23/2/15

23/2/15   MON   WARM

又要開工啦, 開工大吉啦! 7點幾起身就準備出門口啦, 因為反正都要食早餐, 老公就齊齊過嚟長沙灣食, 順手上嚟拜個年囉, 但有D趕所以要撘的士呢! 開吓電腦做吓嘢咁, 10點多總監又話開個快會先落鋪頭啦, 落到去都係hea吓影吓相咁啫, 等夠鐘就去富豪午飯啦, 吹吓水咁就食完, 點幾就散水, 約咗老公喺奧海城, 行到過中港城嗰邊撘車, 過到去佢地剛好食完飯, 咪去反斗城玩囉, 都睇咗大半個鐘玩具呢! 嫲嫲話佢4點後已可接收兩隻豬仔等我地去睇戲, 所以都返去, 但子元見D鋪頭有採青睇又要睇, 睇咗三四間鋪頭先肯走呢, 柏仲就嚇到要抱住! 入到青衣放低佢地我地就去青衣城行吓街咁, 又買定飛同笨元睇企鵝, 但要星期三先有位, 好誇! 行到6點多就入場, 賭場風雲呢D賀歲片真係好睇, 唔洗用腦咁又笑一餐! 睇完去食米線, 9點多先返去到接佢地, 仲要撘巴士走, 跟住Barry話上嚟拜年, 所以搞到10點幾先有得沖涼休息, 12點幾先瞓呢!

22/2/15

22/2/15   SUN   RAIN

今日又變回普通的星期日啦, 朝早瞓到柏仲嘈先起身啦, 子元要學珠心算, 咁hea到咁上吓就出去食早餐, 然後老公帶子元學嘢我就揍柏仲返屋企, 琴日的頭痛延到今日, 好在柏仲等緊車時已瞓咗, 咁我都瞓咗15分鐘, 舒服番好多啦, 返到屋企柏仲都瞓, 我咪可以攤抖吓囉! 等老公佢地回來柏仲又醒呢, 都係玩到hea過, 3點多整番熱琴晚食淨D嘢齊齊食就算, 4點多老公同柏仲齊齊瞓咗, 我都喺廳瞓吓, 子元就自己玩, 到6點幾醒了, 見出面落緊雨, 都唔方便出去食, 所以我就自己出去買飯回來食囉! 回來全部醒哂齊齊邊睇Transformer DVD邊食飯, 比笨元睇哂一套先瞓, 老公就襯子元瞓咗繼續睇下一套, 所以我地2點多先瞓呢!

21/2/15

21/2/15   SAT   COOL


今日約咗5條KING團拜, 子元仲一早自己起咗身, 我就瞓到八點幾, 柏仲都嘈咗一輪架啦, 都要起身招呼佢, 起身梳洗餵奶後都冇咩嘢做, 等ming 搞掂我地先出門口會合, 所以襯機叫笨元做埋少少功課, 然後再去買subway做早餐, 食完差不多出門口了! 入得去都差不多12點了, 都是不停的食呀食, 佢地細路就不停玩呀玩, 柏仲途中睡了, 所以去到瞓醒先玩! 唔知係咪食滯咗, 個人愈來愈唔舒服, 好攰咁! 好在老公帶咗3隻大GE去踢波, 叫做靜少少啦, 不過要睇咗柏仲都攰架! 但踢踢吓軒軒跌親損咗, 所以要打道回府了! 沖好涼就可以繼續搗亂, 柏仲又唔肯瞓, 但個人又炆, 真係比佢激死! 之後大人吹吓水, 叫嘢食等等, 食完就準備走啦, 最終都係叫的士, 半個鐘唔洗就返到, 但柏仲當然瞓咗啦, 不過都要叫醒佢起身沖涼食奶先瞓得, 最終我都搞到10點幾先沖涼, 食D止痛藥先瞓!

