31/7/20

31/7/20.    FRI.    RAIN 3號風球

今日work from home，都做過少少嘢咁大把！瞓到10點多先起身梳洗，但等得老公嚟都好晏啦，食唔切君日啦，只係去咗元朗冰室食，快食完再去買嘢， 要睇蒸飯機，下星期要食自己！最終去咗Aeon買到，$270啫算合理！最搞笑喺給Aeon撞到阿Joe同梓行食CoCo呢，吹咗一輪水先走！回家後試吓個蒸爐都幾好，菜都可以蒸熟！下午都係教仲爺做功課啦，好在今日嗰啲都唔算好難，佢有啲都自己做得到！之後咪hea吓囉，晚餐去咗買Pizza box，食得好滿足呢！晚上笨元做運動時，仲仲要求玩英文遊戲，咁梗係要陪佢啦，算係日日記吓好過冇！白白後都係睇電視啦，老公呢兩日放假可以日日痴住呢！

30/7/20

30/7/20.    THU.    HOT

返埋今日又放假啦，今朝老公放工返嚟車我返工，然後先至返屋企湊仔。我就買早餐返公司慢慢食，跟住先開工。你話今日好忙又唔係，但總係冇咩時間做自己嘢咁，只係打咗一陣機，轉個頭又食飯啦，邊食邊睇Viu套劇。下午主要係完成埋OC2條數，放工前給我有啲私人時間啦，下星期阿姐又返嚟啦，都冇咩機會自由自在。放工搭巴士非常順暢返到屋企已經有飯食，食完就清潔同埋睇電視啦，老公仲整咗雜果冰俾我哋食。子元喺屋企做運動時，我就教仲仲英文，整咗啲教材用遊戲形式教佢，佢要咁樣先肯接受。跟住到我同仲仲做做運動，洗完白白就開始打下機睇吓電視，九點幾老公就返工啦。比仲爺睇電視到10點幾先至入房瞓，我就邊打機變睇電視，仲爺佢今日同我一齊摺衫，雖然佢摺得麻麻地但係難得佢想就俾佢做啦。

29/7/20

29/7/20   WED     HOT

今朝老公放工買埋早餐回來，佢好似知我想食麥當當咁，冇講都買咗返嚟，食埋先返工都趕得切，老公車埋我返工呢！返到去做咗一堆嘢忙咗一輪就開始自由時間，今日得我同Ivy返，真係好自由自在！午飯邊食邊睇劇，有得食好食啦，8月起公司冇飯食，雖然有飯津但我寧願要飯，尤其而家冇啖好食的日子！下午全過膠，公器私用吓咁啦，整吓仲爺啲教材咁！6點收工回家食飯飯，之後都係清潔沖涼睇電視打機，老公就返工囉！

28/7/20

28/7/20     TUE     HOT

今日work from home，都真係接過吓電話咁啦，起身快手梳洗出去食早餐，明早起冇堂食架啦，只可買早餐返公司食架咋！出開去梗係買埋餸啦，買哂今個星期應該冇問題，返到去又要將買番嚟啲嘢收番好洗好，都已經好攰！下午教仲爺做功課又教到我顛咗幾次， 老公就喺房瞓足一個下午，足足比仲爺玩咗我幾個鐘，辛苦過返工！6點幾7點煮飯，飯後老公又唔知同邊個講電話，9點幾又要返工啦！咁我咪捉仲爺瞓覺囉，叫佢讀吓英文書又讀到一pat屎咁，又激到我顛，又要訓話一餐囉！笨元就淨係識得打機，唉！

27/7/20

27/7/20     MON     HOT

今日要返工， 仲要忙死人，仲要阿姐好似唔記得咗我係返830放1730咁，放工前係咁叫我做呢樣嗰樣，搞到我差不多6點先走得，激死！返到去食咗早餐再做嘢，一朝早忙進忙外，12點多開始肚餓到有啲暈呢，食住兩粒朱古力頂住先！1點我仲開飯啦，咩都唔理！睇埋地產仔大結局就開工，本來一心一意做埋自己啲嘢，點知阿姐係咁問嘢，搞到我遲放工囉！撘得巴士返去都唔算晏，不過就要煮飯，因為老公今日要上堂，好在上zoom可以喺屋企上！食完飯清潔完係咁打機，好唔想做嘢，沖好涼趕咗仲爺去瞓就摺衫休息，老公未夠10點就出門口返工啦！

