4/10/16

4/10/16   TUE   HOT

今朝見到程太佢都冇咩, 咁慢慢傾掂其實應該都冇事! 揍咗佢地就返工啦, 朝早都係做吓公事同自己嘢, 繼續番個心情去編行程啦! 午飯後都係睇吓電視打吓機, 下午繼續寫行程, 慢慢有個方向, 希望唔會比人反對啦! 放工接咗子元就去青衣城, 因為仲仲對學校鞋爛咗, 點都要去買, 就去青衣城食飯囉, 快手食完元氣就買鞋, 買完就返屋企, 因為老公趕住去踢波, 但我又要買嘢比子元明天整佢個hot dog bun喎, 所以分頭行事囉! 等佢兩個沖好涼, 仲仲做好功課就趕佢去瞓, 子元仲要睇功課, 做作文! 搞到10點多我先去沖涼, 好在趕得切睇laughing啫! 老公10點幾都返到嚟, 一齊睇埋芉月就瞓!

3/10/16

3/10/16   MON   HOT

今日仲仲竟然要人叫先起身返學, 放假又唔見佢瞓到7點都唔起身, 可惡! 揍咗仲仲返學, 老公話佢有D感冒要請假, 於是車我返公司先囉, 買個早餐就返去慢慢食啦, 之後都係寫番日記開吓會咁GE! 午飯去咗買飯攞埋唔記得攞的大相, 下午就開始咗一輪的whatsapps戰了, 其實你話好大戰又唔係GE, 只係為咗旅行食GE問題, 展開咗好漫長的對話! 講嚟講去兩件事, 第一就酒店房, 佢好堅持為咗慳$75同儲asiamile, 所以要重新訂過, 但hotels.com得番1間房, 要一邊訂一邊放房先可以重新訂過哂3間, 但最終我同Gloria都否決咗我地兩間房重訂的議案, 我地又唔洗儲asiamile, 又覺得$75可以豪比佢, 唔想咁複雜! 咁都算解決咗啦, 係我要等佢地rebooked咗之後我又去cancel番啫! 第二樣就係食GE問題, 亦係最大的問題, 因為佢又要就個囡又要顧個媽, 咁講真我真係一路都提意係食海鮮, 只係怕溫泉完會夜, 海鮮會收檔, 冇嘢食時要有backup, 但佢就講到我非吃不可個北非菜咁! 因為我睇過其實都有唔油膩GE食物, 不過佢咁堅持, 咁我連backup list都放棄呢間囉! 另外就係夜市問題啦, 話婆婆不能行太耐, 要食咗七八成飽再行嗰隻, 其實就係因為我一句: 其實行夜市當晚餐我OK! 佢嗰種講法, 係會令人聽到好礙耳, 講到瑩婆婆會死頂呀, 會忍住腳痛然後返去食藥, 死頂咗返去有咩事就唔好! 咁其實我地有兩架車, 到時真係唔想行, 係可以喺車坐, 坐都唔想咪直情返酒店先囉, 好多嘢係可以好靈活, 但唔好講到我害你阿媽咁! 佢都搞到我成晚都好困擾囉, 晚飯我地出咗去食嘛, 又不停喺到whatsapps, 晚上返到去又係咁, 我同Gloria喺呢到講咗好耐電話, 其實就…唔係唔可以, 但不是以你們全家為中心, 好似上次講去巧克力農場個問題, 又係因為怕阿婆悶, 整完朱古力就算, 我想整香芬呢part要講幾次先話OK, 仲要係我解釋其實嗰到都有好多嘢睇, 唔會悶! 佢個重點都係又要就囡又要顧阿媽, 咁照顧老人家需要係應該, 但主要係生理上的需要, 而唔係悶唔悶GE問題, 我好憎佢呢個point, 你估我陪D細路睇玩具時唔悶GE咩, 但你帶得佢出去睇, 你就遇咗個時間係要悶, 咁你就得個囡玩樂園, 就就唔到個阿媽會悶架喎! 仲要我地選的樂園, 連住商場, 可以有好多嘢睇呀食呀行呀坐呀咁, 仲想點! 真係講起都火!

