1/10/20

 1/10/20.   THU.    HOT

今日係4㬛餐期的開始，都幾hea過架，瞓到10點幾仲爺入嚟叫我地起身， 出得去食早餐都已經12點幾，諗唔到食咩，近近地都係去長沙灣食茶記咋，再近近地去咗行轉Aeon，我買咗個snoopy月曆呢！老公送咗我地返去佢都返工啦，冇咩特嘢要做咁就齊齊hea吓啦，到4點才叫仲仲入房睇功課，子元喺梳化瞓咗就由得佢先啦，點之之後佢話佢有燒， 嘩！而家咁有燒好驚架嘛，唯有叫佢食必利痛先，再沖個涼去休息，我估計係因為佢琴日踢完波腳啲肌肉發炎，因為佢行到好似跛嘅咁，食咗藥瞓咗出到汗就冇咩啦，等老公回來先出去食飯，去咗大角咀食越南嘢，然後返咗長沙灣荔天附近個公園仔賞吓月啦，又有得玩遊樂場， 加上仲爺今日個浴衣look真係好正呢，玩到11點多要回程啦，返去快啲沖涼瞓覺啦！

30/9/20

 30/9/20.   WED.    RAIN

今朝又係一早起身揍仔返學啦，見到仲爺入學校個樣真係好可愛， 睇住佢個背影都覺得佢好悠閑咁，真係好好笑！老公車到我去南昌站就回家，咁我又好早就返到公司， 好蝕咁添！朝早做吓嘢就開始剪job cert， 咁又一朝啦！午飯做個節啦，叫咗外賣一齊食，今次食西餐我食左burger，又真係幾好味喎！本來諗住食完上market place買餸，佢地提意買牛陣外賣，為番起個一個餐都係$104，但夠哂3個人食， 自己加啲嘢就得，結果我真係加咗兩個烏冬同餃子就飽到食唔哂咁滯！下午剪足一晝，好眼瞓！終於捱到放工啦，見到周圍都塞就撘地鐵啦，返到去阿媽就走啦，咁我就煮飯啦，子元踢完波都返嚟！食飽都冇力清潔啦，好眼瞓要瞓陣先沖涼！

29/9/20

 29/9/20.    TUE.    HOT

仲爺終於都開學啦，所以今朝要好早起身啦，可以早啲出門口，唔知今朝會唔會周圍都塞車嘛！結果好快都返到去啦，先車咗子元去長天，再到仲爺去荔天，本來老公話車我返工， 但見到個google map紅到咁，都係去南昌站算啦！由於太早到咗，忍唔住去咗買麥記，食咗個最輕呵的就算！今日主力又係剪job cert同吹水，午飯後去咗買包比佢地估早餐，又要諗晚飯食咩，都係簡單啲食粉算啦！放工返到去阿媽都係過咗嚟不久，見我返嚟佢都走啦！煮住飯等子元回來又啱啱好開飯！清潔完又要睇功課啦，子元就再放吓手比佢自己嚟！仲爺瞓咗可以自由吓，明天又要早起啦！

28/9/20

 28/9/20.    MON.    RAIN

今日又要返工啦，不過主要都係做啲唔洗用腦嘅嘢，好事嚟， 剪吓嘢咁唔洗煩又可以吹吓水！返去食完早餐咪做陣嘢先就開始剪job cert啦，剪咗個幾鐘呀手都攰，Ivy食飯我都可以休息吓，夠鐘就蒸飯食，然後去德福買嘢，撞到joey媽就一齊行，我都係有目標地買嘢，佢又跟我一齊買咁啦！夠鐘就返去又開工啦，又剪咗一個下午，時間咁過都好嘅！放工竟然落大雨，好在我都唔係好怕， 係怕啲嘢濕多過我濕！ 返到嚟見到pizza box，老公要上堂冇煮飯！都好，快手清潔好就處理佢地明天返學嘢，好似做極都唔完咁，10點幾終於沖好涼趕哂佢地上床，可以休息吓呢！

