26/7/14

26/7/14   SAT   HOT

今日好充實呢, 朝早我揍笨元去畫班, 老公揍柏仲入嫲嫲到, 然後去揍笨放畫班再返去砌櫃, 我放工返到去佢真係只係剛砌好, 食埋嘢要開工啦, 都唔執得幾多, 但盡量做啦, 叫做執咗七成架啦, 因為買咗飛4點幾睇戲, 所以都唔執得咁耐, 清潔埋就出門口, 去到買完嘢食剛剛好開場, 套飛機總動員好好睇呀, 睇完又要去接番柏仲, 嫲嫲有街去! 接番佢後咪食晚飯囉, 試咗丼丼屋, 柏仲又係食咗嗰少少就唔食, 不過我地都唔太餓, 都有少少浪費! 食完行咗陣就返屋企啦, 返到去都仲要執嘢, 柏仲又冇地方比佢活動喎, 最終套咗對襪喺學行車囉, 快手執埋D嘢, 都清咗好多垃圾, 沖好哂涼, 可以抖一抖, 餵埋餐奶瞓得!

<好好睇的飛機總動員!>

 <順手影埋D變型金剛!>

 <等地鐵中...>

 <子元成日都好肉緊!>

<柏仲係食SPOON多過食飯!>

25/7/14

25/7/14   FRI   HOT

今朝柏仲如常7點前就嘈架啦, 有咩辦法令佢瞓晏D呢, 之前要入嫲嫲到又7點幾都未醒! 搞掂哂D嘢阿媽過到嚟啦, 咁我地都出門口了, 同老公一齊食咗個早餐先返工, 上午下午都係做吓公事又做吓自己嘢啦, 午飯時都食得幾飽, 又再睇番主君啦! 下午都過得好快, 食埋個tea又差不多放工, 返去時就過萬寧惠康shopping吓啦, 真係shop咗好多嘢呀, 買咗洗面奶, 3包裝濕紙巾, 一箱尿片, 兩條紙巾, 都係因為需要同平咗先買, 不過搬番去先係問題, 行就一定唔得, 撘巴士又唔抵, 咁撘小巴係最抵架啦, 好在搬上搬落車都可以! 返到去settle好之後就差不多食飯, 老公煮咗上半場, 跟住我煮埋下半場囉, 差不多食完時個梳妝台就送嚟, 本來叫老公留喺屋企我揍子元去合唱團就係等個梳妝台嚟, 之後諗番都蠢咗, 張枱嚟咗就應該叫老公揍笨元出去, 我喺屋企整嘢, 因為個幾兩個鐘後我返到去, 佢都仲未洗碗, 又話啱啱K.O.咗柏仲, 但冇餵奶又冇沖涼, 真係唔知D男人諗咩, 係咪真係可以咁冇程序! 結果都係冇沖涼囉, 都瞓咗囉, 咪夜D捉佢起身飲番奶就算囉! 沖好涼笨元就同daddy一齊砌櫃啦, 我要睇主君呀, 冇佢地咁好氣, 睇完就K.O.笨元啦, 佢都攰啦, 跟住就餵埋柏仲, 老公仲未砌好不過都夜啦唔好砌住, 反正明天放柏仲入青衣, 慢慢再執啦!

24/7/14

24/7/14   THU   HOT

今日都係奶奶過嚟啦, 柏仲一早醒咗, 已經盡量唔比佢上嚟大床, 去到7點幾先比佢玩一陣我就起身梳洗, 餵埋奶不久嫲嫲就過到嚟囉, 我都返工啦, 買咗粥返去食, 但下次真係唔好再買, 真係好唔抵食! 上午都係做自己嘢囉, hea 住咁過啦, 午飯後都係無聊架啦, 咁悶吓悶吓時間又過啦, 食埋個tea準備放工, 因為今晚笨元游水嘛, 我又一齊游! 返去執吓嘢準備吓, 差不多7點先出門口, 去到已經唔喺大堂, 馬上同笨元換衫入去啦, 睇到佢落水我就自己去游啦, 今日都游到6個半來回, 算係咁, 夠鐘就去接番佢, 再去訓練池玩咗陣, 試吓SIR教的練習, 但笨元梗係比我試咗一次就唔肯啦, 怕到不得之了! 回到家沖好涼整番熱D餸食, 就K.O.笨元餵埋柏仲, 等佢都瞓埋就自由啦, 睇吓電視search吓嘢咁!       12點左右就瞓啦!

