11/11/14

11/11/14   TUE   COOL

今朝都唔多願起身, 瞓得唔多好呢, 但都要起架, 搞掂兩隻嘢就出門口, 子元如常咁跑跑跳咁走咗去撘校車返學, 柏仲就想行但行唔得快啦! 返上樓食埋奶就執嘢出門口啦, 食埋早餐就返工啦, 今日都唔算好忙啦, 寫吓日記睇吓嘢, call吓人星期四食飯咁又一朝, 午飯後都係睇吓電視打吓機, 最舒服就係! 下午都唔算忙, 做吓公事咁啦! 老細唔返嘛, 最好就係咁, 嚟緊佢又返老家, 心理上點都輕鬆D! 放工直接返屋企, 因為今日笨元早放又同咗阿媽同太嫲去飲茶, 之後咪返屋企玩囉! 我返到去阿媽就閃了, 要快手煮飯因為約咗個同學仔晏D落去踢波! 不過由於明午臨時要開會, 唔洗帶飯, D餸又煮多咗啦, 佢兩父子快手食完就行先去踢, 我就要洗埋碗先, 又要顧住柏仲又要洗碗真係高難度, 唯有自製欄柵隔住佢, 8點喺樓下同樂銚會合就行過球場搵子元佢地, 玩咗大半個鐘人地book咗場, 咁就走啦, 回家後沖涼食奶等9點幾10點全部K.O.哂, 我先可以去沖涼, 仲要洗衫洗奶樽等等, 10點幾都未坐得定喺到睇電視, 11點幾又已經眼瞓了!

<柏仲就嚟可以落場踢啦!>

 <但原來企唔穩!>

 <做住觀眾先啦!>

 <3個小朋友玩得好開心!>

10/11/14

10/11/14   MON   COOL

今日真係超級忙, 未停過咁! 朝早如常起身揍仔啦, 唔知點解咁慢手慢腳, 8點幾先出到門口, 好在都撘到42, 但過到去都9點了, 快手食埋個早餐就閃了! 返到去快手做好自己嘢, 又要開會未停過咁開會, 命都冇呀, 開到食晏喎真係未試過, 飯後又要做番哂D文件嘢, 所以下午都係做公事多, 所以今日真係好充實! 話咁快就放工了, 過去接笨元回家啦, 返去沖好涼就叫佢執拾好D嘢先, 總之我就喺廚房同佢房出出入入, 又煮又教嘢! 柏仲瞓到daddy去接佢都未醒, 所以佢地遲返, 我就要同佢邊睇功課溫書邊煮飯, 所以煮得嚟都晏, 可以等埋一齊食囉! 食完洗好碗就陪柏仲玩陣啦, 佢而家已經可以開步行啦, 真係好叻仔呀, 之前只係喺床先夠膽, 而家喺地都夠啦, 仲行得幾多步添! 玩夠又要執埋哥哥D手尾啦, 係到執書包先交番比佢做, 要教住佢慢慢做呢, 真係要好多時間先得! 搞掂就餵柏仲食奶放佢入房瞓, 然後又到同子元講故事陪佢一陣, 10點唔洗K.O.哂兩隻, 可以休息啦, 打吓機睇吓電視! 12點多頂唔住要瞓先!

