年三十晚(今年係年廿九), 不用畫班可以瞓晏D, 但仲仲又點會放過我, 又係一早嘈我! 出去食早餐後就去尖沙咀行街, 比佢地去睇吓玩具, 然後買鞋, 三個都買到新鞋啦! 跟住就去大家樂食午飯, 再去咗city super買材料今晚返嫲嫲到團年飯! 因為太多嘢攞, 於是call ubar返青衣, 真係超方便又好坐! 返去打暈仲仲就落青衣城買埋D嘢行陣, 然後返去食團年飯, 今晚食西式, 生蠔刺身牛扒拉麵, 食到8點幾回家, 又係call ubra, 返到去沖完涼大把手尾執, 12點幾搞掂哂D嘢先瞓得, 好攰!
2016年2月6日 星期六
2016年2月5日 星期五
5/2/16
5/2/16 FRI COLD
今日又要請半日假, 不過係請下午! 朝早如常咁揍子元校車啦, 不過喺屋企時就好忙亂囉! 返上樓搞掂柏仲就出門口, 今日又係華服日, 仲仲同婷婷今日肯一齊影吓靚相啦! 我就買埋早餐返工啦, 朝早都有做吓公事做吓自己嘢, 今日姑姐接仲仲放學, 學校年宵又有好多嘢攞返嚟, 仲有隻豬頭帽, 個個都好得意! 下午放工前收到大包電話, 話轉咗去D2食飯, 我都奇怪架啦, 最終梗係等又等唔到位, 又要去番盈暉嗰邊食, 跟住就跟老爺車出番美孚, 因為我仲未買餸, 佢就車奶奶返去青衣, 嗰時已經2點幾, 真係怕買唔切呢! 因為子元3點放工我仲要趕返去等佢校車嘛, 先去百佳買咗雞呀嗰D, 跟住再去街市買菜買魚等等,
試吓整粟米魚肚羹, 仲仲買到魚GE時候已經瞓咗, 返到去都可以繼續瞓, 我就好忙咁整餸, 子元放學返嚟就任佢休息睇電視囉, 反正功課都係假期功課, 仲有時間做! 整到4點幾就摺衫, 柏仲瞓到5點先起身, 快手執好嘢出門口, 因為5:30又合唱團, 空檔時間去咗759入貨, 正價先有6折, 唔係正價的就唔會買, 哈哈! 買完返去坐陣佢地就放, 但因為敏瑩今日喺學校可能扭親腳, 所以游唔到水, 子慧又怕凍親因明天跳舞比賽,
所以得子元一個游, 我就揍埋子慧返屋企先, 但原來叫佢睇住仲仲係唔得,
唔怪得Gloria唔生! 煮起飯比柏仲頭圍食先, 由於兩位女士唔洗沖涼, 所以早咗開飯, 食完吹吓水洗埋碗拖埋地都係10點多, 到10點幾佢地都未走我都沖涼先啦, 因為要睇J2套劇呢! 最終睇埋小龍女先瞓!
2016年2月4日 星期四
4/2/16
4/2/16 THU COOL*
今日真係充滿未知數, 朝早落到樓後見到希媽就問佢今日幫唔幫到手揍仲仲, 但因為月希都病病地, 問埋loletta又唔得, 最終找到另一個5年級媽媽幫手, 咁叫做搞掂咗柏仲, 跟住就到子元啦, 因為我中午已經要入一轉青衣, 唔想3點幾再走出去一次, 所以又要找其他媽媽幫手揍笨元嚟公司, 好在都搵到! 叫做安排好今日啦, 都要諗諗明天! 咁揍咗仲仲返學就返工啦, 11點幾又過返去接佢, 由於趕時間都冇咩同老師交流, 柏仲喺學校淨係微笑, 扮哂嘢咁! 同佢撘到巴士轉埋小巴返到去都差不多12:45, 已經快手換衫執D嘢就落去進然媽到交收, 柏仲冇喊冇嘈仲識BYEBYE, 好似好明白個樣真係好可愛! 快手返公司食飯啦, 3點幾落樓下接收咗笨元就返上嚟做功課啦, 都算合作GE, 又有下午茶佢食喎! 放工準時返去, 去惠康買D餸就返上樓接番柏仲, 睇佢應該唔係好大破壞力, 好在啫! 返屋企後都係執好嘢先啦, 跟住就煮飯啦, 老公都好早返到嚟, 食完飯齊齊去百佳入貨, 好多嘢要買, 買到一車都係呢! 返上樓就同兩隻嘢沖涼,
K.O.咗柏仲就睇子元功課, 條友D數又錯又要同佢執, 搞掂哂我都十點幾沖涼呀, 衫都唔想摺睇吓電視, 睇埋J2套劇就瞓!
