14/2/20

14/2/20     FRI      WARM

今日雖然在家工作, 但都係覺得似放假, 同埋個人啲骨痛好似仲未好得哂咁, 喺呢啲疫情咁嚴重的時候, 總覺得一唔舒服就好大壓力咁, 加上子元的水痘完了, 但仲爺身上又有疑似的粒粒喎, 咁想點呢, 加上我自己又覺得會有, 連發夢都發呢啲就知我幾大壓力, 但要避都避唔開架啦, 可以點呢! 瞓到10點多起身, 仲爺整咗奶浸脆片我食, 咁就照食啦, 之後都係hea陣先, 跟住都要開始上堂啦, 子元上一陣, 又去煮午餐, 今日煮意粉啦, 又到仲爺上堂, 再找到個練打字的網比笨元學吓, 成日喺屋企咁hea, 找啲嘢學吓啦! 老公放工回來, 一齊出去攞消毒酒精, 留下了兩位少爺在家啦, 應該就唔怕的, 仲仲因為打咗水痘針, 佢都十成係出架啦, 但情況就冇咁嚴重囉, 只係一粒損咗, 其他都只係紅紅地! 我就覺得自己都有, 因為有啲位損咗但好痛, 不過都冇咩可以做, 希望只係我心多啦!

13/2/20

13/2/20     TUE     WARM

今日又要返工啦, 返一日放一日咁感覺係要趕進度, 7點幾起身出門口, 返到去食埋早餐, 又要量體溫又要問飯等等已經夠忙, 跟住又要清email咁, 其實我啲進度都算係咁上吓架啦! 話咁快又放飯啦, 食完飯都係邊打機邊做吓嘢, 怕做唔哂嘛! 所以下午都真係好努力工作, 放工回家架巴士勁快, 我又冇去超市, 想快啲返去休息吓, 個人好攰冇力咁, 好在嫲嫲煮埋飯洗埋碗, 子元又可以吸塵抺地, 所以我可以咩都唔理! 差不多就去沖涼, 仲爺一日喺屋企總係整到啲嘢亂哂咁, 其實真係好煩! 終於打暈咗佢, 可以自由時間吓, 不過我真係周身痛咁, 可能呢幾日真係太夜瞓!

12/2/20

12/2/20     WED     COOL

今日又係work from home, 所以瞓到10點幾先起身出去食早餐, 老公要揍仲爺去學音樂,所以我同子元返屋企, 休息吓就到上堂時間, 中英數常全部要上, 還要做埋啲練習呢, 期間就整番熱啲隔夜餸食埋佢! 老公仲爺回來後食埋嘢又係時候做埋啲網上功課了, 5點多老公叫我地換衫出去食飯, 要著靚靚喎, 因為要去食情人節餐, 食意大利嘢! 我嗰日講咗想食意大利菜老公就找地方了! 過到對面海, 又係全英文的西餐呢, 雖然係有啲貴, 但真係好好食, 好多嘢都係慢煮出嚟, 真係好特別, 仲有我最愛的甜品tiramisu, 真係好sweet呢! 食完都係回家啦, 老公又話想出去踢波, 咁做運動就由得佢囉, 反正我都要喺屋企追大結局呢!

11/2/20

11/2/20     TUE     COLD

今日要返工啦, 其實而家大家講少咗嘢有時都幾悶, 個個都喺自己位食飯咁, 不過都好的冇得結黨營私! 一返去都係同大家量體溫咁, 跟住都係做嘢啦, 好在我要做嗰啲嘢好分明, 咩日子就做咩, 所以影響其實不太, 只係要做快啲咁解! 午飯時間只係喺位食飯打機, 夠鐘又開工啦, 阿姐出埋今個星期更表, 今個星期我只返二四, 其實都有好有唔好, 因為返到去就真係要快手做呢! 下午啲時間都過得快, 放工返去再去惠康又買咗啲嘢食, 順手睇D廁紙都係冇, 唯有明天過長沙灣再睇, 因為都要入番貨, 開始到達底線! 返上樓有飯食, 大包都過咗嚟, 食完等佢地走咗我就要清潔同消毒一番啦, 老公今晚又做埋gym先返,咁又好夜啦!

10/2/20

10/2/20.    MON.    COOL

今日work from home，其實咪即係放假，瞓到9點幾10點先起身，梳洗後出得去食早餐都已經12點多，今日比笨元一齊出去，佢啲痘都去得7788，就比佢見吓光！食完早餐就買埋餸返屋企！今日星期一嘛，學校upload 咗網上功課，所以下午主力都係叫佢地做功課啦，期間係要煮吓午餐囉！hea到7點多又要搞晚餐啦，呢排煮飯煮到怕，因為冇得出街食局住煮，但好處係廚藝進步咗好多，佢地成日都食清光！子元好番可以幫手做家務，今日已經要佢清潔哂間房，晚上仲可以幫手清潔等等，真係好！老公今晚去做埋gym先返，咁比咗錢點都要做吓嘅，我真係完全冇動力，又食又唔郁真係唔係辦法！

9/2/20

9/2/20     SUN     WARM

今日都算係瞓到自然醒啦, 因為之後又係喺到睇機咁啦, 起身後都係梳洗及淨係帶仲爺出去食早餐啦, 又再買啲嘢咁, 老公車咗我地返去佢就出去做運動同埋返啦, 咁我就返去對住佢兩個, 其實都幾煩架, 要同仲爺做網上功課, 要煮午餐, 忙進忙出咁, 話咁快又要煮晚飯了! 成日都無無聊咁都唔知做過咩咁! 明天又係在家工作, 即係又要對住佢兩個呢! 晚飯係清潔工作洗白白等啦, 睇吓電視咁又一日啦!

8/2/20

8/2/20.   SAT.    COLD

今日冇之前咁忙，因為只係得番音樂仲要上！瞓到自然醒，10點幾先起身梳洗出去食早餐，笨元個樣仲未適合出去，所以佢繼續喺屋企，我地去咗食嘢買餸等等， 幫子元買埋飯盒就返去，老公出去做埋運動就返工！我就返去執好嘢，差不多時間要帶仲爺去學音樂，過到去先食嘢啲時間好過啲，再買埋麥記比仲爺食，上巴士等佢食埋嘢梗係瞓啦，不過今日瞓得麻麻地，回來後都5點幾6點，hea吓又要煮飯了，之後都係清潔睇電視等等！