31/1/19

31/1/19.   THU.    WARM

今日返半日，因為下午要去覆診！朝早如常等老公回來接更啦，買埋早餐返公司食完就開工，主要係pack埋啲insino同利是封，但都做到11點幾呢，阿LA又話出去食，所以hea埋嗰陣1點就快閃去e-max食蕃茄，但食得嚟撘車要2點先有巴士，好在去到荔景老公嚟到接我，咁就唔洗行囉，去到都好快有得睇，例牌啲血實唔靚，只會越來越高，喺屋企反而係越來越低架嘛！睇完排埋下次期攞埋藥就可以走，老公話去食tea，再帶仲爺去公園玩，然後去接哥哥放學就回家做陣功課先出街，接埋嫲嫲去咗荃灣食，再幫仲仲買波鞋還有玩具BB呀，跟住去行花市食吓嘢，10點多先回家，要k.o.哂佢地才有得休息！

30/1/19

30/1/19.   WED.    COOL

今日都係老公回來我就返工啦， 子元今日請日病假休息吓！我可以瞓到7點半先起身呢！返到去都係食早餐然後hea啦，仲未有job cert返基本上冇咩可做！打吓機吹吓水咁，午飯買燒味飯咋，跟住上咗樓上又有開倉，買咗兩件運動衫比子元同老公呢，$100三件喎幾扺！下午都係hea啦，時間過得幾慢，可能真係太holiday mood啦，跟住幫手做吓分貨，要分咗啲內傳雜誌同利是封等，終於等到放工返去，老公今晚炒咗飯咋，唔係好夠餸呢！食完都係清潔啦，沖完涼仲爺又要唱歌咁，幾辛苦先趕到佢去瞓！跟住老公就返工啦， 我就摺衫休息吓瞓覺！

29/1/19

29/1/19.   TUE.    COOL

今日都係老公放工就回來揍子元返學，然後回家同仲爺一齊眠，我就返工！今日其實真係冇咩忙，加上阿姐成日出咗去，所以都比較自由，吹吓水打吓機又一朝，午飯出咗去e-max食，係慶祝Stella生日，但我地食完先話佢知囉，下午阿姐出咗去又可以自由啦，上吓淘寶咁幾好！之後都做咗陣job cert先放工，老公話去球場等，咁我咪行過去囉，慢慢行吓街咁，不過行到九龍城老公話子元踢唔到要早走，其實都係啦， 明知佢條氣有事今日又睇完醫生，踢咩鬼波呀！會合咗佢地去食晚飯後回家，收拾好沖涼，老公就要返工啦！

28/1/19

28/1/19.    MON.    COLD

今朝老公放工就返嚟車子元返學，等佢返嚟我就可以返工， 返去食埋早餐就開工，今日要入利是呀，係要入4千幾封，真係好誇張，好在係可以外判嚟做，不過都做到12點幾，轉個頭又食飯啦，唔知係咪太辛苦，加上今日個飯又比較悶，我食咗兩隻雞脾先夠飽啦，下午就做吓嘢又休息吓，之後都係等收工啦，返到去等陣都食得飯， 笨元攰到瞓咗，有冇咁攰呀！食完飯後都好忙，洗碗吸塵抺地等等，再沖埋涼打暈埋佢地已經差不多11點，還要摺衫呢，仲要煎埋啲蘿蔔糕明天返去比佢地叮嚟食！

27/1/19

27/1/19.   SUN.    COOL

今朝子元學英文，所以9點幾都係要起身，但出廳就見到仲爺用櫈呀被呀等等等等起咗個五星級的家比自己，不過冇法啦要出門口都係要拆！出去食完早餐接番子元，佢提意到去佐敦谷公園，可以放吓車仔，飛機，玩吓遊樂場，唔洗成日喺商場迫！玩到2點多就出去食午餐，然後就返屋企啦，我再整蘿蔔糕，真係好攰！都蒸唔切就要入青衣食飯，要飯後回來先可以再蒸呢！老公今晚返夜，可以過度仲爺呢個早來的新人假！