26/7/20

26/7/20.   SUN.    HOT

今日係出去食早餐同買餸時出咗去咋， 真係只係留係屋企咋！10點幾先起身，梳洗好出去只係剛剛趕得切去荃灣囉間茶記食，因為得呢間開到12點都仲有早餐食！食完去長沙灣買餸，再攞埋啲衫呀書呀比晴媽， 咁就回家啦！睇吓電視又整吓餸，再捉仲爺做少少功課，話咁快又晚飯啦，老公整口水雞，涼伴青瓜，算係幾成功！洗碗清潔完都係沖涼休息啦，因為疫情有啲迫近，附近間ok有職員確診，所以都係唔去跑步安全啲！

25/7/20

25/7/20.    SAT.    HOT*

今日除咗跑步出咗去之外， 都係喺屋企咋，唔係可以去邊呢！早上瞓到11點仲爺入咗嚟幾次我先起身，發咗惡夢所以瞓得唔好！起身後煮午餐啦，不過都係煮丁麵嗰啲咋！我自己就整熱番個人參雞湯食，休息夠就捉仲爺做功課，叫做做到啲啦，終於完成我就去咗整蘿蔔牛腩，老公今日加班7點幾先返到，今晚簡單地蘿蔔牛腩同蒸蛋就算，之後咪清潔完再去跑步囉，回來又係已經好攰啦！

24/7/20

24/7/20     FRI     HOT

今日應該係home office，好在最終都順利home到！朝早7點幾Ivy就打嚟，話佢嗰棟有人確診咗，佢今日唔可以返，今日又要派嘢，怕阿姐搞唔到會call 我返去，所以比定心理準備我， 好在最終都冇收過電話啫！hea到9點到起身，梳洗完煮早餐， 今日又係煮得好豐富，食飽啲唔洗煮午飯啦！hea到差不多12點真係要做功課，仲爺真係好慢，搞到我睇唔切摘星廚神！所以到3點左右整咗tea，好邪惡的芝士西多士， 再加燒賣！老公回來車我去街市買一轉嘢，返到去就慢慢開始煮飯，飯後去跑步，係時候郁吓！

23/7/20

23/7/20     THU     HOT

今日準備應接緊張的一天, 因為阿姐今日都返工, 真係好怕應對佢, 要快狠準唔係咁易! 今朝要叫哂佢地起身, 因為要返荔天攞書, 一年級要攞8-9點, 所以叫老公車到我去南昌站佢先返學校, 咁買咗啲早餐返公司食, 然後就開工啦, 今日真係未停過, 好陰公呀! 阿姐又十號風球咁喎, 都係保持住你睇我唔到的狀態好啲! 午飯時都仲要做住嘢, 不過就照睇住劇做, 唔係會追唔切! 下午啲時間都過得好快, 幾經辛苦終於都捱到放工, 安全著陸走得! 撘得巴士返去等開飯, 老公今日又整咗好好味的晚餐呢! 今日精神上太攰啦, 唔想落去做運動, 做一轉核心訓練算!

22/7/20

22/7/20     WED     HOT

今日又係work from home的日子, 瞓到9點幾先起身, 今日係諗住整個靚早餐, 所以梳洗完就煮早餐, 又三文治又炒蛋餐肉通粉咁, 食完好滿足! 跟住就hea 吓做吓家務先, 子元跟時間表做嘢, 仲爺就free style, 到我煮完午飯食完, 2點幾3點開始捉仲爺做功課, 又係激到爆血管系列! 老公回來, 搞掂佢兩個, 就出去買定晚飯買定呢個星期啲餸, 陣間真係封城就死, 政府唔會諗你咁多嘢! 6點幾返到嚟執好嘢開飯, 睇埋愛回家落去跑步, 不過今日好似唔多夠氣咁, 回來咪沖涼睇電視囉, 明天又要返工啦, 返多日又放, 要快手做好嘢!

