31/7/23

 31/7/23     MON     RAIN

今朝都係瞓到自然醒啦, 食完早餐又同council嗰到周旋council tax問題, 搞咗一個鐘都係重頭嚟過叫我再email過再upload過, 搞到12點左右阿媽話想出去, 佢想自己出去行吓, 但我都係唔放心, 本身叫仲爺帶住佢, 但諗諗吓其實仲唔放心, 兩個都冇電話, 最終叫佢地等我一陣, 我同佢地一齊出去, 行咗去Lidl再行去魚檔買魚, 本身行都冇咩問題, 只係仲爺係咁講嘢, 聽到好攰, 返到嚟煮咗嘢食完我只想攤吓, 個精神好攰咁! 之後就開始追吓劇睇吓戲咁, 老公返嚟帶咗兩隻豬去踢波, 我就睇時間煮飯, 食完飯就沖涼休息!

30/7/23

 30/7/23     SUN     RAIN

今朝瞓到10點幾, 6點幾醒過一次去廁所可以再瞓番, 唔錯! 跟住就捉佢地梳洗食早餐諗住帶阿媽出Central london架啦, 點知佢話係好咗啲但都係唔想出去, 因為個肚都唔係太舒服, 但我地都係想出去行吓, 所以自己照出去, 只係去咗阿仙奴主場, 因為老公話有新的雲加銅像放咗喺嗰到, 咁買埋咖啡就出發, 去到行咗一圈同喺紀念品鋪行咗陣就回程, 本來諗住喺附近食吓嘢, 但因為落大雨, 都係算數, 返番自己地頭食算啦, 返到屋企都係hea啦, 老公整埋個蘿蔔牛腩簡單食就算!

29/7/23

 29/7/23     SAT     HOT

今朝阿媽仲係覺得唔舒服，所以都有冇去玩，食完早餐我同老公出去買吓餸去吓中超就算，次次去中超都放血咁，可惡！買埋日本嘢返去做午餐，跟住全日都喺屋企hea，打吓機咁又要準備晚飯，細佬話要食粟米餃就包比佢食囉，然後都係睇吓電視咁！

28/7/23

 28/7/23     FRI     WARM

琴晚瞓得勁差，今朝精神好差之餘仲周身痛，完全唔知做咩，仲要勁冇胃口，食咗兩隻蛋同咖啡，完全攤咗喺到休息，希望抖吓會好啲，最後食咗粒必利痛好似好好多，等老公返嚟就出發先去食午餐，再揸上牛津行outlet，都要個幾鐘先上到去，同樣都係行吓， 老公就買到太陽鏡，因為真係好需要揸車時用！最後行埋nike先再去M&S買啲餸就返去煮飯食！

27/7/23

 27/7/23     THU     HOT

今日都係冇出過街，放暑假係應該hea吓架嘛，因為冇車都帶唔到媽去太遠！今朝終於瞓到8點幾先醒，子元仲勁瞓到10點幾，我地都食完早餐，先溫完習咁食完什午飯就可以打機，例牌又係兩個要吵架先安樂！老公返嚟帶佢哋去練吓波，我就摺衫睇金師傅，差不多時間就煮飯。

26/7/23

 26/7/23     WED     HOT+

今日都係瞓到自然醒, 但個自然太早, 之後都唔係好瞓得番, 可惜! 起身梳洗食早餐, 之後就準備帶阿媽出去行吓, 因為鐵路又好似有啲問題, 我地就近近地去broadway附近個公園行吓就算, 其實又要撘巴士過去再諗番條路點行都夠我玩! 去到公園其實冇咩嘢睇架咋, 有公園仲爺又可以玩吓咁, 阿媽又玩埋一份, 佢玩到企喺千秋上面呢! 我見都幾近日本麵包店就去買埋麵包啦, 跟住就行番Broadway去M&S買埋方包就撘巴士返去, 落車喺Lidl再入貨, 阿媽話想食豬肉嗰啲, 咁就買咗肉餅囉! 返到屋企見到有封信有哂我同老公個名都知道唔方好嘢, 原來係council話我地冇交felix road嗰邊的council tax, 頂......我咪改咗地址囉, 又改唔啱? 咁佢又識寄嚟呢到比我地, 痴鬼線! 幾經辛苦打咗電話去問到人, 佢話要email完租約個文件比佢等佢close咗呢個account, 就咁改嗰個又唔關事因為唔同account number, 完全諗唔明係咩玩法, 總之email咗比佢先啦, 唔見佢覆都要再打去問! 好在佢地自己整好嘢食放好哂買返嚟的東西, 咁我搞掂都落去食嘢啦! 然後就係同仲爺今日學習, 因為佢要等daddy返嚟帶佢去踢波, 所以好積極搞掂哂等老公返嚟, 佢地去踢波我就繼續睇金師傅, 一邊煮定飯, 佢地踢完返嚟快手沖涼, 因為落雨濕哂! 諗咗可以上下層一齊沖只係水弱啲啫! 食飯都係睇吓電視咁啦!

25/7/23

 25/7/23     TUE     WARM

今日都冇出過街, 因為老公叫我同子元再掘吓後園個flower bed, 但其實嗰到似垃圾堆多啲囉, 激死! 做咗一輪我地都攰爆, 加上時間上都唔係好啱, 就冇再出去, 我仲要換床單, 吸塵抺地等等, 跟住又要煮飯啦, 食飽仲要摺埋啲衫, 可以再繼續睇第二輯金師傅, 之前嗰次睇有好多嘢都唔明, 今次明咗好多! 老公返嚟沖涼再煮飯, 今晚送飯的係Mirror+, 都幾好睇啦!