26/1/19

26/1/19.   SAT.    COOL

今朝老公揍咗子元去足球比賽，到我知醒時已經9點多，同仲爺喺床玩吓咁先起身梳洗煮早餐，然後就做吓文書嘢，睇吓佢地有咩通告回條要填，又執吓嘢咁轉個頭都夠鐘出門口，揍仲仲去音樂，條友仔呢個時間先嚟瞓，抱到我死死吓，仲要喺地鐵冇人讓位，等到有人落車我先有位坐，出閘時又冇人幫真係好心傷，抱住仲爺又要拍兩張八通，點拍呢！揍咗佢去我就食晏行吓街，回程撘巴士時仲爺就唔瞓啦，但又嘈住我瞓喎可惡！同老公交收咗仲爺，等佢揍去足球，我就返屋企休息吓，等子元游完水再食晚飯，老公又約咗Joe佢地食飯，本來想去試番上次間潮洲嘢，不過實在太多人，轉咗去愛群算！之後老公又要去踢波，我地返到屋企沖完涼就打暈仲爺先，然後要摺番3日冇摺嘅衫，足足摺左幾個鐘呢！

25/1/19

25/1/19.   FRI.    COLD

終於到星期五啦，今日真係夠哂難過，朝早為咗要抬隻花燈返去，首先要同笨元一齊出門口，又要帶埋仲爺，還要撘的士時又冇的士，真係令人發顛！最PK係啲的士司機見我咁嘅身世就拒載喎，頂佢呀！終於趕到返去交已經差不多50分，還要送番仲爺入青衣同嫲嫲交收我先返得工，趕得切45分班車，58分先返到去，差啲就遲！食埋早餐開工啦， 今日都算幾忙喎，濕濕碎碎咁冇停手，食完飯都係打吓機啦，下午又係做大，工作上都冇咩， 最令我發顛係陸生，因為架車未攞得住佢接唔切子元，就叫佢先返屋企攞好嘢再撘的士出去牙保，老實我真係唔係好接受到佢咁做，不過由於子元返到去又肚痛等等，遲得滯出門口，點都趕唔到，於是老公就去改期，子元就去車房嗰邊會合攞番架車再去踢波！本來就好火的，同stella㑯完又好似好啲喎！放工回家攞埋嘢出去小童同仲爺會合，唱完歌仔就去新上海快食回家！

24/1/19

24/1/19.    THU.    COOL

今個星期好似過得好慢咁，都仲要返多日先放假！早上都係咁揍仲爺去同嫲嫲會合我就返工啦，返到去食個米粉做早餐，跟住就開工啦，你話好忙又唔係，但唔知點解就係有嘢做，午飯後都係打機吹水啦，下午阿姐返咗嚟冇得悠閒，唯有繼續做嘢啦，下午最令全部人氣憤的事，又係嗰隻神囉，總之佢有本事將一件好簡單嘅事變到煩咗幾個部門，你話佢係咪有病，仲要出到email CC埋比最大嗰幾個，大石壓死蟹！所以佢可以令到全公司人都憎佢，真係好有「本事」！放工返美孚食米線，然後返去沖涼做埋個花燈，沖涼時兩個又玩，仲爺玩到顛得滯啲水吞錯格就嘔啦，比佢玩死我又要做一大餐，咪兩個都一身囉，係要激到我去臨界點！打暈咗仲爺沖涼就真係協助老公整埋個花燈，係要趕頭趕命最尾嗰晚先嚟趕！

23/1/19

23/1/19.   WED.    COLD

今日老公放假，可以揍子元仲爺返學，咁我就唔洗行多轉！買埋早餐返公司，朝早都係做吓嘢hea 吓咁啦，時間都過得至快，下午要去site visit，所以今朝就要搞掂啲嘢，提早食埋個飯就出發，都早咗過到去T1，今次site visit又幾好睇喎，去睇innovations lab，又再過海去石板街酒店，再去埋利東街咁，似睇樓囉幾好玩！5點幾散得，直接去AEON同老公佢地會合，食完COCO再shopping埋就返屋企，經過幾個鐘消化我已經冇片佢英文得71分，但學校啲卷點解毒女出咁深叩，唉！於是同佢兩個溫埋書都好夜，快手瞓覺啦！

