31/10/25

 31/10/25     FRI     RAIN

話咁快term break又完, 又要捱7個星期了! 今朝瞓醒要煮早餐等仲爺食咗可以學音樂, 條友又係到駁我嘴, 叫佢洗面刷牙佢就喺到彈結他, 激死! 片完佢好啲啦, 到我自己煮啦唔理佢咁多, 等佢學完又差不多要準備出去驗眼, 諗住要換都係20鎊, 點知都冇咩平框, 最終加埋薄鏡片等等都要60鎊! 子元因為Letty, Holly 佢地喺Ealing broadway, 最終除咗買佢啲嘢時先過番嚟! 終於買齊嘢, 仲要買到羊腩, 老公又買到牛頸脊打邊爐! 晚上落雨都唔知點去玩hallowoon, 最終老公切完牛頸脊就車我地去攞糖, 返嚟先打邊爐, 又打到10點多, 好在主力食牛, 比較簡單都唔洗洗咁多嘢!

30/10/25

 30/10/25     THU     COOL

今日只係出咗去行吓超市, 不過仲爺的拖延症真係勁咗, 叫親佢做嘢都係拖, 唔鬧都唔郁, 就連出門口都係咁! 去咗LIDL所謂日本節, 都買咗少少嘢啦, 起碼係有熱浪, 但呢個明明就喺香港出名啲! 跟住行咗iceland諗住買春卷但點知冇得賣, 可惡! 返屋企後又開始煮午餐, 又食粥又整米線比佢地食, 都OK啦, 食住就睇造星, 之後都係hea同睇電視, 又係享受埋假期, 仲爺啲功課下星期先要佢做啦, 睇吓佢係咪可以做到自律! 黃昏仲爺去練波, 咁我唯有煮哂啲飯啦, 仲有研究吓個乾衣機點解乾衫乾咁耐, 應該都係日子有功, 希望頂得住啦! 

29/10/25

 29/10/25     WED     RAIN

今朝瞓到9點先醒, 又睇吓機咁, 都10點幾先煮早餐, 所以食得嚟已經11點幾, 今日諗住去B&M, 不過要等巴士過去, 又要行一段咁加上落雨, 都幾麻煩! 但仲爺行得好開心囉, 我都買咗好多嘢, 係幾好的, 但回程時完全唔知幾時到巴士, 點知諗住行去撘另一架巴士時又有車但已經撘唔到, 唯有再等, 返到去快手整午餐, 係school lunch咁款yorkshire pudding配gravy, 仲有漢堡扒同意粉, 食完開始hea, 睇番兩集造星先, 跟住老公返嚟就一齊睇埋套舊劇大結局跟住先煮飯, 煮得嚟都9點先開飯! 所以又夜先沖涼休息!

28/10/25

 28/10/25     TUE     COOL

今日冇出過街啦, 起身食個豐富早餐就要摺番兩大機衫, 然後同阿媽傾完電話就煮午餐, 主要都係為咗食, 跟住仲爺就負責整哈囉喂裝飾, 不過都係要幫吓佢, 因為佢成日都多舊魚, 有時less is more! 然後終於整好咗啦, 都幾靚仔, 可以擺幾日咁啦! 到7點多子元都教完波返嚟就要煮飯, 食完都係繼續睇埋個舊劇, 明明睇過但都係咁吸引!

27/10/25

 27/10/25     MON     COOL

今日是term break 的星期一啦, 今朝都早就醒咗, 可能琴晚太早就瞓所以都係早醒! 9點幾就已經煮早餐食, 食完先做咗清潔先, 仲爺就做咗sparx先, 跟住一齊出咗去Lidl買今日啲餸, 同埋買啲喺呢到先會買的! 行返嚟後就煮午餐, 佢地話要食意粉, 但我想食粥, 各有各食, 然後都係hea吓摺埋啲衫咁, 到咁上吓就預備晚餐, 老公返嚟食完嘢就出去買餸, 都有啲塞車啦, 可能肚餓買多咗嘢, 細佬又一齊去買埋萬聖節嘢, 返嚟煮埋個飯, 睇吓電視就沖涼休息啦!

26/10/25

 26/10/25     SUN     RAIN

今朝都醒咗幾次, 真係好慘, 子元明明個電話6點係到響佢又話冇, 好在老公都聽到唔係陣間又我錯! 最終瞓到9點幾都醒啦, 琴晚我諗我早極都4點幾先瞓著! 所以今日其實都攰! 12點前要check out, 所以我地都出咗去食少少嘢做早餐, 佢地選咗食subway, 咁都OK啦, 食完先過去搵May佢地, 本來諗住去Cardiff飲茶, 但因為周圍都塞車, May又要送蛋糕比人, 所以喺番附近一齊食啲嘢就算啦, 冇辦法佢又忙, 希望下次到佢過嚟可以有時間吹多啲水! 3點多我地已經回程, 因為5點唔夠就天黑架啦, 所以都要早啲, 最終停埋services, 6點先返得到嚟, 食埋飯沖完涼, 未夠10點其實已經眼瞓啦!

25/10/25

 25/10/25     SAT     COLD

今日係過Bristol約咗May的日子，最終M4封路我地又遲出門口，塞到差不多2點先到，又要分頭行事買嘢， May又要整蛋糕，老公又要燒斧頭扒，差不多4點先去返佢地屋企，仲爺同阿B去咗打籃球，但條友跌咗落地變泥鴨，比佢激死！燒完嘢食老公又整咗生菜魚肉，成功咗！然後打邊爐打牌，咁就玩到2點多先走，已經賺咗轉冬令嗰一個鐘，不過返去仲要沖涼，都實在係太夜！