21/12/22

 21/12/22.    WED.    COOL

今日其實都冇咩好食，因為真係病得好辛苦，所以基本上全日都喺度休息，只係午餐晚餐點都要預備吓點解！老公又大細佬上埋年睇波，所以佢哋中午就已經出發，我同子元就煮粥食！因為子元都病咗，所以佢又冇乜胃口，所以佢碗粥分兩餐食，我晚飯都係食返細佬琴日嘅廚餘，基本上九點幾我哋已經各自返房瞓覺，不過我睇幾睇到瞓着咗， 11點醒咗一次，到我老公佢哋返嚟我又醒咗一次，所以都瞓得唔好！

20/12/22

 20/12/22     TUE.    COLD

今日其實都冇咩好寫，因為佢哋病好，就傳晒啲傷風比我，結果我全日都喺度流鼻水，食咗幾次藥都冇用，真係好辛苦，期間仲要照樣執屋煮飯！中午嘅時候我再試吓行出去大街嗰邊睇吓有啲乜嘢買，了解吓附近環境，咁樣行上去都要15分鐘，之後就買嘢都係踩車方便啲，如果唔係一來一回都半個鐘，都未計買嘢！返嚟之後就同佢哋打吓機，四點幾五點先至收夜，老公返到嚟仲話佢哋兩個要去踢波，搞到亂晒大籠，結果細佬去到球場踢一陣就咳到隻嘢咁，阿哥睇完返嚟又凍又唔舒服，話咗冇問題㗎啦，兩個都未好返！我咪喺屋企摺埋啲衫同煮飯囉，我就繼續流鼻水流足一日，希望今晚食埋藥會好啲啦！

19/12/22

 19/12/22.    MON.    COLD

聖誕假期開始，不過細佬琴日開始發燒，今朝老公叫醒我比退燒藥佢食，所以我又瞓唔番啦，佢食完嘢之後又瞓到喎，等到佢出咗汗幫佢抹咗身，我見佢好咗好多，不過老公叫我睇吓可唔可以帶佢去睇醫生，於是我咪打電話去book，點知排咗一個鐘隊，佢同我講今日appointment滿晒，一係打111，一係直接去醫院，咁我見佢開始退燒員亦都精神返好多，就冇再跟進喇！早餐淨係食咗兩隻蛋，因為都冇咩心機整嘢食！然後我醒起份件今日可能會再送去Felix roadd，所以睇一睇個網，見到12點半至一點半會送到，所以派咗阿哥過去等份件，我仲係呢邊分贓埋啲肉，煮粥俾細佬食，果然1:00左右送咗嚟，阿哥就可以攞埋返嚟，下午開始我哋三個就係咁打機，到老公返嚟就開始煮晚飯，本來老公想整埋啲電，但因為要鑽牆，實在太熱唔適合，於是我哋過咗去，又搬啲嘢過嚟，咁聽日就可以再執啦！

18/12/22

 18/12/22.    SAT.    COLD

仲仲今朝本來話要比賽都取消，草地結哂冰踢咩鬼！所以慢慢食埋早餐，本來紮吖老公快啲整埋個電線，但一來又落雨，二來佢又要研究，三來又話冇咗個工具，最終咪發現個工具根本冇買！講到好似係我整唔見佢咁！子元要出去補習，車咗侷過去，返舊屋攞埋嘢再出圡食埋午餐返屋企，放低啲貨就再出去買埋24號開party的交換禮物，再去接番子元，返到嚟掛住睇世界盃決賽，最終要踢到十二碼，阿根廷勝出！跟住的起心肝宴晚餐，老公今日生日，所以煮牛扒，仲有整薯蓉西蘭花，煮到8月先開飯，仲爺瞓咗，叫醒佢食時摸到佢似發燒，快啲食退燒藥，食少少就算啦！洗埋碗食埋蛋糕睇多陣電視煮沖涼瞓覺！

17/12/22

 17/12/22     SAT     VERY COLD

今日無事忙咁, 朝早瞓到9點幾先知醒, 起身煮早餐食, 食完先叫老公整咗嘢先, 唔好去中超買嘢住, 點知就發現個電批叉唔到電, 搞到要問炮哥借, 老公想整個叉電位先, 但原來好難拆, 我諗住叫佢不如用明線喺房拉出嚟, 最終佢就堅持用佢個方法, 我都唔理得咁多啦, 又唔係我整! 咁我咪再諗吓有咩執囉, 仲有要洗衫乾衫, 個洗衣機雖然已經轉番用800轉但都係震到隔離屋過嚟問, 我懷疑係個洗衣機問題唔係個地台問題, 諗住打去保養問, 佢登記完又話幫我轉去維修部點知又cut 咗線, 玩嘢呀, 又要星期一再問, 點解問極都仲有問題去解決架, 真係好攰呀! 2點幾出去食午餐, 然後車子元去踢波, 跟手去中超買嘢, 好多嘢要買呀, 都好耐冇嚟咁! 之後仲要返去舊屋攞嘢, 放到一車都係, 落咗貨老公又要去接番子元, 我就喺屋企係咁執嘢, 盡量清咗啲箱, 但冇咁多櫃, 啲嘢都唔知可以放邊, 好苦惱! 等老公回來煮埋飯食, 都已經9點多, 洗碗沖涼之後仲要摺埋啲衫呢, 咁又12點架啦! 

16/12/22

 16/12/22.    FRI.    VERY COLD

返埋今日就放假，但都唔係咁開心，因為房個廁所塞咗，又唔知係咪太凍結咗冰所以塞喎，今日都係通唔到，好灰！返工返學都有咩，雖然有得放早揍埋細佬放學老公可以嚟接，但因為周圍都塞車，返到屋企試通渠後諗住去茶餐廳食嘢又已經閂門，去Costco 又塞，本來約咗5點出發去central London睇燈飾都趕唔切，整咗一輪樓下算冇問題但樓上完全唔去水同埋怕仲喉爆，都係要搵人嚟睇，但就唔用得住囉！雖然join唔到佢地行market但都可以去睇吓燈飾，不過渣出去再要行去會合又凍又遠，同埋都唔係好多嘢睇，最後去食埋拉麵就回家，排隊沖涼休息！

15/12/22

 15/12/22.    THU.    VERY COLD

今朝都係如常咁返工，而家揸熟咗條路好似行得好啲啦，返到學校又俾麻煩老師捉住要寫電郵俾佢，講返琴日Bella發癲啲嘢，其實本身我都會寫㗎啦，只係見唔到佢就唔使寫電郵，淨係mark番喺系統就可以！寫完佢又差不多返，我都冇咩時間，想去飲杯咖啡都唔得，今朝出門口唔記得咗飲，好在捱到去放飯嘅時候，去搵個同事整過即用咖啡頂一頂先！下午都算順利，今日啲堂其實冇咩嘢做，都係睇吓戲，係零零舍舍有一堂要上，好在嗰堂我去咗食飯！放學去公園接埋細佬，俾佢玩一陣就返屋企，其實今日唔算好多嘢做，都係要試咗洗衣機先，始終1200轉實在搖得太犀利，以後唯有轉用800轉！老公返嚟之後整埋個電視機可以上返牆，咁我就煮好飯食埋諗住沖個涼，點知水壓又唔夠，沖沖吓又變凍水，不過都冇辦法㗎喇，冇錢買晒全年洞，就係咁！