22/1/19

22/1/19.   TUE.    COLD

今朝有點趕，突然醒起要開票比子元買書，仲爺又唔合作完全唔郁，係都要人服侍！終於交咗佢比嫲嫲我就返工，今日都比較閒，所以時間都過得慢啲，朝早出埋啲通告等等，午飯後都係打吓機咁，跟住就開始hea，我都唔記得以前咁多年成日冇嘢做時啲時間係點過！放工我要入青衣接仲仲，因為老公話架車都係要攞去整，所以佢帶子元去踢波， 我就揍仲仲， 返屋企煮麵同大波魚蛋比仲仲食，我就食人參雞呢，係呢啲時間食架啦！跟住都係洗碗清潔啦，搞掂哂沖緊涼老公佢地就返，仲爺今日得1份功課咁開心，子元直情冇功課添，所以K.O.咗佢地就摺衫睇劇！

21/1/19

21/1/19.    MON.    COLD

今日又要返工啦，老公車佢地返工咪好啲囉，我直接返公司，買埋早餐返去食，跟住就要開工啦！午飯後都係吹吓水等開工，下午編埋個蟲蟲更表就hea過啦，去咗填攞政府嗰四千蚊嗰份表！放工撘巴士已經彈閘，但都係避唔開阿姐同車，佢都係去睇演唱會啫！返到美孚去地鐵口會合，去咗愉景新城晩飯，outback食得好飽呢！去玩埋掟銀仔，贏咗好多禮物呢！送埋嫲嫲返屋企就回家，沖完涼要仲爺溫，等佢冇得再咁hea！但一溫書佢就眼瞓，好乞人憎！

20/1/19

20/1/19.     SUN.    WARM

今朝比老公打嚟嘈醒，要我叫子元起身去踢波比賽，其實我之後又瞓唔番，所以hea到9點多都係要起身，煮早餐同仲爺食埋我就抺埋啲窗先，點都叫做做多咗一樣嘢嘛，11點多老公返到來就係咁叫佢地收拾換衫出街，佢諗住去對面海的大館，過得去泊得車行得去大館都差不多兩點，先食嘢先！佢同事介紹過有間喺大館入面的餐廳，但都真係貴，難得過到嚟就算啦，食完影吓相行吓睇哂監倉，仲爺影相影得好好笑，不過最好笑係佢睇啲犯人食嘅嘢又少又難食，就話唔可以做壞事囉！行返去攞車時經過孫中山紀念館又入去睇吓， 竟然有得玩試著民初裝，仲爺同子元就好似少爺同書童咁，好好笑！攞車返去食晚飯後回家，明天要返工返學啦！

19/1/19

19/1/19.    SAT.    COOL

今朝係比老公的沖涼聲嘈醒，跟住仲爺都係好大聲唱歌，結果點瞓都瞓唔好， 激死！10點幾11點先起身，梳洗完出去食早餐，再攞埋cube去維修，咁我就揍仲爺去學音樂，老公就揍子元去踢波，撞啱有171就梗係撘啦，過到好啱啱好，跟住我就同咗joyce食早餐，吹吓公司嘢咁都幾好，跟住去接番仲爺再去食麥記，然後就去葵涌踢波，時間又係啱啱好，老公仲可以嚟接我地，好在佢有來接，因為踢到尾落雨就快閃了，程家話上嚟食，佢地就去AEON買壽司，幾好呀佢地細路可以玩我地可以hea， 老公要踢波8點幾閃了，程家就玩到10點多先走，我就沖埋涼摺埋衫都1點了！

