31/12/19

31/12/19.   TUE.    COOL

嚟到2019年最後一日啦，社會大事就冇咩可以回顧啦，大家都心中有數，我今年生活有咩回顧，應該係仲爺升小學，笨爺又準備升中係最大挑戰！都係努力向前看啦！今朝都係自己返工，有啲趕返去拍完卡先買早餐，今朝早都係做自己嘢，阿姐出咗去嘛，即刻做仲爺啲卷囉，做到午飯都未做完，食咗飯先啦，又再吹吓水咁！下午放4點，時間好唔夠用咁，話咁快又放工！返去睇番我兩隻豬，趕佢地做嘢等等，嫲嫲就幫我地煮埋飯佢就返去食盤菜，我就襯時間去惠康買咗嘢，晚飯後都係如常咁做埋啲嘢，子元想要倒數就由得佢啦！

30/12/19

30/12/19     MON.    COOL

今日要返工啦，唔叫醒佢地我自己撘車算！買埋早餐返去食嘢食埋藥，就要開工啦！淨係清email都清咗我一朝！午飯入房邊打機邊食，因為得番一個鐘多啲買嘢時間！下午都再打多陣先才工作，又要做自己嘢咁，忙到放工呢，撘巴士返到去，笨元教緊仲爺做閱讀記錄冊，但條友仔啲嘢完全郁做過，梗係比我鬧啦，叫佢即刻做，食完飯都要做！

29/12/19

29/12/19.   SUN.    COOL

今日老公放假，我叫做可以有個人倚賴吓，但其實條友都係踢一踢郁一郁，所以都係冇咩幫到手！ 瞓到10點幾先起身，梳洗得嚟出去食早餐，都11點幾12點，食完回來點幾，係時候溫吓書，今日溫吓數啦，溫到3點幾就去圖書館做埋本閱讀記錄冊，轉個頭就5點圖書館閂門了，咁就借埋啲書返去做埋餘吓嗰啲！返去放低嘢就出去食晚餐了，去咗V Walk食牛牛渦，食完行個圈咪返屋企囉，我個長假期就咁完了，明天要返工啦！

28/12/19

28/12/19.   SAT.    COOL

今朝要揍子元去英文補習，跟住去食早餐，但真係病得嚴重咗，老公話都係車我去睇醫生好啲，咁都要架啦，因我真係好喉嚨痛，堅係辛苦嗰隻，去到同仲爺睇埋啦，佢都聲沙又有痰，睇完葉醫生攞埋藥老公過來車我地返去，都11點幾就食藥，但藥力又好似好勁，我攰到全身冇咩力咁，但都要睇功課溫書照顧佢兩個，其實真係幾攞命，好在笨元有番咁大個，比錢佢落去買兩餐食都仲得，叫做有個小幫手啦，希望食埋明天藥會好啲啦，唔係星期一都唔知點返工！

27/12/19

27/12/19.   FRI.    COOL

今日瞓到10點多先起身，覺得喉嚨真係好痛，希望食咗啲藥會好啲！出去食完早餐去埋銀行買埋嘢等等，就返屋企閉關，老公就返工！今日主力溫常識啦，一向都係咁溫架啦，今次已經遲咗好多開始！唔覺唔覺溫到3點多又話肚餓，咁我咪去煮午餐囉，食完又繼續，不過一次溫兩個真係好攰，左右開弓咁根本冇得休息，所以子元去咗踢波時我都只係叫仲爺做收，我摺吓衫！7點幾出去小童，撞到程生佢又可以車埋我去樂富接子元放足球，再揍埋兩個細，一齊去薩利亞食晚飯，又叫得好豐富咁，程生車埋我地返屋企！老公返中加埋返夜，頂多更都好，反正都係瞓！

26/12/19

26/12/19.   THU.    WARM

今日有兩場party要開，所以全日都冇咩做過嘢，朝早起身後叫笨元教仲爺做埋啲數，我地就梳洗出門口，先去長沙灣食個光速餐，跟住就過兒童醫院，梓朗喺醫院開聖誕party，咁我地就去參加，見到佢其實真係心痛架，佢淨係可以坐喺到，仲要坐唔穩，唔係好認到人，不過餵嘢比佢食都肯食，只係見住大家玩佢就坐喺到望！咁我地都係坐吓食吓睇住細嗰兩個玩啦，3點多我地都走啦，因為要返去等下一場的小圈子朋友來，其實都係得Ben同健啫，又係兒童樂園咁，玩到7點多出去CoCo食晚飯，食住吹吓水咁，9點幾散場，回家後安頓好兩個細沖咗涼，點知barry一家上咗嚟，吹咗陣玩咗陣都要請佢地走啦，因為我都要休息了！

