朝出晒太陽都係得零度，子元仲要去踢波比賽，好彩我唔使出去。差不多九點先至醒，快手叫佢哋起身，子元又要食啲藥，因為仲有少少咳。佢哋出咗去我先煮早餐同仲食，跟住就開始出去做功課，我都唔明啲功課咁少點解都仲可以做咁耐，嚟緊都要逼佢每日寫下字先得！如果子元踢完波返嚟佢都未做好，逼住要出完街先至返嚟再做，因為約咗事頭去接佢然後去Costco入下貨，今日Costco都好多人，又唔算買咗好多嘢，好目標為本咁買齊，買埋熱狗就回程，其實都係五點多，個天已經黑到半夜咁。返到去仲要買菜，老公今晚負責煮飯，咁我就開套個電視睇吓啦，不過佢又煮飯又要分返啲肉，結果九點先開飯，真係好慢！所以10點幾11點先至可以休息！

27/11/21

 27/11/21     SAT.    COLD

今朝子元都係話唔去練波，所以唔洗急趕，慢慢煮早餐食！10點幾出門去同仲爺買生日禮物，佢唔係要玩具，而係要結他，所以就去買咗支木結他！突然接到炮哥電話，話玻璃屋漏水，所以我地就過去睇吓，仲爺好搞笑，係咁幫佢地手砌傢俬，最終佢留咗喺到幫手，然後我地就去B&Q換貨買料，再去埋買生日汽球今晚party用！回去接佢已經3點幾，回家快手佈置，4點多佢地都過來，可以早啲玩吓，我哋就整吓嘢食，炮哥仲帶埋一大堆生蠔過來，食得好開心呀！然後就係打邊爐食蛋糕吹水，快樂不知時日過，仲爺收埋佢嘅禮物，係Harry potter洗樽，開心到佢呢！佢好喜歡今日的生日會！佢開心就得！

26/11/21

 26/11/21     FRI     COLD

今朝仲爺又唔合作, 加上子元唔洗返學我又唔知行程係點, 都唔知點煮早餐, 最終老公車我地去學校, 車我去買埋菜就回家, 佢就直接去事頭到, 我就開始吹水時間, 同IVY又傾咗一輪, 又同Nicho Whatsapps吓, 因為佢下年2月過嚟啦, 暫時佢係最近我嗰一個, 渣車都係大半個鐘車程算好近架啦, 都真係開心, 又叫佢幫手買啲藥! 之後都係煮吓午餐找吓工睇吓電視咁啦, 夠鐘去接放學, 真係勁凍囉加埋落雨! 今日炮哥車仲爺去打籃球, 然後老公煮晚餐, 咁我可以努力在電腦上啦! 

25/11/21

 25/11/21     THU     COLD

今日子元家長日, 但都唔係好知啲家長日係點, 成績表又唔似成績表咁, 但都有佢有quiz過的科目得咩級數, 都唔係好架啦, 不過好多科都冇讀過, 第一次讀係要啲時間, 但我希望佢學期尾可以去到6-7啦, 咁先有機會考好個GCSE! 返屋企等佢換番套便服就出去broadway買番條練波用的長褲, 今個星期六日得番2度, 都要準備吓! 然後去咗榮業行食嘢同入貨, 因為星期六同仲爺開surprise birthday party, 所以要準備吓打邊爐嘢, 仲再去broadway睇多次蛋糕氣球等物資, 返到嚟又再找吓工, send吓CV, 老公就整羊腩煲! 收到上次喺超市撞到個香港人的電話, 問我可唔可以幫佢揍小朋友, 其實而家未有工, 賺番少少外快都好, 幫補吓嘛! 多多少少都好! 見今日有時間就同仲爺一齊整埋棵聖誕樹, 但啲燈唔夠長圍哂全棵樹, 唯有明天等老公去換過長啲的款! 

24/11/21

 24/11/21     WED     COLD

今日整早餐先發現冇奶, 所以揍完仲仲返學又要去超市買嘢, 順手去買埋豬肉, 咁就可以包雲吞囉, 所以又用咗一個上午喺廚房, 試埋用隻英國皮去包都係唔得, 但就似普通鮮蝦雲吞嗰種囉, 唔係上海雲吞, 睇嚟我都要學自己整皮先得啦! 午餐就係咁試食囉, 試唔同皮唔同厚度等等, 咁就當一餐啦! 睇完電視開始又再send 吓CV, 希望有回音啦! 揍咗仲仲放學又要預備晚飯煲湯, 再揍仲仲去學音樂, 回來又趕吓煮飯咁啦, 因為今晚又要去上堂, 都係嗰句幾廿歲嚟學英文, 真係覺得自己好好學啫! 今日事頭佢地又偷懶, 因為炮哥想油埋間屋先! 上完堂返去笨元已經喺床瞓咗又唔閂燈, 仲爺就係咁彈ukulele, 明天子元家長日, 唔知有咩講呢!