30/9/23 SAT WARM
今朝我傻咗以為係閒日, 見到8點鐘, 以為遲到, 所以大叫, 老公比我嚇死, 話今日係星期六喎, 真係好白痴! 不過之後都hea到10點先起身! 食埋早餐都11點幾, 仲爺又話要幫佢tun結他, 最終我地差不多12點先出到門口, 先去買咖啡, 再去超市買埋今個星期餸, 今個星期應該唔洗再買餸, 返到去淨係執番啲餸入雪櫃都好攰, 仲要plan埋邊日食咩, 然後先可以煮嘢食, 老公就揍咗子元去做gym! 食完嘢做埋打掃, 我就繼續追我套BL劇- 我的牙想你, 得番4集兩個鐘就追哂, 真係好好好好睇, 又有劇情又有靚仔, 邊有得輸, 睇完嗰吓我係好唔捨得呀, 幾耐未諗過, 唔想開套新劇添呀, 真係好好笑! 我仲忍唔住喺口水個DM打咗個留言介紹佢地睇, 好痴線! 老公煮好飯就可以開飯, 之後睇財閥家的小兒子都好吸引, 減吓我對BL劇的不捨吧!
23/9/23 SAT COOL
今朝瞓到9點幾先起身啦, 星期六嘛梗係要瞓晏啲! 食完早餐就同老公出咗去買咖啡同去B&Q買嘢, 然後再去超市買埋餸, 又放血, 不過點都要食都要買! 返到屋企都點幾, 老公要整下層廁所個沖涼位, 成日漏水出嚟整到牆濕, 不過又要等乾咁今日都係整唔完, 佢兩個要上嚟沖涼! 我就執好仲爺個書枱, 等佢可以開始做功課, 終於入到個google classroom, 都係寫字做數啦, 但佢都做咗好耐, 而我都好無聊咁整咗個每星期食咩餸表, 全部用畫的圖畫, 好可愛架, 咁佢地唔洗食日問食咩, 買完餸返嚟又知邊日煮咩! 老公同子元出去做gym, 做完返嚟抖吓又開始煮飯啦, 今晚有粟米魚肚羹, 好正!
21/9/23 THU RAIN
今日又要開番辛苦工啦, 對住year 7嗰條八婆又係令人燥底, 我其實係咪可以唔理佢呢, 定係只係我問題! 好在今日學生早放, 唔洗對住佢咁耐, 不過小息佢自己掛住print嘢又冇食嘢又話肚餓, 但其實都係11點幾咋嘛, 平時都未開飯啦唔好玩嘢! 玩到放學send埋佢出去, 見佢識自己走我唔理啦, 明天我有我自己走就算! 本來諗住開飯架啦, 但都係返去大房睇吓咩料先, 果然仲要去sport hall聽嘢, 都係講今晚open evening, 但其實係唔關我地事, 不如比我地放飯啦! 終於食完飯就要執房, 執到夠鐘就梗係閃人, 又要去聽細佬學校的parent evening, 悶就梗, 不過可以問埋老師聖誕要請假點做, 仲有google classroom password, 點知走嗰時又落大雨, 等咗一陣細啲都即閃, 濕都要啦, 返到去好似死咗咁, 仲要開定電腦老公返嚟幫兩個報埋term break踢波, 然後我要休息啦, 身心都好攰! 6點幾仲仲叫肚餓, 我就即刻煮麵囉, 反正有牛腩, 食完繼續hea到咁上吓沖咗涼先, 唔想洗碗!
