21/1/22

 21/1/22     FRI     COLD

今日揍完仲仲返學就去買餸, 返到屋企做吓公事先, 找找下星期去警署報道要帶咩文件, 跟住又覆吓電郵, 之前請我做SMSA間學校終於覆電郵, 但已經太遲啦, 或者呢啲真係天意, 我打電話去學校同佢講番因為有另一份工請我, 問佢應該點做, 佢話你就咁而家同我講咗就得架啦, 又話我有另一份更好的offer更係去做另一份, SMSA返得嗰一陣! 而家希望嗰邊快啲收到DBS check, 咁我就可以快啲開工! 12點幾食埋個午餐又休息吓, 然後整定晚飯啲嘢, 因為今日要帶仲仲去打籃球嘛, 子元就等老公揍去試腳! 喺球場同另一家香港人吹吓水咁, 但吹落其實麻麻地啱嘴形, 所以都冇諗住深交, 炮哥嚟到就同番佢吹, 等佢地打完就走啦, 炮哥車我地返去再攞埋子元部電腦去整, 我就馬上煮飯, 子元佢地都差不多回來! 食完飯睇埋電視咁, 明天又唔洗返學, 10點幾11點佢地先去瞓!  

20/1/22

 20/1/22     THU.   COLD

今日都係照常湊細佬返學，因為諗唔到有咩地方好去，所以今日都係唔練車住，返到屋企一心想幫細佬搵返個泳鏡，點知撞咗落個床尾，個膝頭哥痛到好緊要，更加咩地方都唔想去，所以都係做吓家務睇吓電視就算，煮好個午餐食完繼續休息，今日都過得好Hea。夠鐘去接埋細佬放學，返到屋企冇幾耐，又要開始準備晚飯，都好多嘢要切切洗洗。老公差不多六點返到嚟，餘下嘅俾佢接手。食完飯睇吓波，咁又一日啦！夠鐘去接埋細佬放學，返到屋企冇幾耐，又要開始準備晚飯，都好多嘢要切切洗洗。老公差不多六點返到嚟，餘下嘅俾佢接手。食完飯睇吓波，咁又一日啦

19/1/22

 19/1/22     WED     COLD

今日如常揍仔返學啦, 返到嚟做埋啲公務, send埋email文件去學校嗰邊就係時候面對架單車! 始終都要試, 所以首先試咗喺行人路踩先, 圍住屋企踩咗一圈, 開始試吓落馬路, 有對頭車時其實都驚, 要停埋一邊, 慢慢試咗兩圈, 就試吓向Waitrose嗰邊行, 然後轉埋落菜檔條路嗰邊先回頭, 感覺已經好好多, 亦冇咁驚! 先返屋企休息吓, 再睇多次去麵包店條路, 仲有要整番乾個set位, 唔知係咪佢地一直放室外, 個set位墊濕哂, 唯有整番乾佢先再出車! 挑戰去Lammas Park嗰邊間日式麵包店, google map show出來話9分鐘去到, 最終我應該用咗14分鐘左右, 始於有啲位驚...出唔到車, 唯有行行人路, 然後就直接過到去買麵包, 估唔到佢真係淨得唔多, 所以我每款要咗一個, 都買咗差不多9磅, 慶祝第一次出車成功呢! 回程時信心大咗, 真係做到9分鐘返到嚟, 成功! 不過踩單車真係幾用力氣, 喘哂氣呢我! 完成任務可以整午餐食啦, 跟住休息吓夠鐘就去接仲仲放學, 返嚟睇陣電視又要去學音樂, 我就去超市入吓貨! 老公點幾六點回來, 又係時候煮飯食, 8點有賓仔對曼聯呢, 最終輸3-1!

18/1/22

 18/1/22     TUE     VERY COLD

今日子元唔洗返學, 所以可以遲少少起身, 淨係揍仲仲返學啫, 跟住去買埋餸先返屋企! 今日超勁凍囉, -3度喎! 連路面都結霜, 真係行路都要小心! 買完餸回來又要解凍定今晚煮肉骨茶的肉, 然後就喺電腦面前有排忙, 好多嘢要填又好多嘢要搞, 午飯都係快手煮麵咋, 跟住又要整定肉骨茶, 再去揍仲仲放學, 回來快手換衫就出門口去籃球場, 坐車又一個鐘, 睇佢地打又兩個鐘, 其實都幾攰架喎! 回來可以食個好好味的肉骨茶, 睇吓電視等沖涼休息!

17/1/22

 17/1/22     MON     COLD

今日佢地3個都返哂工返哂學啦, 我可以自由活動, 先係揍仲返學啦, 跟住回家後就先send email去問請我嗰間學校, 睇吓幾時可以快啲交埋啲文件, 快啲有得開工! 跟住做清潔, 做家務, 實在係太多日冇理, 所以都幾dirty吓, 努力完已經12點多, 快啲整午餐食, 但發現冇熱水喎, 暖爐又唔著, 同老公講完試咗啲方法都係唔得, 所以都係打去安裝嗰到問, 當然冇咁快覆啦, 唯有等! 之後再問老公, 佢話可能冇水入, 最終試咗將暖爐較到好低溫, 等有水入到去, 終於有番熱水啦, yeah! 去接細佬放學, 回來都係hea吓啦, 又唔洗揍德德啦, 佢地爸媽中咗要隔離, 德仔都冇得返學! 等老公回來差不多又要煮飯啦, 食完就睇電視囉, 佢地係咁睇男排女將呢, 應該要睇完先肯罷休!

16/1/22

 16/1/22     SUN     COLD

今朝子元要比賽, 老公就揍佢出去, 我同仲爺喺屋企, 摺埋啲衫同阿媽傾吓電話咁, 12點多老公回程交換人質, 子元自己喺屋企, 我地就出去costco約咗事頭買嘢, 明明唔係set咗好多嘢要買, 但買吓買吓又好多啦, 不過相比之前又唔算太誇! 諗住買埋熱狗就閃啦, 點知熱狗竟然賣哂, 可惡! 唯有返屋企食囉, 跟住又要分拆啲肉類等等, 再要出車去事頭屋企攞單車, 本來諗住要炮哥嗰架, 但對我嚟講太高, 好在有Letty嗰架, 搞到佢好似單鋪咁! 終於運咗架車返去, 又要開始煮飯, 飯後沖涼睇電視, 10點幾先趕佢地去瞓!

15/1/22

 15/1/22     SAT.    COLD

今日要去遠地方，因為子元去到東倫敦嗰邊試腳，所以九點幾就要出門口，要揸個幾鐘車先至到，仲要唔識路，真係夠晒刺激。11點終於去到球場，交低佢比教練，我哋就去咗附近行街。其實都係好大嗰啲parking mall，真係大得好緊要，不過可以叉電都OK啦。行咗運動舖，為配合嚟緊有㗎新單車，都要買定個頭盔，見佢半價就入市。跟住你就要去睇仲爺啲玩具，行得嚟都差不多又要返去接返子元，遇着塞車，搞到唔可以睇吓佢踢成點，因為去到佢啱啱已經出嚟。本來諗住去飲茶，點知條路又封咗又勁塞車，最終去咗食IKEA，因為已經肚餓到一個點，終於食飽行咗陣買咗少少野，淨係排隊俾錢都排左半個鐘。跟住又揸過幾鐘車先至返到屋企，放低佢哋兩個去買少少餸，跟住就返嚟自己整晚餐啦，食飽我已經好攰，淨係搭車其實都好攰，因為要係咁留意住啲路，領航員都好辛苦。