27/9/20

 27/9/20     SUN     HOT

今朝都唔算瞓得晏, 9點多就醒了, 等老公上埋堂就諗住出去食早餐, 但又要整埋個網上銀行喎, 可能係我太唔識搞呢啲電腦嘢, 搞到我都炆! 終於搞掂咗可以去食嘢啦, 時間關係要去荃灣食, 食完行埋荃灣廣場同Aeon呢, 不過個人都攰, 所以都唔算行得好enjoy! 老公返公前車咗我地返去, 因為遲食早餐嘛, 又可以慳番一餐, 摺哂啲衫, 4點多先落去一人買咗一份燒賣魚蛋食就當一餐, 再去惠康買嘢, 都係啲飲品呀麵呀嗰啲啦, 攞到手都軟! 回家後等佢地沖咗涼, 擺好買返嚟啲嘢, 兩條友又睇機, 我就準備吓晚餐咁, 都係提唔起心機同佢地溫習, 煮好飯食埋飯清潔完都要stop佢地睇機, 不過都係停唔到子元架啦, 比多次機會佢先, 真係大個仔唔想好似小學雞咁同佢溫書, 反而就去咗同仲爺溫, 希望子元今個星期開始做到我教佢的溫習方法啦!

26/9/20

 26/9/20     SAT    HOT+

今日好攰呀！可能真係太多嘢做，身體上又唔多舒服咁，更加辛苦！早上起身起叫醒哂佢地出門口，一個補習一個畫班，我地食完早餐就去咗銀行，問吓開戶口啲嘢，但因為時間關係都冇時間開住！子元補完習就閃人，車返我去畫室佢地就去konter練跑，揍咗仲仲返去我就休息吓，咩都唔做只係打吓機！因為下午又要去長天聽家長會，真係好傷神的！3點開始聽到5點幾，中間有休息嘅，但都係好攰，見到班主任，正班主任都好正常，副嗰件真係又長又沉氣，悶到一個點！搞到Overttime， 阻住人地下場活動嘛，要買埋pizza再去Joe嗰到吹水會，細嗰兩個真係好嘈，吹到10點未夠走人啦，我今日真係好攰呀！

25/9/20

 25/9/20     FRI     HOT

終於捱到星期五啦， 今日仲要冇咩做，悶到一個點，簡直有啲浪費時間！早上有擔心子元知唔知醒返學，咁都好好佢自己搞掂哂， 真係大個仔啦！我就如常返工啦， 返去食埋早餐就開始無所事事啦，因為真係要做嘅嘢都做哂啦，真係打機都打到悶，又要留意住阿姐行開行埋咁，都幾攰吓！午飯因為冇帶飯，同咗Joey出去食米線，吹吓水咁啦！下午回來又係悶，聽住收音機都覺得悶，死未！真係好難捱咁到咗放工，撘巴士返去，但因為見子元仲喺摩士，老公又話美孚塞車，我見下兩個站落車可以join到佢地就落車過去停車場找佢地，因為子元漏咗pat喺球場又要去找，搞咗一大輪先走得，返得去都7點多，上樓放下嘢又要出發， 先去接咗阿嫲再去阿媽到做節，以為都係咁食餐飯，原來有人物要登場，阿妹個新男友終於上水面啦，都好嘅，終於有著落囉！食完飯食吓水果咁，9點幾先返去，快快手手捉佢地去瞓啦，明天又係大把嘢做！

24/9/20

 24/9/20     THU     HOT

今日本來都冇咩架, 係阿姐發神經, 搞到我一日都唔開心, 我係堅嬲架, 我做錯你點小我都得, 但我冇錯, 你話我我係唔會服, 以高壓低正白痴, 不過學Joey媽媽話, 當佢係精神病就算, 唔好計較! 搞到我今日都冇咩想寫, 講吓放咗工之後啦, 除咗下午為發洩, 食咗個豐富午餐好飽, 晚上去咗九龍城, 老公又帶我地食咗餐勁, 因為子元喺九仔踢完波嘛, 就係嗰到食咗間西餐, 主要係有梳孚利pancake啦, 係幾好食但就貴囉, 嚟緊又要幾十蚊一家食一餐啦! 回家做運動沖涼, 佢兩個就快啲做埋功課, 早啲好瞓啦, 真係開學架啦!