21/7/20

21/7/20     TUE     HOT

今日要返工啦，仲要返番9點，因為今日得我一個頂哂成個部門，真係唔知好定唔好， 唔好係一個人做哂啲嘢，好係得我一個而唔係我同阿姐！買埋早餐返去食，食完就開工，忙到頭都暈，又要訂飯又要探熱又要報更，真係攞命！仲要聽電話看門口，食飯前都未停過， 1點就準時開飯，餓啦！食完睇吓劇到2點又再忙過！出完通告還要check efax, 放工可以準時走已經好叻！返去去超市買埋嘢， 返厓鬥屋企就有飯食， 然後都係洗碗清潔再落街跑步，堅持吓做運動！希望真係會瘦！

20/7/20

20/7/20.    MON.    HOT

今日work from home， 所以都唔會瞓到咁晏，9點幾都起身，捉佢地梳洗完，又教吓子元啲倉額，原來學咗咁多年，已經唔記得最初係點學，好在download咗份教材，叫做等佢學住先！等老公都搞掂就出門口，原來約咗嫲嫲，接咗佢去一齊去食嘢，原來佢地今日約左去收樓，不過而家實在不而周圍走，所以食完嘢我叫老父車咗我地返去先，佢再同嫲嫲大包佢地處理！我返到去就同佢地溫習做練習等等，叫做冇生費時間，做完可以打吓機摺吓衫， 晚飯梗係由老公去煮啦，今晚食咖哩！食完又係時候做運動，點都跑吓好過冇！回來沖涼睇電視休息休息， 明天一個頂哂一個部門，諗吓都攰！

19/7/20

19/7/20     SUN     HOT

今朝啲陸生又激到我死, 大的叫極都唔起身, 仲要賴呢樣賴嗰樣, 又話你可以叫多幾次, 又話返完夜點點點, 其實咪就係因為琴晚自己喺公司睇波冇瞓咋嘛, 唔好姓陸啦, 姓賴啦好唔好! 到中嗰隻陸生, 教佢點樣善用時間做好啲嘢學習, 唔好浪費咗個假期, 咪又係到黑口黑面咁囉, 一係行出行入就望住個電視呆咗, 真係好想煎巴佢! 係細陸生呢啲位就最好, 好想氹番你, 係唔同啲! 終於12點幾先出去食嘢, 直接出咗尖咀, 真係為行而行, 本來想食food court, 但點知冇開, 最終去咗食大家樂, 後來先見到有其他嘢食, 早知試吓台灣嘢啦! 行到3點幾返去, 買料今晚打邊爐, 因為完全諗唔到晚餐食咩, 所以整完料就開始睇吓子元書單啲書究竟有幾多可以用到二手, 有邊啲局買新書, 佢今年有幾科都出埋哂啲2020年版, 真係硬食! 打完邊爐清潔完繼續找書, 實在太耐冇接觸, 完全無從入手! 找時間沖埋個涼, login 埋長天個google classroom等等, 見過咗12點, 順手填埋個唔知咩VIP課外活動表, 係唔明點玩架但都填咗先啦!

18/7/20

18/7/20     SAT。   HOT

今日朝佢兩個都唔洗學嘢，所以可以瞓到好晏都得，10點幾起身梳洗出得去食早餐都12點幾！所以直接出咗奧海城食午飯，行咗陣商場，諗住睇吓子元的裇衫西褲，但原來都好貴又唔啱，或者要去番校服舖買！睇埋玩具老公就車我同子元返去，佢揍仲仲去學音樂，我返到嚟打咗陣機就執書，真係要收拾好，因為仲爺下星期有新書返，要有地方擺，執埋子元嗰啲都已經夜晚，老公去咗買pizza box回來食，食得嚟都9點幾，佢又要返工，所以冇做運動啦！

17/7/20

17/7/20.   FRI.    HOT

今日老公車我返工，因為佢返夜咪可以一早放工時車咗我返去先回家囉，最好笑係我8點未夠已經返到去，因為未到法定時間要拍卡再入password ，不過我真係未試過，只記得係用身份證號碼，但原來係尾4不是頭4，好傻咁企喺門口等人回來，好在蘇菲回來救咗我啫！攞番買吅左嗰袋清潔用品比老公攞返去，我就返去食早餐開工！朝早主力做好屋企個更表，跟住就係工作嘅更表！午飯都係睇吓劇啦！今日split office開始，之前喺利登見過的又再過番，仲可以吹吓水呢！另一啲我就唔多願再深交啦，當初可以咁樣鬧走我，今日仲叫我一齊吹吓水，唔好玩啦，我係咁小器架啦！下午本來諗住hea過，點知阿姐出到聲話叫我地去QC啲口罩，咪入去做咗一個鐘先放工囉！返去老公煮晚餐，我又帶咗公司午餐返去，叫做慳得幾多得幾多！食完飯清潔完就落去跑步，撞正抄牌老公就駛架車入來，咁又逃過一嘢！老公今晚返夜，回來沖個涼就返工啦！