2/10/16

2/10/16   SUN   HOT

今日唔洗畫班, 梗係唔想咁早起身啦, 但仲仲又一早起身, 好在子元起咗身都可以睇住佢, 但我都係瞓得唔好, 好頭暈! 出去食完早餐叫做好D! 食完返去溫書呀, 之前又要同兩個對功課, 忙忙亂亂咁! 老公捉咗仲爺入房瞓時, 我亦都同子元溫書啦, 唔覺唔覺都溫咗2個鐘! 我之後都頂唔住要瞓, 瞓到4點幾差不多5點先起身, 但陸生踢波踢6點喎, 所以都要快手起身入屯門, 但大家都冇食過午飯喎, 入到去諗住附近買到嘢食啦, 點知方圓百里都冇咩可以買, 最終我只係可以買到麵包, 咁都頂住先啦! 要揍住佢兩個等陸生踢完波其實都吃力架, 因為要佢地坐定又難, 但你又好難比佢地周圍衝! 點都叫做捱過啦, 可以去食晚飯, 都係為咗食呢間牛雜河咋, 可能肚餓, 特別好食! 返到屋企9點幾, 快手趕佢地沖涼瞓覺, 陪老公睇埋波但都睇唔哂, 點幾我都要瞓啦!

 

 

 

 

 

 

 

 

1/10/16

1/10/16   SAT   HOT

今日又唔洗學嘢又唔洗返工, 理應瞓晏D, 但陸柏仲完全冇理我感受, 一早喺到又唱歌又爬上爬落, 我被嘈醒咗好多次, 雖然之後老公去頂, 我走咗去子元房瞓, 但都瞓得唔好, 激死! 起身後梳洗出去食早餐啦, 跟住直接出街, 不過大包同嫲嫲出咗門口先發現冇KEY, 好在我地只係剛食完早餐, 咪返去攞key入青衣比佢地囉, 然後就去咗愉景新城! 都係睇吓嘢食吓嘢咁, 去玩吓夾公仔呀! 老公就買波鞋, 等緊佢時仲仲攞住佢擲銀仔贏到的筆嘛, 有個妹妹過嚟想攞又攞唔到, 轉個頭竟然行轉頭打仲仲, 好在我個仲唔係豆腐, 我地亦冇咩所謂, 反而叫佢安慰番個妺妹囉! 跟住就去咗行公園, 今次去牛池灣公園, 不過去到停車場兩個都瞓哂, 咪hea到佢地醒先出去囉, 行吓玩吓咁都天黑啦, 玩完就諗食飯, 都係返番長沙灣食穩陣D, 去咗食西餐, 都真係唔錯! 食完買埋糖水返屋企先食, 返去仲要沖涼摺衫咁, 11點幾先食得呢!

30/9/16

30/9/16   FRI   HOT

今日都係如常咁返學啦, 仲仲都係一早起身啦, 今日返去係開生日會呀, 所以著華服, 佢個華服樣係好功夫小子, 好搞笑! 揍咗佢地我就返工啦, 返到去都係做吓公事做吓私事啦! 午飯後就打機睇電視囉! 下午冇咩整, 都係hea! 放工即閃, 又要買餸攞返屋企, 執埋游水嘢再去小童接佢地, 行過去泳池送咗佢地入去, 又返上樓煮飯啦, 今日多咗一位小朋友上嚟, 佢都係0804的BB, 不過Gloria就唔嚟, 都好GE…咁多細路咁嘈佢實唔掂! 8點幾佢地先上到嚟, 快手同子元沖咗涼我就繼續開飯, 今日細路嗰枱都已經好full, 食完都係細有細入房玩, 大有大吹水啦, 10點幾都未走, Gloria可以上埋嚟接囡呢! 結果我沖得涼嚟係睇唔到laughing啦, 只可以睇到芉月呢!