26/5/17

26/5/17   FRI   WARM


今日下午要去商會開會架, 咁咪可以順手去瑪嘉烈聽埋個talk囉, 不過先要揍咗仲爺反學先, 上得去都9點半有多, 其實個talk我覺得冇咩聽, 咁11:15就走啦, 因為要趕過去商會, 不過都係去食咗飯先, 然後先返上去做嘢, 開埋會都係3點幾, 返到嚟又變番做家務囉, 主力係幫仲爺換床單囉, 因為今朝又半夜賴尿囉! 跟住都係hea吓, 真係咩都唔想做, 夠鐘就去小童接笨元游水, 再去交收埋架BB車就去晚飯啦, 接埋笨元放游水就回家, 買咗飯盒比佢食, 老公就去咗踢波, 我就一個打兩個啦, 等笨元食咗飯抖吓就沖涼啦, K.O.埋仲爺, 子元又話要睇電視, 比佢睇到10點要瞓, 我都沖涼啦, 跟住都係睇電視啦, 老公11點幾返到嚟, 等佢沖埋涼就瞓覺啦!

25/5/17

25/5/17   THU   WARM


今日都係如常咁返工返學啦, 揍咗仲仲返學就返工啦, 返到去都唔算特別有嘢做, 所以都係做吓自己嘢啦, 午飯帶咗通粉叮嚟食咋, 慳得一餐得一餐嘛, 跟住都係睇吓電視咁啦, 下午都做咗陣嘢架, 但都係做番自己嘢好, 放工接咗小笨就回家, 嫲嫲出咗嚟煮晚飯, 因為想整焗雞, 仲有琴日買咗牛扒, 所以今晚食西餐, 不過我又要同笨元對功課咁, 都係用時間, 晚飯後落咗去遊樂場同Letty佢地玩, 9點就上返嚟, 都係沖涼瞓覺啦!

24/5/17

24/5/17   WED  RAIN

今朝6點幾開始落狗屎咁, 天文台之前咩都冇講過, 一嚟就黃雨, 咁睇吓個天氣圖好誇喎, 老公又要去攞車, 咁不如車埋子元返學啦, 佢本來都唔想架, 係要我惡惡咁講個原因先明, 咁啱落樓時撞到33樓個同學, 佢地本來諗住撘地鐵, 咁反正順路又有位咪車埋佢地囉, 7:45就返到去啦, 周圍都好似澤國咁, 又浸又塞, 15分鐘返到去都算係咁! 跟住就送仲仲返青衣啦, 好在我地行咗三號咋, 葵涌道浸哂! 去太興食埋早餐先返學, 天橋都濕哂, 樓梯變咗瀑布! 揍咗佢入學校, 仲要等老公喺樓下五金鋪買埋公司嘢, 上車時真係攞命, 大雨到真係倒水咁! 返到公司抺腳都有排抺! 中午前又紅又黑雨, 但都唔關大家事, 出嚟都唔知做咩! 午飯後睇吓電視啦, 下午都係hea, 又做吓公事啦, 放工天晴哂啦, 揍咗笨元就回家, 等老公嚟接我地, 嫲嫲話去AEON食, 又去咗買埋個櫃! 仲爺就出停車場時學阿哥跳樓梯, 就仆咗喺到, 撞到嘴同鼻囉, 嘴唇腫咗, 行咗陣鼻都流血啦, 老公話應該係撞到軟骨啫, 好快止咗血, 到COCO食飯時已經冇事發生過咁啦! 食完笨元就上咗去打卡機, 我就同嫲嫲行超市, 老公一齊行咗陣, 再帶仲爺去睇玩具, 最後陪嫲嫲去買埋個櫃就走啦! 返到屋企9點幾10點, 快手沖涼瞓覺, 但笨元未對功課未溫詞語, 結果我作好句比佢做, 等我沖完涼出嚟就對功課, 嗰時先係重點, 今日D功課錯到九彩, 搞到11點幾, 佢都比我丙咗好耐, 原來D功課喺學校做, 得個快字又唔對又唔小心囉, 唉! 佢瞓之後我仲要摺衫等等, 好在午夜時段都有電時睇啫!

