20/8/14

20/8/14   WED   RAIN

今朝柏仲又係嘈啦, 比咗好多次玩具佢都唔頂得幾耐, 最終開咗樣新嘢比佢玩, 頂到10分鐘, 夠7點半我就起身梳洗餵奶啦, 奶奶嚟睇住柏仲就執嘢出門口返工, 時間尚早老公話一齊食早餐咁咪食埋先囉! 返到去都係hea啦, 上網吹水睇嘢過日神! 午飯後都係睇電視打機, 下午大老闆娘返咗嚟一陣, 做吓樣做吓嘢, 食完tea又放工啦, 快快手返屋企因為怕落雨, 去買埋包書膠返去完成埋個工程! 老公一早返咗嚟, 所以嫲嫲都閃了, 我沖好涼就同笨元睇功課, 難得有時間, 因為佢仲有一頁中文同6頁數學未做, 先教佢做閱讀理解, 原來佢未係好明點做, 襯仲有時間教得幾多得幾多! 之後教數學先係死, 原來唔通就係唔通, 文字題就係有D咁GE麻煩, 好在我都冇教到好炆! 之後食晚餐, 有米粉同菜同鴨腎, 好在老公肯負責去煮, 食完我洗好嘢比笨元抖夠就教笨元再做埋D數, 一邊包埋D書, 到9點多佢話攰, 就放佢一碼! 都未有時間同柏仲玩佢就扭瞓, 於是食埋奶就暈咗, 就再同笨元講故事, 教吓佢唸天主經, K.O.埋佢就可以自由啦, 睇吓J2套新劇, 急診男女幾好睇喎! 之後睇埋big boy club就瞓!

19/8/14

19/8/14   TUE   RAIN

今日如常咁7點就比柏仲嘈醒啦, 7點幾先起身梳洗餵埋奶, 嫲嫲嚟到就出門口買早餐返工啦! 今日又係超hea, 主要都係上網吹水, 基本上都冇做過咩, 午飯後睇電視啦, 下午大老闆娘返咗嚟, 點都要找D嘢做吓, 好在我一向都留有一手貨攞出嚟做啫, 等佢走咗就繼續吹水, 吹到放工閃人, 去快圖美攞相啦, 竟然抽中獎, 有個Hello Kitty File同碟, 啱哂大包, 都係留比佢架啦! 極速行到去巴士站, 因為見山雨欲來咁, 果然去到巴士站已落大雨, 好在等咗一陣有車, 但由車站行返去時有瓦遮頭都要打傘, 漏哂水咁! 返到去捉埋笨元去沖涼, 同柏仲玩咗陣就食飯, 難得執好哂個枱底, 咪拉開少少張枱齊齊上枱食晚飯囉, 唔好分兩張咁煩! 食完嫲嫲搞掂埋D手尾就回家, 老公就同柏仲玩因為佢唔肯瞓, 我就教子元將曬咗同老師的合照寫少少嘢放入相簿等, 雖然我的設計一向都係麻麻架啦, 不過都係想送比老師咁解啫! 留番9月返去幫柏仲交表時比老師, 出吓力咁啦! 放番子元出去玩, 柏仲又比老公打暈咗啦, 整完我就包埋D書, 今次到唔夠包書膠, 真係激死, 包幾次先包得完呢! 不過都10點啦要還番個房比笨元瞓覺, K.O.咗佢又要叫番醒柏仲起身食奶, 佢果然係食完就瞓番, 梗係啦唔多瞓晏覺, 咪8點幾就頂唔順囉! 之後睇埋主君大結局同big boy club就瞓啦!

<一早要搞我部電話, 就自拍吓啦!>

 