23/9/20

 23/9/20     WED     HOT

好似過咗好耐先至星期三咁, 日子真係難過! 不過今日係中一開學日子, 好耐未試過6點幾起身啦, 7點多啲就出門口, 因為要趕7:10班6號, 跑到隻嘢咁, 不過好快就過到去, 喺學校一邊影咗張相等我有得出吓POST, 跟住就揍仲爺去婆婆到, 然後我就要返工啦, 如常返去食早餐開工啦, 日日都係咁冇咩特別! 午飯後咪出去德福買早餐比佢地明天食囉, 下午都係做吓嘢咁啦, 放工去荃灣同老公佢地會合, 去咗食泰國嘢, 仲爺子元又有收穫啦, 嫲嫲又買玩具比佢地! 回家後快手整埋啲嘢, 都早瞓啦, 因為今朝實在係太早起身啦!

22/9/20

 22/9/20.    TUE.    HOT

今日又太遲出門口，所以搭咗8:40班shuttle，真係有啲趕，明天都係早啲出去。返去食埋早餐就開工啦，時間好似過得好慢咁，做咗好多嘢都未定飯，又肚餓喎所以自己提早開飯。食完飯想去祝福買餸，都冇再去行街啦，下午啲時間反而過得好快，有水吹下係好啲！六點先放工你好難又用唔到喎，好在今日巴士都順暢，唔夠七點到返到去，都冇咩時間休息又要煮飯，子元踢完波返嚟都七點幾沖完涼就開飯啦，飯後好忙碌，又要捉佢兩個執好聽日返學啲嘢，雖然仲爺唔使返學但都要過去婆婆到。

21/9/20

 21/9/20     MON.    RAIN

又到星期一要返工啦，今日轉返返九點，所以唔使咁早起身出門口，但最終都係8:30左右就返到去，蝕咗添。返到去都係食早餐啦，然後做下野吹吓水，午飯後就上咗德福買嘢，好忙碌咁又要換月餅，又要買麵包又要買雞蛋，仲要落住大雨，雖然全程都唔怕濕，但估唔到場雨好襟落，一直都放工都未停過，仲要越落越大，加上今日開始又要放返6:00 ，而且周圍唔係炒車就係塞車，梗係唔搭巴士啦，但行去啟德站果斷路已經足夠令人濕晒，不過我就冇乜所謂嘅。返到屋企都差不多七點，佢哋仲以為我去咗惠康買嘢，邊買得到啊濕到隻狗咁！食完飯都唔係照常咁洗碗，估唔到仲爺驚我得閒得滯，冇拖地水入廚房時，一嘢倒到全個廳都係，結果抹到隻野咁，全個梳化底都濕晒，唯有當大清潔啦！所以今日都冇做運動啊我已經夠晒啦。沖完涼睇埋功課可以自由，老公上完堂就出咗去做埋運動先返嚟！

20/9/20

 20/9/20     SUN.    HOT

星期日當然可以瞓晏啲，9點幾起身梳洗好，又係時候出去食早餐，然後出佐敦攞埋子元啲教科書，本來想去運動褲，點知星期日唔開。又唔想咁快返屋企，所以去咗奧海城行個圈，其實都冇咩特別野要買，只係想行吓啫。最後都係買咗啲早餐麵包，就返美孚買餸，因為老公今日返中我哋要食自己。買埋餸返去整好咗又係時候睇吓電視休息吓，睇埋造星就同仲爺溫今個星期啲功課，再睇埋子元啲功課做齊未，咁梗係有甩漏啦！6點幾煮飯食，食完都係清潔做運動沖涼休息！

