6/3/18

6/3/18   TUE   COOL**

今日要返工啦, 好似冇咩咁但其實都仲係咁咳, 真係好煩! 朝早仲爺一早賴尿仲煩, 要換哂佢同啲被咁, 真係驚我唔夠多嘢做! 出門口時仲要唔合作, 令人發顛! 但入到lift又有大把人安慰, 你話咩道理! 揍哂佢地返學就返工啦, 今日返去都要做嘢啦, 所以時間都過得快, 午飯後睇吓電視啦, 夠鐘又開工啦! 做吓嘢等收工, 下午真係咳得多咗, 好難搞! 放工去接笨元過九龍灣踢波, 由地鐵行過去都幾遠! 好在老公7點多都到, 仲爺瞓咗我就喺車陪佢, 唔洗食風! 跟住就去咗食大排檔, 同埋另外兩個波友, 食完返屋企K.O.埋佢地休息啦!

5/3/18

5/3/18   MON   WARM

今朝book咗睇醫生, 本來都諗住睇完醫生就返工, 但係葉醫生開咗兩日假比我, 同埋原來我又有啲燒喎, 咁不如直接請日假休息吓啦! 揍咗仲爺返學就直接過去, 好在book咗咋, 都人多呀! 我已經轉咗症做氣管炎, 聞氣食抗生素全部齊, 希望快啲好得番啦! 搞掂哂走得都10點幾11點, 直接撘車返美孚, 然後買個包食吓, 根本就未食早餐! 去買埋今晚啲餸就返屋企, 今日決定全日在家休息, 通知咗校車叫子元撘返嚟自己上樓, 大個仔啦可以唔洗理咁多, 返到去就食藥休息, 不過真係瞓唔到囉, 所以都係睇吓電視, 整番熱啲粉食! 查實都冇得完全唔理工作休息囉, 因為又要幫總監喺到找機票, 唉…香港人打工就係咁, 唔好病…直接死, 冇人可憐! 4點多子元返嚟, 蒸咗啲燒賣佢食, 叫佢做功課, 咁啱今日又咁多功課唔識喎! 6點幾開始煮飯, 簡單蒸吓嘢滾吓雞翼炒吓菜咋, 食完洗碗抺地開始睇功課, 仲爺的數學真係好差, 多同少個概念又唔明, 數目又數唔掂, 真係好灰! 中文字又唔願寫, 淨係識得玩! K.O.哂就可以沖涼啦, 子元喺功課上好合作的, 但做體能訓練就係咁比Daddy話! 11點多沖好涼睇吓電視, 等老公搞掂啲嘢就瞓覺啦!

4/3/18

4/3/18.  SUN.  WARM

今日過得好HEA，因為兩位陸生都要踢波，咁我唯有全天候喺屋企等囉！朝早老公一早帶咗笨元出去，我就8點幾都要起身照顧仲爺，梳洗完煮早餐， 食完比佢玩到11點，我都睇完sailor moon先捉佢入去做功課， 呢樣先最辛苦，要識要明要肯寫真係好花時間，足足做咗差不多兩個鐘，真係想死！ 打比老公佢話都未知幾點返， 咁咪同仲爺落樓買料煮午餐囉，點知老公又話返，咁啲料留番明天帶飯用囉，出去食麥當勞，跟住又返嚟，因為到老公去踢波，返嚟仲爺瞓覺，子元溫書，點解好似係我冇得休息嘅！摺埋衫等老公回來又出去晚飯，去咗奧海城有得睇吓玩具又有平平地3餸飯！9點幾返屋企又左執右執咁，10點幾11點先沖涼可以睇電視休息吓！