18/8/14

18/8/14   MON   HOT

今日又要返工啦, 柏仲好準時7點就嘈, 子元醒咗睇電視, 聽到柏仲嘈就入嚟同佢玩吓, 咁我7點半都要起身架啦, 但真係超攰呀, 呢排都夜瞓柏仲又早醒, 超唔夠瞓! 買早餐返去食完就快手寫日記呀等等, 11點要開會呢, 開到12點又free啦! 午飯後打吓機咁, 而家愛上咗打迪士尼嗰個公仔Game呢! 下午都係做吓自己嘢又做吓公事啦, 執吓D File咁! 放工阿媽攞咗湯嚟, 我又去曬埋相先返去, 局住撘巴士快手D返去囉! 沖好涼不久又食飯啦, 飯後又可以free吓, 奶奶搞掂D嘢回家, 老公帶子元去練波, 我就同柏仲喺屋企, 玩一陣又執吓嘢, 佢就成日要痴住, 放佢喺地玩唔夠5分鐘又爬嚟找我! 最終我又執咗個机仔, 好滿足! 9點到佢兩父子返, 沖好涼想同柏仲玩吓都唔得, 因為柏仲係咁扭瞓捽眼, 不過係好可愛架! 快手一人K.O.一個囉, 餵完奶噯一陣放入房囉, 跟住同笨元goodnight埋就自由啦, 打吓機睇吓主君, 12點前要瞓啦, 唔係又唔夠瞓!

<起到個patpat一陣咁大把!>

17/8/14

17/8/14   SUN   HOT

今日係冇出過街的星期日, 都冇地方去! 朝早7點幾就比柏仲嘈醒, 唯有起身, 8點幾就出門口去食早餐, 早到我自己都唔信, 食完後本來諗住買窗花材料返去裝, 但一千零一間冇人負責切, 所以冇得買! 唯有整咗窗簾先囉, 噯咗柏仲瞓我地就去整, 期間又教吓笨元睇小一D書, 睇吓佢D普通話程度去到邊, 都有8成識可以啦! 終於完成咗個窗簾, 因為冇窗簾真係好曬! 柏仲醒咗就餵埋奶又餵咗3匙飯仔, 叫做食哂啦! 2點左右我就去買午飯, 一邊食一邊睇Running men, 之後柏仲一路都唔肯瞓, 到5點多先再瞓, 我就襯機執埋D膠箱, 全部嘢差不多歸位, 等笨元瞓醒仲執埋柏仲未啱著D衫入衣櫃, 佢到出年冬天都唔洗買衫呀! 今晚老公煮拉麵, 笨元就食意粉因為得2份拉麵! 全部都好好食呢! 晚餐後老公整埋支夜晚感應燈, 咁笨元落床時就會著燈, 仲係星星款呢! 柏仲就周屋爬, 找到嘢扶住就企起身, 真係要勤力D抺地先得! 到9點半柏仲突然扭瞓, 梗係開埋奶比佢啦, 我同老公一人負責一個, 10點前K.O.哂佢地, 可以打吓機咁啦, 12點幾先瞓!

<叻過哥哥肯玩秋千!>

 <叫你坐馬仔唔係企馬仔呀!>

16/8/14

16/8/14   SAT   HOT

又是如常的一個星期六啦, 柏仲今朝都幾早醒, 所以我餵埋佢食奶先出門口, 帶子元去畫班, 剛好趕到8點半班車, 去到買埋早餐等敏瑩, 搞掂佢地我就買早餐返工啦, 都係hea吓等12點幾, 老公揍柏仲嚟, 我都唔洗幫手, 佢都叫做肯跟人玩! 1點走人, 上到車柏仲已經瞓咗, 回家我可馬上煮午餐食, 仲可以hea吓先開始打掃, 2點多柏仲就醒, 但照樣做家務啦, 餵埋奶比少少飯仔佢食, 但都係食得好少! 之後咪玩囉, 真係邊有咁多嘢同你玩, 我都要做家務架! 3點幾老公佢地返咗, 有佢睇住柏仲可以幫笨元收哂D火車等等玩具入房的櫃筒, 大櫃筒嚟放玩具, 小的嚟放衫, 可見男仔係唔多需要衫! 執好後去咗超市買嘢, 老公今晚踢波嘛, 我地要食自己, 買咗意粉煮雞扒, 夠方便嘛! 返到屋企老公起咗身執緊嘢出去, 我就快手煮吓嘢先再餵柏仲食埋奶, 再煮埋下半場就可以晚飯啦, 柏仲係咁要扶住個梳化行, 咪比佢行多D囉, 到9點幾先K.O.咗笨元, 柏仲都眼瞓, 雖然對上嗰餐唔係食咗好耐, 但佢都照食瞓覺, 我就半睡半醒咁等老公回來, 12點幾先瞓呢!

<哥哥陪我學行!>

 <扶住已企得好穩!>