14/5/15

14/5/15   THU   HOT

老公個鬧鐘未夠6點就響, 搞到我都冇覺好瞓, 柏仲又醒埋, 變相我又冇得瞓到6點半先起身! 揍咗子元返學就返上樓做番每日要做GE嘢, 然後揍柏仲入青衣, 今日早D出門口, 撘到早一班車, 早D入到去, 但出番嚟想買早餐時就發覺9點係勁多人買早餐, 結果去咗買KFC囉! 朝早都係做自己嘢, 午飯後睇電視啦, 老細又返咗嚟阻住哂人地睇, 係咁講嘢, 下午都好忙, 因為老細係到好多嘢跟, 不過都唔緊要啦, 重點係佢下星期忍唔住返澳洲慰妻, 哈哈! 雖然只係3星期都好過冇啦! 之後上網見康傑又有人收到信, 忍唔住send msg比書記再問, 原來嗰批係9月開學, 所以要早D寄等佢地交註冊費, 柏仲未咁早開學, 所以未寄住! 仲有都confirm埋喺上N, 咁都安樂D! 放工直接返屋企, 仲要幫老公去買六合彩, 返去沖好涼同柏仲玩吓啦, 有嫲嫲煮飯, 老公放工去揍子元, 但又遲咗搞到子元打電話比我呢! 終於返到嚟沖好涼食飯都8點多啦, 快手食完嫲嫲幫我洗埋碗, 我就同子元睇功課溫普通話, 真係有D唔知點溫好咁, 因為我都開始唔係好識, 拼音呢D我當年都係學得好皮毛, 不過我見笨元又好似OK咁喎! 今日條友打完小兒麻痺嗰D四合一加強劑嘛, 聽聞打嗰個護士唔好手勢喎! 子元就又要人幫佢沖涼同著衫, 話佢自己打咗麻痺針, 真係頂佢唔順! 9點多K.O.柏仲, 嫲嫲仲啱啱走, 佢以為我地會噯柏仲, 跟住老公話噯咩呀自己瞓啦, 奶奶即刻話佢怕黑喎! 所以呢, crying control的大敵, 果然係心軟嗰批人! 放佢入房瞓咗, 就叫笨元執埋D手尾瞓覺! 今晚我地都早瞓, 梗係啦, 老公6點就要起身, 佢而家都好早瞓呢!

13/5/15

13/5/15   WED   HOT

今日都係如常啦, 老公一早返工啦, 我提議佢撘地鐵, D時間準D嘛! 今日子元校車有誤, 要派第二架車嚟, 搞到7:35先上到車, 仲要冇校車姨姨喎! 遲咗返上樓, 快手摺好衫就出門口, 但巴士都係遲咗, 8:35先到, 柏仲又喺巴士站走嚟走去, 最辛苦喺呢樣啫! 上到車扣住安全帶佢都坐得定GE! 入到去放低佢我都返工啦, 買埋早餐返去食啦, 朝早都係做吓自己嘢咁啦, 仲有做吓個PPT囉, 有嘢交比總監睇吓嘛! 午飯後睇電視啦, 下午佢地個個返哂嚟, 其實sales都冇咩嘢開, 不過成日要侯住佢佢地開會係煩D囉! 開完就完成埋個PPT, 遲咗收工唔可以先返屋企再出去接子元, 咁反正未買餸, 就去咗AEON買餸, 然後才返去接子元, 順手去淋埋花囉, 不過有棵都真係得番2成葉, 唔理啦等阿媽返嚟睇到再算! 接咗子元返去就快手沖涼呀煮飯呀等等囉, 一個鐘內搞掂哂D嘢算係咁, 9點多柏仲想瞓啦, 係咁追住daddy抱, 所以餵咗奶K.O.佢, 再睇埋子元功課, 10點前趕埋佢去瞓, 我就可以嘆榴槤啦!

