7/3/22

 7/3/22     MON     COLD

今日又要返工啦, 朝早仲爺唔肯起身有啲趕, 佢仲要朝早先嚟甩牙, 我真係救佢唔到呀, 好在最終佢自己拔咗, 叻仔! 快手出門口返工返學啦, 今日安排我本身跟個year 12, 但係佢今日冇返, 我就去咗佢嗰班就算, hea到不得了, 期間做咗一個lunch cover, 又係自閉嗰個, 佢今日又係好差, 躲咗喺枱底又用頭撞枱, 用針刺自己, 唉...所以等佢負責人回來就去通知阿頭, 又要記錄番佢啲情況, 最終好似都要Call SLT幫手! 我就12點半過番去課室吽, 提早咗1:15就放飯, 咁我就有足足1個鐘食飯時間, 實在太好啦, 咪係咁睇機囉! 最後嗰堂英文, 個同學仔係都要我教佢, 查實我都唔好得佢幾多囉, 終於捱到放學, 快閃返去接仲爺, 但佢又要玩啦, 查實咁樣我冇咩時間休息, 其實係好辛苦架! 返去準備吓又要揍德仔又要買餸等! 今日子元去試腳, 老公回來車佢過去, 咁得番我同仲爺揍德啦! 等佢走咗我仲要煮飯, 沖完涼又要處理吓公務咁, 都冇咩自己時間又半夜啦!

6/3/22

 6/3/22     SUN     COLD

今日又冇出過門口啦, 琴晚玩得夜, 今朝8點幾9點先醒, 起身等老公煮早餐, 佢話今日整回鍋肉嘛! 食完早餐佢揍子元去比賽, 我就喺屋企打掃做家務, 要換吓床單啦, 期間又要叫仲仲做功課啦, 而家算叻仔咗肯自己做, 家務做到子元佢地踢完波返嚟先差不多做完! 老公佢地又要睇波啦, 另外都要打吓電話返去比婆婆嫲嫲咁啦, 6點幾老公上咗房休息, 子元直情瞓咗添, 到8點幾開飯先叫醒佢! 咁又一日啦, 明天又要開工啦!

5/3/22

 5/3/22.    SAT.    COLD

今朝兩每都唔洗去練波，咁就慢慢食埋個早餐，我地就去咗中超同Costco入貨，回來就開始忙碌地分庄，預備今晚同張家的茶餐廳之夜！佢地4點幾過到嚟，梗係要打牌啦，然後流水席咁食，由炸大腸，雞蛋仔，奶茶到乾炒牛河，8點多入正餐，有咖哩牛腩牛筋魚蛋、蝦仁炒蛋、炸雞脾、魚香茄子！真係太過茶記啦！加埋打牌個格局，似足士多呢！食完再打到12點幾先完成四圈散場，盡興！

4/3/22

 4/3/22     FRI.    COLD

終於到星期五啦，返埋今日又放假，早咗仲仲返學我就返工，不過今日啲堂好悶，個學生唔想上之餘我都唔係好想上，總之都係如常咁樣去做，夠鐘就食飯夠鐘就送堂夠鐘就放學，放學就直接返屋企，因為佢哋今日要打籃球，不過唔使約我係勤少，就可以慢啲！湊咗佢哋上巴士，咁我就去超市買嘢，返去預備好又要接德德！今日德仔心情好好，食飯又好乖，又冇扭計，仲玩得好開心，等佢爸爸湊咗佢走，我就煮晚飯啦等佢哋打完波返嚟有得食，睇吓電視沖埋涼咁又一日啦！

3/3/22

 3/3/22     THU.    COOL

今日都係如常咁返學返工，準時返到如常開工，有咩就做啦！係等食飯等得耐啲，因為今日食1點3個一轉，好肚餓時又要喺飯堂企足九個字睇住佢哋食飯其實都幾慘，所以今日見到有個Apple crumble，忍唔住叫埋嚟食！終於等到放工，快手去公園接埋仲爹，比佢玩到4點先返去，抖抖又要出去接德仔，但佢今晚食飯唔多合作，之後更加喺度喊，老實其實我唔係咁有愛心，我係軍訓系列，唯有叫佢爸爸快啲嚟接番佢！好老實我真係為錢揍佢，而家返咗成日工咁攰有時返到嚟真係想休息吓，hea吓都好！晚飯睇埋最後幾集倚天，可以停追啦，我就繼續追我的慶餘年！

2/3/22

 2/3/22     WED.    RAIN

今朝出門口又落雨啦，快手揍咗仲爺返學就返工，今日都算輕鬆啦，一來佢地enhancement day，唔係正面上堂，二來samin冇返，我跟住另一班year10就可以，午飯又可以慢慢食足9個字！係啲學生2:45放學我冇得早放，都係要等到3:15先可以走，快腳去仲爺學校接佢，因為琴日學校打嚟有份嘢要簽！返到屋企快煮個粉食完，又要揍仲仲去音樂，再去買餸，然後接德仔，返去又要煮晚餐摺衫等等，其實日日都好充實！

1/3/22

 1/3/22     TUE.    RAIN

今朝返學先至嚟落雨，返到去又濕晒，去課室搵返我今日個學生，點知佢哋又唔喺課室，我去Hall搵佢哋又搵唔到，終於忍唔住問咗個老師佢就話應該喺體育館嗰邊，我又要行三四，好彩都過到去！跟住都係如常咁一日跟住佢啦，除咗嗰兩堂英文係有啲壓力，因為又係跟住Miss rice，搞到我午飯都唔可以偷雞食耐啲！夠鐘就準時放學啦，同仲仲佢哋差不多時間返到屋企，快手咗好多嘢，又要出去趕巴士，佢哋去打籃球！然後去超市買埋今晚需要嘅餸同其他嘢，返屋企整起休息一陣，又要出去接德仔，得我一個湊住佢佢悶我又悶，好在佢阿爸都唔係好遲先來湊佢，跟住我就準備好晚飯啲嘢，然後就摺衫啦！明明放咗個膠箱喺出邊把車位，啲車都可以照攞開我個箱又再泊，搞到我出咗去幾次要同人哋講呢個位有人，好彩佢哋都肯讓出嚟！