18/6/16

18/6/16   SAT   HOT

今日請咗半日假, 因為要揍住兩隻豬嘛! 仲仲6點幾就醒咗, 又係放假先嚟咁! 我就hea到8點幾先起身, 出去麥當勞食咗早餐先, 跟住去咗曼克頓山間759買D嘢啦, 再行返去街市買埋午餐晚餐的材料, 本來想去埋惠康架, 但因為實在太多嘢, 都係返上去一轉放低嘢先, 順手攞埋張被去洗, 點知再落返去時落到倒水咁, 唯有折返回家先啦, 換哂D床單先再落過去, 去到超市都有雨呀, 好在比完錢時已冇咩, 馬上返去囉, 跟住都係好忙咁煮午餐啦, 仲仲又係食到衰衰咁, 到3點幾話要POPO, 點知PO咗半個鐘用埋藥先好辛苦咁疴到, 因為條友仔又眼瞓, 都唔知疴定瞓好, 我迫佢點都要疴咗先, 咁疴完咪舒舒服服咁瞓囉, 我都可抖吓啦, hea吓睇電視咁到7點幾真係要叫醒佢, 煮咗烏冬食, 9點幾再捉佢地沖涼, 10點多又掉番佢入去瞓, 子元就10點幾瞓囉!

17/6/16

17/6/16   FRI   HOT

今朝自己揍仲仲返學, 所以都冇喺屋企食早餐, 8:20已經過到去學校, 揍咗佢兩個入學校我就返工啦, 買少少早餐返去食, 都係做吓嘢開吓會咁啦, 午飯食個細細個飯盒咁啦, 其實都夠飽架喎! 之後都係hea吓啦, 下午都係做吓公事做吓自己嘢, 放工去AEON嗰邊同程生會合, 因為敏瑩喺學校有嘢搞, 要等佢OK先再入去青衣接仲仲, 好在趕得切6:30去小童接佢地, 去咗泳池先, 放低3隻大就同仲仲返去, 先同仲仲沖咗涼, 我就要煮飯, 佢都好乖咁自己玩, 咁我都趕得切沖定涼先, 佢地返到嚟就快手同子元沖涼, 開埋個飯就沖奶比仲仲, 食完飯都係做嗰堆嘢啦, 另外就叫子元佢地寫邀請卡比康傑老師啦, 10點幾佢地先走, 我唔係太眼瞓都唔入房瞓, 得自己一個我唔鍾意!

16/6/16

16/6/16   THU   VERY HOT

今朝都係慢慢揍咗子元上校車, 上到樓見仲仲就已經喺廳啦, 搞掂就返學啦, 老公都係慢吞吞, 搞到又接唔到更啦, 仲要排長龍入去呢! 不過之後可以車我返公司, 但我都要去買咖啡等等! 朝早都係做吓公事做吓自己嘢咁啦, 午飯又冇電視好睇, 所以都係打吓機咁啦, 下午D高層又開會, 我地咪做吓D下欄嘢…叫外賣囉, 雖則我都唔介意! 放工都遲咗啦, 快手去敏瑩婆婆嗰到接咗子元先, 條友食咗人地好多嘢, 真係勁唔好意思, 又丁麵又腸仔包咁, 唉! 揍咗佢就要一齊去街市買咗明天的餸先, 然後才撘巴士入青衣去嫲嫲到食飯, 仲仲食飯都係衰衰, 兩個你爭吓我嘢, 我又同你玩吓咁, 到8點左右就閃了, 趕巴士返去呀! 返到去都係沖涼食奶瞓覺, 子元就可以玩吓對吓功課先, 10點幾先瞓, 我就要做番D清洗呀等等工作啦, 執得嚟都11點, HEA吓等老公都搞掂就隔空goodnight瞓覺!

15/6/16

15/6/16   WED   VERY HOT

今日都係閒閒地, 唔洗帶飯簡單好多, 揍咗笨元就返上樓, 搞掂埋仲仲就返學啦, 今日趕得切接更啦, 返到公司都係做吓公事做吓私事啦, 午飯要去買飯, 食咗貴嗰間日本便當, 下午老細返咗, 又要開會啦, 其實我勁眼瞓, 開會真係最辛苦! 開完會經理請大家食芒果糯米糍, 但老實講唔多好食咋! 放工閃人啦, 返去揍子元, 順手用琴錄咗太陽伯伯首歌比仲仲下星期表演用! 返到去慢慢煮飯啦, 試咗個新嘢係海南雞飯喎, 但我冇香矛嗰D, 個味可能會差D但都好好味, 佢地食得好開心呢! 食完飯洗碗抺地, 仲仲就準備瞓覺啦, 子元就砌埋佢架飛機! 我就睇埋電視, 10點幾先沖涼, 然後再睇味道大結局呢! 老公明天要飛大連呀, 嚟緊5日我又要一打二啦, 不過為咗錢都冇法啦!

