24/4/15

24/4/15   FRI   WARM

今朝都係如常咁揍仔返學啦, 琴晚玩得太夜啦, 但柏仲都係咁早起身, 可惡! 子元都唔算要拖佢落床, OK架啦! 搞掂就返上樓啦, 整好嘢就出門去, 老公揍仲仲入青衣, 我就返工啦! 朝早做好自己嘢後就要寫嗰份計劃書, 真係幾攞命, 可能太耐冇用腦寫咁多嘢! 午飯後休息吓咁, 開工後又再寫過, 老細返過嚟, 但嗰時仲未做得起, 都差不多做到放工先做完呀! 放工即閃, 先去小童攞番子元個書包返屋企, 再攞游水嘢出嚟接佢地, 今日子慧媽都嚟埋, 咁換好衫就一齊揍佢地去泳池, 本來我諗住呢個鐘睇吓劇, 但子慧媽一齊咪上看台吹吓水囉, 由學校到細個, 咩都吹一餐, 到夠鐘就去番出入口接佢地! 陸生已經喺晚飯地方等我地, 叫咗嘢食齊人食得, 飽食一頓後就切蛋糕, 不過大家都飽飽地, 但食完個蛋糕都堅持要去松記食甜品, 真係好搞笑! 熱熱鬧鬧咁其實好開心, 玩到夠皮就要回家啦, 已經10點幾, 大家都攰, 柏仲都開始冇電, 仲要有D咳, 梗係之前嗰D未清又嚟過! 沖好涼食咗藥水比埋支奶佢即時冇電, 咁叫老公K.O.隻大我就去沖涼了!

<有同學仔陪你慶生日呢!>

 <有遊戲機就有囡埋身!>

23/4/15

23/4/15   THU   WARM

子元7歲啦, 真係話咁快! 不過上咗小學唔可以請假去玩架啦, 最多夜晚去食佢想食GE壽司囉! 朝早都係一揍二咁送校車啦, 柏仲變番夏令, 晨早流流就一齊起身, 第時返學都係咁就好! 返上樓就要摺衫做家務, 然後齊齊出門口, 不過今日老公直接揍柏仲入嫲嫲到, 所以唔一齊食早餐! 咁我返到公司附近先買啦, 朝早返到去都係hea吓, 下午先開始嚟料, 因為老細想做嗰個咩鬼邊境購物城, 類似要寫份計劃書, 仲要中英對照, 真係攞我命, 但都要死出嚟架, 佢又係咁喺呢邊講嘢, 煩到你耳都聾呀! 最終都係寫得一半左右啦, 明天繼續! 放工過去曼克頓山的元氣攞位叫嘢食先, 等長輩們嚟有得食, 不過眼闊肚窄囉, 叫得太多! 慢慢食到7點幾先返去屋企切蛋糕, 柏仲梗係做show咁啦, 由食嘢到返屋企路上都係咁賣萌! 佢地果然好鍾意食栗子蛋糕, 1磅都食得哂! 再睇吓電視阿媽阿嫲同奶奶都回家啦! 咁柏仲就洗白白飲奶瞓覺, 子元仲要執埋D手尾等等, 10點多先瞓, 我都勁攰, 睇睇吓最佳男主角都瞓到12點先比老公叫醒入番房瞓!

<子元7歲生日快樂!>

 <來個全家福>

 <仲有長輩們>

 <擺post切蛋糕!>

 <簡單的小蛋糕!>

 <搶鏡柏仲!>

22/4/15

22/4/15   WED   WARM**

柏仲照樣鬧鐘未響就爬上嚟, 佢瞓定定都好, 衰在唔係要周圍行! 咁我鬧鐘響就起身啦, 揍哂兩個落樓, 送咗子元校車又返上去啦, 柏仲飲完奶又冇咩好做, 咪hea吓囉! 等老公起身就去食早餐, 分手時柏仲好積極bye我喎, 冇留戀咁我又唔like! 返咗公司都係做吓自己嘢, 又要做吓公事咁啦! 午飯後不久老細就返, 真係勁無癮! 下午都忙忙地, 又要開會咁! 好在佢地都唔算遲走, 自己又有D嘢做吓! 放工去接笨元啦, 差少少就做哂功課啦, 都返屋企先做啦! 返到去都差不多有飯食, 所以快手同兩個囝沖埋涼就食飯, 之後都係洗碗抺地, 子元就做埋D功課囉! 訂嗰塊白板送到嚟, 終於完成哂佢全個房的設計, 佢亦好開心咁貼番哂D磁石上去! 柏仲8點幾已經頂唔住眼瞓, 伏咗喺老公到迷哂, 唯有開奶比佢瞓囉, 咁之後就可以睇笨元功課, 比佢玩吓, 10點前捉佢入房瞓囉! 由於唔係好攰, 就上咗BK睇吓我出嗰堆新加坡之旅分享有冇人回覆囉! 12點幾先瞓!

21/4/15

21/4/15   TUE   WARM

今朝柏仲明明冇咁早醒, 但不一會又聽到佢走出嚟, 應該起身嗰個就賴床! 送咗佢落樓又返上去做家務等等, 然後一齊落去食早餐, 我返工時柏仲識同我byebye, 真係好可愛! 今日都係hea吓咁啦, 朝早做吓自己嘢, 又上BK閒吓! 午飯後都係冇咩做, 老細返咗嚟一陣就走, 本來以為安樂, 但4點幾先打嚟叫你做嘢, 好在明天才比佢, 但有時佢都唔明一句說話要動員幾多人先做得到呢! 放工去接子元, 阿媽話只係幫佢溫咗默書, 返到屋企好多功課要跟! 好在老公煮咗飯, 咁D細沖好涼就食咗飯先, 然後叫子元去做功課, 我就洗碗抺地, 都邊做邊跟佢D嘢架啦, 功課係多架, 所以都要迫吓佢做先掂, 最慘係做phonics, 簡直全家總動員去找字, 找找吓我都頂唔住, 去咗沖涼先, 柏仲9點已經比我地K.O.咗, 沖完涼佢兩父子都係冇進展, 真係頂佢地唔順, 最後都係我狂找啦, 9點幾叫做做得起啦, 但冇再同佢溫默書, 希望佢OK啦! 今晚都眼瞓呀, 11點多都瞓啦!

20/4/15

20/4/15   MON   WARM

今日都係如常咁起身揍子元返學啦, 柏仲又齊齊起身揍哥哥返學, 不過今日遲咗冇得上車玩, 返上樓我掛住摺衫, 結果開咗奶比佢瞓喺地下飲, 等老公起埋身搞掂嘢就出去食早餐, 今日老公又做揍仔公, 嫲嫲唔出嚟! 我就返工啦, 今日都好hea吓, 冇咩嘢做, 話咁快就食晏, 去咗買飯食, 之後都係打吓機吹吓水咁啦, 下午老細都唔返, 又喺網上閒遊! 遊到放工就去接笨元, 今日冇咩功課, 快手返去沖好涼食飯, 陸生煮埋飯, 梗係啦, 未搵到錢梗係要做吓家務啦! 食完飯老公同笨元做勞作, 我就洗碗抺地, 柏仲係咁跟住我個地拖周圍走, 好好笑! 做好嘢未夠9點, 柏仲已經想瞓, 陪佢玩到9點多就換片食奶瞓覺, 完全自己K.O.自己! 咁笨元執好埋嘢, 我睇埋功課回條, 的埋子元上床就可以休息了!