30/11/23

 30/11/23     THU     VERY COLD

老公話今日好凍, 我睇吓真係出太陽都上唔到正數, 所以都要著行啲, 又要服侍仲爺, 條友琴晚咳到隻嘢咁嚇死人, 好在今朝起身已經好好多, 服侍佢起身等等搞到我都好趕, 好在都趕得切! 今日唔係跟個簡單架啦, 所以都要用啲力, 不過我完全用一個不在乎狀態, 反正你愈有反應佢愈鍾意, 同埋佢唔比你理教學啲嘢, 所以我都冇咩好做! 佢放飯時係咁周圍行, 好在我著夠衫啫, 唔係實凍死! 然後另一個問題係放飯, 我睇個時間表都知冇人嚟架啦, 但去到點幾我已經餓, 諗住呢堂都冇人嚟去搵人求救, 好在2點鐘終於有人嚟, 餓死我! 之後捱埋嗰大半堂唔理咁多走先, 我要去揍我隻BB! 快啲返屋企, 凍冰冰! 老公放工返嚟話病, 周身骨痛, 所以佢食咗藥瞓陣食完飯再瞓, 我就要預備埋明朝煲粥, 明天仲凍, 食啲熱嘢先出門口好啲!

29/11/23

 29/11/23     WED     COLD

今朝都係好凍，但都未去到負數，加強裝備都夠做。返到去如常開工，今日都係輕鬆，上吓堂食吓飯吹吓水，始終都有兩個同事啱嘴形都可以吹吓，順利準時放學，去超市入吓貨先再接仲爺，條友突然咳得好勁，又嘔又食唔到嘢，但最大原因都係條氣唔順，咩藥食哂都冇用，臨瞓聞咗氣希望有幫助！

28/11/23

 28/11/23     TUE    COLD

今日又係輕度過，連阿姐個影都見唔到，輕鬆到呢！不過轉早堅凍，明天要準備充足啲先！返到去如常開工，冇咩特別，又準時放飯，仲問埋人事部我個no pay leave係咪mark好咗，係就下星期email阿姐等佢自己搞掂！放學準時收工接仲爺，返到屋企忙家務，倒垃圾摺衫煮飯等等，老公揍佢哋去跟波嘛！食得晚飯都9點幾！

27/11/23

 27/11/23     MON     COLD

又要開工啦, 子元又一早返咗去打羽毛球, 咁我唯有一條友搞掂仲爺返學, 到我返工, 返到去先睇我自己跟邊個, 竟然係跟個算輕鬆架喎, 所以簡簡單單咁又叫做過咗一日, 只係放學遲咗啲, 咁我都冇特別去趕, 都係遲咗少少啫! 不過臨放學子元打嚟話佢要留學校比賽, 咁邊個幫手揍仲爺去球場, 打亂哂我啲計劃, 最終我先整好咗啲餸, 米都洗埋先出門口, 等我地未返子元都可以開始煮飯! 然後就係睇電視, 開咗套社內相親睇, 好正喎! 所以搞到差不多10點先沖涼!

26/11/23

 26/11/23     SUN     COLD

今日忙碌車出車入，朝早仲爺踢波，子元補習，已經要分頭行事，又要車埋仲爺個隊友，又要去買咖啡，好忙亂！去球場企到老公嚟接更我梗係上車打住機等，最得人驚係突然遠處見到有個好熟口面嘅人，係大姐！馬上要唸你睇我唔到！終於等仲爺踢完，返屋企等佢沖個涼又要揍佢去生日會，然後快手去買餸再去接番子元放補習，去食個午餐又返屋企，子元換波衫去比賽，又要回頭接番仲仲，返到屋企都未停過，做清潔煮定肉骨茶打邊爐，洗衫摺衫，食完終於可以沖涼休息！

25/11/23

 25/11/23     SAT     VERY COLD

今日又賣甩佢兩個出咗去，哥哥要溫書仲爺要做功課，咁就我地自己出去算，因為要去Central London，幫老公朋友買袋，但幾經辛苦出到去間鋪頭竟然要排隊，時間關係唔排啦，再算！行返轉頭搵地方食啲嘢，喺泊車嗰頭搵到間買咗包食，估唔到好好食！下一站Costco入貨，好耐冇買過200幾鎊，返屋企煮牛扒，沖涼休息！

24/11/23

 24/11/23     FRI     COLD

今日終於又覺得凍咗, 就算出哂太陽都凍! 朝早如常咁返到去, 照常開工啦, 飯筒喺到局住要一齊吹水, 真係好難頂! 今日揍大嗰個低能妹, 佢係間中有啲煩架啦, 但都搞得掂啦, 上堂時上堂, 放break時放break, 時間都好快過, 可以準時收工, 咩都唔理啦! 返屋企食完嘢開始要做正經事, 申請十萬九千樣嘢, 先係預備關於申請passport的資料, 最煩係仲爺要搞個副署啫, 最終都搵到嫲嫲張身份證, 咁就print埋張相填好埋就開始, 其實唔係要填好耐, 不過要填最耐係子元sixth form申請, 開咗電腦就一次過做啦, 填哂4間學校, 填到眼攰, 有啲又要作文喎, 梗係叫番子元自己作啦, 已經幫佢咗咁多嘢啦! 老公返嚟佢煮埋晚餐啦, 我要繼續填嘢! 食完都係沖涼休息啦!