18/1/19

18/1/19.    FRI.    COLD

終於到星期五啦，子元都考埋今日，大家都放監啦！朝早老公揍仔返學，我就返工，返到去都係食早餐做吓嘢啦， 收到加人工信，都有3.6%算係咁啦，已經meet番我當時想apply的人工啦喎！朝早阿姐出咗去可以hea吓，吹吹吓水仲打咗隻曱甴，午飯出咗去E-max食蕃茄麵，真係幾好食架喎仲好夠飽，我都夠飽真係好飽！下午返去做樣都要做嘢，時間都過得快！放工老公嚟接我，返屋企摺埋啲衫先揍仲爺出去小童，合唱團完梗係同飯腳去食啦，慶祝放監梗係要食餐好，去咗美孚涮涮窩打邊爐呢！老公食到10點幾要返工啦，食完我地就散步返去呢，已經11點幾快啲沖好涼瞓覺！

17/1/19

17/1/19.    THU.    COLD

今日老公放假，可以車我地返工返學， 我可以輕鬆啲啦，返到公司食早餐，然後都係做嘢啦，今日要補番之前幾日的時間，所以都冇咩停過呢，朝早做好更表，午飯後去咗大昌入吓貨，今次買咗唔係好多咋，下午返去做好嘢開完會又再做嘢， 未停過咁做到5點幾，總卜於可以抖吓，放工直接返屋企啦，老公煮好飯有得食，食完都係做埋啲功夫，打暈埋仲爺，再對埋子元啲卷，希望佢頂住好好考埋聽日啦！老公今晚返夜，10點幾就出門口返工啦！

16/1/19

16/1/19.     WED.    COLD

今日都係請咗半假，所以朝早返去都要勤力做好嘢！朝早揍哂佢地返學我就返工啦，朝早真係幾忙吓，12點幾去埋個廁食埋個飯就閃了，笨元已經喺屋企，比咗錢佢買飯盒食，等我回來就可以開工， 同佢溫咗音樂先，跟住就到常識，內容佢都OK係唔識字囉，叫佢默字就發脾氣囉，唔識字點考試呢！6點多入青衣同嫲嫲會合食飯，試咗間東南亞嘢又幾好食喎！返到去沖好涼叫子元自己再溫吓，我覺得其實佢都OK架啦！不如早啲瞓仲好啦！

15/1/19

15/1/19.    TUE.    COOL

今日都係放半日，朝早都係要揍哂啲仔返學啦，買埋早餐返工，都係做嘢啦，其實都係有嘢就做咁解啫，但遇著啲白痴精，唔鬧真係對唔住自己啫！忙忙碌碌咁一朝好快就過，1:00即閃去接子元，因為英文補習嗰到miss未改好卷，所以我們去食咗飯先再返上去，大約知佢錯咩咁啦！返到去抖抖就開始做卷，我就溫定其他術科先，其實係我讀書定佢讀呢⋯⋯唉！做到6點幾入青衣食飯，食完順手接仲爺返來嘛⋯⋯沖好涼笨元又再做練習，仲仲好乖自己玩，夠鐘就瞓覺，我就同子元對埋啲英文，早啲放佢瞓！我仲有3機衫要摺，好在有電視陪住！

14/1/19

14/1/19.   MON.    COOL*

今日請咗半日下午，為嘅都係溫書啫，但時間總係唔夠用咁，溫極都好似唔夠咁！朝早如常揍哂啲仔返學啦，老公返早嘛！返到公司食埋早餐就開陣工，不過都係邊做工事邊做自己嘢，尤其要出題做不供詞提充，我覺得啲字又多又難砌埋，真係攞我命！放工前叫做搞掂啦，快手閃人攞埋個飯返屋企，去到美孚見子元位置差不多，就等埋佢先返去，食埋嘢真係開工都差不多3點，你話時間點會夠用，同佢對吓練習又做吓咁啦，其實要教的一早教哂，都係唯有practic makes prefect架咋，係咁做囉！但做極都仲係有錯，好難搞，我都好迷網，今次真係睇吓上天點安排啦！老公揍埋仲爺返嚟，咁盡人事咁都要溫吓架，首先同佢睇吓工作紙先，我真係好難相信當年呢啲嘢子元係識囉，因為我記得子元嗰時溫書係算輕鬆，因為佢真係日月，但仲爺好似連睇清楚邊個打邊個字都有難度咁，莫講話明啦！巡例咪攞啲練習同佢做吓囉，點都叫做有溫習過嘛！做到6點幾7點大家都餓啦，出去食啲嘢先，返嚟沖個涼繼續，我都好想快啲離開無間地獄呀！

