7/3/19

7/3/19.   THU.    COOL

今朝都係咁返工返學啦，返到去食埋早餐又係開工，唔算太多嘢做，所以可以hea住嚟做，不過之後啲監督上哂嚟開會，嘈到街市咁攞命！仲要1點散場阻住我地食飯！飯後打機夠鐘開工！都係整吓相啦， 到咗3點幾IVY落去買燒味飯時，見到酒樓今日係藝進同學會有晚宴，不過呢啲時間來的都未必係識我嗰批，所以就算我落去八掛都見唔到識嘅人呢！放工回家就有飯食啦， 老公食日煮咗新嘢檸雞翼，好好食喎！洗碗抺地後襯廣告時間睇功課等等，沖埋涼已經好眼瞓，都係早啲瞓好啦！

6/3/19

6/3/19.    WED.    WARM

今日公司Annual dinner，所以都要著好少少，朝早都係咁返工返學啦， 返到去食埋早餐做吓嘢，轉個頭又午飯啦，今日食肉醬意粉好好味，加上今晚冇咁早有得食，所以食飽啲先，再食多個意粉！下午都係做啦，夠鐘放工就去德福行吓先，然後先去E-max，去公司Annual Dinner，百幾圍千幾人的Annual Dinner我真係第一次見，幾少見多怪！主要節目都係抽獎，仲有就係表演，係高層表演比我地睇喎，做十兄弟，個look真係冇得頂！食到10點多抽埋大獎冇份就走得啦！撘shuttle去咗荃灣先再撘番轉頭，11點多回到家，沖涼休息睇電視，仲有要望一望兩隻嘢的功課，因為爺爺根本唔會做！

5/3/19

5/3/19.    TUE.    WARM

今日請咗半日假，諗住去睇子元話劇比賽，又可以揍仲爺返學，但世事就係啱啱遇著剛剛，揍緊仲爺返學時，阿媽打嚟話佢又暈又嘔，唯有車佢去睇醫生，但一來一回去得學校已經10點，只係睇到結尾謝幕，其實真係勁無奈，但又冇理由唔理阿媽架嘛，唯有到同樂同歡嗰時再睇啦！揍番阿媽返屋企就去接仲爺放學，再一齊食午飯，然後出埋屋企，仲爺依依不捨咁係咩玩法呢！下午要去上training，雖然唔洗返工但都真係好悶囉！放學返屋企又到搞掂兩隻嘢，子元近日好多功課，佢又放學有活動，回家又唔馬上做，結果又做到好夜，比佢激死！

4/3/19

4/3/19.   MON.    COOL+

又到星期一啦，朝早老公都係揍仔返學啦，我都係返到公司食早餐，然後就忙足一朝，都未有機會做好啲job cert，轉個頭就食飯，跟住都係打吓機咁啦，下午真係未停過做到放工，尿都唔得閒去，冇法啦明天朝早請咗假睇子元話劇，下午又去training，完全唔會返公司啦！放工返到去都係趕佢地搞掂功課啦，又要鬧吓仲爺叫佢執玩具等等，食完飯子元要趕功課，今日話劇遲放又多功課，做到12點幾呢，平時都好少咁！

3/3/19

3/3/19.   SUN.    WARM

今日都忙碌，起身梳洗煮早餐，再趕佢地去做功課溫習，仲爺好似失憶咁咩都唔記得哂， 又要預番時間出去訂度假營，又要揍子元去奧數，放咗佢去學校我同老公仲爺就去食午飯先，再買定個包比笨元，食完老公就直接返工，我就同仲爺行返過學校，LS真係超大，有哂標準球場泳池等等，我地呢啲真係見識少！等子元期間就同仲爺做埋啲功課，溫埋中默啦！終於等到子元放得，撘小巴過奧海城行住等今晚食飯，約咗Carlie佢地聚吓，所以喺反斗成hea咗成個鐘，6點去餐廳等齊人叫嘢食啦，小童們還需照顧，幾個中童打機飽啦，食到8點幾先散，今次記得影吓相呢！撘巴士返去要kO佢地先得，仲爺又覺得自己未玩夠玩具，要夠根本唔會停！

2/3/19

2/3/19.   SAT.    WARM

今日真係夠哂舟車勞頓，上午係家長日，仲爺見9點，所以送咗子元去補英文就入青衣，老師話仲爺中英文都進步，但數學就真係唔掂，其他都係可以的有進展的，但始終係追唔到進度啫，不過人人都有唔同，冇得比！仲爺冇跟埋我地嚟，因為喺lift撞見樓下月希一家出去食早餐，於是仲爺就跟咗佢地出去玩公園食早餐，11點先喺學校交番心我地，跟住就慘啦，喺學校等咗好耐都未有得見，由於我地都有下一場，唯有老公返去執嘢接埋子元出來，等我見埋回合就各自揍仔，我揍仲爺去學音樂，佢揍子元去比賽！我今日都真係好攰，回程時我喺地鐵都已經想瞓，去到球場同yoko吹住水時間都好過，等佢地踢完波就上咗Joe屋企一打邊爐，梓朗唔知係咪中暑又頭痛又手軟腳軟，結果冇食飯就瞓咗，細嗰兩個就好嘈，食嘢唔多掛住玩，邊食邊吹水到9點幾打的回家啦，我真係已經好攰！

1/3/19

1/3/19.   FRI.    WARM

今朝要整包比子元帶午餐，跟住都係咁返工返學，今朝都係未有嘢做，又唔想再打機，所以都係睇吓小說好，找到個只睇過電視未睇過書的尋秦記，原來原著都幾好睇喎！午飯後去咗惠康買定豆奶沖脆片，下午真係要做嘢啦，一個下午都好快過！放工行去球場，我又掛住周圍行，結果7點幾先行到去，睇咗陣就走得，痴車坐去地鐵，返小童接埋仲爺，同程家去食飯，返到去快手沖涼打暈佢地啦，笨元還要做埋英文補翨竹呢！