16/7/20

16/7/20.     THU.    HOT

今個星期過得好慢咁，而家先星期四！早上梗係快快手手出門口，返到去食埋早餐做吓嘢hea吓，今日主力就係想做好子元個時間表，然後搵埋啲練習比佢做，所以就做咗一朝！午飯睇吓節目咁，下午就真係做嘢啦，叫做編好咗一張更表，在公在私仲有好多表要我編，點解我成日都係編表架！放工返去煮晚餐，都係煮麵咋！跟住都係清潔做運動，然後就沖好涼氹仲仲瞓覺，我就可以做自己嘢！

15/7/20

15/7/20     WED     HOT

今日終於準時出到門口撘到shuttle返去，食埋個早餐開工， 時間過得好慢咁，又要捱到1:30先食得飯真係好難捱！終於可以輕鬆睇吓劇，睇到唔知時間上去攞啲清潔用品，唯有過咗放飯時間都照上去，返落嚟分吓貨咁，再做吓嘢又係時候收工！返到去有牛扒食，又要教吓子元點做好個時間表，晚飯後老公話要落去跑步，咁就一齊落去郁吓好過冇，沖好個涼都係繼續逼子元用電腦做埋個時間表！

14/7/20

14/7/20.   TUE.    HOT

可惡！竟然因為返8:30而第2 次遲道，可惡！改咗返早場就只可撘到8:10班車先可以趕到返公司，但今日差2個人我就上到車架啦，真係激死！咁都冇法架啦，明天再早啲囉！返到去食飽先有力做嘢， 不過今日唔算好多嘢趕，所以都過得有啲hea！午飯未夠點半我就食啦，然後睇埋地產仔，又係時候開工，今日要遲3分鐘先走得，所以唔去買餸，攞咗公司飯返去變！煮完食完都落超市入吓貨，又講到冇嘢賣咁，點都入吓貨啦！

13/7/20

13/7/20.   MON.    HOT

又要返工啦，今日開始返8:30，真係要捉番啱個時間，因為撘最早班車都係啱啱好，早幾分鐘返到咋！返去食埋個早餐就開工，堅係做嘢架！最慘午飯要食1:30，真係好肚餓！下午見冇咩趕嘢做，就入咗去搞口罩囉，做到4點幾就返出嚟，因為今日放5:30嘛！梗係要準時彈閘，去買埋餸撘埋巴士返去都係6:15，非常好，可以慢慢煮晚餐，反正又唔洗睇功課等等！今晚煮雞麵同茄子咋，簡簡單單！

12/7/20

12/7/20     SUN.    VERY HOT

今日有節目，就係約咗同學去影畢業相，不過都係下午嘅事， 早上一於瞓飽佢先，10點幾11點先起身， 還要收拾下午出去啲嘢，然後食埋早餐就返嚟再收拾，本來都要帶埋仲爺去，但晴媽屋企可以收留哂啲細，梗係好啦，車哂啲細過去我地先出發，所以遲咗啲，都順利出發，不過真係好熱好熱，細路又影到溶哂咁，大人都好辛苦！轉到第三個景點，有蓋有風已經好好多，可以著埋件畢業袍影，都算好完滿！回家沖個涼再去程家會所影，真係攰到冇哂力啦，影埋就買外賣上去食，玩到10先走呢，明天係我要返工啫，佢地都可以瞓晏啲！

11/7/20

11/7/20.    SAT.    HOT

今日真係一個唔知點形容的日子，因為本來早上的畢業禮被取消了，大家琴晚吹到咁上吓冇哂聲之後， 今朝又再嚟口過， 不過係用第二啲方法， 炮哥整咗google form，tammy同我都出咗電郵，希望爭取到畢業禮延期！朝早又回復正常日程， 不過只係仲爺去畫班，子元唔洗補習，只係跟住我地先，回家後佢就狂打機打咗一日，除咗食都冇停過！仲爺就係咁彈歌啦，夠鐘就老公揍佢去學音樂，我就hea咗一日，只係摺咗衫咋，冇咩急住做！hea吓都好，香港人太辛苦！6點子元去畫班， 然後去咗試間新米線，食完老公同子元去咗踢波，我同仲爺就回家休息！

