17/10/16

17/10/16   MON   RAIN

今日又要返學啦, 仲仲今日都早咗起身, 好在我返咗上樓佢先醒, 搞掂就出門口啦, 返到公司做好公事先做吓自己嘢啦, 又要幫老細寄嘢, pack嘢都有排做! 午飯要去買飯呀, 有時諗食咩真係諗到頭都大埋! 食完睇吓電視啦, 下午整埋老細D嘢就去寄, 放工開始落雨啦, 又諗唔到買咩餸, 最終只係買咗雞翼同菜咋! 撘緊巴士返去時, 見到對面線有交通意外, 側咗架van, 塞到美孚橋, 馬上叫老公行荔景山道回來! 就返到屋企時就收到老公電話, 嫲嫲話出去食, 咁D餸留番明天囉! 去咗葵芳食茶記, D小菜好好食呀, 食完去樓上食錢樂園玩一轉先走, 仲爺竟然唔捨得返屋企, 佢識得問好完整的句子, 問: 送完嫲嫲返屋企跟住去邊! 真係比佢吹漲! 返去沖完涼做埋功課瞓覺啦, 我仲要同子元對功課溫多次進評! 佢真係好唔識運用D詞語, 始終睇書太少!

16/10/16

16/10/16   SUN   WARM

今朝7:45已經要起身, 去畫班嘛, 好似uber司機咁, 又要接番程太, 又去食早餐, 又車番程生去接婷婷, 再接番佢地放畫班, 返屋企用一個鐘時間go through咗中英數常, 都火火地架…12點半佢又要去踢波, 咁佢去踢波時我又要同仲仲做功課啦, 到2點多老公過來接我地, 食住午餐等子元踢完, 本來諗住佢踢完可以堂食, 但都係趕唔切, 唯有外賣比佢返屋企先食, 因為老公要去踢波, 返到去先K.O.仲爺瞓覺, 等笨元食飽就再溫中文進評, 都溫到差不多7點, 仲仲瞓到7點幾, 就聯絡程生佢地去AEON食COCO啦, 食完例牌睇吓玩具, 今日好D我地上埋12蚊店shopping, 又買左10樣8樣嘢啦! 返到去都10點半, 快手沖好涼佢地都要瞓, 我地睇埋芉月都瞓啦!

15/10/16

15/10/16   SAT   WARM

今日長周, 但都有嘢忙, 朝早喺屋企就諗點叫子元溫吓書先, 返到公司又忙做其他嘢, 長毛要咩鬼圖呀等等嗰D整網頁喎, 又要group一堆比佢, 煩死! 都未做哂就放工, 梗係走先啦話知佢, 星期一回來再算! 行過去球場同老公佢地會合, 路途上撞到二姑婆喎, 佢又冇咩做又想見吓仲仲, 咁就一齊行過去啦, 一齊食埋飯, 又同仲仲去玩食錢樂園, 最開心係仲仲啦! 接埋子元就回家啦, 返去老公負責仲仲, 我就同子元溫書, 溫到差不多叫做完成咗今日想溫好的部份, 梗係休息吓先啦, 7點幾叫醒嗰兩個, 就出去食飯行陣, 因為要幫仲仲買奶粉, 所以要找合適的商場, 最終去咗荷李活廣場, 先買奶粉再去食嘢, 最後周圍行吓, 10點走人因為鋪頭都閂門了! 返到去小朋友沖涼瞓覺, 我地就睇吓電視咁啦, 都睇到好夜添!