15/9/23 FRI WARM
今日我竟然忍唔住喺學校喊咗出嚟，我都估唔到自己會咁，壓抑咗一星期，捱到星期五要爆！本來都冇咩架頂得住，但佢由第一堂開始已經唔合作，之後又因為班主任掉咗佢個prime水樽，因為係禁用，佢又開始顛啦，Geo老師都怕咗佢，基本上今個星期冇幾多個老師係讚呢班，全部都覺得難搞！到小息佢又去圖書館，又撩琴日嗰班女，我已經stop咗佢好幾次，佢唔聽之餘繼續變本加厲，我條臨界點到了，爆咗！行咗去一邊開始喊，過咗一陣圖書館管理員過咗嚟，我都仲抽泣緊，管理員帶我去office等我冷靜吓，咁啱子元個補習老師嚟到見到我咁就即刻安慰我，抒發咗已經好番啲，都要繼續開工！上上吓英文堂二姐嚟咗搵我，佢係想問我咩事，了解番我情緒得唔得，我講完再道歉，二姐叫我唔洗道歉，佢話知道係好難頂，佢自己都唔知喊過幾多次！餘下時間其實我可以轉人，但我唔想煩到人，做埋佢算！放學時真係好攰！返到去馬上出門口去broadway，一嚟老公佢哋食嘢，我又要買波鞋，買藥房3嘢等等，回家後hea到8點幾先開始煮飯食，所以又搞到好夜！
14/9/23 THU COOL
今日兩個都早啲起身, 咪唔洗趕頭趕命咁出門口囉, 返到去都係照常咁開工啦, 查實都唔係好想開架啦, 鬼叫你窮呀頂硬上, 可惜係今日時間夾唔到同letty佢地食飯囉! 12點幾放飯變相要上足哂咁多堂, 真係好攰! 又唔知啲老師咩要求, 不過最好笑係有個老師唔知落堂, 我都提咗佢佢又話未, 要下一堂老師趕佢先知, 低能! 捱到放學本來都冇咩, 喺reception幾個同事先講大姐又出埋哂啲惹人討厭的email, 一句講哂佢唔做好啲嘢又唔比好指引下屬, 其實叫人點做呢, 佢真係想迫人走咁解啫! 但我窮都係要頂! 接咗仲爺放學就要去教堂office搵嗰位人士傾, 重點都係想了解吓我, 再睇吓今年可以點樣安排, 又叫我地要去吓mass, 睇嚟都要開始搵日子去吓! 返屋企諗住休息吓又要準備揍細佬出去踢波, 點知老公話唔洗踢, 咁就好啦可以盡hea, 反正佢都煮好哂牛腩, 我淨係煮飯就得! 食住睇那年盛夏, 明天就大結局啦!
12/9/23 TUE COOL
天氣終於涼番少少, 但係啲課室都係熱, 到放學時開始落雨先好啲! 今日都係攰啦, 揍住嗰條妹都係煩, 突然好掛住啲易揍的, 起碼上堂時我都可以做吓自己嘢, 而家完全做唔到, 好緊囉啲神經! 今日最可惜係又改鬼咗我個放飯時間, 搞到我冇得同letty佢地食飯吹水囉! 仲有放學時個學生老母話佢個囡想同啲同學一齊放學喎, 唔想早啲出嚟, 我同佢講暫時今個星期都係咁先囉, 我心諗你唔好阻住我收工呀唔該! 接埋仲爺返屋企就可以休息同食吓嘢先, 可能真係太大壓力, 係咁想食嘢! 今日要去學校聽子元甚麼year 11 talk, 都係廢話, 一句講哂主力叫佢地要溫書囉! 回程時落住雨咁又天黑, 渣車真係好有難度! 返嚟仲要趕煮飯, 食完睇埋劇仲要洗碗沖涼等等, 今日太夜溫唔到書, 明天要溫兩個!
10/9/23 SUN HOT
今日都仲係好熱, 希望明天好番啲, 熱咗一星期咩都夠啦, 我琴晚都瞓得唔好囉, 熱醒咗好慘! 起身食完早餐就諗住去幫子元報補習, 點知收到Miss Message, 話因為佢地喺brentside覺得太嘈, 用唔到嚟補習要再改地點, 今日報唔到名住! 咁就直接去買咖啡, 行埋B&M又買咗嘢, 然後揍咗佢地返屋企, 叫子元執住屋吸咗塵先, 我地再去買餸, 返到嚟先整好啲餸, 跟住就做清潔, 最後重點係地板打埋立, 都真係幾大工程, 因為只係下層要打, 咁子元就stay喺床, 我地就上哂樓上, 我都冇浪費時間仲要咗衫添, 然後就去煮飯, 都係老公煮啫, 食完飯仲有正嘢食, 因為事頭整咗芋圓, 咁就梗係要襯番個仙草啦, 仲有大細珍珠添, 正! 明天又要開工啦, 要迎接新挑戰, 要跟新學生!
6/9/23 WED HOT
今日兩位少爺都返學啦, 唔洗整飯比仲爺, 絕對係慳咗好多時間! 準時返到去學校, 我都準時架, 本來諗住搵阿姐, 又話要講吓今年要escort+, 但另外個同事話我知阿姐開緊會, 咁我咪照樣開工先囉, 最仆街係之後, 轉堂時我帶個學生返嚟攞嘢, 佢又話個盒喺嗰邊唔行得過去, 大佬...喺條邊位咋, 白痴, 喺地下畫條界呀笨! 平時GNS我地都可以自由出入架啦! 我真係唔想理佢咁多, 佢個人實在令人想搵人打佢一身! 唔理咁多照常開工, 今日都係好熱好曬呀, lunch time最辛苦! 好在最尾嗰堂可以hea, 準時收工走人接細佬, 返到去開電腦做嘢呀, 本來想睇吓改唔到機票, 但價錢太貴搞唔掂, 等子元明天返去問點算啦!
