6/5/14

6/5/14   TUE   COOL

今日佛誕放假一天, 幾星期的悠長假期過埋今日正式告一段落, 咩都要回復正常啦! 今日節目都好簡單, 主要係去睇蜘蛛俠2, 本來諗住朝早睇架, 但琴日太遲先買飛, 結果只可買下午, 都有好處GE唔洗咁早起身! 朝早8點幾都要起身, 柏仲叫食奶, 食完咪叫老公起身囉, 出去食早餐, 試比柏仲食白麵包, 都食到喎好叻仔! 之後老公有公事要做就出咗去, 我一拖二回家, 要笨元溫一陣書先再玩, 柏仲就喺車仔瞓咗, 諗住好心比佢瞓落床舒服D, 點知郁佢就醒咗, 係要人同佢玩, 到12點左右係咁扭, 以為佢換食啦, 咪同佢沖涼開奶囉, 點知到食嗰時就扭瞓, 幾辛苦咁食咗4安就入番房瞓, 但我地又要揍佢入青衣放低佢睇戲, 所以瞓咗個幾鐘都要抱佢起行, 又醒咗陰公! 一路撘車都呆呆地, 去到放低佢我地又閃啦, 落到去青衣城買D嘢食就入場, 搞笑事發生, 播預告片時, 竟然叫我們戴3D眼鏡, 但我地明明買2D架嘛, 咁都算, 到真正做時都仲係3D, 於是有人出去買, 最終職員走入嚟話播錯咗, 轉頭會播番2D, 有D人話不如比副3D眼鏡咪得囉! 做足兩個幾鐘, 笨元都睇得有D不耐煩, 因為吹水嘢多過打, 隻電魔又好流咁, 所以我都覺得一般! 睇完又要馬上返上去揍番柏仲啦, 嫲嫲約咗人出去食飯嘛! 冇再出街啦直接返屋企叫外賣算, 笨元又可以玩玩具, 柏仲又可以休息吓, 隻豬仔係都唔肯瞓, 到食飯時就放佢喺學行車漫遊吓囉, 之八點幾九點老公打暈咗佢, 我又係勁眼瞓, 到K.O.笨元我都冇出現, 就咁goodnight佢就算, 喺梳化瞓到11點幾, 老公叫醒我起身餵柏仲啦, 柏仲咪瞓住食囉, 我地就餵完抖咗陣先瞓!

5/5/14

5/5/14   MON   COOL

今日老細晨早返咗嚟, 真係好慘, 雖然都有做到自己嘢, 但成堆人係到, 真係好唔自在! 忙到午飯啦, 落咗去買飯, 點知買完飯先見到有間新鋪做promote免費有便當攞, 可惡! 返上去喺老細的“煩”音吓食完飯, 真係想好好睇吓電視都唔得! 下午咪做嘢囉, 又話要整個感謝座比台灣比個客, 咪馬上找途徑去做囉, 都冇等老細再FIRM, 佢又左扭又扭, 出年都做唔完! TEA幾個人分番中午攞嗰個便當嚟食, 放工就閃人啦, 返去睇吓我兩位皇子, 捉笨元做埋功課先, 柏仲到我地食飯時就醒咗, 係都要人抱住, 放佢喺床又坐唔穩, 一跌又叫救命, 食完飯就抱吓佢囉, 之後又打陣機, 差不多時間就閃人, 返到去都要笨元溫吓默書, 唔可以再放鬆! 跟住可以玩囉, 柏仲又係唔肯瞓, 咪入房一齊玩到咁上吓, K.O.咗笨元就餵埋柏仲, 可以早D瞓覺啦!

4/5/14

4/5/14   SUN   WARM

今日都算閉關架啦, 起碼兩個細GE冇出過街, 係我地落樓買吓嘢啫! 朝早柏仲6點幾7點又嘈, 老公7點幾就起身, 但佢邊有咁好死, 去踢波咋! 我都醒咗囉, 咪起身囉, 又要餵藥滴鼻, 又要餵奶, 仲要預佢要嘔, 失策在應該預備埋個筒比佢嘔, 咁就抺都唔洗抺, 嘔咗好多痰出嚟, 好事! 抱佢一陣見佢又想瞓啦, 就放佢落床, 然後我就換好床單先煮早餐, 笨元就自娛唔洗理佢, 係間中要佢做吓功課! 食完早餐柏仲已瞓, 所以就打掃埋D地方, 抺好哂地柏仲都瞓緊, 就陪笨元玩咗陣, 老公返嚟啦, 柏仲瞓咗3個鐘左右都醒, 同佢沖好涼就食奶啦, 今餐食哂冇嘔, 嫲嫲過咗嚟, 咁就一齊叫外賣, 食完笨元就睇電視, 我地落去百佳買吓今晚的配料, 今晚食法國菜呀, 有洋蔥湯, 意大利火腿配沙律, 芝士焗火箭菜, 芝士焗虎蝦, 蒜香磨菇扇貝, 安格斯牛柳配鵝肝, 芒果啫厘! 買完返上嚟老公都開始準備, 我頂到5點多真係超眼瞓, 去咗笨元張床瞓咗陣, 到柏仲食奶都唔係好知, 係佢嘔啦我先醒醒地, 嘔係慘呀但只有咁嘔咗D痰先好! 7點幾大包先嚟到, 就開始上菜啦, 真係幾好食呀! 柏仲冇得食就周屋走, 笨元就掛住睇電視唔多食, 不過都食哂D牛扒同鵝肝, 幾識食呀! 之後佢地食啫厘, 我就洗碗囉! 終於搞掂嘢又到笨元沖涼, 柏仲比daddy玩住先, 等我沖好涼就沖奶, 10點食飽就瞓啦! 我都好攰, K.O.埋笨元睇咗陣電視, 11點幾都瞓囉!