10/7/20

10/7/20     FRI     HOT

今日請咗下午假, 因為笨元要去長天註冊嘛, 叫陸生搞實在係唔放心! 早上揍咗佢地返學食埋早餐先返工, 其實今朝都冇咩心機做嘢, 又做吓又八吓又吹吓水咁啦, 愈近放工愈出問題, 終於都係要停課, 跟住就開始擔心畢業禮的問題! 不過差不多1點, 處理咗自己啲嘢先, 準時飛去長沙灣同老公佢地會合, 食個午飯就過長天註冊, 重點係一嚟就要交$2950雜費, 真係未見官先打80大板! 然就係要填電子表格登記番嘢資料, 跟住就聽番啲師兄講番相關事宜, 其實真係太多資訊, 都要啲時間吸收, 本來仲應該買埋運動服, 但又冇碼咁不如遲啲先買! 終於搞掂完學校, 又要去黃金整番部ipad, 然後先可以返屋企, 放好嘢休息一陣又要出去, 先去攞番部ipad再去接嫲嫲, 出咗南昌食打邊爐, 不過真係食得好唔專心囉, 因為畢業禮喺差不多6點時, 就喺網業放下一句取消就算, 家長們當然起哄! 不過講完一大餐, 其實學校都唔會即刻比番個畢業禮我地, 你去拉banner都冇用, 咁仲可以點呢, 炮哥提意出個電郵比學校, 爭取延期代替取消, CC埋比啲教區呀議員呀咁, 我都諗緊咁樣有冇用, 仲可以點做呢, 家長真係咁被動, 一句取消就冇say! 真係懷疑人生!

9/7/20

9/7/20     THU     HOT

今日有車返到學校已經好好, 老公車到我去南昌站, 佢就去踢波, 咁我又忍唔住買咗燒賣粉果返去做早餐! 朝早都係做吓嘢又hea吓咁啦, 阿姐唔喺到冇咩動力做嘢! 今日開始放飯時間要分3段, 我1點半先食, 可以hea到2點半先開工, 下午都係做吓吹吓水咁啦,放工就去買餸煮飯, 今晚簡單啲食牛肉烏冬同烚菜, 食完清潔埋就沖涼, 有好多衫要摺, 所以趕咗仲爺去瞓就做嘢!

8/7/20

8/7/20     WED     HOT

今朝要自己揍佢兩個行返學,真係熱到死! 行到返學校又要行去南昌站, 又熱又焗咁, 上咗車先叫做好啲, 返到去食埋早餐就開工, 今日都係忙架啦, 放一日假啫洗唔洗咁多電郵要清呀! 做到午飯都未做好, 但都要好好食個飯先, 休息夠先夠力開工! 下午都係做呀做, 差不多放工就休息吓, 放工去買埋餸返去, 子元今日去到天水圍踢波, 所以冇咁早返, 我可以慢慢煮, 睇埋仲爺功課等等, 阿媽又已經幫佢溫咗英文, 煮好我同仲爺都食咗先, 肚餓啦唔等! 不過等佢地返嚟食完先可以洗碗清潔都晏啦, 10點幾沖好涼趕埋仲爺去瞓就可以休息, 不過都冇機打, 好慘!

7/7/20

7/7/20     TUE     HOT

今日係升中放榜大日子, 我地呢啲花生友, 都係咁揍咗佢地返去, 諗住食個早餐先返去接佢, 點知原來家長都要一齊上去, 我地真係太過hea! 去到學校又掛住吹水, 不過因為冇驚喜, 點都要去九華交一交表, 所以上咗一號西九個會所影印, 再去九華交表啦, 由於天氣太熱, 只係想快啲返屋企沖涼休息, 12點幾又要接番仲爺放學, 去荃灣食嘢,順手買埋仲爺隻畢業公仔! 回家收拾好, 仲仲就要做功課, 老公就揍子元去踢波, 仲爺做功課真係好慢, 做極都唔完咁, 好火! 晚上4隻嘩鬼開Party慶祝, 都係上嚟我地到啦, 嘈之巴閉咁又過咗一晚! 最大件事咪仲爺攞部i-pad想比啲姐姐睇嘢但比人一嘢推開就跌咗部機落地, mon即死, 唉! 我唔知講咩好!

