7/1/22

 7/1/22     FRI     COLD

今日都係凍凍地架啦, 只係冇琴日咁凍啫, 只係捉仲爺起身返學, 本來想去超市買埋嘢, 但都係覺得凍, 快啲返屋企先, 完全唔理嗰兩條友, 鍾意幾時起身就幾時啦, 我有我做自己要做的事, 11點幾出去藥房攞埋藥, 再去Acton嗰邊食拉麵, 真係好好味個湯底! 然後就係去超市買埋今晚啲餸, 回來都要預備啦, 因為仲爺放學返來差不多就要出門口, 今日老公試吓跟住佢地撘一次巴士, 跟住我4點幾就要去接德德, 因為今日得我一個人睇住冇小幫手, 所以遲少少又要全程陪住佢玩, 不過一個有一個揍住的揍法, 單手一樣可以煮好飯仔, 不過今日6點幾佢爸爸先過到嚟接佢, 搞到我都冇賺! 等佢閃咗我就開始煮飯, 今日煮簡單蒸嘢同煲雞湯烚菜啫, 所以都好快手! 晚飯後又因為雪櫃內食物問題引起誤會爭執, 真係好煩, 其實間屋而家真係幾大, 老遠點知你地講咩啫, 啲嘢喺雪櫃有本事就食到架啦! 問咩鬼啫!

6/1/22

 6/1/22     THU     VERY COLD -2

今朝又零下2度啦, 但都要如常咁揍仔返學去超市買餸等等架啦, 買完回來就係要check email. 因為要完成埋個DBS check嘛, 快啲搞掂快啲返工, 總要有個開始! 跟住又有好多電話要打咁, 要打去藥房問子元支氣有未啦, 忙忙碌咁都幾好, 睇完哲仁皇后先煮午餐, 之後又開咗尋泰記, 睇到晚上囉, 係出去揍仲爺揍德仔時先停吓機, 真係好顛! 晚飯後大清潔咗一次, 難得的得起個心肝即刻做! 

5/1/22

 5/1/22     WED     COLD

今日是比較特別的一日, 因為我要去做差不多一日的first aid training, 所以要子元揍仲仲返放學, 老公就車我去學校, 咁我就唔洗撘大半個鐘巴士, 到時日日返先再算! 趕得切8點半去到學校, 先交咗文件, 雖然唔夠但都可以再補電郵去搞! 差不多時間就去上堂, 原來係學校的其他人都會一齊上, first aid好在廿年前上過, 只係而家變咗英文版咁去上啫, 上咗個幾鐘有得放break, 其他職員都好好, 帶我地去staff room, 比我地飲吓茶休息吓, 更加加深咗我喜歡學校的工作環境呢! 上到12點有得放飯啦, 原來有埋飯食, 真係好驚喜, 雖然都只係pizza同千層麵咁簡簡單單, 但都已經好好! 休息完下午上的部份比較難, 因為好多生字, 搞到我要喺咁查字典先明, 最後做埋test, 10題中8題已經pass, 咁我都算叻真係中夠8題, 另外兩題係唔太明題目所以唔識, 咁都夠用啦! 叫老公嚟接我, 去超市買埋餸再去接埋德仔就回家, 又要整飯又要快速清潔一吓, 好在可以叫老公煮晚飯啫! 好耐未試過咁忙, 完全醒唔起我喺香港的日子係點過!

4/1/22

 4/1/22     TUE     COLD

今朝老公冇返工呀, 佢話琴晚瞓極都瞓唔到, 怕今日渣唔到1個鐘車, 所以就請人假好啲! 我5點幾係醒咗兩次, 不過佢話請假後我都瞓番, 9點多先起身啦, 梳洗食早餐, 佢地就開咗造星1嚟睇, 一睇就睇咗勁耐, 午餐都係求奇地煮麵, 食完繼續睇到差不多2點幾先肯收, 咁3點幾諗住出去買番啲必需品同幫子元攞支氣, 點知又係未有得攞, 又要等兩日喎! 跟住就去接埋德仔返嚟玩, 食埋飯就可以收工! 因為解凍唔切啲肉, 所以今日食腸蛋飯加菜就算! 食完都係hea吓啦, 明天又要回復正常忙碌啦!

3/1/21

 3/1/21      MON.    COLD

今日都算瞓到自然醒，老公仲係有咳所以琴晚佢瞓梳化，咁我就可以瞓好啲！今日除咗出去買咗啲餸，基本上又係閉關在家，老公聽日要返工喇佢兩個就放多日假先返學。感覺佢生活又回復正常，放完個長假啦。買完餸返嚟煮埋個午餐食，就同佢哋打咗成個下晝機，然後又煮飯啦，挑起條筋睇造星一，佢哋又要一齊睇！咁又睇到10點幾係時候趕佢哋去瞓！

2/1/22

 2/1/22     SUN.    COOL

今日又係郁出過門口，冇法啦老公仲係唔多舒服，加上都冇咩地方要去，就喺屋企hea吓啦！朝早好早已經瞓唔著，結果7點幾就起身，又咩都唔想做，於是㩒套戲睇吓囉，肚餓先食早餐，買咗啲窩夫就唔洗整早餐比佢地食！之後都係無所事事，中午就煮午餐，簡單地整吓粉咋！下午睇埋膠戰就同佢哋打吓機到6點幾先煮飯！咁又一日！

1/1/22

 1/1/21     SAT.    COOL

今日冇出過門，老公又病病地，更加唔會郁！9點幾起身梳洗整吓雞蛋麵包食就算！食完早餐做吓都唔同我差不多時間出嚟要開始準備睇叱吒，期間又要煮午餐等等，叱吒一向都好睇架啦，咁當然要睇mirror同姜B啦！足足睇咗4個幾鐘呢！然後都要執屋煮飯，老公全日都係攤，其實我都攰架但都要使哂啲嘢囉！