25/12/19

25/12/19.   WED.    WARM

今日係聖誕節，本來有兩場party，但因為Joyce同joey媽媽個囡都病咗，所以都係放棄了，唯有改期吧！所以今日只有一場康傑小聚會，9點幾出門口過去荃灣，上到會所其實都冇咩做，大人細路都係傾吓偈咁咋，始終今次聚會係有種傷感喺到，又比較少時間去搞，所以大家都冇咩準備，但有得食吓見吓吹吓水都唔錯啦！12點幾散場老公車我地返去，佢就返工，順手攞埋架車去整番玻璃，咁我就喺屋企同兩隻豬仔做功課，都算做得七七八八，之後應該有時間溫書！5點幾出門口去踢波，仲爺就喺球場玩足兩個鐘，我就打機囉，踢完有聖誕禮物，係每人波鞋一對，又有零食咁，完成了就去樂富找地方食晚飯！返到去快手沖涼休息，老公要OT多三個鐘才放工！

24/12/19

24/12/19.   TUE.    WARM+

今日係仲爺期待已久的迪士尼日，所以佢琴晚一早就瞓，今朝鬧鐘響就起身！老公今朝要早啲起身去處理cube cube，因為琴晚攞車時發現車尾玻璃被打爛了，不是有惡意但係泥頭車彈出的石頭彈中咗，泊得街就遇咗，已經算不幸中之大幸架啦！但今日要用車嘛，所以食完早餐先去欣澳轉車入咗園先，老公再出返去，攞架車去舊公司做番個封貼先囉！我就同兩隻嘢入去玩住先！本來煊只可帶3個人入園，但佢仲可以幫我找到多張飛，咁我就可以完全免費入場了！一入去先玩咗未玩過的Ironman 同蟻俠，跟住就同老公會合，去咗公主嗰邊玩，今日真係算好少人，好多地方都唔洗排隊，真係好耐未試過，可能係我太耐冇入過嚟，起碼蟻俠我未玩過先啦！今日主力係為咗仲爺生日來迪士尼，所以佢想玩咩就玩咩，盡量就佢！差不多兩點幾就食飯，老公都係話去Corner cafe，咁質素又真係好多，食完就轉去獅子王嗰邊玩，仲仲話要玩河流就比佢睇吓，本來諗住反斗奇兵嗰到可以玩吓機動遊戲，不過實在太曬同埋要排太耐，所以去咗迷離莊園先，再喺灰熊山谷玩陣，又行番去公主嗰邊，玩吓米奇呀木馬咁，最後仲爺都係要玩反斗奇兵個降落傘，條友完全唔驚囉！終於玩夠皮，慢慢行返出去，差不多7點多出番小童，仲爺今日小童要報佳音呢！大家一齊睇完咪同程家齊齊去食晚飯，去咗食打冷囉！

23/12/19

23/12/19.    MON.   COOL

今日基本上都係得個軀殼返工！朝早叫醒哂大家一齊起身送我返工，因為老公要買早餐比梓朗爸佢地，咁就同我食埋早餐先囉！返到去真係只係做咗基本嘢就算，其他時間唔係打機就做自己嘢，全hea狀態！午飯梗係入房吹水啦，轉個頭就夠鐘！下午阿姐出咗去開會，簡真提早放工咁，我就係咁做自己嘢囉，完全係等放工，夠鐘即閃去球場同阿媽交收番仲仲，等佢踢完就返屋企開飯，有嫲嫲煮好飯嘛，然後就趕佢地去瞓因為明天要去迪士尼嘛，我都好期待！