 

 

 

14/10/16

14/10/16   FRI   WARM

今日係結婚10周年呀, 不過都係要照常的星期五! 早上仲爺竟然喺我地出門口前醒咗, 局住帶埋佢落去, 返上樓快手搞掂出門口啦, 好在都趕得切! 返公司後今朝都不算忙, 可以做吓自己嘢先! 午飯後睇吓劇啦, 下午老細返咗嚟就煩, 係煩足我一個下午, 真係頂佢唔順! 又要同佢搞機票, 下星期跟商會團去大陸, 又要早返喎, 又要自己額外訂過飛等等, 又洗錢又煩人, 就只係唔想Stay多嗰大半日, 正PK! 咁我一個下午就係到搞佢地D機票, 因為又要處理埋佢阿媽D飛等等, 總之全個下午都係咁忙啦! 放工不用買餸, 老公話今晚餐飯佢負責, 咁我又期待吓先! 所以放工我就返咗去樓下間惠康入貨, 飲品等等都可以入定貨, 買完返去攞齊嘢又出小童接佢地, 然後就去游水啦, 子慧今日唔游, 咁就跟我返屋企先, 唔洗煮飯真係好輕鬆! 原來老公去咗買生蠔&KFC, 仲有Gloria帶咗支酒過來, 好正呢, 咁我真係覺得開心! 食完又唔係好多碗要洗, 執好嘢就得, 吹吓水沖埋涼睇電視, 12點幾先瞓呢!

 

13/10/16

13/10/16   THU   COOL

今朝仲爺都係好cute咁攞住佢隻gorge瞓, 叫佢先起身! 返到公司有嘢趕呀, 又話今日要開咩鬼工展會會議, 所以我咪整個PPT囉, 好在呢D嘢我都仲OK! 做得嚟都真係食lunch啦, 食完飯睇吓新劇! 下午又話2:30開會, 最終D高層返咗嚟又係開哂D高層會議先到我地呢D基層囉! 好在我個PPT用得著, 唔係我真係唔肯過佢! 開完會吹吓水都放工囉, 買餸接子元回家煮飯食, 今晚好似早咗少少, 8點半已經搞掂出得門口, 先去打波再去跑步, 不過子元今晚唔係好跑得, 唔係咁好狀態! 返上去沖好涼睇一睇仲爺D功課又到子元啦, 好忙! 10點幾趕得切睇laughing, 今晚都睇到1點先瞓!

12/10/16

12/10/16   WED   COOL

今日都係咁返工返學啦, 仲爺瞓得好冧, 要叫佢先起身! 返咗學我地就返工, 朝早都冇咩, 做吓自己嘢, 老細返過嚟, 比佢簽吓嘢先啦, 好在佢唔喺到阻住我地食飯啫! 下午以為佢唔返啦, 點知4點幾死返嚟喎, 不過都冇理佢咁多, 係火在知道佢又喺到廢話多多啫, 要開會講工展會D嘢咪開囉, 洗咩又話唔知我會唔會請咗假啫, 低Q能! 放工就返去接子元啦, 買好餸煮好飯, 食完就快手洗碗抺地, 然後又可以去打波跑步, 仲去埋超市買嘢, 返到去快沖涼K.O.仲爺, 睇埋子元功課, 沖好涼趕得切睇laughing, 睇到1點先瞓!

11/10/16

11/10/16   TUE   COOL

放完長假期啦, 又係時候回魂! 今朝要整子元個長通粉沙律, 都有點趕, 揍仲仲時又攞漏嘢, 結果趕唔切接更揍婷婷, 仲要排隊呢, 好在都好快! 返到公司都係寫吓日記咁啦, 有4日嘢要寫都幾係多, 仲要過埋D相呢! 老細係返過嚟開會, 不過係開佢地D高層會議, 唔關我地事, 下午佢又唔返, 咁都Free D! 午飯後都係hea! 下午又開始睇吓高雄之旅, 想睇吓有咩地方食早餐, 我想食地道早餐呢! 放工去接子元, 都唔係好諗到買咩餸, 嗰間惠康D餸愈來愈唔掂, 都要想想辦法啦! 回家快手煮飯食飯, 忙忙亂亂咁, 幾個都算合作, 有幫手執碗抺地, 都趕得切落去打到幾個字波再去跑步, 返到去沖好涼就K.O.仲仲, 睇埋子元功課溫埋默書就沖得涼, 之後仲要執衫等等, 結果今日攰得滯, 睇睇吓芉月瞓著咗, 老公又冇叫醒我喎!