30/1/25

 30/1/25     THU     COLD

今日真係輕鬆好多，除咗冇時真係聽唔明佢講咩，其實都冇咩，仲可以自己安排食飯，幾好！跟住又準時收工揍仲仲，返嚟掛住同仲仲買相，完全唔記得咗子元家長日miss咗PE嗰個，是但啦係廢話！跟住又要對番哂仲仲啲數，佢明天有排改正，呢排黃昏時分好唔想郁，又凍又攰咁，所以晚餐好懶只係再食滷水就算！

29/1/25

 29/1/25     WED     COLD

大年初一，恭喜發財，可惜冇假放，仲要揍三隻小天使，真係好攰，都唔想記佢地做咩，不過都有開心事，話哂初一啦，都有同學仔同老師講吓恭喜發財，都幾開心！終於放得學，先去Janet到攞馬蹄糕，再返去接仲，因為太肚餓去買咗牛角包食，返到去真係好攰，要攤抖休息，好在老公煮開年飯，正有豬手！

28/1/25

 28/1/25     TUE     RAIN

一個落住雨的年三十，都係要返工啦，仲爺唔洗補課，打亂哂我買餸計劃，唯有快手去買咗魚返屋企放低就去覆診，簡單啲嚟講都係冇咩，但都係血脂高，睇嚟真係要減食先得！同埋真係要做運動！返到去梗係hea到10點先開工，今日還算可以啦，又送埋蘿蔔糕比個中國人同事，又吹吓水咁囉，好在放學冇咩雨，返嚟倒埋垃圾就煮飯，團年飯真係好吃力！都煮得幾好！

27/1/25

 27/1/25     MON     RAIN

今日都係好攰啦, 星期一仲要跟個顛妹真係好攰! 返到去都係照常開工啦, 冇咩特別, 佢有佢顛我有我做番自己, 盡量令到自己好似做緊嘢咁啦, 最辛苦反而係PE堂, 大風到一個點仲要喺室外, 痴線! 好在我下半堂去咗放飯, 因為落大雨, 我唔知佢地點啦, 反正我唔洗淋雨就算! 最難捱係最尾英文堂, 因為係飯桶堂, 好在顛妹2:45走得, 我同佢都恨不得快啲走, 因為個飯桶又遲到又係咁鬧人, 又send哂啲學生走, 最終應該得番4個人喺課室, 我盡可能唔理啦, 夠鐘就走人! 接咗仲仲返去可以休息, 因為今日唔去踢波, 一來落雨二來佢腳未好得哂! 咁就到7點多先煮飯食啦!

26/1/25

 26/1/25     SUN     RAIN

今日都冇咩寫，主要都係喺屋企，佢地就要出去踢波，我就做家務，吸塵抹地換床單，仲寫埋揮春啦，佢地7點多先返到，馬上煮飯食，好肚餓！今日落足一日雨，希望明天唔好落啦，我要返工！

25/1/25

 25/1/25     SAT     COLD

今日都係普通的星期六，起身食早餐，老公煎蘿蔔糕，食完先帶埋仲爺去整咗支電子ukulele ，然後去買埋午餐，返嚟食完就出去買餸，返嚟跟吓功課佢地又要出去練波，我就可以邊摺衫睇埋套劇大結局，然後要開始預備晚飯，試新買的黑松露油整意粉，超正！

24/1/25

 24/1/25     FRI     WARM

今日都係無驚無險又到放工啦，好事嚟嘅，悶就梗架啦但總好過又要寫報告咁！放學唔洗揍仲，本來諗住返嚟就同仲爺出去整結他線，但實在太塞車，都係明天先算，去買麥當勞返嚟食，當埋晚餐，佢地踢完波返嚟都冇食嘢啦，仲飽緊！