22/12/19

22/12/19.   SUN.    WARM

今日係難得一日咩都唔洗學，真係好！可以出去行街買嘢，要買聖誕禮物，子元又要買衫面試！瞓到9點起身出去食早餐，時間關係都係去食光速餐，點知又撞到may koon，又撞到肥迪！計劃去海運買嘢，路途上又去咗善導睇明愛賣物會，路過深水埗泳池又見到對面有個新場就去打吓卡影吓相，笨元影得好文青Feel呢！過到海運去咗反斗城買禮物，最終買咗9份比唔同小朋友，子元仲仲都選咗佢地想要的！跟住就睇子元的面試衫，但都係唔啱，所以食完嘢過咗圓方睇zara， 終於找到啱的，真係著得好靚仔呢！上去遊樂場玩埋就返青梅食冬節飯！

21/12/19

21/12/19.   SAT.    WARM*

計一計我今日真係港九新界遊，撘車都撘咗5個鐘，來回台灣都可以了！都係為揍仔啫，香港人係咁可憐架啦！早上子元學英文，咁送咗佢過去我地就食早餐，上阿媽到攞番仲爺條校服褲，接番子元去畫班，我地就返屋企，收拾咗仲爺房個廚房仔，實在係太多垃圾太亂，執得嚟都夠鐘出門口去傑志比賽，入到去有個靚位睇佢地踢波唔洗曬，不過仲爺又撞到呢！踢完又趕下場，要去海怡學音樂，又靠實程食嘢啦，佢學嘢時我就食飯，然後就返屋企放低行裝又要入大埔，要接番我隻大寶！佢都好叻仔架啦自己撘到車入嚟，不過我都有啲擔心！去到睇都仲有個尾聲，雖然輸波但子元都叫做踢得幾好！同另一位家長去附近食埋晚餐就撘巴士回家，都算好快9點9都返到，快手搞掂埋佢地就可以沖涼休息！

20/12/19

20/12/19.   FRI.    WARM

今日都係返工返學啦，佢地返去開party返半日，我就冇咩做，所以時間過得好慢咁！朝早同老公食埋早餐就返工，吹完水開工！朝早都算有嘢做，順手過番啲嘢比Mandy，都返咗成個星期工應該接番手啦！午飯同負能量太太團食做冬飯，帶咗佢地去啟業食平價酒樓，但都真係好好食架！吹吓水咁時間超快過，又要仆返番去！不過下午堅係冇嘢做，於是打咗一個下午機，差不多放工前有個人叫FRED CHU嚟比啲文件我，因為之前Jackie講過姓朱就唔好叫Fred，點知佢嚟到時真係好有份量，嗰吓真係要忍笑忍得好辛苦囉，但實在真係太好笑啦！放工行過球場接笨元，條友仔跌親又係到話唔得呀好痛呀嗰啲，咁跌到梗係痛架啦！最後冇再練但都係要等到夠鐘先走，返到美孚佢去食住麥記等我接埋仲爺再會合，等我買埋粥返去食，唔理咁多快手沖好涼食嘢休息！

19/12/19

19/12/19.    THU.    COOL

總覺得今日似星期五咁，可能真係太想放假啦！朝早又係趕啦，都唔明點解咁慢，係佢地太慢定我要再快啲！又差不多8點先返到去，老公揍埋我食早餐返工，今日都係咁做吓嘢啦，又再吹吓水咁，午飯去咗同special team 食，但真係食only，悶到一個點！差不多2點先返去，又係吹水與做嘢啦，但實在係太想著放假，個人其實係冇咩心機做，只係想快啲收工，不過今日都有個唔知算唔算係好消息啦，因為出咗b仔啦，冇上年咁多但總好過冇嘛，有幾多得幾多啦！終於捱到收工，快腳去接仲爺踢波，其實攞住咁多嘢再揍住佢迫真係好攰架！返到去有飯食算係好事，之後又唔洗洗碗，只係吸塵抺地，捉佢地沖涼休息，收拾好明天聖誕party啲嘢，終於可以去沖涼了！

18/12/19

18/12/19.    WED.    WARM

今日係老公生日，但佢又要返中班，冇時間慶祝，所以星期日先會切咗蛋糕先，今日可以出相呃like呢！朝早車咗我去南昌站，咁我就去麥記買早餐，食得好飽呢！然後都係做吓嘢吹吓水咁啦，午飯入咗房食，又係負能量太太團啦！下午都係忙忙碌碌啦，放工撘地鐵去長沙灣，要出糧比阿嫲個工人，順手接埋仲仲，返屋企後完全唔想煮飯，所以只係簡單煮丁麵，明天叫咗老公買午餐壽司比佢地咁就冇所謂！子元自己出去踢完波回來食，我就快手搞掂仲爺先！