3/3/18

3/3/18.   SAT.   WARM

今日真係節目豐富，未夠8點就要起身，先去補習社放低子元比英文老師，跟住就行去學校家長日， 早知唔洗咁趕啦，去到都仲要等！都9：10先有得見，其實都冇咩講啦，平時都可以吹水，一睇到成績表我最想知考第幾，因為要找數嘛，個豬仔又真係夠成績有餘喎，我要全班5名內佢考到第4，全級20名內佢考到19， 真係冇嘢講！傾完就去食早餐然後返去接佢啦，知道自己得咗梗係開心到不得了啦！返去攞車後就入青衣到仲爺見家長，呢個就死火，同一條腸出點解差咁遠，唯有盡力幫佢補吓！接番仲爺就各有各活動，老公帶仲仲去學音樂，子元就去踢波， 我就返屋企換床單攞去洗，再去接番子元食午飯！返屋企後做陣功課又要去游水，老公返到嚟就瞓，仲爺就唔肯瞓，不過都被迫喺房一輪，6點幾我先放佢出嚟！又要去接哥哥放游水同埋食晚飯啦，近近地去咗荃灣又可以行吓啦！

2/3/18

2/3/18.  FRI.  WARM

終於到星期五啦，今朝竟然又唔知醒，好在笨元知醒叫我咋！快手搞掂出門口，都叫做趕得切！今朝比較忙，先要車咗笨元啲家檔去婆婆到，然後去食早餐再送仲仲返學，返到公司都係做吓嘢啦，冇咩特別，係唔記得帶飯，真係激死！食晏時又要落去買飯！下午都係做吓公事又做吓私事，放工去接子元放畫班，再過香港仔踢波，今晚仲爺喺嫲嫲到過夜，所以都好free，踢完去附近食晚飯， 最終都係食咗上海嘢，好食呢！返屋企前去barry到攞番個叉電，同睇吓佢隻手點啦！返上樓就沖涼休息啦！

1/3/18

1/3/18   THU   WARM

今日都係照樣返工啦, 心情已經回復, 隨緣啦施主! 朝早起身整飯比子元帶, 跟住都係食早餐返工返學啦! 今日返到去都係要做嘢, 午飯要去買飯, 諗過睇埋中醫先, 但最終都係冇睇到! 下午返去都係做吓嘢啦, 有啲細藝都好, 時間過得快啲! 放工前最終都去咗睇一次中醫, 今次都唔好就要去睇西醫囉! 接子元返屋企煮飯啦, 一日冇停其實都真係會攰架, 飯後沖完涼做功課時間, 仲爺要做番之前的功課, 加上都多嘢寫, 佢條友又疴屎又肚痛多多事實咁, 係好激氣但都要迫到佢去做好為止, 所以搞到9點幾10點先瞓! 子元的功課我今日都冇睇, 咁我都信佢OK架啦, 沖好涼摺好衫, 12點幾老公先肯瞓呢, 掛住打機!

28/2/18

28/2/18   WED   WARM

今朝請咗假睇子元話劇, 不過依然係要一早起身, 仲爺仲要未夠5點喺到叫救命, 初頭兩聲媽媽我都唔想應, 但第三句話我要疴屎你就會即刻醒哂, 其實佢都好叻仔出到嚟去, 只係急得滯條褲又有, 又上唔到廁所咁解啫, 結果我又要洗褲洗佢洗廁所, 同佢換番褲先可以再瞓, 都已經5點3, 好在今朝唔洗整飯, 一於瞓多10分鐘先起身! 揍哂佢地返學, 我同老公就去食早餐, 就喺嗰時同佢講番琴日件事, 佢意思都係騎牛搵馬囉, 咁都係架啦又冇本錢唔做! 食完早餐去醫院攞啲家檔比Barry, 唔知今日出唔出到院, 真係陰公, 踢波踢到跌斷手! 差不多時間就去學校啦, 原來11:30先開始, 睇就只係睇佢嗰幾分鐘表演, 不過條友仔又做得幾好, 啲戲好咗喎! 佢個灰太郎真係好可愛! 睇完我地都閃啦, 食埋午飯我就返工, 老公就返屋企整嘢, 得番半日好多嘢迫埋嚟做, 5:30老公嚟接我, 入青衣同嫲嫲切蛋糕, 然後再落青衣城食晚飯, 8點幾返去啦, 去攞車時喺停車場撞到Carlie喎, 約都難見! 揍哂全部人返屋企老公就去踢波, 我就要K.O.佢兩隻嘢啦, 老公都11點幾先返到嚟, 我睇完電視只係喺梳化瞓住等佢, 等佢沖完涼出嚟我就入房瞓!