<11個月1星期就會行了!>

<還會爬上子元張床搞搞震!>

9/11/14

9/11/14   SUN   COOL

今朝竟然唔知醒, 不過都係瞓得唔好, 5點幾柏仲喊醒又要哄番佢, 之後都係咁發夢咁, 子元8:10先嚟叫我起身, 真係turbo腳咁搞掂出門口, 子元去畫班嘛, 我連買餸單都未寫! 過到麥記食埋早餐就揍佢兩個上去啦, 之後幫朗B買咗兩件背心, 終於記得幫家寶買, 拖咗幾個星期呢! 之後就去買餸啦, 真係好抵買, 要勁計算咁去買呢! 返到去同老公交收, 佢出去接子元我喺屋企睇住隻未瞓的柏仲, 又要做嘢又要睇住佢, 捱到11點幾都仲唔瞓就整支奶比佢, 終於瞓到! 我可以做吓嘢, 但佢都只瞓到1點咋, 唔係好夠時間呢! 醒咗之後咪餵佢食飯囉, 我又食佢又食都OK喎, 之後同佢出咗去759一轉, 入吓飲品貨咁! 返到去睇Running man, 都係由佢通屋走啦, 不久兩父子返啦, 沖好涼就比佢睇埋先開始溫常識, 老公出去踢波前K.O.咗柏仲, 我地溫到6點幾7點幾就食晚餐, 簡單地食意粉咋, 之後叫醒柏仲要起身啦, 但條友喊到死都唔肯食飯, 同佢顛完一輪我投降, 你贏! 同佢沖好涼就叫子元睇住柏仲到我沖, 然後放佢兩個出嚟玩陣到9點多就餵奶哄瞓細嗰隻跟住到大嗰隻, 然後等老公回來食埋嗰兩隻大閘蟹, 真係好顛呀咁食法, 不過真係好正, hea到12點幾1點我真係支持唔住要瞓啦, 冇睇埋Ten!

8/11/14

8/11/14   SAT   COOL

今日完全冇同笨元溫過書, 星期日都唔知點算! 朝早我如常一早比柏仲嘈醒啦, 起身梳洗後就返工啦, 都係hea吓咁啦, 講吓琴晚食嘢咁, 老公到中午都未帶柏仲嚟, 佢話柏仲12點先起身又要等車等等總之就係耐啦, 咁放低後佢就同子元去踢波了, 我就帶柏仲返屋企, 都遇咗佢唔會瞓住架啦, 點幾嫲嫲就過咗嚟, 我仲煮緊午餐, 跟住佢話同埋我地一齊出去買鞋比子元, 都好GE! 咁一齊撘的去球場會合食埋晏就過奧海城, 行咗好多間鋪頭先找到啱款又啱size的白鞋, 之後仲要買埋普通跑鞋, 好在有嫲嫲比錢! 柏仲未識行都有收穫, 買咗對同子元同款但唔同色的比佢識行之後著喎, 真開心! 之後去行埋反斗城就回家了, 返去沖好涼就食大閘蟹, 真係好好好正, 不過要顧住D細的食起上嚟唔夠放, 所以留番一隻等佢兩個瞓哂先食! 執好嘢K.O.哂兩個啦已經好攰, 不過有隻蟹支撐住, 邊睇電視邊食, 一大享受呢! Hea到12點幾就瞓啦, 明天又要繼續作戰!

 

 

 

 

 

 

 

7/11/14

7/11/14   FRI   COOL

今日老公請咗假, 因為嫲嫲要去攞大閘蟹唔可以睇住柏仲, 我今晚又去食自助餐揍唔到子元合唱團同游水, 所以都要老公請假啦! 朝早齊齊揍子元撘校車, 因為老公可以之後再瞓嘛, 返上樓等柏仲食埋奶就出去食早餐, 然後我就返工啦, 早咗返到唔想咁快返公司, 加上諗住有嘢都要買就去咗萬寧shopping啦, 慢慢計清計楚, 最後用咗145蚊但買到好多嘢, 真係好有滿足感! 返到公司竟然未有人返到, 少有! 朝早都要做吓公事先, 搞掂琴日商合的文件, 之後都係做吓自己嘢架啦, 午飯去咗買飯, 我都覺得食個飯太多, 早知只係食個麵啦, 今晚食自助餐嘛! 下午都係做吓自己嘢啦, 夠鐘放工就出發了, 去行吓街先夠鐘才上去酒店食嘢, 一開始食嗰D真係覺得最好食, 其實都多嘢食的, 不過熱嘢我麻麻, 主力食哂冷盤嗰D先, 慢慢人多啦, 咁大致上都係食得開心GE, 只係之後愈來愈眼瞓辛苦D囉, 年紀大啦唔夜得, 平日喺屋企hea住夜又冇問題喎! 10點幾先走, 返到去都唔洗11點, 都算早架啦, 不過真係超攰, 沖好涼就按吓腳咁, 唔知做咩對腳咁攰! 之後本來想瞓架啦, 但柏仲發夢醒咗又要哄佢, 都醒咗一陣12點幾先再去瞓!