17/12/19

17/12/19.   TUE.    WARM

今朝又要發顛嘈佢地先識起身，真係好攰！成日都咁遲先返到學校唔係咁好呢！過到九龍灣食早餐，返上公司吹吓水咁又要開工啦，朝早都係勤力工作架，其實有嘢做好過冇，因為又唔可以點做自己嘢幾慘！午飯同咗oso食，吹水吹到爆笑咁真係好開心，不過就唔係可以成日同佢地食嘅！下午都係忙忙碌碌咁啦，所以時間過得好快！放工快手回家，因為老公約咗人今晚食生日飯喎，我又係要同佢兩隻嘢搏鬥囉陰公，叫笨元教仲爺功課，但仲爺啲嘢又真係好亂，同埋唔係好聽阿哥話，真係好煩！最終都順利完成功課啦，笨元就都係一個字講哂，懶！10點多兩個去哂瞓，我可以自由！

16/12/19

16/12/19.   MON.    WARM

今日又要返工啦，不過今日係帶住開Party的心情返去，因為今日係大食會嘛，基本上由11點多開始到3點多都係搞緊關於大食會啲嘢！朝早返去都有做好嘢先，都係冇停手的，但之後就開始係咁翻熱食物set buffet 枱等等，12:50左右阿sir話可以食得大家就開動了！我地玩到熱食冷盤甜品飲品分哂區咁，大家又好似食自助餐咁排隊攞嘢食喎，因為阿sir比咗錢買刺身嘛，點都要排番轉先，初頭幾怕我啲布丁啫喱唔賣得，點知銷情都算唔錯喎！食到點幾未夠兩點幾實我地都已經開始執嘢洗，但都要搞好耐，因為大大話話都有幾十個盒喎，又要洗又要分番咁都幾係嘢！最後仲分埋啲飲品零食咁，算係完滿結束！放工快閃去九龍塘同阿媽會合揍番仲爺去踢波！今日仲未咗成績表，我遇咗佢第尾，但又未去到全級第尾，仲有7個喺佢後面，我好樂觀咁話佢好有潛質攞最佳進步獎呢！踢波時同昱男媽吹吓水咁啦，返到去食得飯嚟都9點幾，還要趕佢兩個做埋啲功課，11點幾先有得沖涼呢！

15/12/19

15/12/19.     SUN.    WARM

今日又係分頭行事，搞到放假都好似冇咩見到老公咁！朝早7點幾已經比仲爺嘈醒，但都8點幾先起身，帶笨元去畫班，我地就去食早餐，然後買料準備整明天大食會旳芒果布丁，最終我加咗個芒果啫喱，應該都ok掛！返到去都唔可以整住，因為要幫仲仲溫中文作文，其實即係作句啦，但都要溫架，因為佢真係文盲嚟架嘛！跟住就係煮午餐，都係整番啲隔夜飯餸又一餐！跟住就睇吓子元的功課，條友仔做漏咗好多，又唔比英默我睇，今晚見到先片佢！差不多4點帶仲爺去游水，然後返來快整好啲布丁同啫喱，就可以落去接仲，溫一溫普通話就放佢自由，因為又要出去，幫仲爺買咗對cross，再去到VWallk買老公個生日蛋糕呢，返阿媽到做節，然後咪食完蛋糕返屋企！

14/12/19

14/12/19.   SAT.    WARM

今日又係忙碌的一天！朝早首先子元要去補英文同畫班，我地就去食早餐，食完返去接番子元去畫班就返屋企同仲仲做埋啲功課，然後咪去石門練波比賽囉，真係好攰呢！仲爺今日唔係出場好耐， 之後仲要去㕦豬㕦龍門，所以都唔係睇及得好清！比塞完又係時候去學音樂，所以都係快手撘地鐵過去！買多個包比佢食就唔洗再買麥記包！等佢學緊時我就去咗食嘢，不過我地又去！回程都算好瞓， 返到來笨元已出門口，但都6點多先過到去，我地就預番時間煮飯，9點幾10點都瞓啦佢地，我還要習衫呢

