13/4/18

13/4/18.  FRI.  HOT
今朝叫老公早啲起身攞車先，因為琴晚實在太刺激，都係安全啲好！搞掂就出門口啦，去長沙灣食個早餐先接埋婷婷返學！揍完佢地就返工啦，今朝都係冇咩做， 所以做好自己嘢又要找吓工作咁，夠鐘就閃人，下午約咗4：15見工，所以都要請半日假， 返去買咗飯食，再休息吓，仲得閒吸吓塵先化妝換衫， 就喺我準備著鞋嗰吓電話響喎， 嗰時都3：30架啦， 就係叫我去見工嗰間公司打嚟，話佢上司突然有事見唔到我住喎， 頂呀......好在我住得近未出門口啫，但都係火囉，蝕咗半日假， 仲問我下星期幾時得閒見喎，呢啲公司見唔過啦！或者係天意啦，因為我問佢要見幾耐左右，原來要見2個鐘，咁見得嚟我咪揍唔切子元，所以呢啲可能都係天意！結果落番個妝換番衫就幫老公買定餸，差不多時間就出去揍子元踢波，我自己就去跑步，踢完就返屋企食飯，然後好攰好攰，喺梳化特別好瞓！