15/8/14

15/8/14   FRI   HOT**

今日柏仲6點就係到嘈, 攞咗幾次玩具比佢, 手指都比佢食埋, 都玩到差不多7點先噯得佢瞓番, 不過我之後就瞓得好差啦, 8點都要起身啦, 佢隻衰豬就瞓番, 到我差不多出門口先醒, 咪同佢換埋片先囉, 餵奶留番比嫲嫲囉! 返到公司都係hea吓做吓自己嘢, 午飯時打吓機, 因為主君已經睇咗, 又download咗隻新game嘛! 下午都係吹吓水做吓自己嘢啦! 放工馬上返去, 因為嫲嫲要去睇醫生, 我要早D返去接更, 柏仲剛飲完奶, 時間關係我同程太先會合咗先, 等老公放工過嚟可以食飯, 8點前就返番上小童群益會啦, 今日表演都幾好睇, 佢地都唱得OK, 不過笨元可能攰啦, 冇咩表情! 小朋友表演完仲有miss表演架, 但又係時間關係, 聽咗一首我地就走啦, 去麥記食D嘢先回家, 兩個小朋友快手沖涼後柏仲食奶, 笨元因為等我地, 喺梳化瞓咗, 老公K.O.完隻細就K.O.埋隻大, 我就收拾埋D殘局, 可以休息吓啦, 睇埋隋唐先瞓呢!

<佢就有得再瞓....>

 <瞓到幾冧!>

 <子元合唱團呆樣!>

14/8/14

14/8/14   THU   RAIN-

今朝都算係咁, 7點幾先嘈我, 起身後梳洗餵奶啦, 跟住出門口返工, 今日都係hea過, 買埋早餐返去食, 吹吓水咁, 又喺網上吹水, 寫好日記做埋會議記錄就上BK hea, 同荔天的同學仔whatsapps吓, 先知到暫時找到唯一同班嗰個都係住荔欣, 咁以後撘校車就有朋友仔啦! 午餐後都係睇吓電視啦, 下午繼續hea, 繼續上網, 時間都好快過, 放工行返去順手買埋759, 因為明天要早D返嘛! 今日返到去都好忙, 先幫笨元放好張新床褥, 再要執游水D嘢, 趕到去泳池已過7點, 咁咪換埋衫先一齊帶佢去泳池, 然後我都游番半個鐘啦, 不過今日游得唔係咁好! 接番笨元後再比佢玩多陣啦, 真係叻仔咗好多, 游到2米喎, 比起之前頭唔掂水, 係叻咗! 不過叫佢自己執游水嘢就執漏咗替換嗰套衫, 唯有著番住件泳衣回家囉! 快手沖涼食嘢, 真係好餓! 之後餵埋柏仲, K.O.埋佢兩隻嘢可以抖, 游完水真係攰到咩都唔想做, 不過就睇埋隋唐先瞓!

13/8/14

13/8/14   WED   RAIN

今日係好忙的一日, 好多會開, 總監返嚟一日就開哂所有會, 真係佢唔攰我都攰, 朝早快手食咗個早餐就做吓自己嘢, 因為10點幾11點就要開會, 開到差不多12點多, 又要出去開, 但我主力都係食GE啫, 不過佢地真係叫得太過份, 洗唔洗多到咁, 雖然都食到九成, 但係飽到上心口! 2點多又要閃了, 因為佢地約咗人interview, 我叫做可以free D, 因為呢樣就唔關我事, 不過我都要prepare吓陣間同雜誌開會D嘢, 4點幾去樓下茶記係咁二傾埋, 終於收得工啦! 返到去沖好涼先理兩隻豬仔, 不久又開飯啦, 邊餵柏仲食少少飯, 因為湯有紅蘿蔔, 撈飯餵佢都食咗一匙啦! 之後開始執嘢, 執埋笨元D衫去新衣櫃, 老公就主力揍住柏仲, 執到9點多都執哂啦, 柏仲頂唔住要食奶啦, 咪餵咗佢先囉, 食到尾已瞓咗, 放入床搞掂, 子元9點幾都瞓啦, 我地又自由啦, Barry又攞咗好多龍眼上嚟, 今次真係好多, 雖然好大核不過就好甜! 邊睇主君邊食都OK啦, 之後睇埋隋唐先瞓, 夠哂攰!