20/2/15

20/2/15   FRI   COLD


初二又係要入阿婆到啦, 不過朝早有D唔同, 起身後執吓嘢, 同笨元對吓功課, 本來諗住屋企煮早餐就算, 不過老公話出去食大家樂, 食完再去遊樂場玩到中午就入沙田, 齊齊瞓餐飽先, 入到都啱啱開飯, 柏仲都好叻仔食到好多, 食完咪玩吓坐吓, 見柏仲扭奶就比佢食咗先, 3點幾就撘巴士返去啦, 上車又齊齊瞓, 返去屋企後hea吓, 煎D糕食又出去, 嫲嫲話出去食喎, 咁就去咗愉景新城食outback, 最抵係撘地鋪, 今日半價之餘仲用埋減兩蚊, 所以來回只用了三蚊, 幾勁! 食完去咗toyrus, 子元要玩嗰個咩卡, 柏仲就去反斗城睇吓嘢! 回家後沖涼瞓覺!

19/2/15

19/2/15   THU   COLD
大年初一, 恭喜發財! 琴晚比柏仲玩殘, 4點左右係到喊, 抱住就好D, 我地兩個輪住噯都唔掂, 搞到5點幾叫做好D, 終於可以瞓吓, 所以9點多先起身, 食埋早餐執埋嘢都11點幾, 快手出門口去阿媽到拜年啦, 影陣相咁就過阿嫲到食飯啦, 柏仲都算合作, 咁點幾就閃了, 因柏仲開始扭瞓, 果然未上車已瞓咗, 好在入到嫲嫲到都仲肯瞓, hea咗陣去買嘢食返去食, 仲仲醒咗後就要陪吓佢啦, 但到我地頂唔住要瞓, 瞓醒又餵佢埋飯咁, 之後到我地食, 今晚9點都走啦, 早D返去怕仲仲又扭, 結果喺巴士上都係扭, 回家後沖好涼諗起去同龍校長拜年, 傾咗陣先返屋企瞓! 我就可以沖涼休息啦!

18/2/15

18/2/15   WED   COOL
今日係年三十晚, 但都要返工, 真係幾無癮, 可能根本冇人記得我地仲返緊工, 又唔可以打去問我地有冇得早放, 真係好老土, 以前都有得早放架, 而家愈來愈刻薄, 有時真係好唔like, 但六合彩又未中, 冇法啦鬼叫你窮呀頂硬上! 朝早搞掂柏仲就出門口買早餐啦, 諗住買大家樂但竟然已經閂咗門, 可惡呀! 求奇買咗美心算! 上午都係做自己嘢囉, 繼續找新加坡資料, 又問吓maymay咁啦, 午飯要去759買糖放存盒, 跟住諗住買飯啦, 點知咩都收哂, 美心又得番D奇怪嘢, 又唔想咁貴食意粉, 最終食素嗰間買仲要得D餸尾, 好慘! 下午又係做自己嘢啦, 冇得早放咩, 開公數食個大tea, 話知佢! 所以食咗starbucks! 5:30準時放工走人啦, 直接返青衣食團年飯, 食完走都9點多, 回程時柏仲瞓咗, 仲要捉醒佢起身沖涼先瞓得! 我地搞掂哂都1點幾先瞓得呢!

17/2/15

17/2/15   TUE   WARM

今日要揍哂兩隻豬入青衣先返工, 完全冇較鬧鐘諗住等柏仲叫醒我, 佢都差不多8點先嘈, 所以都遲咗先入到去, 早餐都冇食就飛番出嚟, 返公司先買早餐食啦! 今朝做完自己嘢後mark咗商會的出席人數先, 咁過完年返來就可以再call人! 午飯本來想去食米線, 點知勁多人, 最終食咗飯團嗰間, 叫個大餐都幾貴呀! 下午開始又係睇新加坡嘢啦, 人地話plan完自由行你會對嗰個地方了解多咗, 都係GE, 由交通到食都要諗清楚, 雖然只係去食遊客嘢, 唔係地道嘢, 但都叫咗了解咗嘛! 放工返去青梅等埋老公回來齊齊落青衣城晚飯, 又去影吓喜羊羊咁啦, 坐埋車仔就返屋企啦, 佢地三個沖好涼喺床玩我就抺好地先, 搞掂隻細的我先可以沖涼, 笨元就放佢玩吓先, 等我沖好涼先哄佢瞓, 到11點多我先自由啦! Hea吓睇吓電視12點幾先瞓呢!

<柏仲被玩變女仔!>

 <好靚呀!>

 <子元坐得穩可影遠D!>

<有嘢賣呀, 柏仲路人甲咁!>

 <仲有雞蛋仔!>

<呆仲!>

 <子元話佢去買飛喎!>

 <兩兄弟不錯的合照!>