13/12/19

13/12/19.   FRI.    COOL

今日又係一個做唔停手的一天！朝早揍仲仲返學，順手問埋吐口水喺仲仲飯盒的同學，叫咗老師跟進，希望可以處理好！食埋早餐返到去就要開工啦，打好哂更表就已經半日，午飯痴咗joyce佢地嗰邊食，之後仲幫我入咗前絈一小禮物啲袋，真係好感激，但最搞笑係阿姐囉，佢覺得我找人幫手，但冇通知Stella，我都唔明阿姐驚咩，總之做好咪得囉！總果全個下午我地就喺到入入入袋！好在我地都快手，但條氣就真係唔順架啦！好在準時放到工，去球場接笨元，又同啲阿媽講吓升學嘢，接咗子元就返美孚揍埋仲仲，馬上返屋企整熱番啲嘢食，等佢兩個沖好涼就開飯，仲爺食飽唔洗理，食完都仲要洗碗清潔，等佢兩個瞓咗先做好嘢沖涼，又係好攰的一天！

12/12/19

12/12/19.    THU.    COOL

今日只係揍仲爺返學，個豬仔又好可愛咁啦！老公同我一齊食埋早餐我就返工，今日竟然好holiday mood! 返到去都唔多願做嘢，可能要趕急的都做哂，所以可以很閒，吹吓水慢慢做咁，午飯提早落去酒樓食，因為今日食公司聖誕飯，今年唔食夜晚食午餐，咁仲好啦快靚正！同咗catherine佢地坐，吹水開心好多！下午大人物全部出哂去開會， 梗係自由時間啦，但其實都冇咩做，之後又要pack前線小禮物，所以都係冇咩做過自己嘢！放工撘巴士入石門，都算好快入到去喎又有位坐！仲爺今晚都踢得幾好啦，踢完去附近食車仔麵，又真係幾好食喎！然後就返屋企，執埋啲功課手尾就可以瞓覺，其實有時佢又好自動自覺，只係有時好想做自己想做的事就算！今日佢又話我知個同學吐口水落佢個飯，睇嚟我要同老師講，因為仲爺講咗比姨姨聽都冇人理，係都要迫我出手！

11/12/19

11/12/19.   WED.    COOL

今日子元要入camp，本來要一早入去，但因為佢地足球隊下午要比賽，所以有5位隊員都可以比賽完先入camp，啱哂子元河車啦！早上仲爺都係要返學的，子元就跟咗我地去食早餐，順手叫佢上office攞埋啲月曆返屋企！今日啲朋友仔唔係放假就出咗去做嘢，飯腳都冇陰公！朝早都係做嘢啦，仲有同Ivy吹水，但大家都係吹啲傷心事，所以兩個都喺到流眼淚，不過有人講吓都係好事！午飯後冇地方去，就上網睇吓學校啲資料囉，係時候要填吓表囉！下午專心做嘢，因為今個月尾要放假，唯有而家做多啲先！放工直接去阿媽屋企，因為要接仲爺，順手食埋飯先返屋企，沖好涼就同仲仲整芒果布丁！可以咁閒反而唔係咁慣，好得意！

10/12/19

10/12/19.   TUE.    WARM

今日揍仔返學後，老公車到我去南昌站我就自己撘車返去，喺紅磡站買咗麥記食呢！返到去點都要做啦，不過今日唔係咁急做嘢，所以都係舒服的！午飯得番我同Wnnie食，大家吹吓水咁囉！下午啲大人物入哂房開會，仲唔作反咩，梗係做自己嘢啦， 我主力搞吓啲相咁啦！放工去街市買啲餸就返去，又要塞吓車咁，老公都出咗門口約咗人食飯，我就煮飯先，然後都係清潔睇功課等等，明天子元要入camp，所以要睇佢執嘢報友成點！