13/1/19

13/1/19     SUN.    COOL

捱埋呢幾日就放監架啦，加油呀！今朝8點幾醒咗都唔覺老公琴晚入過嚟瞓又唔覺佢今朝身返工，我應該真係幾攰吓！起身煮早餐，食完就叫笨元做練習，然後我就係咁二再同仲爺做吓練習，再摺埋啲衫，同佢對吓答案解吓咁，點幾出去食嘢回來就轉溫常識，條友原來都幾多唔熟，好在常識仲有時間處理！老公放工去買餸，因為今晚約咗阿媽佢地上來食生日飯！當然係由大廚出馬啦，我就繼續教仔！等佢地上來食飯，老公就7點幾出咗去踢波，我就洗碗切埋蛋糕，趕佢地去沖涼我就打掃！

12/1/19

12/1/19.   SAT.    WARM

今日好似唔開心多過開心，有時開始覺得，淨係我揍住佢兩個時係辛苦啲，但起碼冇人嘈我，最終兩個都會聽我講，但多條友喺到嘈嘈閉時，其實仲搞壞件事！朝早笨元去學英文，我地去食早餐，然後都係返屋企，但周圍都亂，老公又要子元唔知畫咩，所以就未溫書住，但到我執好嘢叫仲爺做功課，佢又喺到多多事實，令我又發火啦，其實都冇咩架，我火完就得，點解又要話我發火呢！搞到大家都唔高興， 我嬲到出咗去買嘢，總之嗰陣時都唔好受！到老公揍咗仲爺出去學嘢，我又執咗一輪嘢，同子元去食埋晏就回來溫中文，溫吓做吓練習先知咩唔熟！到5點幾老公回來接我地，約咗Joe佢地食飯，飯後佢帶埋個仔去踢波，我就同仲爺返屋企，沖好涼睇咗陣電視玩咗陣就要去瞓，我就自由時間囉！

11/1/19

11/1/19.   FRI.    COOL

今日真係冇咩做，朝早起身整午飯比笨元帶，跟住就返學返工啦，買埋早餐返去，然後食完就開始搵嘢做吓，但今日都係hea架啦，午飯後上咗去睇煲，最終我都買左兩個，好難得！下午更free 啦，因為阿姐請咗機， 基本上我係狂打機啦，係間中吹吓水玩陣咁， 放工即閃返去美孚食晚飯，嫲嫲話出去食，食完我去超市埋買丁麵等等，回家後我只想快啲休息呢，今日好攰！

10/1/19

10/1/19.    THU.    COOL

今朝又要晨早起身捉佢地起身返學，買埋早餐返工啦，今日真係冇咩做，朝早都係做埋photo report，午飯因為太惡劣，又得番我同Mandy, Kathy於是出咗去食，但正記又係勁多人，最終食咗車仔麵，都唔錯！下午基本上都係hea，其實都幾浪費時間！等到放工就閃人，去美孚食上海嘢，食完就回家，本來都冇咩，不過之後子元講咩數學專題個立體嘢唔可以用環保紙，宜㘠給令人好火囉⋯⋯又係立體又係旋轉對稱啦，咁環保紙有咩問題先，彊化！結果我又黑面咗一晚，其實我又開始好大壓力，下星期都考試但溫習上好虛無咁，令人好大壓力！