6/7/20

6/7/20.   MON.    HOT

又要返工啦， 早上都係咁揍仔返學啦，跟住都係同老公食埋早餐就返工！今日都忙忙地啦，不過就就唔趕的，慢慢做！食完就同個同事傾升中啲嘢，佢個仔小五嘛，可以幫到幾多就幾多！下午都係做吓嘢等收工啦，諗好食意粉，就去買埋材料撘巴士返去，今日又塞又等咗3班車先有，7點有多先返到去呢！又要煮埋晚餐等等，都8點先開到飯！明天就派位出爐啦，雖然我地都冇咩特別，但真係替其他人緊張，希望個個都順利！

5/7/20

5/7/20     SUN     HOT+

星期日嘛，梗係瞓到自然醒啦，hea到10點左右先起身，梳洗完出去食早餐，時間關係唔多選擇，食咗新華咋，係有啲貴但好食！食完就入咗沙田，睇吓嗰到間奇趣天地有冇畢業公仔，但最終都只係買到件畢業袍，想套落邊隻到都得啦！再喺新城市行咗陣就回程，子元要去小童打nurf，我就先去程家攞子元件淘寶畢業袍，見識吓程生受傷隻手！回家後休息到睇完翻做的造星，就開始同仲爺溫書，太耐冇咁溫書，我又激到發哂火！之後心情都唔多好，煮咗冬瓜湯做晚飯，沖好涼可以休息吓，好辛苦趕哂佢地去瞓先可以自由咋！

4/7/20

4/7/20.   SAT.    HOT

今日好忙碌呀！早上開始先要揍仲仲去畫班，然後返咗學校，因為仲仲買書張支票未簽名，要返去簽番！跟住先去食早餐，再去埋銀行，又要返去接仲仲， 再去剪頭髮啦，3個頭又剪到差不多樣咁啦， 本來想去幫子元買畢業公仔，但原來呢樣嘢都會斷貨，唯有再找找啦！老公車咗我地去長沙灣地鐵站仲爺先話肚痛，最終係苦面到南港島線瞓著咗，醒咗又話冇事！咁咪去食麥記囉，食完佢學嘢我就去薩利亞坐到差不多去接佢，回程大家都瞓到好冧，再去惠康買埋日用品先返去，子元出咗門口去畫班啦，我就同仲仲對功課囉，差不多時間就去接埋笨元就食埋晚餐先返，簡單地食粥舖咋！返到去做埋運動就沖涼趕仲爺去瞓，子元又掛住打機！

3/7/20

3/7/20     FRI     HOT

終於到星期五啦！早上都係揍仔返學，老公一齊食埋早餐！朝早都忙碌架，都好時間過得快啲，午飯都係邊用電腦睇viu邊食飯，不知幾自在！下午做咗陣嘢就自由時間吓，因為真係咩都唔想做呀，happy friday嘛！放工快啲返去諗代住煮咗晚餐先，等仲爺可以食咗先去合唱團，點知條友又話唔餓，咁咪唱完先食囉，但因為小童唔比人留喺到等，結果我又要周圍行，又落住雨，又要買晚餐咁，接咗仲爺仲要攞住咁多嘢行返去，又攰又餓，食完又好眼瞓，竟然就咁喺梳化到瞓咗，10點幾先沖涼！

2/7/20

2/7/20.   THU.    HOT

今日又要返工啦，忙到仆街！月頭都算啦，同時又有好多其他嘢跟，又要係麻煩嘢，真係做到未停過！午飯時本來想出去買嘢，但好似想落雨咁，都係留喺office睇電視節目算啦！下午一夠兩點又係做，我係完全唔知時間，做到5點幾先發現，好在都做好嘢，準時收工！去啟業買埋兩位少爺明天的早餐就返去，不過今日又冇車又迫陰公！返到去又要準備開飯又要捉仲爺快啲做埋功課，因為下午跟哥哥去踢波嘛！食完飯做埋清潔就可以做運動沖涼休息！

1/7/20

1/7/20.   WED.    HOT

今日只係一日假期，但心情都唔多好！早上10點幾先知醒，梳洗好出去食早餐都差不多12點，只可以去荃灣啦，食食吓頭頂個冷氣漏水喎，啲嘢食濕哂，好在都整過比我地啫！跟住就去咗愉景新城行吓，都好耐冇行過，感覺好新鮮！最終都係去咗掟吓銀仔，換吓禮物咁啦！老公今日要返工，所以點幾都要走啦，返到去就捉佢地做功課，然後hea! 到六點幾就開始煮晚餐，兩個都話餓，又冇咩喺雪框，只可以簡單地煮咗豬扒咖哩烏冬，又食得好開心喎！之後都係清潔做運動沖涼休息，明天又要返工啦！