7/5/22

 7/5/22     SAT.    WARM+

今日行程豐富，朝早起身食完早餐就整埋野餐啲食物，跟住去睇樓，甚實全新樓真係好吸引，但佢泊唔到車又得98年lease又令人要三思，再諗諗啦！回家後準備埋執哂野餐物資就出發去Mandy家會合，要揸個幾鐘頭車先去到維多利亞公園，泊好車攞齊嘢，就去遊樂場玩，可以有野餐枱坐住咁野餐真係好！細路們就追追跑跑，玩足4個鐘，期間梗係有爭執等等架啦，10個小朋友咁多實係咁！最終6點幾先走到，晚飯去咗Keith屋企繼續邊吹水邊食，11:30叫先肯散，吹足一日水真係好滿足！

6/5/22

 6/5/22.    FRI.    WARM

終於嚟到星期五啦，雖然今日都係抽倒支唔好嘅簽，但都要做㗎啦鬼叫你窮啊！湊咗仲仲返學就趕返工喇，不過可以嘆杯咖啡先至再開工，第一堂都係炒散去咗上Science，跟住10點你去Reception等Bella啦，然後就想我最唔鍾意上嘅嗰條低能上司嘅英文堂，好在呢上半堂到我放飯時間，所以賺咗半堂，然後咪喺操場漏咗九個字囉，真係悶死我，咩都唔睇得有冇人講嘢我就嚟變咗個佛㗎喇！返返去上堂咁咪照常囉， Bella今日全日都情緒勁差，難得佢肯睇住本書唔搞事，好心個低能上司就唔好理佢啦，明知佢哋呢啲人一入咗自己個世界就咩人都唔會你！最尾嗰堂History， Bella點課室都唔肯入，要企喺度門口睇，咁我咪陪佢哋囉，好在隔籬房cover嗰個LSA冇位坐，一樣同我企咗喺門口，咁就同佢傾吓計囉，難得有個正常嘅大人可以吹吓水舒緩下，佢教我放咗工就放低呢度嘅嘢唔好再諗，行咗出個門口就全部放低，如果唔係我哋會好辛苦㗎，我都覺得佢講得好啱，有時就係不知不覺間有人教你做人嘅道理，其實都幾好！最終諗住可以順利放工，點知落咗去AL1等，諗住早少少帶佢出reception我就收工，點知佢又要企喺度等埋佢啲朋友，我心諗你啲朋友都未必想同你一齊先啦，不過佢哋就係咁固執，佢唔走我又走唔到，好在有同事仗義幫手，咁我先至可以準時放工！返到屋企，子元已經揍咗仲仲返嚟，咁就快啲執好嘢去巴士站同勤少會合啦，點知今日啲車又遲又亂，最終差不多4:15佢哋先至上到車，仲要同唔到勤少一班，不過佢哋話因為中途又俾人講咗落車，再等吓一班都係同勤少一齊！佢哋上咗巴士我就安心去買嘢返屋企整餸，期間由四點幾開始一路同肥脾傾電話，又買餸整餸到去接咗德德到煮飯到餵埋佢食飯我都傾緊電話，我都覺得自己好犀利！見佢哋差不多時間返就煮埋啲餸，食完飯洗碗沖埋涼就可以休息啦，明天又要準備去野餐嘅嘢！

5/5/22

 5/5/22     THU     WARM

今日如常咁返工返學啦, 都有啲遲架啦, 所以踩單車時都要好努力! 返到去攞齊嘢就去沖番杯咖啡飲先, 反正唔趕, 第一堂炒散, 去上吓science都好! 跟住去接Bella啦, PE堂都幾好, break後上GEO, 又係代課老師, 但其實都算充實, 不過Bella開始唔願抄嘢, 但佢都有答問題有反應, 捱到放飯, 等到差不多1點先有人嚟cover我可以去食飯, 點知返番課室後就出事啦, 見佢開始愈來愈唔對路, 開始傻笑, 手部有幻想動作, 跟住就開始打自己個頭同撞頭落枱, 佢個朋友已經幫手阻止, 但都係唔得, 唯有call SLT, 但佢開始掙扎唔比我捉住佢手, 等咗一陣終於有人嚟啦, 前前後後嚟咗4個人先成功將佢移到樓下AL1, 真係好痴線! 我估我都應該唔會有做錯咩啦, 期間借啲二問吓一個老師, 佢話其實經常發生, 我覺得佢唔止係自閉症, 佢應該有幻聽, 所以先會打自己想趕走個幻聽! by the way我只係想冇事冇幹咁收工, 終於用分散主意力加強行趕走, 佢喺AL1又變咗另一個人, 係咁睇地圖呀分享呀咁, 遇咗喺到陪佢到放學, 期間嗰條Celia又咁啱返到嚟, 唔知頭唔知路又一輪咀講嘢, 好似覺得Bella應該返課室呀, 以為佢仲係放break等等, 佢真係唔識架喎唔係扮, 最終Clare嚟講咗句再帶番條白痴Celia走, 我咪陪到Bella夠鐘就一齊攞埋單車帶佢去reception閃人囉! 事頭話有肉鬆比我地, 順路去佢車到攞埋先回程, 總之唔去公園接仲爺啦, 佢又話要玩, 咁我返屋企先, 近近地去Watrose買埋餸, 返屋企整完嘢差不多時間先去公園接咗佢再要去接德仔! 回來又係做啦, 終於等佢閃咗又差不多要煮飯, 食得嚟9點幾10點啦!