14/6/16

14/6/16   TUE   HOT

今朝唔洗整飯, 可以輕鬆D, 加上仲仲未起身就更輕鬆啦, 揍完子元上校車才返去叫醒另外兩個, 仲仲先好笑, 明明醒咗但見我叫daddy起身佢又要扮瞓番! 搞掂出門口啦, 今日趕得切接更啦, 揍咗佢地我就返工啦, 今日返到去先食早餐, 不過都係食件雪芳蛋糕啫! 朝早做好執好哂嘢啦, 下午要過海關座談會! 午飯後等Nicho電話就出發, 都預早咗過去呢, 未夠3點其實都算齊人架啦, 但估唔到咁overrun囉, 人地本身諗住係兩個海關人員present完, 就Q&A吓, 點知人地present的時間就少, 佢地講的時間就多, 所以5點多先起行去參觀, 分開咗兩group人分別睇兩個景點先, 到第三個景點先join埋一齊, 去到時發現我老細同長毛已經閃咗, 真係巴閉又特權囉, 可以咁樣早走! 參觀哂走得已經6點多, 馬上撘地鐵去程家幫手啦, 一入到去就話子元同子慧鬧交啦, 唉…子元又撞到子慧, 跟住又話唔一齊玩咁, 好在程生都好識處理佢地呢D, 都講掂佢地囉! 跟住婷婷又踩到子慧, 佢又誇張咁話痛, 我同程生咪教佢其實呢D痛係可以克服, 唔需要嚴重咁去演繹, 但佢好似唔多想理我同程生咁! 最終決定咗去CoCo食, 快手食完啦明天仲要返學, 仲仲就玩嘢啦, 食完要疴POPO, 又辛苦我同佢去廁所! 返去時聽到子慧又同佢阿媽講婷婷踩到佢, 最估唔到係佢阿媽個反應係話: 係咁架啦, 佢成日都踩你同我架啦! 我後來同老公講番, 佢話佢咁教個囡, 個囡咪咁GE反應囉, 咁落去都係佢個囡唔識同人相處架咋! 返到去都係咁K.O.咗仲仲先啦, 10點幾本來都想沖涼架, 點知有人拍門, 原來係ICAC抽樣調查嗰個人, 之前嚟過但冇人, 估唔到咁夜都仲會返轉頭, 最慘係抽樣仲要抽屋內14-65歲最近生日月份嗰個, 咁即係我啦, 我要做埋先可以沖涼, 激死! 今晚都眼瞓, 12點多就瞓!

13/6/16

13/6/16   MON   HOT**

今朝趕到顛, 又要煮子元個飯盒, 子元又遲起身, 趕到顛! 返上樓又到整我個飯盒, 所以遲咗出門口, 趕唔切接程太更! 返到公司都係做吓自己嘢啦, 開會我都係似傍聽多啦, 繼續做吓自己嘢啦, 午飯後hea吓咁, 老細開完會先返, 已經同佢兩個愛將開會, 又叫另一個同事上繳工作成果出嚟, 送比佢兩個愛將用, 我覺得呢樣真係好PK, 做老細做到佢咁, 完全唔識用人! 因為佢又要喺個會議室搞投影嘢, 之前又話用projector, 而家又話要整部電視駁電腦, 最搞笑係, 叫個業務拓展經理去買電腦喎, 人地經理都話好似有個負責IT的人員, 雖然都係出去搵, 但都係公司用開, 你有咩理由叫個經理去買電腦呀! 放工就閃人啦, 接咗子元返去都係煮飯等等啦, 今日派咗兩份卷, 中文85, 常識72, 都不過不失啦, 常識勁深呀, 全班最高分都係87! 食完飯都係洗碗抺地打暈D仔啦, 沖好涼先同子元睇功課, 得一樣小日記啫, 佢之前成日話諗唔到寫咩, 我咪提意佢寫嗰日攀石囉, 估唔到佢又寫得好好喎, 其實佢係做到架囉! 搞掂佢瞓就摺衫睇電視囉, 12點多就瞓啦!