 

 

12/5/15

12/5/15   TUE   HOT

今日柏仲瞓到差不多7點先起身, 一齊揍咗哥哥就返上樓啦, 又要食奶又要摺衫, 落到樓又要等巴士, 等到8點幾先有車呢, 又唔知對上班車幾點, 否則我都想早一班唔洗咁晏! 揍咗柏仲入去我就返工啦, 不過今日都係skype吹吓水先, 冇咩mood做嘢, 不過Skype又成日hand機, 好麻煩, 午飯後睇吓新劇, 都OK呀! 下午開始做吓嘢, 因為總監又話要整PPT, 用嚟做present用, 雖然佢只係叫我找料, 但梗係要再做多D啦, 都好GE近來都閒, 咪做吓囉! 放工先回家, 整定D餸再去接笨元, 返屋企後用咗新方法令子元自動自覺做嘢, 就係簡單地一個程序表, 做好一組嘢就有個tick, 平時沖涼沖10分鐘都唔出嚟, 今日10分鐘沖好著埋衫吹埋頭, 跟住對好功課自動執埋書包校服就可以自由, 我就快手煮飯啦, 食得嚟都9點, 子元識得自動吸塵, 仲識叫個daddy抺地, 大家合作咪好囉, 9點幾K.O.咗柏仲, 又要睇子元的功課, 因為玩七巧板, 真係做唔掂要老公幫拖! 做好嘢就比佢打陣機先瞓囉, 我地睇電視睇到11點幾瞓啦! 不過入到房都喺到講吓子元囉, 原來同學仔話佢D視藝核突, 老公就要輔導吓佢, 話呢D係創作, 人地嗰D成日都係抄襲, 所以唔洗理人地點講囉! 另外子元今日都同我講咗, 話ms mak讚佢操行進步咗好多, 想學期尾頒個最佳品行進步獎比佢, 睇得出子元係好開心架, 希望呢D鼓勵可以幫到佢進步!

11/5/15

11/5/15   MON   HOT

今日老公開始返工啦, 6點幾就出咗門口, 柏仲見佢出房仲扭抱添, 可愛到呢! 鬧鐘未響就喺我床行嚟行去, 起身梳洗後就叫笨元起身, 而家起一定要揍埋柏仲落樓啦! 返上樓就食奶啦, 仲要摺埋衫先出門口, 等到8點半先有車, 入到去我都閃了, 買早餐返工啦, 朝早老細們返哂嚟開會, 好在都唔係太阻住, 只係又要幫佢地買飯呀, 同埋有D心理壓力怕佢地走過嚟囉, 午飯去咗買冷麵同沙律, 食少D, 反正又有tea, 下午老細閃了啦, 真好! 繼續做自己嘢, 不過老細同總監都有嘢叫我做! 放工前都係落出雨, 先返屋企換過裝束, 整好餸, 攞埋拖鞋先去接笨元, 好在都唔大雨又有巴士, 好快返到去, 快手叫佢去沖涼, 到我沖緊老公已經返咗, 但都要沖好先煮得飯, 今晚食西餐算啦, 食完洗埋都9點! 我抺地時子元同柏仲玩緊躲貓貓, 點知一跑就跌咗喺到, 痛到顛哂咁, 但最搞笑係柏仲學子元慢跌一次, 再走埋去打個櫃, 起好笑! 9點多先K.O.咗柏仲, 跟住睇子元功課, 完全係錯漏百出, 有一樣未做唔做埋, 冇寫日期冇寫名, 默書又默錯, 視藝又未做, 搞到10點我叫做督佢做好哂前面嗰堆, 留番個視藝老公搞, 但真係做得太夜, 手尾叫老公跟, 子元要瞓啦, 已經11點! 跟住老公講番今日第一日開工, 好搞笑囉, 返7:45但9點先開工, 做到10點又抖到10:30再做到11:30, 跟住食飯食到13:00, 又抖到13:30先開工, 開到3點又抖, 3:30再開工到4:45就等到5:45收工! 真正做嘢時間得4-5個鐘! 大家都眼瞓啦, 未夠12點就瞓啦!