9/1/19

9/1/19.   WED.    COLD

今日老公放假，可以揍哂啲仔返學，我又唔洗趕頭趕命啦，返去食埋早餐就開工，今日都係整吓相咁啦，午飯後上咗去睇開倉，今次係煲，我又唔需要其實都係陪吓佢地睇啫！下午都係正經做嘢啦，所以時間過得好快！放工返屋企喺巴士站接埋子元回家，返去就有飯食啦，食完都係做埋啲家務，同仲爺溫吓書，又催吓子元做好啲嘢咁啦， 10點幾沖好涼邊摺衫邊睇電視啦！

8/1/19

8/1/19.    TUE.    COLD+

今日要揍埋仲爺入青衣先可以返工，朝早打咗俾嫲嫲打左好耐先至有人聽，嚇死我啦！返到公司仲大把時間食早餐，朝早都係做嘢又吹吓水咁，午飯出咗街食，點知正記冇位就去咗試米線，其實都唔係咁差，最後食埋燒餅做甜品就一流！下午本來都做嘢，等啲大人物去哂開會就出吓卷比仲爺，盡吓人事溫習吓！放工等老公來接我，返去超市買埋油等就回家收捨，等老公接咗子元放踢波，攞埋pizza回來吃！晚上的功夫總係做唔完，12點多先有機會坐吓！

7/1/19

7/1/19.    MON.    COLD

今日又係要返工返學的日子啦，今朝老公仲可以車我地，唔洗太趕又可以早返到去，食埋早餐慢慢做吓嘢，朝早阿姐喺到所以都係要做，但其實都冇咩係特別趕急，午飯後咪吹吓水打機囉，下午阿姐請咗假又可以自由埋佢啦，其實都係打吓機上吓網啦，話咁快又放工，返到去就有飯食，嫲嫲煮好飯嘛，食飽食埋碗打掃埋沖涼都9點幾，同仲爺睇吓功課問吓書又要捉佢去瞓，再睇子元的功課，都冇機會溫習，明天等佢去婆婆到再溫吓普通話，我都想快啲考完試！

6/1/19

6/1/19.   SUN.   COOL

今日老公返全日，咁我又要全日揍仔啦，瞓到9點多起身，梳洗好揍笨元去英文補習，我就同仲爺去咗食麥當勞，再去埋遊樂場玩，夠鐘先返去接子元，買埋餸返屋企，快手開始同子元溫吓書先，溫咗常識先，再做吓練習，我就去煮午飯，簡單地煮麵咋！之後程生就嚟接子元去奧數，咁我就有時間大掃除，主力洗哂個廁所，尤其係抽氣扇同抽油煙機，真係抺到手軟！等子元返來又繼續溫中文，6點多開始肚餓了要去煮飯，跟住都係洗碗清潔沖涼啦，冇再同笨元溫書啦，叫佢做埋啲功課，再打暈埋仲爺就摺衫等等，最搞笑係笨元話喺床睇書，咁咪睇囉冇問題，但我見佢電話冇叉電咪提吓佢囉，其實佢係邊睇書邊攞咗個電話喺床，冇問題架但我係要佢誠實囉，呢啲時候唔教幾時教呢！

5/1/19

5/1/19.    SAT.    COOL*

今朝老公要揍子元去足球比賽，咁我就同仲爺二人世界啦，瞓到9點幾先起身，煮埋早餐佢食開始要做功課啦，佢慢起上嚟真係可以好慢，寫中文字可以寫大半個鐘，激死你，不過做咗最難嗰樣先都係好事，最後做到1點就要出門口過去學音樂，今日踢波夾唔到時間，所以學完就可以撘巴士回來，喺車程到瞓飽飽！回來後仲爺就做埋啲功課，子元就去咗游水，等佢游完水就去咗食米線，食完回家快手沖涼，仲爺做哂功課可以玩玩具，子元咩都未做嘛，唔該做埋功課先！明天老公加咗轉返早，星期日OT最著數！

