12/6/16

12/6/16   SUN   HOT

今朝瞓醒發現老公帶咗子元去踢比賽, 明明落雨架喎都有得踢, 初頭都有D唔高興, 但都冇法, 唯有同仲仲二人世界啦, 整咗隻艐食又分D比仲仲啦, 邊睇電視邊摺埋兩機衫, 仲仲都係自己喺到玩咋嘛, 係之後捉我同佢玩但我又想瞓吓喎, 好在不一會老公佢地都返到, 咁就執好嘢出去食午飯啦, 都係去大快活食咋, 食完要去超市買嘢, 本來諗住想百佳買就算, 因為落緊雨, 但最終都係要去番惠康, 想買D嘢先有平! 買完返上去再執好嘢先出得門口, 約咗喺長沙灣等, 都係遲咗少少呢, 不過都趕得切去YMCA, 3點開始攀石嘛, 先係學D簡單嘢, 然後先開始攀, 子元初頭都係攀到第一層石就又話攰又話冇力又上唔到, 好在阿sir係有D計, 首先唔比我放佢落地, 吊住佢喺半空, 同佢講掂數, 問佢放棄定繼續, 咁繼續你目標爬到第幾格呢, 傾掂先比我放佢落地, 結果之後咪爬得到囉, 根本就係心理問題! 攀到就開始得意洋洋囉, 試咗兩次成功就直情唔再攀啦! 咁我地大人都有玩啦, 爬到上頂喎, 不過就有D手軟, 因為真係要用力架嘛! 玩完就要諗晚飯啦, 最終決定去番程家打邊爐就算, 分頭行事買餸睇仔攞車等等, 8點前已經開餐, 婷婷未瞓醒前都OK, 因為仲仲自己玩玩具咋嘛, 之後就煩D囉, 因為婷婷又要管住仲仲玩咩, 咁有時仲仲轉玩第二樣啦, 婷婷又要去玩, 幾次之後陸生都頂唔住提出, 話咁樣真係好難搞! 還有就係子慧啦, 婷婷可能真係撞到佢, 但個反應唔洗大到咁囉, 瘀咗少少唔洗喊到咁嘛! 仲有就係我完全唔覺子元琴日有咩問題, 明明唔係佢錯但又比人話咗先, 好似佢攞咗張圓櫈嚟當枱畫嘢, 點知子慧又痴埋去畫, 咁子元就同我講子慧攞咗佢個位畫嘢, 但Gloria第一時間係話:子元你讓吓佢地得唔得啫, 唔洗我出聲老公已話: 唔係喎, 係子元用緊子慧走埋去用咗佢張枱咋喎, 咁Gloria先話唔好意思! 我覺得子元真係控制好咗, 佢地玩女仔嘢佢唔啱, 咁佢咪出廳囉, 我覺得冇問題, 佢又唔係發脾氣! 我都唔知係咪我睇得太鬆, 其實仲仲食食吓嘢會走出嚟, 咁我會拖番佢埋去叫佢坐好, 係一吓佢唔坐仲跳起撞正我塊面我先打佢, 捉佢去門口企, 等佢喊完咪過嚟認番錯就過去食嘢囉, 可能我D真係仔, 我唔會因為你唔啱鬧完你你喊我又去哄番你, 而家連奶奶都明, 喊係解決唔到問題呢句說話, 但可能對住女仔係唔work啦! 所以我個feel都麻麻地, 見住佢地喊呀霸呀就OK咁! 10點多就閃了, 返去快手K.O.佢地, 沖好涼我都仲好忙好多嘢要洗, 11點幾先坐下睇doctor X!

11/6/16

11/6/16   SAT   HOT

今日要返工啦, 都勁唔願起身架啦, 難得仲仲差不多8點先起身! 我照返工啦, 老公就揍咗仲仲入青衣先, 佢就入去做大爺, 等我放工老公同子元就嚟接我, 先同程家佢地一齊午飯, 然後送兩隻細去畫室補定堂先! 咁我地就喺呢頭買吓嘢, 然後送咗程太返屋企, 就再轉程生架車, 因為約咗去旺角睇戲, 要說服老公唔適合渣車, 陣間冇位泊咁點呢! 接咗佢地畫班就去MTR會合Gloria, 約咗睇X-MAN, 今集我覺得易明好多呢! 睇完都6點幾7點, 我地返去攞車再去程家會合, 男的睇住細路, 女的去買壽司, 又開出冊party, 食吓吹吓水咁10點幾先走, 快手K.O.咗佢兩個, 我地都要休息了!

 

10/6/16

10/6/16   FRI   HOT

今朝仲仲冇一齊醒, 可以慢慢送子元上校車, 考埋今日放監啦! 揍咗仲仲返學我就返工啦, 朝早都係做吓公事做吓自己嘢啦, 午飯後睇電視睇得好地地老細就返, 阻鬼住哂! 下午幫大老闆娘搞佢娶孫新抱個function啦, 我發覺我都鍾意做搞function呢D嘢架喎, 差不多5點時阿媽打嚟話, 原來佢揍咗仲仲入沙田, 本來只係同阿婆去老人中心做物理治療, 點知話阿婆有D燒, 唔比佢做要去睇醫生, 咁就怕趕唔切揍番仲仲出嚟啦, 我咪諗住入沙田接番仲仲先囉, 早走少少啫! 剛諗住入閘時佢又打嚟話就有得睇醫生, 又叫我唔好入去, 咁就算啦, 我返美孚幫子元攞番個書包返屋企先! 今晚睇子元佢地小童的合唱團表演, 所以我地喺美孚快食米線就算, 7點幾接番仲仲一齊食米線啦, 跟住就上小童睇表演啦, 子元佢地嗰組唱咗兩首歌, 之後就係自行報名表演, 子慧跳舞, 仲仲見到人人都表演佢又要表, 問咗可以臨尾比佢上台, 佢暫時得一道板斧啫, 就係唸靜夜思, 雖然細聲D但都叫做上台唸咗喎, 好叻仔架啦! 不過之前就BB囉, 唔知子元定婷婷整到佢之前跌損嗰到, 我見佢好唔開心咁, 一問佢咩事就爆喊, 真係唔知好嬲定好笑! 表演完去麥記開多轉餐就回家, 返到去10:30, 快手K.O佢兩個, 11點還趕得切睇J2套劇呢, 老公睇完子元表演已經去咗踢波啦! 差不多12點才返, 不過佢今晚又要睇歐國盃, 所以我都係瞓先!