23/7/14

23/7/14   WED  HOT

今日都係嫲嫲過嚟揍兩隻啦, 柏仲又係7點就, 都唔諗吓而家唔洗咁早起身啦嘛, 喺床玩咗半個鐘唔耐煩啦, 都係要上嚟大床玩, 咁未夠8點我都要起身, 梳洗完餵埋奶, 跟住就等奶奶負責, 我同老公出門口返工啦! 買埋早餐返去食, 朝早係咁做自己嘢, 因為知道下午要開會冇得自由, 午飯時都係睇吓電視啦, 但未夠2點開始有人嚟interview, 唔阻住總監佢地咪冇得再睇電視囉, 之後又要招呼見工D人, sales又返咗嚟, 做自己嘢都唔方便! 本來4點多就開得會, 點知見5點條友早咁多嚟, 都要見埋佢先, 搞到差不多5點先開到會, 真係冇咩講到, 浪費哂D時間! 放工買埋奶粉返去, 唔係柏仲又冇得食架啦, 跟住就撘巴士返去囉, 太焗啦行唔到呀! 返到去先搬番好送錯咗嚟GE櫃埋一邊先去沖涼, 跟住就食飯啦, 食完同柏仲玩陣, 老公子元去踢波, 我咪執吓個梳妝櫃, 起碼知道入面有D咩, 有咩可以掉, 咁到時一拆個櫃就可以換番D嘢入去! 8點幾柏仲係到嘈, 拖到9點先餵佢食奶, 其實佢係扭瞓多過食, 但食住嚟瞓快好多! 佢瞓咗我就邊睇電視邊執嘢囉, 要掉真係大把嘢掉! 佢地踢完波返嚟子元沖個涼就瞓, 我執好嘢剛好睇主君, 今集冇咁驚囉! 之後睇埋big boys club都瞓啦, 柏仲係3點幾嘈過囉, 老公極速K.O.番佢, 梗係啦, 之前同子元玩到顛!

22/7/14

22/7/14   TUE   HOT

今日都係嫲嫲過嚟啦, 8點左右佢就過到嚟, 我都係啱啱起身, 不過就一早比柏仲嘈醒咗架啦, 條友仔都唔醒水, 醒咗就喺床自己玩啦, 叫咩鬼啫! 搞掂就出門口返工啦, 今日可以準時D啦, 買埋早餐返到去, 都係做吓自己嘢, 冇咩特別啦! 午飯後睇主君的太陽, 係恐怖但又好睇囉, 下午都係吹吓水做吓嘢上吓網咁囉, 放工前突然落大雨又行雷, 好在放工時已冇事, 撘地鐵返去諗住問吓泳池嗰邊有冇得游, 咁啱因為西鐵有事, 喺美孚出閘唔洗錢呢! 返到去柏仲剛醒, 陪佢玩咗陣就要執嘢去游水啦, 都唔早出門口架啦, 但去到都係要等, 下次都係唔洗咁早! 今次跟咗佢去做埋熱身, 見佢地落水我自己先去游, 今日游咗5個來回, 都真係攰! 去接番笨元後同佢喺室內池玩咗半個池就走啦, 叫佢潛吓落水比我睇又唔肯! 回家後馬上沖涼食嘢啦, 都係食咗D菜咋, 笨元就食咗塊豬扒同菜! 餵埋柏仲食奶本來諗住組裝個梳妝台, 點知開咗先發現佢送錯貨, 真係好掃興, 但都冇法, 唯有再聯絡番佢送過嚟! 咁各算K.O. 一隻仔啦, 之後就可以睇吓電視, 12點左右就瞓啦!

21/7/14

21/7/14   MON   HOT*

今日真係勁唔想返工, 琴日真係超攰, 柏仲未夠7點就醒, 其實醒咗可以自己玩啫, 點解係都要人陪呢, 搞到我明明可以瞓晏D都唔得, 嫲嫲8點幾過到嚟我先剛餵完奶, 交比佢我就快手換衫梳頭出門口了, 買埋早餐返到去都9點幾, 今日都係做吓自己嘢先, 因為只係整理D相同寫番3日日記已經用咗一朝都未做完! 午飯買咗茄米粉, 好正喎! 下午都要做吓數啦, 埋埋個尾嘛! 放工返到去就沖好涼先, 然後食飯時餵少少節瓜比柏仲試, 食完飯老公同子元去踢波, 去放吓佢電, 我就喺屋企揍住柏仲, 8點左右就開始扭, 於是餵咗藥先, 再哄佢瞓啦, 哄咗佢瞓我都瞓埋, 佢地返嚟我係知但我真係完全冇理過, 可能前兩日真係太攰了! 瞓到12點老公叫醒我起身餵奶, 由於瞓咗3個鐘, 餵完奶都唔係好眼瞓! 所以點幾兩點先瞓得番呢!