<子元柏仲一齊玩!>

 <柏仲呆呆...子元唔理照玩!>

<是日晚餐!>

3/5/14

3/5/14   SAT   WARM

今日我地又走咗去街玩! 朝早柏仲好好瞓, 到我出門口都未起身, 咁我就揍笨元去畫班, 柏仲留比daddy搞! 之後我返工啦, 都係做番自己嘢囉, 執番好D相寫番日記咁啦! 老公12點幾就帶咗兩隻嘢上嚟, 笨元冇人理呀…不過佢有機打就得, 柏仲一嚟到就整PAT屎先, 好在帶齊嘢同佢換咗片先比人玩, 不過都吽吽地架啦, 1點閃人, 約咗程生佢地午飯, 因為print咗嘢要攞比佢嘛, 食完我地就先返屋企, 餵咗柏仲餐奶, 換一換行裝就去荃灣, 買明天煮母親節大餐D嘢啦! 推住車仔柏仲可以瞓吓, 先去咗睇玩具, 滿足咗笨元先, 跟住就落去超市買食物啦, 主力係海鮮, 因為牛扒已經喺荔枝角買咗啦! 欠少少嘢就過埋隔離一田買, 跟住就回家煮晚餐, 但笨元都唔係好願食咁衰到死! 柏仲食咗藥, 想瞓多過想食, 12點叫醒佢食多餐先瞓啦, 我地就掛住睇電視, 搞到3點先瞓, 因為我11點時又喺梳化瞓夠咗呢! 

<瞓咗喺Daddy強勁的臂彎中>

 

 <馬騮你同我玩呀?>

<好啦我同你玩吓啦!>

 <不過我地玩咩好呀?>

 <咦...咪咪你原來喺到架!>

 <邊睇電視邊玩腳!>

 <但玩完腳食手好似唔多乾淨喎!>

2/5/14

2/5/14   FRI   WARM

今日子元跳舞表演, 不過下午先係, 但11點半就要帶到去POLY, 所以我就要請埋上午假帶柏仲去睇醫生囉, BOOK咗10點半, 準時過到去架, 但勁多人排, 排到去starbucks嗰邊! 好在葉醫生唔太多人睇, 第3個就到, 都係話傷風囉, 開咗止咳化痰藥同滴鼻, 攞埋藥瞓咗, 撘小巴返到去就食咗藥先沖涼再食奶! 嫲嫲嚟埋, 搞掂就出門去食lunch, 然後會合埋阿媽就去POLY睇笨元表演, 不過笨元佢地做咗開場後, 就交咗比個牧師講道, 雖然好笑但都有悶位同太長, 家長們都係想主力睇表演, K3係開場同結尾, 柏仲都算合作架啦, 係到魔術表演時先開始扭, 諗住同佢去廁所換片開奶, 原來冇地方好換, 好難咁換到又冇位開奶, 最終見都散場, 就馬上返屋企, 搞到冇影到大合照! 回家後餵藥食奶就瞓咗, 所以老公先帶笨元去開飯, 然後等佢地揍兩個細嚟合唱團時就接埋我返長沙灣食飯, 食完仲去咗睇程生的新樓, 長實D樓真係好唔掂, 笨元仲玩得顛得滯嘔添!



<病B一隻!>

 <第一次坐high chair...冇嘢食...食手!>

 <兩個一齊撘車去表演!>

 <so sweet!>

 <chok王又嚟!>

<好誇好靚!>

 

1/5/14

1/5/14   THU   WARM

今日勞動節假期, 我們當然選擇躲在家中, 這些日子出街是搵自己笨! 朝早8點幾都要起身, 隻粒叫食, 餵咗猴棗睇吓有冇用啦, 跟住先再食奶, 由於要買嘢, 就出去食早餐啦, 食完去惠康買完返屋企, 不過期間喺街因為笨元發脾氣, 教訓完佢我仲火緊, 我又覺得事件起因都關老公成日激笨元事, 於是咪嘈囉, 雖則最後都冇事, 但佢好似講極都唔明自己個問題, 成日話我發脾氣就走咗去! 我同笨元去借埋書先返去, 又要同柏仲沖涼食奶, 笨元玩咗陣就要佢做功課! 我就勁攰囉, 所以柏仲瞓冧咗我都入咗房一齊瞓, 勁頭痛呀, 瞓咗都係痛, 好過瞓都唔瞓啦, 都冇咩好做! 柏仲醒咗就抱佢落大床玩陣, 佢瞓住我地D大枕頭時, 可以自己轉到身啦, 我當我係第一個見到佢傳身架啦! 之後玩到唔願玩啦, 就抱佢出去準備食奶囉, 食完就唔多瞓啦, 晚飯老公煮咖哩, 煮咗勁耐先有得食, 餓死我啦! 晚飯後沖涼, 到咁上吓打暈笨元, 柏仲就11點食埋奶就再瞓, 明天都要睇醫生架啦!