3/4/18

3/4/18   TUE   HOT

又要返工啦, 佢兩個細就仲未要返學, 所以可以7點幾先起身, 揍咗子元去婆婆到我就食埋早餐返工, 今日知道老細唔會返, 又咁鬼holiday mood, 實在係令人提唔起勁工作! 於是都係做咗自己嘢先, 咁你話完全冇嘢做又唔係GE, 秘書小姐係咁架啦, 老細唔係到就梗係自由啲架啦, 覆吓電話等等! 午飯後都係睇吓電視休息吓! 下午大老闆娘返咗就比埋啲文件佢星期五用, 基本上就冇咩做啦! 放工去接子元返去快手煮飯, 老公又話快食咗飯先同子元去踢波, 但我計過7:30踢邊趕得切, 最終佢返到嚟一見子元就鬧佢唔換波衫, 咁佢都冇講過著邊套, 況且你返到嚟又唔係即刻行, 咁先換衫都未遲呀, 鬧咩啫, 成日都唔了解清楚就鬧! 等佢同子元閃咗我就煮咗飯同仲仲食先, 比佢玩吓到8點幾叫佢執嘢吸塵抺地, 沖埋涼9點多就捉佢去瞓, 咁佢都好合作, 等佢瞓咗我睇多陣小說就去沖涼, 10點幾佢地返到又要整番熱飯餸, 子元電視送飯咁當然慢, 但叫佢要執枱洗碗又矇矇吓咁比佢激死! 我今日好眼瞓呀, J2套劇都睇唔哂就瞓鬼咗!

2/4/18

2/4/18   MON   HOT**

今日節目都多, 朝早9點幾起身梳洗好就出去食早餐, 咁我約咗阿嫲11:30喺佢樓下等架嘛, 10點出去食早餐都OK, 你要同個仔練波都OK, 但真係要睇住時間囉, 11點半都仲未返到屋企, 仲要沖身再出去呢, 結果過得去接阿嫲都差不多12點, 好在阿嫲冇周圍走, 識上番樓等啫, 唉…真係令人好火囉, 因為今朝已經鬧咗一次交, 都係因為兩隻嘢唔合作囉, 尤其仲爺, 哥哥都幫佢執緊, 陸生出到嚟就鬧, 都唔了解清楚先就鬧, 我係子元都火啦, 仲要之後喺到邀功話佢地咪執哂囉, 唉…我唔識講啦! 過到大角咀食飯啦, 食就唔係好想食架啦, 但點都要應付咗佢架啦, 快啲食完快啲走人, 送咗阿嫲返屋企就直入屯門, 5條king聚會嘛! 去到都係食吓吹吓水啦, 班細GE就係咁玩囉, 期間切埋蛋糕影吓相, 6點幾去買晚餐, 食到飽到上頭頂先走, 返得去捉佢地沖哂涼10點幾瞓哂, 我地就打機睇電視囉!

1/4/18

1/4/18

第二朝差不多8點先醒，等大家都肯梳洗好都差不多9點啦，去食埋早餐就再去玩，不過今朝我都攰攰地，所以都玩唔到幾多嘢，去打乒乓球子元唔夠打又黑面， 仲爺就頂唔住室內運動場的回音覺得嘈， 最終都係去踩單車最開心囉，玩到11點咩都冇得玩啦，於是返營屋企執嘢走人啦，係要行番去攞車遠啲囉，返到屋企第一時間執嘢沖涼，叮嘢食就當午餐，4點多老公揍咗兩隻嘢去踢波，我就摺哂啲衫，等佢地返嚟沖好涼出去食晚飯，只係行出去美孚食大家樂咋，大家都攰啦，回來都係睇吓電視休息吓就算！