2016年2月3日 星期三
3/2/16
3/2/16 WED COLD
今日都係如常咁返工返學啦, 揍哂佢地返學我就買早餐返工啦, 朝早都係做吓自己嘢啦, 午飯後就睇電視啦, 下午真係做吓公事啦, 做吓嘢食吓tea又放工, 快手買餸返去接更, 有條友嚟咗整番個廁所水箱, 但態度勁衰, 搞掂阿媽就閃了, 我就執好屋開始煮飯囉, 老公買咗手撕雞返嚟咁就煮少樣餸, 8點多已食完洗埋碗拖埋地, 咁佢地就沖涼瞓覺, 柏仲瞓咗我就可以同子元對功課, 搞掂就可以沖涼了, 沖完例牌要摺衫啦, 老公話眼瞓但我又未想瞓住, 咪叫佢喺廳陪吓我, 差不多12點時阿媽打嚟話佢咳食咗中藥但痰封喉, 明天後天想請假, 咁我梗係話OK啦, 但就成晚係到諗可以點做, 可以找邊個接手揍仲仲囉, 結果都瞓得唔好!
2016年2月2日 星期二
2/2/16
2/2/16 TUE COLD
今日又係趕頭趕命咁揍子元返學啦, 跟住到揍柏仲啦, 老公今日請咗假, 所以可以一齊揍仲仲返學, 等入去時梗係影吓相啦, 因為今日華服日嘛, 不過程太喺到時, 婷婷係完全唔肯影囉, 到佢走咗佢就肯影! 佢地入咗學校我同老公就去快食個早餐, 我就返工佢就返屋企啦, 想找人整吓個廁所架但明明約咗4點佢都係冇嚟囉, 真係好唔掂! 老公仲好笑, 朝早去睇完醫生, 佢就去接咗柏仲買飯上去嫲嫲到食, 咁食完飯仲仲瞓咗佢就放低咗仲仲喺嫲嫲到, 因為子元放學都要返去接佢, 咁佢就由得仲仲喺嫲嫲到, 我一聽完都火架, 陣間仲仲醒咗嫲嫲睇住佢點方便呢, 所以我都係whatsapps咗奶奶叫佢有咩就叫人幫手唔好自己硬嚟! 我下午唔知點解都勁忙, 咁啱係到計吓每月開支嗰D, 愈計愈唔夠錢用咁, 真係令人好苦惱! 放工就馬上返青衣啦, 因為我叫咗老公買埋飯先過嚟, 點知7點佢都未返到, 打比佢又冇人聽, 本來我叫佢買燒味飯, 但佢就去咗買美心, 所以排咗好耐又等唔到巴士入嚟, 咁真係冇咩好講啦! 食完飯8點多就回家, 返去沖好涼K.O.咗仲仲就睇子元功課, 然後先有沖涼, 沖完涼仲未停得, 仲要摺衫入利是啦, 有咩就做咗咩先啦, 睇埋J2套劇12點就瞓啦!
2016年2月1日 星期一
1/2/16
1/2/16 MON COLD
今日都係如常咁返工返學啦, 朝早叫老公起身煮午餐盒比笨元, 柏仲又起咗身, 忙忙亂亂咁梳洗出門口啦, 揍咗柏仲入青衣就去青衣城入數順手食個早餐, 點知勁多人喎, 都係排唔到攞現金, 最終都係要返去公司附近的再排過, 入好哂就返公司啦, 都唔算忙或者係我想hea啦! 午餐後都係睇電視啦, 落雨濕濕都係唔出去啦! 下午都係HEA吓啦, 放工就去買餸, 返到去阿媽就收工啦, 今晚老公約咗舊同事食飯, 咁我地就自己煮飯食囉, 兩個都算OK啦, 順利煮完餐飯就食啦, 洗完碗抺埋地就同佢兩個沖涼啦, 8點幾仲仲瞓咗就同子元睇功課, 條友掛住睇電視都唔係好合作架啦, 老公9點多返到嚟, 子元可以見吓個daddy囉! 笨元都瞓埋我地就可以沖涼同計吓數啦, 就係差嗰少少! 辦法總比困難多GE! 沖完涼睇吓電視, 睇睇吓又睇到1點先瞓啦!
訂閱：
文章 (Atom)