12/8/14

12/8/14   TUE   HOT RAIN

今日要返工啦, 柏仲7點幾嘈啦, 不過而家唔洗咁早起身, 真係唔想佢咁早嘈, 等我瞓耐D! 起身梳洗後嫲嫲嚟到我都出門口了, 今日返到去要寫番3日的日記呢, 還要執番D相咁, 然後又吹吓水, 都真係好忙好忙呀, 午飯時諗住落去過錢比老公, 但要來張票未得, 過唔到住, 再去買飯時就落雨啦, 好在唔算好大! 之後邊食邊睇主君啦, 因為琴晚瞓咗睇唔到呢! 真係睇到人地好唔開心啫, 最唔鍾意呢D橋段! 下午都係做自己嘢啦, 有得free就free吓啦, 放工返到去仲喺到商量緊邊個帶笨元去游水, 但6點幾時出咗雷暴, 咁唔洗游啦因為得番室內場! 於是食完飯就沖涼啦, 跟住執番哂餘吓D嘢, 老公就整埋D相架, 最級有一幅放唔到…度位度得太盡! 本來想執埋衫, 但都夜笨元要瞓, 唯有明天繼續! 柏仲就唔肯瞓一陣先, 玩到9點幾食埋支奶咪暈囉, 咁10點前我地已經自由啦, 睇埋主君老公又話肚餓…搞到我都食咗個麵, 肥死! 最後睇埋隋唐演義就瞓啦!

<feature wall上半部完成!>

11/8/14

11/8/14   MON   HOT

雖然今日請咗假, 但都係好多活動架嘛, 朝早5點幾就比子元叫醒, 佢話佢好咳喎, 咁咪比次咳水加聞氣佢囉, 之後柏仲6點幾又嘈啦, 我真係超冇得瞓呀! 8點前都起咗身餵埋奶, 柏仲就係咁扶嘢行, 本來老公話出去食早餐, 但反正有麵咪煮麵食囉, 我地又可以睇番Running Men, 柏仲9點幾左右又要再瞓, 我就再執嘢呀等等, 總之就是沒有停啦! 11點幾出門口了, 同埋嫲嫲一齊去美麗華食自助餐, 午餐平好多, 都唔會食到好多嘢架啦, 咁抵D! 柏仲都食咗D包呀, 子元就食得少啦, 期間柏仲食完奶又唔肯瞓車仔, 一放佢落去就喊, 最終咪冇瞓囉, 到走嗰時拖住車佢就瞓啦, 我地下一站去科學館, 嫲嫲就回家啦! 原來科學館有新嘢, 類似wii咁GE, 笨元都玩得好開心, 其他嘢其實都睇過架啦, 同埋閒日原來都好多人, 玩到5點睇埋個星際路軌咁就走啦, 過海港城柏仲先食奶, 行完反斗城就去city super買晚餐, 慳番唔食晚上自助餐的錢勁買生蠔食, 5百幾蚊有18隻啦! 回家後先洗白白, 餵柏仲食埋少少粥同奶佢就已經瞓咗, 我地可以慢慢嘆, 笨元都食咗兩隻生蠔呢, 仲要分到味道的不同, 叻仔! 之後就瞓覺啦, 我都勁攰, 睇唔到主君呀, 瞓鬼咗, 唯有明天睇番! 臨瞓時諗住放番好柏仲, 點知移動佢後就咳咗幾聲, 仲嘔咗D奶出嚟, 我地又做餐死囉, 佢就兩吓瞓番, 唔抱起佢佢真係照同D嘔吐物一齊瞓呀!

<巴士扶手都玩一餐!>

 <努力食包中!>

 

 <加咗個生日蛋糕, 再影多張!>