3/4/18

3/4/18   TUE   HOT

又要返工啦, 佢兩個細就仲未要返學, 所以可以7點幾先起身, 揍咗子元去婆婆到我就食埋早餐返工, 今日知道老細唔會返, 又咁鬼holiday mood, 實在係令人提唔起勁工作! 於是都係做咗自己嘢先, 咁你話完全冇嘢做又唔係GE, 秘書小姐係咁架啦, 老細唔係到就梗係自由啲架啦, 覆吓電話等等! 午飯後都係睇吓電視休息吓! 下午大老闆娘返咗就比埋啲文件佢星期五用, 基本上就冇咩做啦! 放工去接子元返去快手煮飯, 老公又話快食咗飯先同子元去踢波, 但我計過7:30踢邊趕得切, 最終佢返到嚟一見子元就鬧佢唔換波衫, 咁佢都冇講過著邊套, 況且你返到嚟又唔係即刻行, 咁先換衫都未遲呀, 鬧咩啫, 成日都唔了解清楚就鬧! 等佢同子元閃咗我就煮咗飯同仲仲食先, 比佢玩吓到8點幾叫佢執嘢吸塵抺地, 沖埋涼9點多就捉佢去瞓, 咁佢都好合作, 等佢瞓咗我睇多陣小說就去沖涼, 10點幾佢地返到又要整番熱飯餸, 子元電視送飯咁當然慢, 但叫佢要執枱洗碗又矇矇吓咁比佢激死! 我今日好眼瞓呀, J2套劇都睇唔哂就瞓鬼咗!