18/5/15

18/5/15   MON   RAIN

今日都係如常返工返學啦, 今朝嫲嫲出嚟, 所以揍咗子元後返上樓都比較hea, 吸吓塵咁咋! 嚟到同佢地落去大快活買埋早餐我就返工啦! 返去都係做吓嘢吹吓水咁啦, 老細過咗大海, 唔洗見到佢真係好! 午飯去咗買, 又試嗰間日本嘢, 係唔會太飽但都幾好食! 下午都係做吓自己嘢啦, 話咁快又放工啦! 返去接笨元, 冇咩功課做, 又冇帶書溫, hea爆啦! 返到屋企奶奶同大包就閃了, 我一揍二仲要煮飯, 都幾係嘢, 不過只要將要求降低就得! 等老公返到嚟就開飯啦, 之後再分工收拾啦, 仲要睇一睇笨元功課, 9點幾諗住K.O.柏仲啦, 點知條友反常喎, 又喊住爬出嚟唔肯瞓, 於是叫老公打比嫲嫲, 問佢柏仲幾點瞓過晏覺, 原來4點瞓到6點才醒, 唔怪得唔肯瞓, 出出入入咗四五次, 奶奶又再打嚟問柏仲係咪未瞓, 咁我已經比柏仲激到火起啦, 咪有少少語氣唔好, 話咁晏唔好比佢瞓等等, 老公聽到我講電話就出嚟睇吓咩事, 我就叫佢聽, 我繼續入去打暈柏仲, 跟住就聽到老公同奶奶嘈啦, 終於再出入咗幾次柏仲終於肯瞓, 咁我咪打番比奶奶講番其實我求先唔係想話佢, 只係柏仲一咁樣我就撞火囉! 其實都有少少原因係因為又出去飲茶嗰D搞亂哂柏仲D時間架啦, 佢呢D人都係喺屋企對住四面牆好D!

 

17/5/15

17/5/15   SUN   HOT RAIN

星期日都係如常架啦, 子元要學嘢真係其他咩地方都唔洗去! 柏仲又係一早起身啦, 但都唔理得咁多照瞓, 7點幾走咗出廳瞓老公又由得柏仲走出嚟, 我真係頂唔順發顛! 老公先出嚟揍番隻嘢入去, 等我梳洗完先放佢出嚟, 然後齊齊出門口, 揍子元去食麥記及畫班, 同程生佢地一齊食埋早餐就閃, 我返美孚買餸, 柏仲竟然咁早眼瞓, 回程喺小巴上扭咗一陣…暈埋, 咁返到去都仲可以繼續瞓, 我就快手整好D餸摺好衫等等, 本來想出埋普通話卷比子元回來做, 但柏仲瞓咗個幾鐘就醒咗啦, 我想抖吓都冇機會, 先餵咗香蕉佢食, 再到點幾就食飯仔, 而家叻仔啦一食飯就知要坐high chair, 食完一齊玩吓lego咁啦, 我就睇Running man, 佢咪搗亂囉! 突然落大雨, 老公同咗子元去踢比賽嘛, 踢咗兩場都要腰斬, 5點多返到嚟, 一齊去大快活食個tea, 回家佢地三個沖好涼, 就同子元溫書, 同溫咗一個鐘左右, 完成哂就放佢去玩, 仲有砌吓robie咁! 8點左右我出去攞米線外賣, 廢事柏仲阻住佢地砌嘢, 我就推車仔推埋柏仲一齊出去, 點知條友已經眼瞓, 回程時喺車仔瞓咗, 返到屋企放上床繼續瞓, 我地可以安心食嘢, 邊睇電視邊食, 跟住10點前捉笨元瞓覺我沖涼, hea到12點多先瞓!