9/12/19

9/12/19.   MON.    WARM

今日要去聽talk，所以又係時候出動SL，送咗佢地返學食埋早餐就去睇醫生，醫生10點先返到，原來好多人嚟睇，好在我係第一個啫，等咗一個鐘等到真係一個病樣，醫生都話我有啲燒，咁攞埋藥返去就做家務摺埋啲衫，12點多叫醒老公出去，喺八方雲集食咗啲嘢就過學校聽talk，咁就升中啦，真係聽到個人好亂咁，喺hall聽完就分班同班主任傾，但都係冇啦幫到，夠鐘放學搵埋仲仲敏瑩佢地，基本上都冇咩啱問到，都係照番原木咁啦！最唔開心係接番仲爺時，英文老師又投訴佢，做堂課時又掛住玩咩都吾做！返屋企快手同佢換定波衫做功課，最後要喺入石門來回車程上做埋3份數，又慳咗啲時間，回人來食埋嫲嫲晚飯就做埋英文功課，都叫做搞得掂休息啦！

8/12/19

8/12/19.   SUN.    WARM**

今朝我都係瞓到9點多，老公放公回來就接咗子元出去，本來諗住係去探梓朗，但佢喺ICU唔方便被探，所以老公帶佢去咗跟個舊同事去教堂，幫梓朗祈禱，因為個教堂喺上水，所以一來一回都12點多先返到來，本來諗住出咗街先，仲爺再回來游水，不過子元又話想跟老公去踢波，咁我就同仲爺喺屋企囉，先睇咗子元功課再同仲爺溫書，跟住就出去食午餐，諗咗去美孚食上海麵，估唔到仲爺咁識食，呢間正嘢可以一個人食哂一個麵！回家前去惠康買埋嘢才返去換衫游水，老公佢地踢完波返嚟，沖埋涼接埋仲爺就出街，去咗mega box，買咗褲比笨元，比舊年高咗咁多，要買大人款了！去IKEA食嘢買嘢，老公就幫Joe佢地買啲粥比梓朗食，手術係做完咗，但只係吊命的手術，聽完都心痛，大半年間就已經惡化成咁，醫生仲要話佢呢個瘤暫時全世界都冇藥可醫，咁即係得一條路，有邊個做父母可以接受到！行完商場就返屋企沖涼休息！

7/12/19

7/12/19.   SAT.    COLD

今朝老公放工回來瞓到8點幾先起身，揍咗笨元去補英文，我地就去食早餐，接返後返去換波衫又要出去比賽，仲爺就返去做功課， 12前要出門口呢，因為又要入石門踢波嘛，趕埋啲功課就出發，都算趕得切啦，今日只係踢咗一場上半場咋！完場就趕去學音樂啦，今日食唔切麥記，唯有學完先食啦，我就去咗照樣食撒利亞！回家撘巴士，我都午到仲爺唔瞓架啦，去程時就喺地鐵瞓，抱到我手軟！6點多返到去，收拾好又出去食飯，只係近近地去奧海城食埋晚飯，幫仲爺買埋件heat tect先呢！回家後老公就尤返工啦，我又要對住佢地，快手趕咗仲爺去瞓，子元就要幫我摺埋啲衫先瞓得，反正佢都要睇佢個足球小將！

6/12/19

6/12/19.    FRI.    COLD

終於捱到星期五！照樣老公放工回來送我地返學返工，不過今日送到我南昌站啫，我再自己轉車！買埋早餐返去食，跟住就開工啦，清吓email先再做吓嘢囉！你話完全冇嘢做就唔係，但都算好Free架啦，午飯早少少食因為要去shopping, 都係去大昌買吓嘢，但一抬嘢飲就死，已經有車仔都好重！返到去執吓貨咁，叫定老公放工來車我！下午都係做公事多，放工老公送我同仲爺去到樂站拾一車，返去同佢做多樣功課就出發去小童，晚飯同程家快食老公又要返工啦立！

5/12/19

5/12/19.   THU.    COLD

今日終於叫做冇咁忙，朝早老公放工回來揍我地返工返學啦，兩個慢到成日要人催，真係好攰！返到公司對正食埋早餐先返上樓，都係吹一輪水先闕一工啦，朝早趕起埋啲相報告，午飯本來想去大昌開倉，但最終都係跟咗佢地上咗德福囉，又幫笨元買到upder！下午做吓嘢吹吓水，時間都過得好快，放工去啟業買料打邊爐，點知等巴士回程時出事了，因為等到7點多先有架車仲要硬迫上去，返到去又要整嘢開餐，老公揍番仲爺踢完波回來，食完佢又返工，我就大把手尾，好在明天佢地只係返去補課，咁就唔洗趕功課！