4/5/22

 4/5/22.    WED.    COOL

今朝掛住趕，唔記得飲咖啡，返到學校見仲有時間，就諗方法飲杯咖啡先，又比我發現到邊到可以加熱水，好事！今日又係跟Bella，大致都可以，係science堂下半堂躲咗喺枱底囉，午飯日日都係食沙律，我自己都悶！另外今日嚟咗個日本人，但佢外表真係好唔似，可能因為英文太差，好似完全唔明講咩咁！終於捱到放學即閃，返屋企抖抖先去公園，攞埋支結他接仲仲去學嘢，點知落足全程雨，我仲要來來回回咁，濕哂！返得去都5:30，煮飯比德食，等佢閃咗就休息啦！

3/5/22

 3/5/22     TUE     COOL

今日又要返工啦, 朝早有點趕, 因為處理啲買樓問題, 一早就打嚟chur我, 又話要打比我solicitor講, 搞到過咗8點半先出到門口! 返到學校都係如常咁工作啦, 又係跟Bella, 第一堂去咗year 9, 攞咗份Bio可以比子元做吓! 10點就去番接Bella, 跟住都正常上到堂, 反而係我為咗freehold leasehold係咁電話呀message呀等等, 好在我都掌握到點樣避開人眼去用電話, 唔係陣間又比人話就煩! 另外就係有炮哥幫手打咗去solicitor問清楚, 已經幫輕咗我好多, 連email都幫我打好, 我跟打就得! 午飯都食得好趕, 因為中途係咁whatsapps, 好在可以去睇住Bella時再食! 一直順利至History, 以為都可以冇事, Bella因為老師唔係教書而係睇卡通又發脾氣, 我就要陪佢去Japaneses garden坐到放學, 好在我都醒, 早5分鐘帶佢去reception有人睇住佢我就可以走! 去公園接埋仲仲回家, 搞掂埋個email, 出去買餸再接埋德仔, 仲仲又要去踢波, 今日係三個男人都去踢, 結果回來沖得涼差不多10點先開到飯, 真係唔掂!  

2/5/22

 2/5/22     MON     COOL

話咁快又最後一日假期啦, 今朝瞓到9點幾先起身, 食得早餐嚟都11點, 老公約咗炮哥同Keith佢地去Westway買波boot, 咁我地咪又一齊去囉, 只係我地去睇玩具咁解, 等佢地買完我地就去Fan fair, free entrance嘛, 去睇吓都好, 見都唔係太貴可以玩吓, 機動遊戲只係玩咗碰碰車同轉轉機, 反而玩攤位遊戲仲用得多錢, 因為子元掉中咗有公仔攞, 仲爺又想要但我地真係再掉唔中啦, 所以佢走嗰時又唔開心, 真係好煩! 去買埋午餐食就回家, 追埋套彊屍校園, 又開套永恒族睇, 因為晚餐都係食雲吞, 都包好哂, 所以可以hea吓! 

1/5/22

 1/5/22     SUN.    COOL

今朝瞓醒都冇急住起身，可以睇吓機先，梳洗後就等老公煮早餐，我就打吓機先！食完早餐摺埋啲衫，開咗同新劇睇，又係喪屍片，不過都幾好睇！結果掛住睇就咩都冇做，兩點幾同老公一齊出去買餸同午餐，返嚟點蝕先繼續睇，中途又預備下晚飯咁啦，今晚簡單啲食羊腩煲就算！食完睇返10點幾十一點先沖涼，假期就係去煲劇之中渡過！