19/9/20

 19/9/20     SAT.    RAIN

今日又係一個忙碌的星期六， 8:00起身就同佢哋出去學嘢，跟住同老公去君日食早餐，竟然撞到蔣老師，咁咪食下傾吓佢老公就去接返子元，我就去畫室等仲仲放學就回家，休息吓就摺埋啲衫，等老公返嚟，差不多時間又車我哋去撘地鐵，仲仲要去學音樂呢。我就梗係去咗食午飯啦，而家回程都係搭地鐵，快啲呀嘛。返到屋企差不多時間就叫子元去畫班，我同Chung仲係屋企都係休息吓，佢有佢睇機，我有我唔郁。七點幾出門口又要去接返子元啦，你畫室樓下買咗餸直接返屋企可以食，仲可以邊睇波邊食，咁又一日！

18/9/20

 18/9/20     FRI     HOT RAIN

今個星期的時間好似過得快咗好多, 都好, 開始習慣番日日要返工! 可能今日唔太忙, 可以好好做自己嘢! 返到去都係食蛋做早餐啦, 然後咪做吓嘢囉, 不過都係吹水多架啦! 今日食飯時間都食咗好耐, 因為叫咗樓下酒樓的外賣, 半價嘛, 三百幾蚊食到飽, 仲可以連籠上, 幾搞笑! 食完又吹水咁, 兩點幾先開始做吓嘢, 但我都係打吓機咁啦, 不過都有事要忙吓! 放工就先去7-11換我的Snoopy環保袋, 終於換到Snoopy個頭嗰隻啦, 仲要換齊兩款, 咁可以停啦! 返到屋企先睇仲爺功課, 然後咪開飯囉, 兩兄弟都係咁, 啲功課甩甩漏漏, 激死我! 真係要出禁機令先得啦!

17/9/20

 17/9/20     THU     RAIN

今朝又獨留兒童在家，等阿媽過來才接更，我就7點幾照出門口！返到去食埋早餐才開工，不過都係有啲hea，唔算有咩趕忙！好在一早同阿姐講咗今日覆診，事事都要睇佢面色先可以講嘢， 真係好麻煩！12點半就可以閃了，返4個鐘嘛，可以返屋企食埋飯先再出去覆診！今次真係覆得好快，去到仲要檢查埋血壓計等等，好在體重又輕咗，啲血都冇咩， 係要再食清啲，血管入面啲油都仲係好多，所以都係要清吓！返到去阿媽就可以收工啦，我就跟仲仲功課， 子元上完堂就去踢波，等仲爺做好功課，摺埋啲衫， 等老公回來接我地，就入嫲嫲到食晚飯呢，又係可以好舒服食一餐飯呢！ 

16/9/20

 16/9/20     WED     HOT

今日都係如常咁返工啦, 返到去又發現跳咗線,真係好奇怪,又要處理囉! 跟住都係做吓嘢咁啦, 今朝都比較忙,連森美都聽唔到! 話咁快又放飯, 食完上咗去德福買包啦, 下午又入咗房做剪爛壞口罩工作, 咁又浪費咗個幾鐘, 不過咁就好快就放工囉, 返到去都係收拾吓先,等張家葉家上來開party, 其實係食餐飯傾吓大家的難民大計咁囉, 要傾真係一日都講唔完! 11點幾先散場, 仲要洗碗清潔等等, 12點幾先停落嚟呢!