16/5/15

16/5/15   SAT   HOT

星期六都係如常咁我返工, 老公睇住兩隻豬啦, 不過今日要去小童報名, 之後揍柏仲過來, 佢就同子元去踢波! 柏仲喺到玩飽, 回程上到巴士竟然一坐低就瞓咗, 所以佢攰根本唔洗哄, 自動關機! 返到去放佢落床都繼續瞓到, 我就快手煮D嘢食, 抺咗個地摺咗衫, 都瞓咗兩個鐘, 之後咪煮番熱之前嫲嫲整落的粉佢食囉, 子元打完乒乓球返來都5點幾, 沖個身玩陣又要出去, 約咗敏瑩佢地晚飯, 因為佢地要過嚟小童報名, 去咗食越南嘢, 不過柏仲臨尾飲水飲得多得滯, 一繼親就嘔, 一身一地一櫈都係, 人地鋪頭真係多得你唔少, 我又冇帶衫比佢喎, 好在可以喺附近平平地買一件! 剛好8點過去小童報名, 4個小朋友各有各玩啦, 主力係程太搞個報名啫, 子元同敏瑩就玩填色, 柏仲同婷婷就喺玩具屋到玩, 見兩個大的反正都填色填得七七八八, 就叫佢地默埋英文先, 順手溫埋書嘛之後唔洗再找時間做! 搞掂就去麥記食雪糕, 敏瑩要食可樂味思樂冰嘛, 咁啱麥記嗰個製作中, 於是程生走到過對面的七仔買返嚟比個囡飲, 我地講笑話呢D咪為女死為女亡囉, 又笑佢有冇咁為程太做過! 食完都9點幾10點, 返屋企沖涼瞓覺!

 

 

15/5/15

15/5/15   FRI   HOT

今日都係5點幾就比人嘈醒, 其實再係咁落去我真係會顛, 有咩辦法令柏仲瞓晏D呢! 起身梳洗揍仔啦, 今日嫲嫲出嚟, 本來我想返工前吸塵抺地, 但個吸塵機又未叉電, 最終都吸唔到, 咪找其他嘢做囉! 嫲嫲嚟到, 一齊去大快活食早餐, 我就買外賣返公司食算啦! 朝早都係做吓自己嘢啦, 午飯後本來以為老細唔返啦, 點知另一個老細同佢老婆返咗嚟用電腦睇嘢, 完全係令到人做自己嘢時要偷偷摸摸囉! 跟住老細又返咗嚟, 都係阻住哂架啦! 放工即閃去小童幫子元轉裝, 跟住返屋企執齊嘢, 柏仲見我返, 又走埋嚟摟你又要你抱咁, 可愛到呢! 我都執齊嘢齊齊去游水, 咁鬼熱乾等好辛苦! 去到接咗佢地就打的過去啦, 齊齊入閘去家庭室, 齊齊跟埋阿sir上泳池啦, 阿sir好搞笑地話, 你都可以一齊落埋水, 我梗係唔會去嗰個BB池啦, 一齊做咗熱身就各有各有啦, 不過半年冇游過, 仲未適應番, 一次來回連休息要5分鐘, 所以半個鐘都係游得6個來回, 仲要超攰, 上水時真係有D暈暈地, 過去睇一睇佢地游成點, 見到子元攞住塊板都算游得OK, 但敏瑩好搞笑, 唔多去水咁又沉沉吓! 佢地上咗水阿sir都叫我可以直接帶佢地去換衫, 原來家庭室係咁樣, 另外有幾個大的沖身室, 除我地外, 同另一個妹妹一齊去咗一個室, 因為人地媽媽一早霸住咗比個囡換, 咁我地都唔好意思咁入埋去算啦, 因為已經冇房! 搞掂出到嚟程太剛剛到, 一齊行過去森記食嘢, 食吓吹吓水咁, 時間過得好快, 食完就返屋企了, 快手叫子元沖涼瞓覺, 柏仲就飲奶瞓覺, 終於到我可以沖涼, 然後睇電視休息啦, 突然聽到子元咳, 馬上叫佢落床, 入到廁所已經嘔, 佢一咳起條氣就嘔, 好在而家大個D已經叫到佢入廁所先嘔, 諗起以前成日換床單真係攞命! 總算搞番掂佢入房瞓, 我地依然未瞓, 其實都攰攰地架啦, 但都1點左右先瞓呢!