30/8/13

30/8/13   FRI   RAIN

真係貴人出門招風雨, 今朝諗住一早過去睇葉醫生, 起身時落雨落到狗屎咁, 但都要出門口架, 又睇住架42走咗, 唯有綠van轉紅van啦! 過到去真係勁少人, 葉醫生仲提早咗開工, 登記完即刻有得睇, 9點未夠已等攞藥啦, 然後食埋早餐就撘車返長沙灣同嫲嫲交收囉! 佢就揍笨元入青衣, 我就返工啦, 唔算多嘢做, hea吓又一朝啦, 午餐食咗麥當當, 跟住都係睇吓手機咁啦! 下午老細冇返, 但咪又係搖控你做嘢, 所以放工就走人啦, 去咗青衣城等嫲嫲揍埋笨元落嚟就去翡翠食上海嘢, 笨元成日話冇胃口, 我估有少少冇胃口, 但最大原因係唔食就打機, 我梗係識破咗佢啦, 話佢知食都冇得打, 坐到我地食完先, 咁佢咪又食得哂, 仲食埋個小籠包! 食完了行咗陣三聯, 笨元無端端話佢賴屎喎, 頂…玩嘢呀! 其實佢應該係放屁唔覺意放多咗D嘢, 咁都要換架, 於是嫲嫲帶佢去廁所, 我就去咗馬莎買咗底底比佢囉, 咁又洗咗我$99! 時間夠哂啦要去小童群益會合唱團, 本來都唔諗住比佢去, 但見佢食咗藥又好似好D, 佢又話要學咪比佢去囉, 我就睇吓劇咁啦, 時間都好快過! 跟住撘小巴返屋企, 沖完涼就比佢睇埋衝上雲霄先, 因為都仲有一PART做完, 佢又要食藥呀等等呢, 咁都算佢都好快瞓, 至衰係三點幾都係咳醒咗要聞氣…係咪應該教埋佢自己聞氣, 咁夜晩就唔洗起身服侍佢呢?