31/8/24

 31/8/24     SAT     WARM

真係嚟到暑假的尾聲啦, 星期一就要開工! 今朝都瞓唔到好晏, 可惜! 子元要去做gym, 我地又要一齊去, 本來諗住喺嗰到食埋早餐, 點知係冇架, 唯有等到子元做完gym一齊去Broadway先食, 只係叫咗杯咖啡就算! 去到食完雞就同仲仲睇吓副眼鏡有冇得搞, 子元就去剪頭髮, 之後仲要去買餸啦, 最終因為想食牛腩, 去埋中超同超市先返屋企, 本來諗住做家務, 但最終只係hea喺到! 食完飯睇咗套電影先沖涼!

30/8/24

 30/8/24     FRI     HOT

今朝瞓到10點先醒, 快手梳洗食埋個早餐就同仲爺出去做運動, 郁咗呢幾日覺得自己都好似好啲, 不過條腰都仲係痛! 做完運動打埋波返嚟換好衫, 等老公放工返嚟就去costco入少少貨食埋午餐, 買唔算耐, 但車程先耐, 回程周圍都塞, 幾經辛苦先返到嚟! 先雪好啲貨再切定啲肥牛今晚雞煲再打邊爐! 最好笑收到子元學校email話因為佢數學科差2分去到grade 8, 免費幫佢申請查卷, 希望真係搵到多兩分返嚟啦!

29/8/24

 29/8/24     THU     HOT

今朝醒咗唔係好瞓得番, 希望明天可以瞓晏啲! 下星期要開工啦陰公! 終於肯離開張床煮早餐食, 又要食完抖吓先出去做運動, 仲要去郵局寄埋嘢, 去超市買啲奶, 咁就返去做運動, 仲爺仲要打埋波, 不過今日球場有啲街童喺到搞搞震, 好難專心同要特別留心! 返去煮午餐, 簡單食香港買返嚟的撈麵咋, 然後都係睇電視摺吓衫咁, 老公返嚟就揍仲爺去踢波, 子元要去睇住佢, 因為我地要去賓仔聽talk, 其實都係講番入咗post-16啲嘢, 我地都遲咗, 唔算太多嘢講, 最終佢都會send番個PDF出嚟, 下星期開始都要練架啦! 買埋外賣返去食完就可以沖涼!

28/8/24

 28/8/24     WED     HOT

今朝好早醒咗又瞓番, 點知牙醫診所又打嚟, 地產鋪又打嚟, 想再瞓都瞓唔番! 唯有起身處理問題, 先係牙醫要改期, 跟住係地產鋪打嚟催barry交訂, 真係比佢地玩死, 原來佢地返咗大陸, 好在已經返緊去, 最終我打去同地產鋪講叫佢等到今日3點, 好在佢地都搞得切, 終於唔洗再幫佢地睇樓! 食埋早餐仲要帶仲爺出去做運動, 佢又好辛苦咁樣囉, 返嚟沖完涼又冇哂事, 出門口前煮咗粥, 可以各自幾時食都得, 食完我都係睇吓膠劇又食吓零食, 嘆埋呢幾日冇架啦又要開工, 晚飯等老公回來煮, 食完梗係要食埋雪糕先啦!

27/8/24

 27/8/24     TUE     WARM

今日老公要返工啦, 我醒咗就睇機睇到9點幾先起身換床單食早餐, 要預番時間同仲爺出去做運動同買餸, 搵機會同笨元講番琴日的youtube事件, 其實佢最主要唔想自己睇到, 咁得啦, 你唔好睇咪得囉, 頂你搞咁多嘢! 終於同仲仲出到去做運動買埋餸啦, 返嚟煮午飯食, 簡單食麵咋, 同細佬打咗陣機, 然後都係睇電視呀煮飯咁啦, 子元去咗做GYM, 仲仲去踢波, 開咗膠戰睇, 真係唔會停到! 睇完沖涼休息!

26/8/24

 26/8/24     MON     WARM

今日基本上係冇出街, 瞓到10點多先起身, 煮早餐然後hea啦, 時間都過得好快, 要沖咖啡就要出去買奶, 你話附近有間士多係幾咁緊要, bank holiday嘛! 然後明明睇緊電視架嘛, 又要迫人打機, 到四點幾我唔想打啦, 自己上咗房睇機摺衫, 然後肚餓啦要煮飯, 咁就開始要煮飯, 但都幾冇心機煮, 好似仲未回哂魂咩都唔想做咁! 食飯睇電視時睇到一part話個小朋友笑另一個個媽媽post佢啲露肉照, 子元就諗佢本身個you tube account有佢一路啲片, 最終佢係覺得細佬search嚟睇佢唔鍾意, 佢想private哂佢, 但其實呢個係我個account嚟架喎, 關咩事呢, 點解你要管我呢, 最終我堅係發脾氣架, 覺得委屈囉, 你班仆街男人咁撚鍾意管, 管好自己先啦, 自己都manage唔好自己, 管咩人地呀, 啲片個樣係佢就屬於佢, 咁佢自己都屬於佢自己架, 咁叫佢自己養自己囉, 做咩要住我間屋食我啲飯呀, 愈諗愈火!

24-25/8/24

 24-25/8/24     SAT SUN     RAIN 

呢兩日係西行之旅, 又係去Bristol! 本身諗住早啲出發去一轉Cardiff, 但出車開始一路都落雨, 去完Services後發現去到都要12點幾, 但約咗2點左右去到May屋企, 計落條數都唔行得好耐, 所以就決定唔去住, 直接去咗May到算! 去到吹咗陣水跟住就可以出去買嘢, 要買定今晚的菜, 去咗中超又買埋啲無謂嘢啦, 返到去快食個麵又要車啲仔去打波, 然後真係忙! 返番去又係時候開始BBQ, 其實係大人燒細路食囉, 出面又大風, 燒吓燒吓都開始食唔落, 啲細路打機的打機, 打牌的打牌, 我地就好似工人姐姐咁喺廚房吹水, 點幾鐘要走啦, 返酒店排隊沖涼, 我沖完出嚟三個瞓哂! 我都要瞓啦3點幾! 較咗鬧鐘10點, 起得身過番May到食早餐, 個廚房忙到一個點, 原來13人真係要好大個廚房先得! 食完研究最終去邊, 但因為車唔夠, 若果要同埋May一家就去唔到, 加上天氣唔合適去海邊, 你話唔落水都係咁話! 最終去咗玩跳彈床, 啲細路超開心啦, 我地都係要睇住佢地之餘又要去買埋今晚啲嘢, 因為都要返去煮, 玩到6點閂門佢地先肯走, 返到去又開枱, 我地大人要煮飯, 之後已經好攰都冇咩力吹水啦, 10點多要走人, 好在路面情況唔錯, 順利返到去12點幾啦!