7/6/17

7/6/17   WED   HOT

今朝仲爺早起不特止, 仲要唔合作, 唔梳洗唔換衫但又要落樓喎, 結果又激到我爆, 落到樓我完全冇理佢, 由得佢自己跟住行算, 去到校車位仲要喊喎, 可惡! 咁教訓完佢先摟番佢囉, 上到樓食早餐咪食囉, 又要攞上梳化食, 結果倒到一身都係, 佢朝朝都有驚嚇比我架喎, 唉! 揍返咗學我就返工囉, 以為老細今日會返, 但最終都唔返, 冇咩所謂GE, 我地又free多日咁解啫! 朝早繼續做自己嘢, 午飯前走咗上去開倉, 竟然買咗3條褲同半打襪, 又敗家啦, 咁係抵嘛! 跟住都係睇電視等開工, 開完工又等收工咁囉, 食埋個tea, 買埋餸就返去揍笨元, 返去比佢自由吓我就煮飯, 因為要快手煮飯, 老公返嚟食完出去踢波, 我就要洗碗抺地睇功課執嘢等等啦, 9點多趕仲爺去瞓, 就可以同子元再溫常識, 睇吓字對吓答案咁, 10點多放佢去瞓啦, 我就要影印數學卷比佢明天做, 對我嚟講都算考完啦! 跟住都係摺吓衫睇吓電視咁啦, 老公11點幾返嚟, 齊齊睇埋妙手先瞓!

6/6/17

6/6/17   TUE   HOT

今朝仲爺7點先一齊起身, 真係難得! 搞掂出門口, 揍咗哥哥上校車先記得未食藥, 於是馬上返去叫醒老公送藥, 8點前趕得切送到去學校, 咁就直入青衣食早餐啦, 仲爺好搞笑咁話: 佢唔買蛋糕啦, 但又醒起哥哥要食, 就話要買比哥哥, 但自己就要食麵麵! 揍咗入學校我就返工啦, 冇咩特別嘢, 都係好好享受埋今日老細未返香港的日子! 午飯後都係睇吓電視啦, 下午都係做吓自己嘢啦, 放工前先有人送水嚟, 咁都冇咩嘢, 但送水嚟的, 又唔係平時的水佬, 又唔係水伯, 係小鮮肉囉, 仲要係冇著上身衫的肌肉男, 一身汗咁好似搽咗油, 大隻得嚟又有腰, 真係引死姐姐囉! 放工買埋餸去接笨元, 返到去比佢玩陣啦, 因為我又未同佢對答案, 又未找到練習再比佢做, 所以要食完飯先得閒理佢! 老公返到嚟就開飯啦, 搞掂完仲要K.O.埋仲仲都9點幾, 咁先開始同笨元對答案, 先發現佢又係錯嗰D嘢, 兩篇作文直情全軍覆沒, 叫佢再改, 唔知佢明天又會作成點啦! 另外tense又係咁錯啦, 改好又再同佢嚟多次concept鞏固, 11點多先收工, 我真係覺得係精神折磨我囉! 沖好涼摺埋衫都12點幾啦, 睇埋妙手就瞓!

5/6/17

5/6/17   MON   HOT

又要返工返學啦, 仲爺6點又起身啦, 搞掂佢地出門口返學就返工啦, 返到去都係寫吓日記開吓會, 午飯買米線食囉, 跟住睇劇啦, 上星期五瞓咗冇睇下半集呢! 下午都係做吓自己嘢, 影印吓工作紙比佢做囉, 我都好殘忍又影咁多! 放工買餸返去接咗笨元就回家啦, 抖咗陣先煮飯, 今晚好簡單飯餸咋! 食完洗碗抺地, 嗰兩隻沖完涼, 仲爺就玩玩具, 笨元就做卷囉, 我就出出入入咁幾十萬樣嘢做! 終於10點11點幾K.O.好笨元, 開始邊摺衫邊睇電視, 最後睇埋妙手就瞓, 老公呢…今日好攰一早瞓咗囉!