31/3/18

31/3/18   SAT   HOT

又係一年一度去camp的日子，去咗咁多年可能都有少少悶，不過可以比佢地平平地玩吓又係好事！朝早如常咁起身食早餐啦，跟住老公又要帶笨元出去做足球練習，我就同仲仲喺屋企執好去camp d嘢，執好老公返到嚟出去食啲嘢就出發，過到去啱啱去兩點幾聽埋talk就攞房，今次個位唔錯喺二樓又近主樓，等老公泊埋車返來就去玩， 最有體力喺呢個時間，梗係要玩啲體力勞動啲，去咗射箭，佢地就踩單車，仲爺踩得好得意架，笨元就成日都好挫敗咁好麻煩！然後我就同子元去玩繩網，老公就陪仲爺去玩遊戲室，玩夠就返去換衫出去西貢食晚飯，只係簡單地食泰國嘢，之後再食吓其他嘢咁，今次食咗個魚仔燒，再去食埋糖水就回程，返到去都冇咩玩，只係去玩左陣足球機等等，老公泊好車回來就去沖涼，再去咗電視室睇電視，睇到11點就返咗房瞓睇，又要打暈埋仲爺呢，最終點幾我先瞓！

30/3/18

30/3/18.    FRI.    WARM

今日係假期開始，瞓到8點幾開始比佢地兩隻嘢嘈醒， 不過都9點幾先起身，跟住又要捉佢地梳洗煮早餐等等，洗埋碗都11點幾12點， 又趕佢地去做功課啦，笨元自己搞掂，但就要督住仲爺做囉， 佢真係好麻煩架，不過喺我手上做到1點前算係做好， 差寫數字未做啫！做好功課老公就同子元去練波，仲爺當然跟埋去啦，我就要執一執自己先出得去，不過真係練好耐囉，差不多3點先返去沖涼再出去食嘢， 再去買嘢飲， 跟住就入藍澄灣康傑小聚會啦，原來我地做咗到，6點先開爐，所以慢慢搬埋啲嘢飲上去， 再周圍巡吓咁又等到大家嚟，細路們開始發顛玩，大人就開始準備食物，我今次完全冇理仲爺，由得佢玩啦，因為全層都包哂唔怕玩！邊吹水邊整嘢食，時間過得好快！影埋大合照就執嘢閃，唔比仲爺瞓著呀，因為佢地玩到好dirty，一定要返去沖涼先瞓！

29/3/18

29/3/18.   THU.    WARM+
返埋今日就放復活節假，真係好輕鬆，我今日都唔找工住啦，休息一天！朝早老公車子元過阿媽到再車埋我返公司佢就返工， 我買埋早餐返去食，然後都係做吓自己嘢啦，幾開心架，老細又唔返！午飯前老公打嚟話接埋子元找我食飯，咁就去咗青山道食麵，食完返公司做吓自己嘢，下午時間都過得快，等衛生署嚟睇埋嘢就可以出門口，又係過衛生署交文件，順手可以早啲過去紅磡，子元要睇林醫生嘛，都係冇咩特別啦，攞埋藥比埋錢就走得！返咗葵芳食晚飯，行咗陣去一田睇吓嘢，買咗支Oliver oil，諗住去排隊比錢時竟然見到火火，忍唔住叫佢同我影番張相，咁都比我集到郵！去嫲嫲到接埋仲仲就返屋企啦！

28/3/18

28/3/18   WED   WARM

今朝送哂佢地出門口我就煮早餐食, 跟住落去還埋個碗比Barry就返工, 今日都係開次會啫, 之後全日都好努力咁找工, 真係睇到眼都矇埋, 午飯後都係睇陣電視, 下午找工的時間過得特別快, 轉個頭放工啦, 返去接咗笨元就返屋企, 轉一轉裝就落樓, 嫲嫲話去AEON食, 佢要入貨! 泊好車時仲撞到程生, 佢而家都變咗遊牧民族, 所以泊入嚟攞單! 去COCO食完嘢老公就同兩隻細去玩卡睇玩具, 我就去同嫲嫲超市shopping, 都買咗兩大箱呀, 買完都閃啦, 已經8點幾夠鐘出車! 送咗嫲嫲返去, 仲爺又話要喺嫲嫲到過夜, 咁明天反正都係要送佢入嚟, 咁就由得佢喺到瞓囉! 我地返到去都係如常咁啦, 係子元真係一有個電視佢就呆, 唔理播緊咩佢都係呆架喎, 激死!