15/9/20

 15/9/20.    TUE.    HOT RAIN

今日都係唔算好多嘢做，如常咁返工啦，但返到去就話跳咗電，蒸唔到蛋，食咗第二啲早餐呢！跟住都係做吓基本嘢，然後就再做自己嘢囉，但真係好肚餓，原來雞蛋係飽肚啲架喎，午飯後都係出咗德福，買咗餸咁啦，勁大雨都唔去得邊！下午大家都要開會，咁我就可以聽咗do姐找資料，所以時間過得勁快！放工快腳返去，就揍埋仲仲入青衣啦，因為子元入咗去踢波，不如順手喺嫲嫲到食埋飯啦！咁我又慳番唔洗煮！入到去就等開飯，真係好開心！食完就hea到8點幾先走，啱啱好趕到巴士，所以返到嚟都係9點，做埋運動先沖涼，慢慢做吓自己嘢，趕埋仲仲去瞓，唔比子元打機佢就係咁睇電視，執埋明天返長天考分班試啲嘢就趕佢去瞓！

14/9/20

 14/9/20.    MON.    HOT

又要返工啦， 琴晚太夜瞓，今朝真係唔多想起身！返到去食早餐啦，然後咪做吓嘢囉，時間都算過得快，聽住森美好好笑！午飯快食完個杯麵加飯團就去德福行街，Joey媽媽叫我幫佢買麥記，因為佢要趕返去打卡！下午寫完水版樽就做自己嘢，睇英國學校啲資料，做番個excel好睇啲，點都好啦，機會係留比有準備嘅人！放工返到去有嘢食先，因為老公揍子元佢地出去買運動服時又食埋tea，買左炸大腸同臭豆腐返嚟比我食，好正呀！晚飯時老公又邊食邊上堂，我食完本來想喺梳化hea陣先洗碗，點知就瞓咗，真係太攰！

13/9/20

 13/9/20     SUN.    HOT

今朝起身就見到晴媽send message嚟，原來想約我哋今日比啲細路一齊玩，反正下午都冇嘢做就約啦，起身後梳洗出去食早餐，再幫子元買埋西褲，得一條西褲真係唔夠返學。再行咗一陣就返屋企啦，都要返去收拾下先上嚟屋企嘅，兩點幾晴媽帶咗啲細上嚟，等程生湊埋婷婷上嚟，佢哋就走咗啦，如果下午班細路就喺我哋度玩，我同子元就打機打到七點幾，再捉啲細路執嘢準備開飯，買咗外賣返嚟，大家吹水吹到10點左右先至散場，明天又要開工返學啦！

12/9/20

 12/9/20.    SAT.    HOT RAIN

星期六終於變返忙忙碌碌，朝早就子元去補習又要湊仲仲去畫班，然後我同老公去食早餐，佢又要揍子元去練波，我就揍仲爺回家，比佢玩陣又做咗陣功課就要出門口去學音樂，子元要去埋剪頭髮先返。過到去海怡都係如常咁，佢學嘢我食嘢！來回撘地鐵快好多，回來後都係休息吓，見差不多時間子元去畫班就叫佢落樓，點知竟然冇6號，原來之前撞咗車所以冇車返，唯有叫佢撘地鐵，條友又話唔識路真係想丙佢！最終咪又完成到！我同仲仲做埋網上功課就出門口去接佢啦！去食埋米線才回家。

11/9/20

 11/9/20     FRI.    HOT

終於捱到星期五啦，可以放假啦，個心都飛咗去放假啦！返到去食早餐開工，唔算太忙但都有嘢做，日子都係好悶咁過！放飯快手食完，陪joey去德福買嘢，有得出去行吓就夠啦！返到去都冇咩趕忙，所以都係邊做吓嘢邊打吓機等等，放工直入青衣，但等車又等得耐，等等吓奶奶打嚟話原來去青衣城食，老公冇同我講過囉，可以點呢喺巴士站囉！最終咪迫42c去到長安落車行返過去囉，好在大包已經攞咗位，食住等老公佢地啦！食飽後去攞車前又撞到莫主任蔣老師佢地，仲爺見到老師個樣真係好好笑， 緊張到呢！去食埋許留山就回家啦！