4/6/17

4/6/17   SUN   HOT

今日都係溫書日, 仲爺一早嘈醒子元, 同樣嘈醒我, 不過我喺房盡量唔理佢, 10點多先起身, 出去鬧一輪啦, 係要我出衣架先得, 咁煮好早餐食完就叫子元做埋D嘢先, 11點幾佢出去打鼓, 我就同仲爺溫書, 佢條友都唔知佢真唔識定假唔識, 但佢都未明咩叫組合咁, 可以點教呢! 子元學完鼓回來交換人質, 因為老公去踢波, 所以揍咗仲爺入嫲嫲到, 等我同子元溫書! 今日主力溫常識, 因為溫完再做埋練習都用咗好耐時間, 條友轉個圈嚟問佢又唔識架, 又話D字識寫但到做嗰時又唔識, 真係比佢激死! 到6點終於溫完常識, 中文明天去婆婆到再做練習算啦! 老公車埋嫲嫲出嚟, 去咗愉景新城睇玩具同食晚飯, 仲玩埋夾公仔掟彩虹, 返到屋企都10點多, 快手沖涼瞓覺啦! 我地睇埋妙手先瞓呢!

3/6/17

3/6/17   SAT   HOT

今日長周要返工呀, 但仲爺都冇放過我一早就嘈醒哂全部人, 除咗daddy啦, 嗰個好難嘈醒! 咁8點起身梳洗出門口返工啦, 返到去都係做吓自己嘢, 又搵吓英文練習比笨元做啦, 所以忙忙碌咁又一朝, 本來諗住我買KFC返去食就算, 但因為廠攞咗D紙箱出嚟比我啦, 就叫老公嚟車埋走囉, 咁就順勢去食埋KFC先回家作戰! 返到去老公K.O.仲爺, 我就同笨元溫英文, 因為唔同佢一邊做一邊溫, 根本唔知佢唔明D咩, 除咗英文再溫咗一半常識啦, 唔覺唔覺溫咗4個幾鐘, 我都覺得自己好勤力! 咁努力完梗係要去放鬆吓啦, 同埋都要去食飯架嘛, 所以就近近地去咗葵芳新都會, 試吓間韓燒, 感覺上都幾正宗吓, 不過有D貴啦, 咁早餐午餐慳咗D, 晚餐食番貴少少啦! 食完就去咗葵廣行, 睇吓嘢咁咋, 返屋企都快手沖涼瞓覺啦, 老公11點多出咗去睇波, 我就冇佢咁好氣啦, 早D瞓!

2/6/17

2/6/17   FRI   HOT*

仲爺實在太可惡, 比我瞓多一陣都唔得, 晨早起身為咩呢! 整飯盒比子元啦, 揍哂佢地返學就返工啦, 今日都係冇咩特別嘢做, 都係做吓自己嘢囉, 午飯後睇咗陣電視就落去銀行同買嘢囉, 下午都係做自己嘢啦, 放工回家執好嘢出去揍子元, 差不多出到去才醒起今日係冇得游水, 所以老公嚟接咗我地就回家煮飯, 喺遊樂場撞到letty, 一齊玩咗陣先回家, 食完飯子元過咗去letty到玩大富翁, 仲爺就瞓覺啦, 子元玩到11點多先回來, 馬上斷電瞓咗, 書係要溫GE, 明天再溫啦!

1/6/17

1/6/17  THU   HOT

今日都係咁如常一早比仲爺嘈醒啦, 佢而家真係日日都咁早, 點算! 搞掂揍佢地返學啦, 老公今日要出旺角買嘢, 所以可以車我返工, 咁又唔洗行啦! 今日返去做吓嘢之餘仲睇吓淘寶嘢, 裝修都有嘢係淘寶嘛! 午飯後都係睇吓電視啦, 琴晚瞓鬼咗都冇睇到! 下午都有做公事架, 邊得嚟成日做私事呀! 食埋tea就等放工啦, 買好餸接埋笨元, 返到樓下先收到老公通知, 嫲嫲話要出去食, 因為個櫃送咗嚟, 但係有爛, 所以要去鬧爆佢喎! 咁我買哂餸囉咪唯有放雪櫃先囉, 等佢地嚟接, 去到都係食coco, 因為仲爺可以自己食哂唔洗煩! 食完大包就同嫲嫲去處理, 笨元就去咗玩機, 我就去睇特價嘢, 有好多snoopy嘢賣呀, 但你話好必要買又唔係, 所以都係睇吓算啦! 搞掂就送佢地返青衣, 回家K.O.哂佢地就做咗陣運動, 本來的起心肝落去跑步架, 但搞掂哂佢地都10點多, 太夜啦, 所以只係做咗D肌肉訓練! 醒起要同仲爺影學生相, 要同佢影真係有難度, 又唔夠光喎, 都唔知點影, 唯有打完燈再後期加工啦! 沖完涼都係摺衫睇電視瞓覺!