19/2/17

19/2/17   SUN   WARM

今朝要補番畫班, 所以8點多又要起身出門口, 揍咗子元我地就可以去食早餐, 再hea吓買吓嘢咁啦, 夠鐘就去接番笨元就回家溫習, 琴日完全冇做過嘢! 都算快地溫好默書同今個星期教嗰D, 咁2點幾就出門口, 去仲爺同學生日會, 其實唔知係咪有比較, 覺得有D悶同埋好似各有各喺個會所玩咁, 我同D家長又未係好熟, 所以都係食吓嘢睇住佢地玩吓咁囉! 玩到3點幾走啦, 冇咩地方好去就返咗屋企, 勁hea地休息, 老公就同仲仲入房瞓, 到7點幾點都要叫醒佢地出去食飯, 近近地去咗食米線咋, 食完回來執吓嘢咁又要佢地去瞓了, 明天要返學嘛!

 

 

 

 

18/2/17

18/2/17   SAT   WARM

今日又要返工啦, 老公就一早揍咗子元去踢比賽, 本來我都可以瞓晏D, 不過未夠7點聽到有人嗌救命, 原來樓上有人困住咗開唔到門, 真係比佢玩死, 就咁嘈醒咗! 返到公司都係做吓公事做吓自己嘢啦! 放工即閃了, 仲爺喺車瞓咗, 但子元都要返去換番運動衫攞球拍, 所以都要返屋企先, 點知我地攞完嘢落嚟仲爺已經醒咗, 咁就去咗AEON食八方雲集, 然後子元就去打乒乓球, 我地就喺AEON行吓囉, 臨接子元前帶咗仲爺上禮堂, 因為今日荔天新春團拜, 咪上去八吓囉, 不過都係hea咗陣就走! 跟住就返屋企沖個涼換個衫先出街, 入咗沙田睇吓IKEA, 又去食吓嗰間西餐, 其實都冇咩睇得啱, 大致都已經有咗個諗法! 9點多返到去都係沖涼瞓覺啦!

 

17/2/17

17/2/17   FRI   WARM

今日仲仲竟然鬧鐘響都未醒, 可能琴晚溫書真係太攰! 到我返上樓知佢起咗身, 佢仲問我哥哥去咗邊! 揍咗佢返學就返工啦, 今日都有嘢做吓, 又要開吓會咁, 時間好快過! 午飯後又係打吓機啦, 下午時間唔知點解過得慢好多, 已經又吹水又做吓私事架啦, 都過得咁慢! 終於放得工啦, 老公今晚約咗人食飯, 子元又游水, 咁都唔洗煮飯, 諗住煲啖粥算! 返去先摺好D衫才出小童接笨元去泳池, 請迪媽放游水時幫我揍一揍子元過咗馬路自己回家, 咁我就唔洗專登落樓接佢! 同仲爺返上去先煮粥啦, 跟住佢話要聽Mels, 都要開比佢聽, 希望睇多三五七次佢會識啦! 到子元回來就叫佢兩個沖涼, 然後咪食粥囉, 邊睇電視邊食實慢, 最終9點幾先K.O.到仲爺, 再叫笨元快D做功課, 明天又要足球比賽喎, 邊有時間做! 但佢做嗰D數又好深喎, 我答唔掂呀叫佢自己whatsapps問健sir! 老公10點多回來, 沖好涼有糖水食, 食完…勁眼瞓啦, 都冇等老公就瞓覺了!

16/2/17

16/2/17   THU   WARM*

今日都係如常咁返工返學啦, 仲爺又早過個鬧鐘嘈醒我, 又要一齊落去咁啦, 揍哂返學就返工啦, 返到嚟都係吹水多, 午飯同同事出去食, 諗住早少少去睇吓嗰間salty pigger有冇位, 但walkin都話冇, 唔休做咁! 咁咪行返去第二間再找囉, 點知調頭時見到artists喎, 係愛回家的馬壯同吳家樂, 佢地應該係拍馬家開飯啦, 早知走埋去集郵啦, 但人地行緊返去保姆車, 唔係咁好意思GE! 最終去咗D2食一間類似便當的, 都幾好味呀! 下午都係做吓公事啦, 真係就嚟商會就職啦, 唔做唔得! 放工去學校接笨元, 佢知道又要行返去買餸都唔多like架, 但冇架喎要食就要去買餸架啦! 點知行到去美孚嗰頭買緊菜時, 有人拍我, 原來係同學仔媽媽, 佢話馬壯喺嗰邊拍緊嘢, 佢叫咗個囡落嚟睇, 點知我地一齊行到過去已經散水, 咁咪一齊行返去街市買餸囉! 返到屋企啱啱想開始煮飯老公就打嚟, 話嫲嫲想出去食, 咁就馬上收手唔煮, 好在咩都未做啫! 去咗荃灣食高速列車壽司, 佢地玩得食得好開心GE, 好快食完就回家啦, 返去仲要沖涼溫書睇功課, 又再教仲爺英文同數, 完全投降, 下半場比咗陸生, 我要睇子元功課, 都冇咩時間溫書又要佢瞓, 已經十點幾啦! 我終於可以沖涼, 跟住仲要摺衫等等, 11點幾先可以休息!

15/2/17

15/2/17   WED   COOL

今日過去商會開會, 完全唔洗返公司啦, 朝早趕到唔記得比藥子元食, 快手返上樓叫醒老公梳洗換衫出去學校攞比佢食, 但去到剛剛8點, 已經排緊隊, 又唔知佢排邊喎, 見到校長比較得閒, 所以都要問佢, 餵咗子元食藥就揍仲爺返學, 大把時間食埋個早餐先上去! 揍咗佢我就撘地鐵過商會啦, 9點幾已到, 係咁寫呀寫做呀做, 忙過喺公司呀! 10點幾D老細開始嚟, 梗係要拜吓年逗利是啦! 11點幾開會, 因為有個議程解釋咗好耐, 12點幾才散得, 仲要行落去酒樓, 齊人開飯都1點多, 好在食到2點幾啫, 不過等埋單等等仲要上返去攞袋, 走得都3點幾, 返到美孚買埋餸, 回家煮肉骨茶, 整到5點到先出門口去接笨元, 好在佢地都遲放, 去到啱啱好! 直接返屋企等佢做功課, 我就做家務, 老公返到嚟話佢老細約咗佢地出去, 咁佢食完飯就閃, 都冇法啦, 咁食完好好味的肉骨茶就閃, 我就比佢兩個睇陣電視, 等我吸塵抺地, 之後叫子元同仲仲沖涼啦, 我就要睇功課! 等仲爺沖好涼同佢對功課時發現佢做錯咗數學咪再教囉, 點知又去番認唔到數字咁, 愈教愈火又燒起咗我條痴根, 結果我真係打佢, 教極都唔明絕對係會令人扯火, 唔係一開始就扯架, 但當你用咩方法佢都係唔明咁, 顛係正常架喎! 打完做完我再由頭教過數數=數字的概念, 又摟番囉, 咁大家都冇咩事, 刷牙瞓覺! 到子元未做視藝, 又喺到趕, 我沖完涼佢都未油到20%, 最終都係要幫佢手, 做到11點先搞掂, 老公12點多就返到嚟, 比平時踢波仲早呢!