12/6/17

12/6/17   MON   RAIN 1/3/8號風球 *

今朝起身仲係1號風球, 但講明10點會掛3號風球, 所以幼稚園唔洗返, 但笨元都係要返架喎, 好在未有雨, 揍埋仲爺去嫲嫲到就撘巴士返工啦, 買埋早餐返去食, 朝早都係做自己嘢先啦, 又要開會咁, 最慘係11點幾老細話要開會, 開嚟緊2018年周年晚宴的事, 開到1點都唔捨得停, 都唔知佢想點, 又要返番自己位食飯, 好在上星期已經睇定J2套劇啫! 下午繼續開, 由2點開到4點, 都係講廢話多, 期間我又要留意住暴風消息睇吓點接送等等, 真係好忙呢, 最終4點幾先走得, 雖然話5:30前先掛8號, 但都應該要預早比人走囉, 去接埋子元就同老公聯絡, 直接去咗香港地食個早飯啦, 食完可以直接回家, 其實本來想早D搞掂D嘢就開始收拾家檔, 但大家沖吓涼, 仲爺又唔肯瞓之下, 都係8點幾先開始到, 淨係執個飾櫃已經用咗10個箱, 仲有好多個櫃啦, 廁所廚房嘢啦, 點算! 執到差不多11點, 要休息吓啦, 不過都係要摺衫囉, 最終睇埋妙手就瞓啦!

11/6/17

11/6/17   SUN   HOT SUNNY

今朝子元要去到馬鞍山踢波, 所以7點又要起身啦, 搞掂出門口都係7點幾, 過到去先泊好車揍咗子元去球場, 見到阿sir交低就走得, 去咗食早餐先, 跟住泊番架車去運動場, 就睇吓子元比賽, 條友都係呆呆吓咁, 唔夠積極囉! 睇咗陣仲爺悶啦就帶佢去遊樂場囉, 但因為太熱, 先去廁所抺一次汗先, 我都醒啦濕住條毛巾喺頭遮吓, 仲爺只係出汗啫, 照樣好有力周圍玩, 我陪住都熱, 隔一陣就要入廁所洗一次面, 濕一濕條毛巾! 玩到10點幾, 仲爺竟然話要返上車, 咁就帶佢去換衫抺身買嘢飲啦, 唔知係咪有少少中暑, 佢行緊過停車場時好辛苦又話肚痛又想嘔咁, 最終喺停車場口嘔到少少水出嚟佢就舒服番啦! 上到車喺後座佢都係搞家, 於是放佢去車尾玩波, 咁大家都開心D! 等子元沖好涼過嚟都12點, 近近地去馬鞍山市中心行吓食個午飯先, 玩到2點幾又唔想咁快回家, 於是睇吓有咩地方去, 老公就話去睇吓海馬的床褥, 所以諗住去奧海城, 不過仲爺瞓咗就先返屋企攞舊牛扒出嚟解凍, 再攞D衫放洗衣機先! 去到奧海城都係周圍行吓啦, 最後去百佳買埋料就回家, 本來諗住開始執屋D嘢, 但最終只係幫咗仲爺同子元個書櫃, 佢兩隻喺地下玩到好鬼亂, 我可能又攰所以都燥底呀! 叫開飯時都發老脾, 咁當然最終都冇事啦, 照樣食飯洗碗抺地沖涼, 9點多捉佢兩個去瞓啦, 咁我都係摺埋衫, 11點幾就瞓!

 

 

 

 

 

 

 

 

 

10/6/17

10/6/17   SAT   HOT

今日雖然係放假, 但都係要早起身, 叫做可以瞓到8點囉, 因為子元要學畫班, 揍咗佢去我地就去食早餐啦, 然後就返屋企收拾吓先, 1點子元又踢波啦, 咁佢有佢踢我地又我地去做事, 想睇吓有咩course啱佢地報! 等子元放足球就食午飯, 食完直接出街啦, 都係去Mega Box咋, 想睇IKEA嘛, 呢排都係睇呢D架啦, 只係想睇吓有咩靈感, 見到想買嗰隻牌子的飾櫃做85折, 但做埋星期日, 反正可以遲攞貨, 咁不如買咗先啦, 可以慳三百幾蚊喎! 跟住再睇吓有咩衣櫃啱, 最終老公都想買個實淨D GE衣櫃, 可能都接受我所講的方法放番而家原位! 睇完傢俬咪去睇玩具, 跟住再去遊樂場玩囉, 點知喺大眾門口撞到Letty家, 嚟到九龍灣都撞到, 最終大家一齊去咗食日本嘢, 不過老公要踢波我地早走先, 車咗我地返去老公就去踢波, 我就返去K.O.兩隻嘢, 子元見FOX有得睇X-MAN最新嗰套, 所以睇到11點多先瞓呢!

 

 

 

 

 

 

 

9/6/17

9/6/17   FRI   HOT

今日最後一日考試啦, 在我立場今朝只係講幾句叫佢小心D就算, 都冇咩幫到佢! 跟住我地就返工返學啦, 朝早都係開吓會吹吓水咁啦, 午飯老細冇返嚟, 因為同咗經理去食飯嘛, 差不多2點先返到, 都算係咁啦! 下午佢又係同D高層開會, 所以冇煩到我地GE, 咁我就繼續做吓自己嘢啦, 放工直接返屋企先, 去咗惠康shopping, 又買咗好多平貨囉! 返屋企等老公嚟接我就去小童揍埋子元啦, 因為今日唔洗游水, 所以同埋嫲嫲一齊去咗AEON食晚飯, 今次唔食coco啦, 去咗酒樓食但真係有D貴囉! 食完就各有各做嘢, 退錢的退錢打機的打機, 睇玩具的睇玩具, 差不多時間就回家啦!

8/6/17

8/6/17   THU   HOT

今朝仲爺未起身, 我揍完子元落樓返上嚟, 見到個好嚇人GE畫面, 仲爺除哂褲, 攞咗支雪糕喺到食緊, 支雪糕應該係上次佢攞咗出嚟攤咗幾個鐘又放番入去嗰支, 睇佢應該食咗幾啖啫, 咁唯有即刻stop佢啦, 再收拾番個現場, 心血少D都比佢嚇死! 搞掂出門口食埋早餐先返學, 仲爺係歐洲派, 嘆早餐嗰隻, 食到8:45先返學! 返到公司都係做吓自己嘢啦, 老細12點多就返到嚟, 仲要呢D時間去食飯, 即係1點就返嚟阻頭阻勢, 果然係咁阻住人地睇電視! 下午佢係咁同D高層開會, 都好GE唔洗煩我地, 咁我就安心等做嘢, 因為比佢簽完名D嘢都有好多跟進架嘛! 放工買埋餸去接笨元啦, 返到去都係佢有佢睇電視我有我煮飯, 呢排喺daydaycook睇咗D餸又幾好煮, 所以呢兩日煮兩味餸都好食得嚟又夠食啦! 老公快手食完就去踢波, 咁我都係洗碗抺地, 等佢兩個沖好涼就先同仲爺跟功課, 9點幾捉佢上床瞓, 就同子元對數學練習, 又係錯埋哂D無謂嘢囉, 你話好差又唔係GE, 但我覺得佢可以再計好D, 希望佢明天正常mood啦! 對完答案改埋都11點先瞓, 唔知佢夠唔夠精神呢! K.O.埋佢我就邊摺衫邊睇電視啦, 老公都係11點幾返, 等佢沖完涼睇電視, 我都攰啦, 12點幾就瞓!