4/1/19

4/1/19.    FRI.    COLD

終於到星期五啦，今朝都係老公揍仔返學啦，咁我就好早返到公司嘆埋早餐先開工，不過其實要趕的都七七八八，所以都係輕鬆咁過！午飯後休息吓吹吓水啦，，後來有嘢做時間先過得快少少，放工老公嚟接我，先返屋企收拾吓，差不多8點才出小童，我就係小童等啦，本來都冇咩，到臨放時嗰個羅sir先嚟話咩點名紙個名冇仲爺，應該係交錢時入錯班，但佢要我重新交過錢，要30日後先退番比我，大佬，價錢一樣，又都係合唱團，為個點名紙何解要咁複雜！終於可以去食飯，又試新嘢去咗食茶記，食到10點幾先回程！

3/1/19

3/1/19.    THU.    COLD

今日終於開始返學，即係我又要一早起身啦，今朝有老公揍我都仲可以慢手慢腳啲，下星期又要趕頭趕命啦！返到公司食早餐，然後都係開工啦，朝早都做得七七八八，午飯後同幾位太太講吓升小學啲嘢，原來佢地真係冇咩概念同資訊，咪同佢地介紹吓囉，下午阿姐放假，我地又放囉，做好埋啲嘢就自由吓咁，放工可以直接回家，嫲嫲揍咗仲爺出嚟我唔洗行多轉，等我回來佢就走，我就自己煮飯食，然後都係收拾清潔沖涼睇功課，係仲爺要表演唱歌比我地睇囉，佢真係唱得好投入！

2/1/19

2/1/19.    WED.    COLD

今日又係月頭返去忙的日子，佢兩個仲未要返學，老公又返晏，所以一早起身得我一個！一去到廁所就見到一條賴屎褲喺企缸，都估到係仲爺琴晚出事，不過條友識自己搞掂，只係冇處理好哂啫，但識抺patpat換過乾淨褲先再瞓已經叻仔！快手搞掂出門口返工，今日返去食香蕉同脆片，節日過後真係要節制吓！可能今日真係太忙，完全唔覺得餓，轉個眼就已經放飯，食完飯都係吹吓水啦，阿姐下午雖然請咗假，但我都係勁入job cert，其實都冇咩著數，放工就忙囉，返青衣先接咗仲爺，再去九龍仔接子元，咁樣走一轉就差不多2個鐘，喺樂富食埋KFC就返屋企，快手沖完涼本來都冇咩，係子元要交嗰份唔知咩網上功課又激到我火起，其實學校又係煩，點解成日要網上交呢！

1/1/19

1/1/19.    TUE.    COLD

新年快樂！2019年的第一天腄到自然醒，算係一種幸福吧！2018年算是一個很大的轉變，我和老公都轉咗工，時間地點都好多轉變，大家都好努力咁協調，慢慢適應咗，就我嚟講其實都開心咗，不過晚上的時間怎樣都唔夠用，真係好傷腦筋！笨元開始大個仔，試咗第一次自己離開香港去交流團，亦多咗自己出入去唔同地方，我都開始要學識放手比佢長大！仲爺依然係咁可愛，同佢開咗個5歲生日會，希望佢一路都記得有個咁開心嘅日子！我同老公都係老夫老妻咁啦，佢要返shift後我都要努力適應，好多時大家都要一打二揍仔，日子都係咁過！
今日老公返中，朝早瞓到10點幾先起身，叫得大家起身出去食早餐都12點幾，真係好肚餓，然後土葵廣行咗陣同子元換咗mon貼，仲爺去遊樂場玩咗陣，行咗陣商場老公又要返工，我就同佢兩個返屋企，買埋餸今晚返去煮！今日都冇再同子元溫書，只係叫佢做埋琴日未有時間做嘅嘢，不過就同仲爺做咗少少數學，做埋閱讀記錄冊咁，再幫子元搞埋個數學專題的立體旋轉對稱作品交功課！早點煮晚飯食因為都好餓啦，食完打掃埋就沖涼休息！