9/6/16

9/6/16   THU   HOT

今日放假呢, 仲仲差不多8點才出聲, 都算係咁, 但我地hea住唔起身, 其實又瞓唔番都係冇咩意思! 9點幾先起身, 佢兩兄弟已經喺出面嘈咗好耐, 都係仲仲唔肯執玩具囉, 個豬又係衰, 成日蝦阿哥會幫佢執, 咁子元又遺傳到我的收拾力, 執玩具好快, 呢樣佢又真係乖! 搞掂就出去麥記食早餐, 換咗蛋黃哥套碗, 又真係幾靚GE! 食完早餐返屋企溫埋數學啦, 但子元做數真係好唔小心, 同埋教極佢都唔明, 真係激死我! 溫到2點幾去找嫲嫲出街, 去咗尖沙咀行toyrus, 仲仲唔知邊到攞咗架BB車推住隻angry bird周圍走, 好好笑囉! 跟住去city super買晚餐, 生蠔刺身咁, 買完返去都6點幾, 要子元做多份綜合練習佢又係到討價還價, 好乞人憎! 7點幾大包嚟埋啦, 咁開餐啦, 先食生嘢, city super的刺身真係特別好食! 食完生嘢老公先煮牛扒, 但期間又要係到搞康傑聚會的booking, 咁咪兩頭唔到岸囉, 叫我幫佢book住先, 但根本佢係開錯網頁, 點book啫! 加上我頭痛就見咩都火, 所以仲仲喺到搞家時, 我就捉佢去沖涼囉, 大家一齊冷靜吓, 沖完涼出嚟已經有牛扒食, 但我都已經飽飽地, 所以執住枱咁等老公餵啦! 大包呢, 咪大爺咁攤喺梳化囉, 子元喺地下玩緊, 咁又想放上梳化玩, 仲要比大包鬧, 話佢明明喺地下玩, 佢坐時就要喺梳化玩, 所以我就叫子元入房玩囉, 大包都仲唔知喺佢唔啱, 叫都唔識做, 做又做唔到, 老實講真係好廢, 冇諗過要進步架喎! 唉…冇得救, 奶奶想執枱我就叫佢唔洗啦等我執! 奶奶亦叫老公唔洗車番佢地入去, 叫佢留下幫手, 只可以話大包有個太好GE阿媽, 太會體諒, 令佢地覺得所有嘢都係必然! 終於K.O.咗仲仲, 我都要沖涼啦, 所以叫子元刷埋牙瞓先, 明天考數要清醒頭腦呢! 我今日都好攰, 11點套劇竟然全瞓冇睇到, 唯有明天睇啦!

 

 

 

 

 

8/6/16

8/6/16   WED   HOT

今日要返番全日, 竟然有D唔想, 原來放半日假都已經唔錯! 朝早都係揍仔返學啦, 返到公司都係做吓自己嘢! 上午冇咩特別, 食完午飯咪睇吓電視咁囉, 下午就要開會啦, 最搞笑係D SALES同經理慶生日喎, 買咗兩個蛋糕咁, 又叫埋我地過去, 真係唔多真心同佢慶咁架, 做人就係唯有咁假! 開完會4點幾啦, 跟住就要prepare吓呂太娶孫新抱D嘢, 放工就閃了, 老公打嚟話唔洗買餸, 嫲嫲話出去食, 咁接咗子元返屋企咪等老公來接囉! 近近地去咗AEON食咋, 加上周三特價日, 咪再shopping囉! 送埋嫲嫲返屋企, 返到去都已經10點幾, 快手K.O.佢地, 我11點要睇劇呢! 睇完都瞓啦!

7/6/16

7/6/16   TUE   HOT RAIN

今日又係請半日假, 要溫常識最難呢科! 朝早都係咁返工返學啦, 仲仲送哥哥校車, 走埋上去坐定定, 真係忍唔住影佢個衰樣! 買咗少少早餐返去食啦, 都係做吓自己嘢, 個心都飛咗去諗放工點同子元溫書! 返到阿媽到食完飯就返屋企啦, 休息一陣開始溫, 都溫足個幾鐘呀, 條友D字又唔識寫, 都唔知佢點考! 跟住又冇common sense喎, 已經放棄咗時事題架啦, 但都覺得佢好不足! 4:15比佢睇一套卡通, 跟住就做卷, 對卷時就知佢冇common sense程度去到邊囉, 希望佢知道唔識咩明天正式時識番啦! 之後都係煮飯食飯啦, 仲仲又玩嘢, 食飯時食少少又話落地, 咪捉佢埋牆鬧囉, 最終都係要人餵, 真係好衰! 洗碗抺地做好嘢, 陸生又開姑故態復萌, 又開始激我啦, 叫佢做佢就叫個仔做, 衰格! 沖好涼9:30前捉哂佢地去瞓啦, 今日好眼瞓呀, 但又想睇電視, 搞到喺梳化瞓咗好耐, 搞到入房之後瞓唔著呢!