23/5/17

23/5/17   TUE   HOT

今日都係如常咁返學啦, 差不多出門口送子元落樓時仲爺就醒, 但佢又話要換校服咁, 但邊有時間啫, 佢咪又喺到扭, 我就更燥! 返上樓後先換衫咪乖囉, 揍咗佢返學就返工啦, 今朝都冇咩忙, 做吓自己嘢, 午飯後都係睇電視啦, 下午又係HEA囉, 放工要入去接仲爺, 但返到去收到老公通知又話唔洗OT喎, 叫我喺嫲嫲到等佢嚟接, 咁嫲嫲約咗人出街嘛, 所以一齊車佢地出咗荃灣先去接笨元, 快手去咗食米線就返屋企, 老公趕住去踢波! 沖完涼子元就掛住睇射雕, 仲仲就係咁攞玩具玩, 預早同佢刷好牙, 諗住子元睇完電視就K.O.佢, 點知仲仲玩極都唔夠, 又喺到扭, 喺要我出動衣架先得! 沖好涼先K.O.笨元, 跟住就摺衫睇電視啦, 老公11點多已返到, 齊齊睇完電視1點多先瞓!

22/5/17

22/5/17  MON   WARM

今日仲爺6點多就醒咗, 又要我出去開電視等等, 明明我係可以瞓到6:45架嘛, 起身後都係揍仔返學啦, 返到公司都係做吓自己嘢做吓公事咁, 又話唔洗開會啦, 仲好! 午飯後掛住睇電視冇落去過數, 放工先算啦! 下午都係做吓公事GE, tea time同事話食西餅, 咁我落去買時順手過埋數囉, 咁就可以send埋報名表去公民, 幫子元報吓學跑步嘛! 放工接咗子元就入青衣, 嫲嫲整咗雲吞叫我地返去食, 笨元梗係搶住食啦, 仲爺梗係三催四請先食到D啦, 8點幾返到屋企, 快手沖涼, 笨元又要睇電視, 我就同仲爺溫吓書先囉, K.O.咗佢就沖涼, 笨元睇完射雕先作埋篇文, 所以沖完涼仲要睇功課, 差不多11點先摺衫, 但老公好快又話要瞓覺, 最終我咪自己睇埋電視差不多1點先瞓囉!

21/5/17

21/5/17   SUN   WARM+

今日冇出街呀, 只係出去食吓嘢! 朝早仲爺當然又係晨早啦, 兩個起哂身其實都係好嘈, 我瞓到9點頂唔住都係要起身, 因為唔想出去食早餐啦, 反正都係食丁麵, 於是喺屋企煮囉, 抵食好多嘛! 食完開始喺屋企困獸鬥, 仲爺玩玩具唔執啦, 笨元溫書溫得慢啦, 11點阿媽話唔記得有冇閂電器, 最後叫咗老公過去睇, 我就繼續做家務, 換床單等等, 跟住老公就揍笨元去打鼓, 我同仲爺都係喺屋企! 等佢兩父子返嚟, 老公就睇住仲仲, 但睇睇吓最終又係自己瞓咗, 子元就繼續溫默書, 之後我餓餓地就煎咗D餃同笨元一齊食, 3點多老公終於起身, 當時我個人比較攰又屈到悶悶的, 所以態度勁衰, 最終老公話出去食D嘢, 再返嚟同子元溫書, 近近地去咗長沙灣食越南嘢, 返到去仲爺瞓晏覺, 我叫子元換好床單再抄常識, 我就落咗惠康一個人shopping吓, 個人即刻舒服番哂! 買埋嘢今晚整人參雞, 影咗D數比子元做, 整好雞湯再同佢溫常識, 咁今日都叫做溫咗D書啦! 7點幾開飯, 之後都係抺地呀沖涼呀咁啦, K.O.咗佢地就摺衫睇電視囉, 老公今晚睇波, 所以我睇埋妙手都係瞓先啦!

20/5/17

20/5/17   SAT   WARM

今日長週呢, 如常比仲爺6點幾就叫醒, 好殘忍! 起身後整嘢返工啦, 老公就揍仔, 本來話放工前放仲仲上嚟, 佢帶子元去踢波, 點知又話原來要12:45集合, 咁就叫我自己入沙田找佢地囉, 撘巴士入到去都差不多2點, 子元有子元喺球場, 我地就去咗食飯, 然後出咗市中心, 同仲爺買咗對波鞋, 一來佢今日著咗對拖鞋嚟, 係咁甩, 二來佢對波鞋都殘啦! 跟住就返去球場啦, 老公入去睇, 我就喺車陪仲爺瞓覺, 5點到先散場, 去咗荃灣食火車壽司, 行咗陣街就回家! 本來諗住今日放工就同仲爺回家, 著得勁求奇, 點知出咗一日街囉!