10/9/20

 10/9/20     THU     HOT

捱到星期四啦， 返多日就放假，不過今日仲爺上網課都係唔順利，應該幫手的又掛住瞓，子元都要上堂架嘛，顧得仲爺幾多呢，激死！朝早都係做吓嘢又吹吓水咁啦，午飯前得知阿姐下午請咗假，即刻假期心態，首先係飯後出去唔洗咁趕返嚟，第二係下午基本上罷工啦，完全做自己嘢呢！所以下午啲時間過得好快，轉個眼就放工，巴士有啲塞，返到去煮得飯嚟有啲遲，所以都遲咗做運動沖涼等等，本來仲爺都好合作又幫我手做呢樣嗰樣，但最尾跌咗個琴落我隻腳到，痛到我大叫，因為真係好好好痛！子元比我大叫叫咗出嚟，佢都算識救我咁啦！

9/9/20

 9/9/20.    WED.    HOT

今日至星期三咋，究竟幾時先放假呀！早上都有啲趕，好在都冇遲，返到去蒸蛋焗麥皮食，食完又開廿工做吓嘢打吓機咁啦，都係聽住收音機做架啦，唔係時間好難過！午飯後上咗德福買餸，返到去做咗陣自己嘢就要入房又整口罩，搞得嚟又放工啦，返到去煮埋飯，子元都踢完波差不多返，食完飯咪清潔囉， 跟住同仲爺做吓網上功課，條友仔都算識喎，比我想像中好，我做埋運動就沖涼休息啦！

8/9/20

8/9/20.    TUE.    HOT

 今個星期過得好慢咁， 成日以為今日係星期三！今朝試吓開始食簡單早餐，減吓肥嘛，因為買咗雞蛋做早餐，加埋麥片啱啱好！之後都係做吓嘢啦， 但都係做唔到幾多，因為掛住打吓機等等，所以今日進度好慢，午飯後都係上咗德福啦，買咗麵包啦奶啦麥皮等等，又要返去！下午都冇咩做嘢， 因為同炮哥佢地吹緊英國啲嘢，其實真係好多細節嘢要諗，可以係好煩好煩，但又非做不可，嗰個無力感先大！放工好快返到去，都係冇機會休息架啦，煮好飯食，不過兩隻豬真係好食得，睇嚟要再多啲餸先掂！清潔完做埋運動就沖涼，趕埋仲仲去瞓，又可以休息啦！

7/9/20

 7/9/20     MON     HOT

今日開始冇得WFH啦，要開始調番個心態先得！早餐食包同麥片，真係好清淡！食完就做吓嘢啦，都有嘢做架，唔理咁多照聽住收音機，時間真係過得快啲架，始終有啲娛樂嘛，放飯後去咗德福買餸，只可以喺超市買呢，都算好快手買齊返去！下午都係做吓嘢啦，只係想快啲放工，不過返到去都係要煮飯呀做呀做，清潔完沖埋涼先可以休息吓呢！

6/9/20

 6/9/20.    SUN.    HOT

今朝老公揍咗子元去練波，得我同仲爺喺屋企，起身後煮早餐食，比佢睇陣機就要去預習，教咗佢中文第一課點讀，寫吓啲字咁啦，佢肯做都算係咁！之後就換床單囉，試吓張新床單係咪真係咁好瞓！佢地練完波返嚟沖好涼，又可以出去啦，今日諗咗去德福，又洗咗好多錢咁添！午餐啦，又去咗無印買嘢，然後又買包呀， 去ikea又買嘢食呀等等等，連埋喺ikea食埋晚餐囉，不過連ikea都停擺囉，都冇咩新嘢咁！8點幾回程啦， 返去做埋運動就沖涼休息，不過有好多衫要摺好攰！

