21/2/21

 21/2/21.    SUN.    WARM

今日都過得好無聊，老公一早帶咗仲爺去教堂，所以我瞓到完全有知覺，唔係子元手2點幾入嚟我都唔知要起身，梳洗完即刻整午餐食，因為子元要去踢波，快手整咗五香肉丁炒意粉，等佢食完可以出發！然後我就喺屋企吽，睇住電視摺埋衫，老公揍咗仲爺回來後又出去踢埋一份，咁我就同仲爺睇埋要交的功課，就放佢睇機，老公佢地差不多7點先返到，咁近近地去咗Aeon食泰國嘢，行咗陣就回家，明天又要早起，要返學啦，仲爺又話頭痛咁！

20/2/21

 20/2/21     SAT.    WARM

本來諗住今朝去食君日，點知9點醒過後又瞓番，10點幾先醒，咁實趕唔切啦，唯有放棄去咗新華食算啦，買埋飯返嚟比子元食，因為佢又要吹大號！夠鐘老公又要揍仲爺去音樂，我就喺屋企做吓嘢，局子元溫吓書咁，我話同佢溫佢又話唔洗，咁希望佢真係識啦到時！hea到老公佢地返嚟，6點幾就出咗街，子元又話釘boot唔啱，仲爺啲褲又唔啱，都要買啲比侷架啦，喺food court食埋嘢都返屋企啦，反正啲鋪頭都早收！

19/2/21

 19/2/21.    FRI.    COOL

今個星期真係過得好慢，終於到星期五，預定啲嘢今日慢慢做，但都會抲下機咁，時間都係好慢，好難先等到放飯，邊睇Mirror Go邊食飯，然後上去德福行個圈，下午回來都係等時間過等放工，點知塞車喎，6點多先返到去，兩隻細路好嘈，等男人買完餸回來，我同Yoko就落去買嘢飲，等耳仔休息吓，買完時喺百佳仲撞到Barry呢！返上去就準備開枱呢，烚住等程生佢地嚟，都8點多先到呢，所以都食到11點幾，吹水嘛，打邊爐就最好，又食得耐又可以邊食邊吹！最後切埋蛋糕影吓相咁，差不多12點先散，我地仲要清潔呢！

18/2/21

 18/2/21.    THU.    COOL

今日係放縱的一天，因為阿姐放假，我帶晒啲文件返去Scan，除咗緊急嘅，都係咁做自己嘢。午飯提早出去一齊打邊爐，試咗犇但真係唔多好服務，大家報復性消費都係咁話！朝早scan咗一朝文件，下午返去都係咁上下，因為要整幾個version，所以都要啲時間！放工返去又係亂糟糟咁，叫仲爺執好晒啲嘢，叫老公起身，就出去搵地方食飯，因為今日可以堂食呀嘛！然後喺長沙灣行吓買下野咁， 8:00左右我哋就搭巴士返屋企，老公就去返工。返到嚟做埋運動就沖涼，本來諗住早啲瞓，但朱古力掌門人幾好睇，咁就一齊睇吓啦，點知11點到Monita佢哋打嚟，叫我哋幫手print文件，因為佢哋間屋賣咗啦，經紀帶漏咗啲嘢。咁之後吹水吹左成個鐘，如果唔係仲仲要我講故事先瞓覺，應該都有排講。講到尾都係要快手啲賣樓，留喺度都唔知做咩，好多嘢都要賣咗層樓先至行拱北，咁不如快快脆脆！

17/2/21

 17/2/21     WED.    WARM

今日都係要返工啦，返到去食個簡單早餐，又要扮工啦！今日真係冇咩做，所以係咁打機，時間過得好慢好慢，好辛苦先捱到食飯，食完飯上德福買麵包，又去超級市場睇吓啦，下午返去都係打機打機同打機，真係幾無聊，係plan吓聽日阿姐放假自由時間可以做啲咩。放工搭巴士返去，因為老公一起去教會同返工，所以好快有飯食，未到七點幾就出門口啦！咁我哋週末休息呀側門洗碗準備沖涼，我就執埋明天返去Scan嘅文件！

16/2/21

 16/2/21     TUE.    WARM

今日終於要返工啦，其實都唔算有咩做，所以都係扮工中，再睇吓英國嘢咁啦！早上都係收吓利是派吓利是，午飯出咗去食自己，經過一年抗疫，我已經完全接受到自己食飯！食完行吓咁冇買嘢，返去都係等收工！成日靠FF UK生活嚟支撐住！老公約咗人BBQ，然後直接返工，咁嫲嫲就過來睇住啲細同埋煮飯洗碗，我就努力教仲爺做埋啲功課，先可以好好hea吓！

15/2/21

 15/2/21     MON     WARM

最後一日假期啦, 真係唔捨得咁快返工呀! 今朝瞓到9點幾起身, 叫佢地好起身梳洗食早餐, 然後就要做功課, 子元就溫書, 仲爺真係好怕寫字, 但嗰堆專題又冇得唔做, 已經搬字過紙架啦都好慢, 差不多3點先出到門口, 約咗老公喺尖東等, 行吓個K11 但真係冇咩好行, 經星光大道行返番海運, 真係要找地方食嘢啦, 全日淨係食咗個麵咋! 於是去咗海運食咗餐貴韓國嘢, 但一餐當兩餐就算啦, 嚟緊又要慳食啦! 食完去咗行通利, 都係仲爺要求啦, 但行行吓又要去廁所, 真係比佢玩死, 明明話去小, 但我喺女廁出來唔見佢, 原來佢開大, 嚇死我囉, 好在廁所姐姐好好比我入去幫佢清理埋! 返去再睇多陣結他, 就撘巴士返去啦, 點知去到長沙灣道大塞車, 好在司機識找路, 叫做算快走得甩, 回來得個hea字, 到咁上吓先沖涼休息!