4/12/19

4/12/19.   WED.    COLD

今日真係凍咗好多，好在有老公車返工，食埋早餐返去，吹咗陣水到9點就要開工，真係做唔停做唔完咁！午飯入房食方便吹水啦！下午都係做嘢啦，目標係今日趕起哂嘢啦，經過全日的努力，終於完成哂，準時收工，邊撘巴士返屋企邊睇番琴日的全民造星，返到去老公煮飯找就睇功課換埋被先！開飯食完洗埋碗，趕仲爺做埋功課我就沖涼，叫佢溫英文又係唔合作啦，最終都係由得佢！因為迫佢都係唔入腦，去瞓啦！老公今晚返夜，仲爺未瞓佢都出門了！

3/12/19

3/12/19.   TUE.    COLD

今日除咗忙，我已經諗唔到用咩字去形容，早上已經要早咗起身煮飯盒，老公揍咗佢地返學就揍我返工，可以慢慢食埋早餐先呢！但返到去吹埋水，基本上真係冇停過，嗰種感覺真係好辛苦，除咗放飯嗰一個鐘，我真係做足咁耐！期間都盡量抽時間做吓私務，不過只係想快啲放工！ 但今日又塞車喎，所以7點多先返得到嚟，老公又已經出咗去食飯，我一返到去兩個就喺到叫肚餓，咪快手煮飯先囉，快極都要大半個鐘架，食完洗埋碗還要清潔教功課，我真係想死咗佢或者一刀殺咗佢地算，我真係好攰，其實我真係好努力去支撐住，但我真係好大壓力呀，放工返嚟其實已經好攰，但冇選擇一定要去做一定要去煮飯去教功課，有排山倒海嘅嘢迫埋嚟！然後啲細又唔合作，令到我發哂顛囉，我真係好辛苦！

2/12/19

2/12/19.    MON.     COOL

今日係仲爺生日，6歲啦，終於可以話比人知佢足6歲了，感覺上佢真係仲係BB咁呢！生日還生日，都係要返學返工，朝早我仲要煮飯盒，真係要6點半起身呢！順利出到門口返學返工，食住早餐吹吓水咁，夠鐘又開工，以為好閒......好難啦，又係冇停手做到食晏，快食完就同佢地出去行Uniqlo，不過我地負責排隊，Catherine先係大戶！等緊車返去時見到Miss call，原來學校打嚟，子元中午練波時跌倒，手落地再比個身壓到，唔係好郁到手腕，聽到咁已經驚啦嘛！但我又做唔到啲咩喎，係咁諗早唔早走，最終好唔專心咁做哂啲嘢先，3點半到等阿姐講完電話馬上同佢講聲就走，即去法國登記先，但要6點幾先有得睇喎！跟住再同仲爺登記埋，因為老師打嚟話佢同老師講個菇菇痛，都係睇一睇穩陣，好在最終只係外傷啫，藥膏搞得掂！子元就唔排骨科啦，一來唔知要等幾耐，二來老公話去九龍城睇跌打，比師傅摸清楚骨冇裂，係傷咗軟骨囉，敷咗藥應該好啲！跟住就要解決埋晚飯，買埋蛋糕返去但就要沖好涼做哂功課先可以食，都等到9點幾囉陰公！不過仲爺就好開心囉！

1/12/19

1/12/19.    SUN.    WARM

今日老公返早，我就全日負責帶出帶入啦！朝早9點幾起身快手帶佢出去補英文，再同仲爺去食早餐，去公園玩一陣就接番子元，本來諗住返屋企都有時間做功課，但因為12點半又要出門口，根本冇時間冇機會，連仲爺都只係溫咗兩句英默咋，趕住1:30要過到跑馬地，真係行得好鬼遠！放低咗佢我就同仲爺返屋企，期間又影吓相咁囉，咁啱見到有pocket mon，仲爺又影得好開心呢！返到屋企叫佢溫幾句英默就放佢去游水，我就返屋企摺埋啲衫，等仲爺游完水就帶佢去觀塘同老公佢地會合食放題！仲爺最開心係12月之星砌蛋糕啦，主要咪比佢，見佢怕怕羞羞個樣真係好得意，8點幾回程了，笨元仲有功課要做呢！