5/9/20

 5/9/20     SAT.    HOT

今個星期六終於有啲似回復到疫情之前，因為仲仲可以去學畫畫又可以學音樂。所以8:00就要起身，等佢哋食埋個早餐就去學野，子元補英文，仲仲去畫班，我同老公就去食早餐。本來落大雨諗住Konter唔使練波，點知10點幾又出太陽，咁老公接咗子元就去踢波，搞到我喺美孚行返去畫室接仲仲，都要行咗半個鐘真係有啲攰。返屋企Hea到咁上下，兩位臭男就返嚟，到點幾鐘又要出門口，仲爺去學音樂，子元就自己係屋企搞掂。我都好耐冇湊個仲仲學音樂，去食埋個午餐，行咗陣$12店就接仲仲，搭地鐵返屋企。Hea到六點幾七點先至煮晚餐，都係簡單西餐啦！清潔完做埋運動就沖涼休息啦！

4/9/20

 4/9/20.   FRI.    HOT

返埋今日又可以放假啦，朝早都係咁返工啦，其實都冇咩嘢趕忙，所以都算快做哂！反而係仲爺學校啲嘢，今日又要上一上網課，老公又唔知醒咁，好在都趕得切上，仲爺個上身校服下身睡褲樣好搞笑！做好嘢就打機啦，放飯後快食完上咗幫德福行咗轉無印，幫子元買咗啲notebook，等佢可以抄note用呢！買埋麵包就返去啦， 下午差不多都係打機打機同打機，放得工就去長沙灣同老公會合，子元畫班嘛我地就食咗晚飯先，點知仲爺食完講嘢時續親嘔跴出嚟，真係激死！揍埋子元去買麥記就可以回家啦！

3/9/20

 3/9/20.    THU.    HOT RAIN

今日繼續係要返工架！不過返之前仲要去抽血驗，入去又要探熱我又超標，又要等， 抽血時又抽嚟抽去都抽唔到，真係好麻煩！最終搞掂走得老公車我地去食早餐， 仲爺可能早起又話頭痛又話肚痛，見佢冇嚟精神個樣真係好嚇人，好在之後都冇咩啫！返到去都係做嘢啦，午飯後點都出吓去，留喺公司總係會覺得蝕咗！去咗德福快行買咗包比佢地做早餐等等，下午返去都係做吓嘢時又打吓機，時間都算過得快，放工返去又有飯食啦， 食完咪都係清潔吓睇吓電視，最悠閒的時間！今日仲爺好聽話，又唔睇機又係咁幫手做嘢，仲話去瞓就瞓，可能今朝頭痛真係令到佢好唔舒服，所以都好合作，又好可愛咁呢！

2/9/20

 2/9/20     WED     HOT

今日要返工啦, 嚟緊都要返, 冇得返一日放一日, 真係要啲時間習慣! 返去買埋早餐食完就開工, 今日都係忙架, 月頭嘛! 返去做呀做, 做到午飯前已經唔想郁啦, 但食完個時間又唔夠街街,只係去咗樓下買嘢飲咋! 下午都係做呀做啦, 放工入青衣食飯,因為子元喺水庫練波, 撘42C返去真係撘到懷疑人生, 實在係太耐! 食完8點幾回程, 返去又要處理政務, 仲爺派咗啲回條等等嘛! 

1/9/20

 1/9/20.    TUE.    HOT

今日唯一一日WFH的日子，不過都係hea住咁過啦，瞓到10點幾先起身，諗住整早餐架嘛，但竟然冇蛋，唯有出去食囉，食完先去買蛋啦！送咗我地返屋企，老公就去幫阿媽整屋！我地返到嚟都係冇咩做，點都要教仲爺做吓功課，少少嘢都要做吓，唔係個腦真係唔識轉！跟住子元話要打MIRIO, 咁咪陪佢打囉，打到老公回來又唔願煮飯，最終出左去食，順手去咗買皮鞋比子元開學呢，食完晚飯買埋糖水就回去，明天又要返工啦！