5/12/15

5/12/15   SAT   COLD
今日都係晨早比仲仲叫醒啦, 7點幾起身就叫埋笨元起身梳洗去學體操啦, 夠時間食埋個早餐, 跟住我就返工啦, 平日星期六好閒架嘛, 但今日竟然勁忙, 可惡! 柏仲差不多1點上嚟, 因為子元今日要踢到好晏, 所以要食咗嘢先, 仲仲上嚟玩咗陣就閃啦, 買埋飯團返去食, 但仲仲未上車已經要我抱, 眼瞓喎! 果然返到去都瞓到豬仔咁, 我就食完飯執住嘢先, 但都唔做得幾多, 佢3點多已醒, 咁咪先餵咗佢食嘢, 再做家務囉, 仲要幫仲仲換季, 因為實在冇衫著, 但BB換季反而更大工程, 只換咗一部份, 老公5點幾打嚟話走得, 約咗喺沙田會合, 咁我執好嘢就出發, 要推車仔過去都幾大工程, 真係行到腳軟, 都要1個鐘先入得到去, 先去咗IKEA嗰邊, 本來諗住食大快活就算, 點知執咗, 轉咗間新嘢喎, 實在太肚餓, 見價錢合理就入去食啦, 又非常唔錯喎! 不過同柏仲一齊食嘢, 實在係令人無法享受的! 食完就行IKEA啦, 有車仔困住佢點都好D, 買咗我地要GE嘢就可以走, 本來想去mother care買夾衣, 但原來收9點, 咁就去咗UNI睇啦, 買咗好多嘢, 8件夾衣比柏仲, 又買咗D heat tech啦, 再去對面gap,買咗幾件薄長袖比子元, 買滿$400即減$150, 為起$250有4件, 抵啦! 返得屋企已經11點, 柏仲瞓咗架, 不過都要捉佢起身沖涼, 沖完再瞓過! 我地就點幾先瞓, 買咗咁多嘢返嚟, 又有排洗有排執!

 

 

 

 

 

 

4/12/15

4/12/15   FRI   COOL

今日子元都係放假, 由於朝早冇人揍, 又唔想嫲嫲揍兩個, 所以交托咗子元比子慧媽媽幫手, 所以朝早我返工前就揍佢出去, 柏仲就老公揍入青衣! 買埋早餐返公司就做吓自己嘢又做吓公事咁啦, 午飯出去買飯食, 回來睇吓電視啦, 老細今日唔返, 可以自在D, 放工就返屋企先, 換哂3張床單先出去, 約咗食米線, 因為今日要睇子元敏瑩佢地合唱團表演, 子慧仲一齊唔游水捧我地場呢! 今年子元表演得好咗好多, 雖然都唱唔足咁多字, 但起碼冇呆冇發瘟跟到動作, 都算係咁! 睇哂就走啦, 冇再睇才藝表演同抽獎就走啦, 去咗麥記食嘢, 食完返去都10點多囉, 快手沖涼瞓覺, 趕得切睇奇皇后呢!

 

3/12/15

3/12/15   THU   COOL

今日子元唔洗返學, 但仲爺係唔會放過我, 都係天未光就起身, 由6點到7點幾我都係出出入入咁, 係之後子元起咗身可以幫我睇住仲仲時, 先可以瞓多陣, 夠鐘就入嫲嫲到啦, 食埋早餐我先走, 仲換埋麥記的woodstock咕臣, 返到公司都係邊做公事邊做私事啦! 午飯要去買飯, 諗過好唔好食多次麥記換埋snoopy個咕臣, 但又人多, 可能都係想我再考慮吓! 飯後睇吓電視啦, 之後都係要做公事, 忙碌到放工就入青衣同埋奶奶一齊去愉景新城啦, 老公話食日本嘢, 其實呢間都好貴咁, 但真係好好食喎, 有時真係一分錢一分貨, 食咗兩張大單又係時候節流啦! 去埋反斗城, 又洗咗錢, 嫲嫲買咗公仔比兩個孫, 另外又買咗禮物比子慧! 去入埋會就回家啦, 返到去仲仲就沖涼瞓覺, 子元都要快手瞓啦, 我地就睇埋電視先啦, 不過都好攰啦!

 

 

 

 

 

 

 

2/12/15

2/12/15   WED   COOL

今日係仲仲兩歲生日啦, 但大家都冇請假冇去玩, 只係晚上出去食個飯咋! 朝早臨出門口仲仲先醒, 揍得佢落去又遲, 好在趕得切車咋, 月希媽媽好叻呀記得仲仲生日, 買咗架車仔比佢添呀, 返上樓摺埋衫等等, 趕住去撘巴士啦, 點知去到巴士站話2分鐘, 但一路都唔見車, 跟手個個站都話到達, 都唔知個報站系統想點, 結果等到8:30先有車囉, 放低仲仲就返工啦, 返到公司思前想後覺得好似冇閂到夾頭髮機個電制, 都係返去望吓穩陣, 好在係有閂到, 咁就執好埋D嘢先回公司, 跟手做吓自己嘢, 做吓公事咁啦, 午飯後hea吓睇吓電視, 下午又要做嘢又要開會, 好忙好忙, 忙到放工, 今晚book咗6點半喺美孚食, 又要去攞蛋糕, 所以喺公司做多陣嘢先走, 去攞完蛋糕行過去啱啱好, 差不多齊人就叫嘢食, 但…中咗伏, 唔係難食, 但個價錢唔值囉, 份量少, 冇take2啦! 大包就差不多食完先到, 佢真係好搞笑, 完全冇時間觀念囉! 食蛋糕影埋相就走啦, 慢慢行返去, 沖好涼K.O.咗仲仲, 笨元就搞掂埋D功課先瞓, 雖然有4日假, 但我都係鐘意做起先! 所以佢都11點幾先瞓, 我地就睇埋奇皇后先瞓!

 

1/12/15

1/12/15   TUE   COOL

今日都係如常咁返工返學啦, 朝早只是蒸飯, 但由於仲仲又醒咗, 子元又懶瞓又流鼻血, 都係要叫醒陸生起身幫拖先趕得切! 之後入到嫲嫲到食埋早餐先返工啦, 仲要計計條數叫阿媽借住幾千蚊嚟頂住先! 跟住全日都好努力工作, 因為真係好忙呀陰公, 呢D係出得嚟行遇咗要還! 午飯去咗食日本嘢, 因為食公數, 所以梗係食最貴GE刺身啦, 不過都唔係真係好食得咁緊要, 好在係公數啫! 下午返去都係做做做, 到放工都冇為意囉, 幾恐怖! 返去接咗笨元就回家煮飯啦, 今日快手煮簡簡單單, 8點多食完, 搞掂就到仲仲要瞓覺, 笨元要溫書, 9點幾佢就瞓啦, 我地仲要幫佢找專題研集的圖, 好在有printer方便好多, 但冇諗過老公喺呢方面咁弱, 又唔識點整出嚟print又唔識去找相! 終於搞掂都11點, 睇埋奇皇后就瞓啦!